ॐ https://www.BhajanUSA.com Hindi bhajans · English transliteration
← All bhajans
Granth

३. अरण्यकाण्ड · 3. Aranya Kand

Tulsidas's Ramcharitmanas — Book 3, the full text of the forest exile, Surpanakha, Sita's abduction, and Rama's grief · Devanagari with English transliteration
हिन्दी
English
1 of 355
श्लोक—मूलं धर्मतरोर्विवेकजलधेः पूर्णेन्दुमानन्ददं वैराग्याम्बुजभास्करं ह्यघघनध्वान्तापहं तापहम्। मोहाम्भोधरपूगपाटनविधौ स्वःसम्भवं शङ्करं वन्दे ब्रह्मकुलं कलङ्कशमनं श्रीरामभूपप्रियम् ॥१॥
Shloka—Mūlaṃ dharmataror vivekajaladheḥ pūrṇendumānandadaṃ vairāgyāmbujabhāskaraṃ hyaghaghanadhvāntāpahaṃ tāpaham, mohāmbhodharapūgapāṭanavidhau svaḥsambhavaṃ śaṅkaraṃ vande brahmakulaṃ kalaṅkaśamanaṃ śrīrāmabhūpapriyam. (1)
2 of 355
सान्द्रानन्दपयोदसौभगतनुं पीताम्बरं सुन्दरं पाणौ बाणशरासनं कटिलसत्तूणीरभारं वरम्। राजीवायतलोचनं धृतजटाजूटेन संशोभितं सीतालक्ष्मणसंयुतं पथिगतं रामाभिरामं भजे ॥२॥
Sāndrānandapayodasaubhagatanuṃ pītāmbaraṃ sundaraṃ pāṇau bāṇaśarāsanaṃ kaṭilasattūṇīrabhāraṃ varam, rājīvāyatalocanaṃ dhṛtajaṭājūṭena saṃśobhitaṃ Sītālakṣmaṇasaṃyutaṃ pathigataṃ Rāmābhirāmaṃ bhaje. (2)
3 of 355
सो०—उमा राम गुन गूढ़ पंडित मुनि पावहिं बिरति। पावहिं मोह बिमूढ़ जे हरि बिमुख न धर्म रति॥
So—Umā Rāma guna gūṛha paṃḍita muni pāvahiṃ birati, pāvahiṃ moha bimūṛha je hari bimukha na dharma rati.
4 of 355
पुर नर भरत प्रीति मैं गाई। मति अनुरूप अनूप सुहाई॥ अब प्रभु चरित सुनहु अति पावन। करत जे बन सुर नर मुनि भावन ॥१॥
Pura nara Bharata prīti maiṃ gāī, mati anurūpa anūpa suhāī. Aba prabhu carita sunahu ati pāvana, karata je bana sura nara muni bhāvana. (1)
5 of 355
एक बार चुनि कुसुम सुहाए। निज कर भूषन राम बनाए॥ सीतहि पहिराए प्रभु सादर। बैठे फटिक सिला पर सुंदर ॥२॥
Eka bāra cuni kusuma suhāe, nija kara bhūṣana Rāma banāe. Sītahi pahirāe prabhu sādara, baiṭhe phaṭika silā para suṃdara. (2)
6 of 355
सुरपति सुत धरि बायस बेषा। सठ चाहत रघुपति बल देखा॥ जिमि पिपीलिका सागर थाहा। महा मंदमति पावन चाहा ॥३॥
Surapati suta dhari bāyasa beṣā, saṭha cāhata Raghupati bala dekhā. Jimi pipīlikā sāgara thāhā, mahā maṃdamati pāvana cāhā. (3)
7 of 355
सीता चरन चोंच हति भागा। मूढ़ मंदमति कारन कागा॥ चला रुधिर रघुनायक जाना। सींक धनुष सायक संधाना ॥४॥
Sītā carana coṃca hati bhāgā, mūṛha maṃdamati kārana kāgā. Calā rudhira Raghunāyaka jānā, sīṃka dhanuṣa sāyaka saṃdhānā. (4)
8 of 355
दो०—अति कृपाल रघुनायक सदा दीन पर नेह। ता सन आइ कीन्ह छलु मूरख अवगुन गेह ॥१॥
Do—Ati kṛpāla Raghunāyaka sadā dīna para neha, tā sana āi kīnha chalu mūrakha avaguna geha. (1)
9 of 355
प्रेरित मंत्र ब्रह्मसर धावा। चला भाजि बायस भय पावा॥ धरि निज रूप गयउ पितु पाहीं। राम बिमुख राखा तेहि नाहीं ॥१॥
Prerita maṃtra brahmasara dhāvā, calā bhāji bāyasa bhaya pāvā. Dhari nija rūpa gayau pitu pāhīṃ, Rāma bimukha rākhā tehi nāhīṃ. (1)
10 of 355
भा निरास उपजी मन त्रासा। जथा चक्र भय रिषि दुर्बासा॥ ब्रह्मधाम सिवपुर सब लोका। फिरा श्रमित ब्याकुल भय सोका ॥२॥
Bhā nirāsa upajī mana trāsā, jathā cakra bhaya riṣi Durbāsā. Brahmadhāma sivapura saba lokā, phirā śramita byākula bhaya sokā. (2)
11 of 355
काहूँ बैठन कहा न ओही। राखि को सकइ राम कर द्रोही॥ मातु मृत्यु पितु समन समाना। सुधा होइ बिष सुनु हरिजाना ॥३॥
Kāhūṃ baiṭhana kahā na ohī, rākhi ko sakai Rāma kara drohī. Mātu mṛtyu pitu samana samānā, sudhā hoi biṣa sunu harijānā. (3)
12 of 355
मित्र करइ सत रिपु कै करनी। ता कहँ बिबुधनदी बैतरनी॥ सब जगु ताहि अनलहु ते ताता। जो रघुबीर बिमुख सुनु भ्राता ॥४॥
Mitra karai sata ripu kai karanī, tā kahaṃ bibudhanadī baitaranī. Saba jagu tāhi analahu te tātā, jo Raghubīra bimukha sunu bhrātā. (4)
13 of 355
नारद देखा बिकल जयंता। लागि दया कोमल चित संता॥ पठवा तुरत राम पहिं ताही। कहेसि पुकारि प्रनत हित पाही ॥५॥
Nārada dekhā bikala Jayaṃtā, lāgi dayā komala cita saṃtā. Paṭhavā turata Rāma pahiṃ tāhī, kahesi pukāri pranata hita pāhī. (5)
14 of 355
आतुर सभय गहेसि पद जाई। त्राहि त्राहि दयाल रघुराई॥ अतुलित बल अतुलित प्रभुताई। मैं मतिमंद जानि नहिं पाई ॥६॥
Ātura sabhaya gahesi pada jāī, trāhi trāhi dayāla Raghurāī. Atulita bala atulita prabhutāī, maiṃ matimaṃda jāni nahiṃ pāī. (6)
15 of 355
निज कृत कर्म जनित फल पायउँ। अब प्रभु पाहि सरन तकि आयउँ॥ सुनि कृपाल अति आरत बानी। एकनयन करि तजा भवानी ॥७॥
Nija kṛta karma janita phala pāyauṃ, aba prabhu pāhi sarana taki āyauṃ. Suni kṛpāla ati ārata bānī, ekanayana kari tajā Bhavānī. (7)
16 of 355
सो०—कीन्ह मोह बस द्रोह जद्यपि तेहि कर बध उचित। प्रभु छाड़ेउ करि छोह को कृपाल रघुबीर सम ॥२॥
So—Kīnha moha basa droha jadyapi tehi kara badha ucita, prabhu chāṛeu kari choha ko kṛpāla Raghubīra sama. (2)
17 of 355
रघुपति चित्रकूट बसि नाना। चरित किए श्रुति सुधा समाना॥ बहुरि राम अस मन अनुमाना। होइहि भीर सबहिं मोहि जाना ॥१॥
Raghupati Citrakūṭa basi nānā, carita kie śruti sudhā samānā. Bahuri Rāma asa mana anumānā, hoihi bhīra sabahiṃ mohi jānā. (1)
18 of 355
सकल मुनिन्ह सन बिदा कराई। सीता सहित चले द्वौ भाई॥ अत्रि के आश्रम जब प्रभु गयऊ। सुनत महामुनि हरषित भयऊ ॥२॥
Sakala muninha sana bidā karāī, Sītā sahita cale dvau bhāī. Atri ke āśrama jaba prabhu gayū, sunata mahāmuni haraṣita bhayū. (2)
19 of 355
पुलकित गात अत्रि उठि धाए। देखि रामु आतुर चलि आए॥ करत दंडवत मुनि उर लाए। प्रेम बारि द्वौ जन अन्हवाए ॥३॥
Pulakita gāta Atri uṭhi dhāe, dekhi Rāmu ātura cali āe. Karata daṃḍavata muni ura lāe, prema bāri dvau jana anhavāe. (3)
20 of 355
देखि राम छबि नयन जुड़ाने। सादर निज आश्रम तब आने॥ करि पूजा कहि बचन सुहाए। दिए मूल फल प्रभु मन भाए ॥४॥
Dekhi Rāma chabi nayana juṛāne, sādara nija āśrama taba āne. Kari pūjā kahi bacana suhāe, die mūla phala prabhu mana bhāe. (4)
21 of 355
सो०—प्रभु आसन आसीन भरि लोचन सोभा निरखि। मुनिबर परम प्रबीन जोरि पानि अस्तुति करत ॥३॥
So—Prabhu āsana āsīna bhari locana sobhā nirakhi, munibara parama prabīna jori pāni astuti karata. (3)
22 of 355
छं०—नमामि भक्त वत्सलं। कृपालु शील कोमलं। भजामि ते पदांबुजं। अकामिनां स्वधामदं ॥१॥
Chhand—Namāmi bhakta vatsalaṃ, kṛpālu śīla komalaṃ, bhajāmi te padāṃbujaṃ, akāminā svadhāmadaṃ. (1)
23 of 355
निकाम श्याम सुंदरं। भवांबुनाथ मंदरं। प्रफुल्ल कंज लोचनं। मदादि दोष मोचनं ॥२॥
Nikāma śyāma suṃdaraṃ, bhavāṃbunātha maṃdaraṃ, prafulla kaṃja locanaṃ, madādi doṣa mocanaṃ. (2)
24 of 355
प्रलंब बाहु विक्रमं। प्रभोऽप्रमेय वैभवं। निषंग चाप सायकं। धरं त्रिलोक नायकं ॥३॥
Pralaṃba bāhu vikramaṃ, prabho'prameya vaibhavaṃ, niṣaṃga cāpa sāyakaṃ, dharaṃ triloka nāyakaṃ. (3)
25 of 355
दिनेश वंश मंडनं। महेश चाप खंडनं। मुनींद्र संत रंजनं। सुरारि वृंद भंजनं ॥४॥
Dineśa vaṃśa maṃḍanaṃ, maheśa cāpa khaṃḍanaṃ, munīṃdra saṃta raṃjanaṃ, surāri vṛṃda bhaṃjanaṃ. (4)
26 of 355
मनोज वैरि वंदितं। अजादि देव सेवितं। विशुद्ध बोध विग्रहं। समस्त दूषणापहं ॥५॥
Manoja vairi vaṃditaṃ, ajādi deva sevitaṃ, viśuddha bodha vigrahaṃ, samasta dūṣaṇāpahaṃ. (5)
27 of 355
नमामि इंदिरा पतिं। सुखाकरं सतां गतिं। भजे सशक्ति सानुजं। शची पति प्रियानुजं ॥६॥
Namāmi iṃdirā patiṃ, sukhākaraṃ satāṃ gatiṃ, bhaje saśakti sānujaṃ, śacī pati priyānujaṃ. (6)
28 of 355
त्वदंघ्रि मूल ये नराः। भजंति हीन मत्सराः। पतंति नो भवार्णवे। वितर्क वीचि संकुले ॥७॥
Tvadaṃghri mūla ye narāḥ, bhajaṃti hīna matsarāḥ, pataṃti no bhavārṇave, vitarka vīci saṃkule. (7)
29 of 355
विविक्त वासिनः सदा। भजंति मुक्तये मुदा। निरस्य इंद्रियादिकं। प्रयांति ते गतिं स्वकं ॥८॥
Vivikta vāsinaḥ sadā, bhajaṃti muktaye mudā, nirasya iṃdriyādikaṃ, prayāṃti te gatiṃ svakaṃ. (8)
30 of 355
तमेकमद्भुतं प्रभुं। निरीहमीश्वरं विभुं। जगद्गुरुं च शाश्वतं। तुरीयमेव केवलं ॥९॥
Tamekamadbhutaṃ prabhuṃ, nirīhamīśvaraṃ vibhuṃ, jagadguruṃ ca śāśvataṃ, turīyameva kevalaṃ. (9)
31 of 355
भजामि भाव वल्लभं। कुयोगिनां सुदुर्लभं। स्वभक्त कल्प पादपं। समं सुसेव्यमन्वहं ॥१०॥
Bhajāmi bhāva vallabhaṃ, kuyogināṃ sudurlabhaṃ, svabhakta kalpa pādapaṃ, samaṃ susevyamanvahaṃ. (10)
32 of 355
अनूप रूप भूपतिं। नतोऽहमुर्विजा पतिं। प्रसीद मे नमामि ते। पदाब्ज भक्ति देहि मे ॥११॥
Anūpa rūpa bhūpatiṃ, nato'hamurvijā patiṃ, prasīda me namāmi te, padābja bhakti dehi me. (11)
33 of 355
पठंति ये स्तवं इदं। नरादरेण ते पदं। व्रजंति नात्र संशयं। त्वदीय भक्ति संयुताः ॥१२॥
Paṭhaṃti ye stavaṃ idaṃ, narādareṇa te padaṃ, vrajaṃti nātra saṃśayaṃ, tvadīya bhakti saṃyutāḥ. (12)
34 of 355
दो०—बिनती करि मुनि नाइ सिरु कह कर जोरि बहोरि। चरन सरोरुह नाथ जनि कबहुँ तजै मति मोरि ॥४॥
Do—Binatī kari muni nāi siru kaha kara jori bahori, carana saroruha nātha jani kabahuṃ tajai mati mori. (4)
35 of 355
अनुसुइया के पद गहि सीता। मिली बहोरि सुसील बिनीता॥ रिषिपतिनी मन सुख अधिकाई। आसिष देइ निकट बैठाई ॥१॥
Anusuiyā ke pada gahi Sītā, milī bahori susīla binītā. Riṣipatinī mana sukha adhikāī, āsiṣa dei nikaṭa baiṭhāī. (1)
36 of 355
दिब्य बसन भूषन पहिराए। जे नित नूतन अमल सुहाए॥ कह रिषिबधू सरस मृदु बानी। नारिधर्म कछु ब्याज बखानी ॥२॥
Dibya basana bhūṣana pahirāe, je nita nūtana amala suhāe. Kaha riṣibadhū sarasa mṛdu bānī, nāridharma kachu byāja bakhānī. (2)
37 of 355
मातु पिता भ्राता हितकारी। मितप्रद सब सुनु राजकुमारी॥ अमित दानि भर्ता बयदेही। अधम सो नारि जो सेव न तेही ॥३॥
Mātu pitā bhrātā hitakārī, mitaprada saba sunu rājakumārī. Amita dāni bhartā bayadehī, adhama so nāri jo seva na tehī. (3)
38 of 355
धीरज धर्म मित्र अरु नारी। आपद काल परखिअहिं चारी॥ बृद्ध रोगबस जड़ धनहीना। अंध बधिर क्रोधी अति दीना ॥४॥
Dhīraja dharma mitra aru nārī, āpada kāla parakhiahiṃ cārī. Bṛddha rogabasa jaṛa dhanahīnā, aṃdha badhira krodhī ati dīnā. (4)
39 of 355
ऐसेहु पति कर किएँ अपमाना। नारि पाव जमपुर दुख नाना॥ एकइ धर्म एक ब्रत नेमा। कायँ बचन मन पति पद प्रेमा ॥५॥
Aisehu pati kara kieṃ apamānā, nāri pāva jamapura dukha nānā. Ekai dharma eka brata nemā, kāyaṃ bacana mana pati pada premā. (5)
40 of 355
जग पतिब्रता चारि बिधि अहहीं। बेद पुरान संत सब कहहीं॥ उत्तम के अस बस मन माहीं। सपनेहुँ आन पुरुष जग नाहीं ॥६॥
Jaga patibratā cāri bidhi ahahīṃ, beda purāna saṃta saba kahahīṃ. Uttama ke asa basa mana māhīṃ, sapanehuṃ āna puruṣa jaga nāhīṃ. (6)
41 of 355
मध्यम परपति देखइ कैसें। भ्राता पिता पुत्र निज जैसें॥ धर्म बिचारि समुझि कुल रहई। सो निकिष्ट त्रिय श्रुति अस कहई ॥७॥
Madhyama parapati dekhai kaiseṃ, bhrātā pitā putra nija jaiseṃ. Dharma bicāri samujhi kula rahaī, so nikiṣṭa triya śruti asa kahaī. (7)
42 of 355
बिनु अवसर भय तें रह जोई। जानेहु अधम नारि जग सोई॥ पति बंचक परपति रति करई। रौरव नरक कल्प सत परई ॥८॥
Binu avasara bhaya teṃ raha joī, jānehu adhama nāri jaga soī. Pati baṃcaka parapati rati karaī, raurava naraka kalpa sata paraī. (8)
43 of 355
छन सुख लागि जनम सत कोटी। दुख न समुझ तेहि सम को खोटी॥ बिनु श्रम नारि परम गति लहई। पतिब्रत धर्म छाड़ि छल गहई ॥९॥
Chana sukha lāgi janama sata koṭī, dukha na samujha tehi sama ko khoṭī. Binu śrama nāri parama gati lahaī, patibrata dharma chāṛi chala gahaī. (9)
44 of 355
पति प्रतिकूल जनम जहँ जाई। बिधवा होइ पाइ तरुनाई ॥१०॥
Pati pratikūla janama jahaṃ jāī, bidhavā hoi pāi tarunāī. (10)
45 of 355
सो०—सहज अपावनि नारि पति सेवत सुभ गति लहइ। जसु गावत श्रुति चारि अजहुँ तुलसिका हरिहि प्रिय ॥५(क)॥
So—Sahaja apāvani nāri pati sevata subha gati lahai, jasu gāvata śruti cāri ajahuṃ tulasikā harihi priya. (5a)
46 of 355
सुनु सीता तव नाम सुमिरि नारि पतिब्रत करहिं। तोहि प्रानप्रिय राम कहिउँ कथा संसार हित ॥५(ख)॥
Sunu Sītā tava nāma sumiri nāri patibrata karahiṃ, tohi prānapriya Rāma kahiuṃ kathā saṃsāra hita. (5b)
47 of 355
सुनि जानकी परम सुखु पावा। सादर तासु चरन सिरु नावा॥ तब मुनि सन कह कृपानिधाना। आयसु होइ जाउँ बन आना ॥१॥
Suni Jānakī parama sukhu pāvā, sādara tāsu carana siru nāvā. Taba muni sana kaha kṛpānidhānā, āyasu hoi jāuṃ bana ānā. (1)
48 of 355
संतत मो पर कृपा करेहू। सेवक जानि तजेहु जनि नेहू॥ धर्म धुरंधर प्रभु कै बानी। सुनि सप्रेम बोले मुनि ग्यानी ॥२॥
Saṃtata mo para kṛpā karehū, sevaka jāni tajehu jani nehū. Dharma dhuraṃdhara prabhu kai bānī, suni saprema bole muni gyānī. (2)
49 of 355
जासु कृपा अज सिव सनकादी। चहत सकल परमारथ बादी॥ ते तुम्ह राम अकाम पिआरे। दीन बंधु मृदु बचन उचारे ॥३॥
Jāsu kṛpā aja siva sanakādī, cahata sakala paramāratha bādī. Te tumha Rāma akāma piāre, dīna baṃdhu mṛdu bacana ucāre. (3)
50 of 355
अब जानी मैं श्री चतुराई। भजी तुम्हहि सब देव बिहाई॥ जेहि समान अतिसय नहिं कोई। ता कर सील कस न अस होई ॥४॥
Aba jānī maiṃ śrī caturāī, bhajī tumhahi saba deva bihāī. Jehi samāna atisaya nahiṃ koī, tā kara sīla kasa na asa hoī. (4)
51 of 355
केहि बिधि कहौं जाहु अब स्वामी। कहहु नाथ तुम्ह अंतरजामी॥ अस कहि प्रभु बिलोकि मुनि धीरा। लोचन जल बह पुलक सरीरा ॥५॥
Kehi bidhi kahauṃ jāhu aba svāmī, kahahu nātha tumha aṃtarajāmī. Asa kahi prabhu biloki muni dhīrā, locana jala baha pulaka sarīrā. (5)
52 of 355
छं०—तन पुलक निर्भर प्रेम पूरन नयन मुख पंकज दिए। मन ग्यान गुन गोतीत प्रभु मैं दीख जप तप का किए॥ जप जोग धर्म समूह तें नर भगति अनुपम पावई। रघुबीर चरित पुनीत निसि दिन दास तुलसी गावई॥
Chhand—Tana pulaka nirbhara prema pūrana nayana mukha paṃkaja die, mana gyāna guna gotīta prabhu maiṃ dīkha japa tapa kā kie. Japa joga dharma samūha teṃ nara bhagati anupama pāvaī, Raghubīra carita punīta nisi dina dāsa Tulasī gāvaī.
53 of 355
दो०—कलिमल समन दमन मन राम सुजस सुखमूल। सादर सुनहिं जे तिन्ह पर राम रहहिं अनुकूल ॥६(क)॥
Do—Kalimala samana damana mana Rāma sujasa sukhamūla, sādara sunahiṃ je tinha para Rāma rahahiṃ anukūla. (6a)
54 of 355
सो०—कठिन काल मल कोस धर्म न ग्यान न जोग जप। परिहरि सकल भरोस रामहि भजहिं ते चतुर नर ॥६(ख)॥
So—Kaṭhina kāla mala kosa dharma na gyāna na joga japa, parihari sakala bharosa Rāmahi bhajahiṃ te catura nara. (6b)
55 of 355
मुनि पद कमल नाइ करि सीसा। चले बनहि सुर नर मुनि ईसा॥ आगें राम अनुज पुनि पाछें। मुनि बर बेष बने अति काछें ॥१॥
Muni pada kamala nāi kari sīsā, cale banahi sura nara muni īsā. Āgeṃ Rāma anuja puni pāchheṃ, muni bara beṣa bane ati kāchheṃ. (1)
56 of 355
उभय बीच श्री सोहइ कैसी। ब्रह्म जीव बिच माया जैसी॥ सरिता बन गिरि अवघट घाटा। पति पहिचानि देहिं बर बाटा ॥२॥
Ubhaya bīca śrī sohai kaisī, brahma jīva bica māyā jaisī. Saritā bana giri avaghaṭa ghāṭā, pati pahicāni dehiṃ bara bāṭā. (2)
57 of 355
जहँ जहँ जाहिं देव रघुराया। करहिं मेघ तहँ तहँ नभ छाया॥ मिला असुर बिराध मग जाता। आवतहीं रघुबीर निपाता ॥३॥
Jahaṃ jahaṃ jāhiṃ deva Raghurāyā, karahiṃ megha tahaṃ tahaṃ nabha chāyā. Milā asura Birādha maga jātā, āvatahīṃ Raghubīra nipātā. (3)
58 of 355
तुरतहिं रुचिर रूप तेहिं पावा। देखि दुखी निज धाम पठावा॥ पुनि आए जहँ मुनि सरभंगा। सुंदर अनुज जानकी संगा ॥४॥
Turatahiṃ rucira rūpa tehiṃ pāvā, dekhi dukhī nija dhāma paṭhāvā. Puni āe jahaṃ muni Sarabhaṃgā, suṃdara anuja Jānakī saṃgā. (4)
59 of 355
दो०—देखि राम मुख पंकज मुनिबर लोचन भृंग। सादर पान करत अति धन्य जन्म सरभंग ॥७॥
Do—Dekhi Rāma mukha paṃkaja munibara locana bhṛṃga, sādara pāna karata ati dhanya janma Sarabhaṃga. (7)
60 of 355
कह मुनि सुनु रघुबीर कृपाला। संकर मानस राजमराला॥ जात रहेउँ बिरंचि के धामा। सुनेउँ श्रवन बन ऐहहिं रामा ॥१॥
Kaha muni sunu Raghubīra kṛpālā, Saṃkara mānasa rājamarālā. Jāta raheuṃ biraṃci ke dhāmā, suneuṃ śravana bana aihahiṃ Rāmā. (1)
61 of 355
चितवत पंथ रहेउँ दिन राती। अब प्रभु देखि जुड़ानी छाती॥ नाथ सकल साधन मैं हीना। कीन्ही कृपा जानि जन दीना ॥२॥
Citavata paṃtha raheuṃ dina rātī, aba prabhu dekhi juṛānī chātī. Nātha sakala sādhana maiṃ hīnā, kīnhī kṛpā jāni jana dīnā. (2)
62 of 355
सो कछु देव न मोहि निहोरा। निज पन राखेउ जन मन चोरा॥ तब लगि रहहु दीन हित लागी। जब लगि मिलौं तुम्हहि तनु त्यागी ॥३॥
So kachu deva na mohi nihorā, nija pana rākheu jana mana corā. Taba lagi rahahu dīna hita lāgī, jaba lagi milauṃ tumhahi tanu tyāgī. (3)
63 of 355
जोग जग्य जप तप ब्रत कीन्हा। प्रभु कहँ देइ भगति बर लीन्हा॥ एहि बिधि सर रचि मुनि सरभंगा। बैठे हृदयँ छाड़ि सब संगा ॥४॥
Joga jagya japa tapa brata kīnhā, prabhu kahaṃ dei bhagati bara līnhā. Ehi bidhi sara raci muni Sarabhaṃgā, baiṭhe hṛdayaṃ chāṛi saba saṃgā. (4)
64 of 355
दो०—सीता अनुज समेत प्रभु नील जलद तनु स्याम। मम हियँ बसहु निरंतर सगुनरूप श्रीराम ॥८॥
Do—Sītā anuja sameta prabhu nīla jalada tanu syāma, mama hiyaṃ basahu niraṃtara sagunarūpa Śrīrāma. (8)
65 of 355
अस कहि जोग अगिनि तनु जारा। राम कृपाँ बैकुंठ सिधारा॥ ताते मुनि हरि लीन न भयऊ। प्रथमहिं भेद भगति बर लयऊ ॥१॥
Asa kahi joga aginī tanu jārā, Rāma kṛpāṃ baikuṃṭha sidhārā. Tāte muni hari līna na bhayū, prathamahiṃ bheda bhagati bara layū. (1)
66 of 355
रिषि निकाय मुनिबर गति देखी। सुखी भए निज हृदयँ बिसेषी॥ अस्तुति करहिं सकल मुनि बृंदा। जयति प्रनत हित करुना कंदा ॥२॥
Riṣi nikāya munibara gati dekhī, sukhī bhae nija hṛdayaṃ biseṣī. Astuti karahiṃ sakala muni bṛṃdā, jayati pranata hita karunā kaṃdā. (2)
67 of 355
पुनि रघुनाथ चले बन आगे। मुनिबर बृंद बिपुल सँग लागे॥ अस्थि समूह देखि रघुराया। पूछी मुनिन्ह लागि अति दाया ॥३॥
Puni Raghunātha cale bana āge, munibara bṛṃda bipula saṃga lāge. Asthi samūha dekhi Raghurāyā, pūchī muninha lāgi ati dāyā. (3)
68 of 355
जानतहूँ पूछिअ कस स्वामी। सबदरसी तुम्ह अंतरजामी॥ निसिचर निकर सकल मुनि खाए। सुनि रघुबीर नयन जल छाए ॥४॥
Jānatahūṃ pūchia kasa svāmī, sabadarasī tumha aṃtarajāmī. Nisicara nikara sakala muni khāe, suni Raghubīra nayana jala chāe. (4)
69 of 355
दो०—निसिचर हीन करउँ महि भुज उठाइ पन कीन्ह। सकल मुनिन्ह के आश्रमन्हि जाइ जाइ सुख दीन्ह ॥९॥
Do—Nisicara hīna karauṃ mahi bhuja uṭhāi pana kīnha, sakala muninha ke āśramanhi jāi jāi sukha dīnha. (9)
70 of 355
मुनि अगस्ति कर सिष्य सुजाना। नाम सुतीछन रति भगवाना॥ मन क्रम बचन राम पद सेवक। सपनेहुँ आन भरोस न देवक ॥१॥
Muni Agasti kara siṣya sujānā, nāma Sutīchana rati bhagavānā. Mana krama bacana Rāma pada sevaka, sapanehuṃ āna bharosa na devaka. (1)
71 of 355
प्रभु आगवनु श्रवन सुनि पावा। करत मनोरथ आतुर धावा॥ हे बिधि दीनबंधु रघुराया। मो से सठ पर करिहहिं दाया ॥२॥
Prabhu āgavanu śravana suni pāvā, karata manoratha ātura dhāvā. He bidhi dīnabaṃdhu raghurāyā, mo se saṭha para karihahiṃ dāyā. (2)
72 of 355
सहित अनुज मोहि राम गोसाईं। मिलिहहिं निज सेवक की नाईं॥ मोरे जियँ भरोस दृढ़ नाहीं। भगति बिरति न ग्यान मन माहीं ॥३॥
Sahita anuja mohi Rāma gosāīṃ, milihahiṃ nija sevaka kī nāīṃ. More jiyaṃ bharosa dṛṛha nāhīṃ, bhagati birati na gyāna mana māhīṃ. (3)
73 of 355
नहिं सतसंग जोग जप जागा। नहिं दृढ़ चरन कमल अनुरागा॥ एक बानि करुनानिधान की। सो प्रिय जाकें गति न आन की ॥४॥
Nahiṃ satasaṃga joga japa jāgā, nahiṃ dṛṛha carana kamala anurāgā. Eka bāni karunānidhāna kī, so priya jākeṃ gati na āna kī. (4)
74 of 355
होइहैं सुफल आजु मम लोचन। देखि बदन पंकज भव मोचन॥ निर्भर प्रेम मगन मुनि ग्यानी। कहि न जाइ सो दसा भवानी ॥५॥
Hoihaiṃ suphala āju mama locana, dekhi badana paṃkaja bhava mocana. Nirbhara prema magana muni gyānī, kahi na jāi so dasā Bhavānī. (5)
75 of 355
दिसि अरु बिदिसि पंथ नहिं सूझा। को मैं चलेउँ कहाँ नहिं बूझा॥ कबहुँक फिरि पाछें पुनि जाई। कबहुँक नृत्य करइ गुन गाई ॥६॥
Disi aru bidisi paṃtha nahiṃ sūjhā, ko maiṃ caleuṃ kahāṃ nahiṃ būjhā. Kabahuṃka phiri pāchheṃ puni jāī, kabahuṃka nṛtya karai guna gāī. (6)
76 of 355
अबिरल प्रेम भगति मुनि पाई। प्रभु देखैं तरु ओट लुकाई॥ अतिसय प्रीति देखि रघुबीरा। प्रगटे हृदयँ हरन भव भीरा ॥७॥
Abirala prema bhagati muni pāī, prabhu dekhaiṃ taru oṭa lukāī. Atisaya prīti dekhi Raghubīrā, pragaṭe hṛdayaṃ harana bhava bhīrā. (7)
77 of 355
मुनि मग माझ अचल होइ बैसा। पुलक सरीर पनस फल जैसा॥ तब रघुनाथ निकट चलि आए। देखि दसा निज जन मन भाए ॥८॥
Muni maga mājha acala hoi baisā, pulaka sarīra panasa phala jaisā. Taba Raghunātha nikaṭa cali āe, dekhi dasā nija jana mana bhāe. (8)
78 of 355
मुनिहि राम बहु भाँति जगावा। जाग न ध्यान जनित सुख पावा॥ भूप रूप तब राम दुरावा। हृदयँ चतुर्भुज रूप देखावा ॥९॥
Munihi Rāma bahu bhāṃti jagāvā, jāga na dhyāna janita sukha pāvā. Bhūpa rūpa taba Rāma durāvā, hṛdayaṃ caturbhuja rūpa dekhāvā. (9)
79 of 355
मुनि अकुलाइ उठा तब कैसें। बिकल हीन मनि फनिबर जैसें॥ आगें देखि राम तन स्यामा। सीता अनुज सहित सुख धामा ॥१०॥
Muni akulāi uṭhā taba kaiseṃ, bikala hīna mani phanibara jaiseṃ. Āgeṃ dekhi Rāma tana syāmā, Sītā anuja sahita sukha dhāmā. (10)
80 of 355
परेउ लकुट इव चरनन्हि लागी। प्रेम मगन मुनिबर बड़भागी॥ भुज बिसाल गहि लिए उठाई। परम प्रीति राखे उर लाई ॥११॥
Pareu lakuṭa iva carananhi lāgī, prema magana munibara baṛabhāgī. Bhuja bisāla gahi lie uṭhāī, parama prīti rākhe ura lāī. (11)
81 of 355
मुनिहि मिलत अस सोह कृपाला। कनक तरुहि जनु भेंट तमाला॥ राम बदनु बिलोक मुनि ठाढ़ा। मानहुँ चित्र माझ लिखि काढ़ा ॥१२॥
Munihi milata asa soha kṛpālā, kanaka taruhi janu bheṃṭa tamālā. Rāma badanu biloka muni ṭhāṛhā, mānahuṃ citra mājha likhi kāṛhā. (12)
82 of 355
दो०—तब मुनि हृदयँ धीर धरि गहि पद बारहिं बार। निज आश्रम प्रभु आनि करि पूजा बिबिध प्रकार ॥१०॥
Do—Taba muni hṛdayaṃ dhīra dhari gahi pada bārahiṃ bāra, Nija āśrama prabhu āni kari pūjā bibidha prakāra. (10)
83 of 355
कह मुनि प्रभु सुनु बिनती मोरी। अस्तुति करौं कवन बिधि तोरी॥ महिमा अमित मोरि मति थोरी। रबि सन्मुख खद्योत अँजोरी ॥१॥
Kaha muni prabhu sunu binatī morī, astuti karauṃ kavana bidhi torī. Mahimā amita mori mati thorī, rabi sanmukha khadyota aṃjorī. (1)
84 of 355
श्याम तामरस दाम शरीरं। जटा मुकुट परिधन मुनिचीरं॥ पाणि चाप शर कटि तूणीरं। नौमि निरंतर श्रीरघुवीरं ॥२॥
Śyāma tāmarasa dāma śarīraṃ, jaṭā mukuṭa paridhana municīraṃ. Pāṇi cāpa śara kaṭi tūṇīraṃ, naumi niraṃtara śrīraghuvīraṃ. (2)
85 of 355
मोह विपिन घन दहन कृशानुः। संत सरोरुह कानन भानुः॥ निसिचर करि वरूथ मृगराजः। त्रातु सदा नो भव खग बाजः ॥३॥
Moha vipina ghana dahana kṛśānuḥ, saṃta saroruha kānana bhānuḥ. Nisicara kari varūtha mṛgarājaḥ, trātu sadā no bhava khaga bājaḥ. (3)
86 of 355
अरुण नयन राजीव सुवेशं। सीता नयन चकोर निशेशं॥ हर हृदि मानस बाल मरालं। नौमि राम उर बाहु विशालं ॥४॥
Aruṇa nayana rājīva suveśaṃ, Sītā nayana cakora niśeśaṃ. Hara hṛdi mānasa bāla marālaṃ, naumi Rāma ura bāhu viśālaṃ. (4)
87 of 355
संशय सर्प ग्रसन उरगादः। शमन सुकर्कश तर्क विषादः॥ भव भंजन रंजन सुर यूथः। त्रातु सदा नो कृपा वरूथः ॥५॥
Saṃśaya sarpa grasana uragādaḥ, śamana sukarkaśa tarka viṣādaḥ. Bhava bhaṃjana raṃjana sura yūthaḥ, trātu sadā no kṛpā varūthaḥ. (5)
88 of 355
निर्गुण सगुण विषम सम रूपं। ज्ञान गिरा गोतीतमनूपं॥ अमलमखिलमनवद्यमपारं। नौमि राम भंजन महि भारं ॥६॥
Nirguṇa saguṇa viṣama sama rūpaṃ, jñāna girā gotītamanūpaṃ. Amalamakhilamanavadyamapāraṃ, naumi Rāma bhaṃjana mahi bhāraṃ. (6)
89 of 355
भक्त कल्पादप आरामः। तर्जन क्रोध लोभ मद कामः॥ अति नागर भव सागर सेतुः। त्रातु सदा दिनकर कुल केतुः ॥७॥
Bhakta kalpādapa ārāmaḥ, tarjana krodha lobha mada kāmaḥ. Ati nāgara bhava sāgara setuḥ, trātu sadā dinakara kula ketuḥ. (7)
90 of 355
अतुलित भुज प्रताप बल धामः। कलि मल विपुल विभंजन नामः॥ धर्म वर्म नर्मद गुण ग्रामः। संतत शं तनोतु मम रामः ॥८॥
Atulita bhuja pratāpa bala dhāmaḥ, kali mala vipula vibhaṃjana nāmaḥ. Dharma varma narmada guṇa grāmaḥ, saṃtata śaṃ tanotu mama Rāmaḥ. (8)
91 of 355
जदपि बिरज ब्यापक अबिनासी। सब के हृदयँ निरंतर बासी॥ तदपि अनुज श्री सहित खरारी। बसतु मनसि मम काननचारी ॥९॥
Jadapi biraja byāpaka abināsī, saba ke hṛdayaṃ niraṃtara bāsī. Tadapi anuja śrī sahita Kharārī, basatu manasi mama kānanacārī. (9)
92 of 355
जे जानहिं ते जानहुँ स्वामी। सगुन अगुन उर अंतरजामी॥ जो कोसलपति राजिव नयना। करउ सो राम हृदय मम अयना ॥१०॥
Je jānahiṃ te jānahuṃ svāmī, saguna aguna ura aṃtarajāmī. Jo Kosalapati rājiva nayanā, karau so Rāma hṛdaya mama ayanā. (10)
93 of 355
अस अभिमान जाइ जनि भोरे। मैं सेवक रघुपति पति मोरे॥ सुनि मुनि बचन राम मन भाए। बहुरि हरषि मुनिबर उर लाए ॥११॥
Asa abhimāna jāi jani bhore, maiṃ sevaka Raghupati pati more. Suni muni bacana Rāma mana bhāe, bahuri haraṣi munibara ura lāe. (11)
94 of 355
परम प्रसन्न जानु मुनि मोही। जो बर मागहु देउँ सो तोही॥ मुनि कह मैं बर कबहुँ न जाचा। समुझि न परइ झूठ का साचा ॥१२॥
Parama prasanna jānu muni mohī, jo bara māgahu deuṃ so tohī. Muni kaha maiṃ bara kabahuṃ na jācā, samujhi na parai jhūṭha kā sācā. (12)
95 of 355
तुम्हहि नीक लागै रघुराई। सो मोहि देहु दास सुखदाई॥ अबिरल भगति बिरति बिग्याना। होहु सकल गुन ग्यान निधाना ॥१३॥
Tumhahi nīka lāgai Raghurāī, so mohi dehu dāsa sukhadāī. Abirala bhagati birati bigyānā, hohu sakala guna gyāna nidhānā. (13)
96 of 355
प्रभु जो दीन्ह सो बरु मैं पावा। अब सो देहु मोहि जो भावा ॥१४॥
Prabhu jo dīnha so baru maiṃ pāvā, aba so dehu mohi jo bhāvā. (14)
97 of 355
दो०—अनुज जानकी सहित प्रभु चाप बान धर राम। मम हिय गगन इंदु इव बसहु सदा निहकाम ॥११॥
Do—Anuja Jānakī sahita prabhu cāpa bāna dhara Rāma, Mama hiya gagana iṃdu iva basahu sadā nihakāma. (11)
98 of 355
एवमस्तु करि रमानिवासा। हरषि चले कुंभज रिषि पासा॥ बहुत दिवस गुर दरसनु पाएँ। भए मोहि एहिं आश्रम आएँ ॥१॥
Evamastu kari ramānivāsā, haraṣi cale kuṃbhaja riṣi pāsā. Bahuta divasa gura darasanu pāeṃ, bhae mohi ehiṃ āśrama āeṃ. (1)
99 of 355
अब प्रभु संग जाउँ गुर पाहीं। तुम्ह कहँ नाथ निहोरा नाहीं॥ देखि कृपानिधि मुनि चतुराई। लिए संग बिहसे द्वौ भाई ॥२॥
Aba prabhu saṃga jāuṃ gura pāhīṃ, tumha kahaṃ nātha nihorā nāhīṃ. Dekhi kṛpānidhi muni caturāī, lie saṃga bihase dvau bhāī. (2)
100 of 355
पंथ कहत निज भगति अनूपा। मुनि आश्रम पहुँचे सुरभूपा॥ तुरत सुतीछन गुर पहिं गयऊ। करि दंडवत कहत अस भयऊ ॥३॥
Paṃtha kahata nija bhagati anūpā, muni āśrama pahuṃce surabhūpā. Turata Sutīchana gura pahiṃ gayaū, kari daṃḍavata kahata asa bhayaū. (3)
101 of 355
नाथ कोसलाधीस कुमारा। आए मिलन जगत आधारा॥ राम अनुज समेत बैदेही। निसि दिनु देव जपत हहु जेही ॥४॥
Nātha Kosalādhīsa kumārā, āe milana jagata ādhārā. Rāma anuja sameta Baidehī, nisi dinu deva japata hahu jehī. (4)
102 of 355
सुनत अगस्ति तुरत उठि धाए। हरि बिलोकि लोचन जल छाए॥ मुनि पद कमल परे द्वौ भाई। रिषि अति प्रीति लिए उर लाई ॥५॥
Sunata Agasti turata uṭhi dhāe, hari biloki locana jala chhāe. Muni pada kamala pare dvau bhāī, riṣi ati prīti lie ura lāī. (5)
103 of 355
सादर कुसल पूछि मुनि ग्यानी। आसन बर बैठारे आनी॥ पुनि करि बहु प्रकार प्रभु पूजा। मोहि सम भाग्यवंत नहिं दूजा ॥६॥
Sādara kusala pūchhi muni gyānī, āsana bara baiṭhāre ānī. Puni kari bahu prakāra prabhu pūjā, mohi sama bhāgyavaṃta nahiṃ dūjā. (6)
104 of 355
जहँ लगि रहे अपर मुनि बृंदा। हरषे सब बिलोकि सुखकंदा ॥७॥
Jahaṃ lagi rahe apara muni bṛṃdā, haraṣe saba biloki sukhakaṃdā. (7)
105 of 355
दो०—मुनि समूह महँ बैठे सन्मुख सब की ओर। सरद इंदु तन चितवत मानहुँ निकर चकोर ॥१२॥
Do—Muni samūha mahaṃ baiṭhe sanmukha saba kī ora, Sarada iṃdu tana citavata mānahuṃ nikara cakora. (12)
106 of 355
तब रघुबीर कहा मुनि पाहीं। तुम्ह सन प्रभु दुराव कछु नाहीं॥ तुम्ह जानहु जेहि कारन आयउँ। ताते तात न कहि समुझायउँ ॥१॥
Taba Raghubīra kahā muni pāhīṃ, tumha sana prabhu durāva kachhu nāhīṃ. Tumha jānahu jehi kārana āyauṃ, tāte tāta na kahi samujhāyauṃ. (1)
107 of 355
अब सो मंत्र देहु प्रभु मोही। जेहि प्रकार मारौं मुनिद्रोही॥ मुनि मुसुकाने सुनि प्रभु बानी। पूछेहु नाथ मोहि का जानी ॥२॥
Aba so maṃtra dehu prabhu mohī, jehi prakāra mārauṃ munidrohī. Muni musukāne suni prabhu bānī, pūchhehu nātha mohi kā jānī. (2)
108 of 355
तुम्हरेइँ भजन प्रभाव अघारी। जानउँ महिमा कछुक तुम्हारी॥ ऊमरि तरु बिसाल तव माया। फल ब्रह्मांड अनेक निकाया ॥३॥
Tumhareiṃ bhajana prabhāva aghārī, jānauṃ mahimā kachhuka tumhārī. Ūmari taru bisāla tava māyā, phala brahmāṃḍa aneka nikāyā. (3)
109 of 355
जीव चराचर जंतु समाना। भीतर बसहिं न जानहिं आना॥ ते फल भच्छक कठिन कराला। तव भयँ डरत सदा सोउ काला ॥४॥
Jīva carācara jaṃtu samānā, bhītara basahiṃ na jānahiṃ ānā. Te phala bhacchaka kaṭhina karālā, tava bhayaṃ ḍarata sadā sou kālā. (4)
110 of 355
ते तुम्ह सकल लोकपति साईं। पूछेहु मोहि मनुज की नाईं॥ यह बर मागउँ कृपानिकेता। बसहु हृदयँ श्री अनुज समेता ॥५॥
Te tumha sakala lokapati sāīṃ, pūchhehu mohi manuja kī nāīṃ. Yaha bara māgauṃ kṛpāniketā, basahu hṛdayaṃ śrī anuja sametā. (5)
111 of 355
अबिरल भगति बिरति सतसंगा। चरन सरोरुह प्रीति अभंगा॥ जद्यपि ब्रह्म अखंड अनंता। अनुभव गम्य भजहिं जेहि संता ॥६॥
Abirala bhagati birati satasaṃgā, carana saroruha prīti abhaṃgā. Jadyapi brahma akhaṃḍa anaṃtā, anubhava gamya bhajahiṃ jehi saṃtā. (6)
112 of 355
अस तव रूप बखानउँ जानउँ। फिरि फिरि सगुन ब्रह्म रति मानउँ॥ संतत दासन्ह देहु बड़ाई। तातें मोहि पूछेहु रघुराई ॥७॥
Asa tava rūpa bakhānauṃ jānauṃ, phiri phiri saguna brahma rati mānauṃ. Saṃtata dāsanha dehu baṛāī, tāteṃ mohi pūchhehu Raghurāī. (7)
113 of 355
है प्रभु परम मनोहर ठाऊँ। पावन पंचबटी तेहि नाऊँ॥ दंडक बन पुनीत प्रभु करहू। उग्र साप मुनिबर कर हरहू ॥८॥
Hai prabhu parama manohara ṭhāūṃ, pāvana paṃcabaṭī tehi nāūṃ. Daṃḍaka bana punīta prabhu karahū, ugra sāpa munibara kara harahū. (8)
114 of 355
बास करहु तहँ रघुकुल राया। कीजे सकल मुनिन्ह पर दाया॥ चले राम मुनि आयसु पाई। तुरतहिं पंचबटी निअराई ॥९॥
Bāsa karahu tahaṃ Raghukula rāyā, kīje sakala muninha para dāyā. Cale Rāma muni āyasu pāī, turatahiṃ paṃcabaṭī niarāī. (9)
115 of 355
दो०—गीधराज सैं भेंट भइ बहु बिधि प्रीति बढ़ाइ। गोदावरी निकट प्रभु रहे परन गृह छाइ ॥१३॥
Do—Gīdharāja saiṃ bheṃṭa bhai bahu bidhi prīti baṛhāi, Godāvarī nikaṭa prabhu rahe parana gṛha chhāi. (13)
116 of 355
जब ते राम कीन्ह तहँ बासा। सुखी भए मुनि बीती त्रासा॥ गिरि बन नदीं ताल छबि छाए। दिन दिन प्रति अति होहिं सुहाए ॥१॥
Jaba te Rāma kīnha tahaṃ bāsā, sukhī bhae muni bītī trāsā. Giri bana nadīṃ tāla chhabi chhāe, dina dina prati ati hohiṃ suhāe. (1)
117 of 355
खग मृग बृंद अनंदित रहहीं। मधुप मधुर गुंजत छबि लहहीं॥ सो बन बरनि न सक अहिराजा। जहाँ प्रगट रघुबीर बिराजा ॥२॥
Khaga mṛga bṛṃda anaṃdita rahahīṃ, madhupa madhura guṃjata chhabi lahahīṃ. So bana barani na saka ahirājā, jahāṃ pragaṭa Raghubīra birājā. (2)
118 of 355
एक बार प्रभु सुख आसीना। लछिमन बचन कहे छलहीना॥ सुर नर मुनि सचराचर साईं। मैं पूछउँ निज प्रभु की नाईं ॥३॥
Eka bāra prabhu sukha āsīnā, Lachhimana bacana kahe chhalahīnā. Sura nara muni sacarācara sāīṃ, maiṃ pūchhauṃ nija prabhu kī nāīṃ. (3)
119 of 355
मोहि समुझाइ कहहु सोइ देवा। सब तजि करौं चरन रज सेवा॥ कहहु ग्यान बिराग अरु माया। कहहु सो भगति करहु जेहिं दाया ॥४॥
Mohi samujhāi kahahu soi devā, saba taji karauṃ carana raja sevā. Kahahu gyāna birāga aru māyā, kahahu so bhagati karahu jehiṃ dāyā. (4)
120 of 355
दो०—ईस्वर जीव भेद प्रभु सकल कहौ समुझाइ। जातें होइ चरन रति सोक मोह भ्रम जाइ ॥१४॥
Do—Īsvara jīva bheda prabhu sakala kahau samujhāi, Jāteṃ hoi carana rati soka moha bhrama jāi. (14)
121 of 355
थोरेहि महँ सब कहउँ बुझाई। सुनहु तात मति मन चित लाई॥ मैं अरु मोर तोर तैं माया। जेहिं बस कीन्हे जीव निकाया ॥१॥
Thorehi mahaṃ saba kahauṃ bujhāī, sunahu tāta mati mana cita lāī. Maiṃ aru mora tora taiṃ māyā, jehiṃ basa kīnhe jīva nikāyā. (1)
122 of 355
गो गोचर जहँ लगि मन जाई। सो सब माया जानेहु भाई॥ तेहि कर भेद सुनहु तुम्ह सोऊ। बिद्या अपर अबिद्या दोऊ ॥२॥
Go gocara jahaṃ lagi mana jāī, so saba māyā jānehu bhāī. Tehi kara bheda sunahu tumha soū, bidyā apara abidyā doū. (2)
123 of 355
एक दुष्ट अतिसय दुखरूपा। जा बस जीव परा भवकूपा॥ एक रचइ जग गुन बस जाकें। प्रभु प्रेरित नहिं निज बल ताकें ॥३॥
Eka duṣṭa atisaya dukharūpā, jā basa jīva parā bhavakūpā. Eka racai jaga guna basa jākeṃ, prabhu prerita nahiṃ nija bala tākeṃ. (3)
124 of 355
ग्यान मान जहँ एकउ नाहीं। देख ब्रह्म समान सब माहीं॥ कहिअ तात सो परम बिरागी। तृन सम सिद्धि तीनि गुन त्यागी ॥४॥
Gyāna māna jahaṃ ekau nāhīṃ, dekha brahma samāna saba māhīṃ. Kahia tāta so parama birāgī, tṛna sama siddhi tīni guna tyāgī. (4)
125 of 355
दो०—माया ईस न आपु कहुँ जान कहिअ सो जीव। बंध मोच्छ प्रद सर्बपर माया प्रेरक सीव ॥१५॥
Do—Māyā īsa na āpu kahuṃ jāna kahia so jīva, Baṃdha mocchha prada sarbapara māyā preraka sīva. (15)
126 of 355
धर्म तें बिरति जोग तें ग्याना। ग्यान मोच्छप्रद बेद बखाना॥ जातें बेगि द्रवउँ मैं भाई। सो मम भगति भगत सुखदाई ॥१॥
Dharma teṃ birati joga teṃ gyānā, gyāna mocchhaprada beda bakhānā. Jāteṃ begi dravauṃ maiṃ bhāī, so mama bhagati bhagata sukhadāī. (1)
127 of 355
सो सुतंत्र अवलंब न आना। तेहि आधीन ग्यान बिग्याना॥ भगति तात अनुपम सुखमूला। मिलइ जो संत होइँ अनुकूला ॥२॥
So sutaṃtra avalaṃba na ānā, tehi ādhīna gyāna bigyānā. Bhagati tāta anupama sukhamūlā, milai jo saṃta hoiṃ anukūlā. (2)
128 of 355
भगति कि साधन कहउँ बखानी। सुगम पंथ मोहि पावहिं प्रानी॥ प्रथमहिं बिप्र चरन अति प्रीती। निज निज कर्म निरत श्रुति रीती ॥३॥
Bhagati ki sādhana kahauṃ bakhānī, sugama paṃtha mohi pāvahiṃ prānī. Prathamahiṃ bipra carana ati prītī, nija nija karma nirata śruti rītī. (3)
129 of 355
एहि कर फल पुनि बिषय बिरागा। तब मम धर्म उपज अनुरागा॥ श्रवनादिक नव भक्ति दृढ़ाहीं। मम लीला रति अति मन माहीं ॥४॥
Ehi kara phala puni biṣaya birāgā, taba mama dharma upaja anurāgā. Śravanādika nava bhakti dṛṛhāhīṃ, mama līlā rati ati mana māhīṃ. (4)
130 of 355
संत चरन पंकज अति प्रेमा। मन क्रम बचन भजन दृढ़ नेमा॥ गुरु पितु मातु बंधु पति देवा। सब मोहि कहँ जानै दृढ़ सेवा ॥५॥
Saṃta carana paṃkaja ati premā, mana krama bacana bhajana dṛṛha nemā. Guru pitu mātu baṃdhu pati devā, saba mohi kahaṃ jānai dṛṛha sevā. (5)
131 of 355
मम गुन गावत पुलक सरीरा। गदगद गिरा नयन बह नीरा॥ काम आदि मद दंभ न जाकें। तात निरंतर बस मैं ताकें ॥६॥
Mama guna gāvata pulaka sarīrā, gadagada girā nayana baha nīrā. Kāma ādi mada daṃbha na jākeṃ, tāta niraṃtara basa maiṃ tākeṃ. (6)
132 of 355
दो०—बचन कर्म मन मोरि गति भजनु करहिं निःकाम। तिन्ह के हृदय कमल महुँ करउँ सदा बिश्राम ॥१६॥
Do—Bacana karma mana mori gati bhajanu karahiṃ niḥkāma, Tinha ke hṛdaya kamala mahuṃ karauṃ sadā biśrāma. (16)
133 of 355
भगति जोग सुनि अति सुख पावा। लछिमन प्रभु चरनन्हि सिरु नावा॥ एहि बिधि गए कछुक दिन बीती। कहत बिराग ग्यान गुन नीती ॥१॥
Bhagati joga suni ati sukha pāvā, Lachhimana prabhu carananhi siru nāvā. Ehi bidhi gae kachhuka dina bītī, kahata birāga gyāna guna nītī. (1)
134 of 355
सूपनखा रावन कै बहिनी। दुष्ट हृदय दारुन जस अहिनी॥ पंचबटी सो गइ एक बारा। देखि बिकल भइ जुगल कुमारा ॥२॥
Sūpanakhā Rāvana kai bahinī, duṣṭa hṛdaya dāruna jasa ahinī. Paṃcabaṭī so gai eka bārā, dekhi bikala bhai jugala kumārā. (2)
135 of 355
भ्राता पिता पुत्र उरगारी। पुरुष मनोहर निरखत नारी॥ होइ बिकल सक मनहि न रोकी। जिमि रबिमनि द्रव रबिहि बिलोकी ॥३॥
Bhrātā pitā putra uragārī, puruṣa manohara nirakhata nārī. Hoi bikala saka manahi na rokī, jimi rabimani drava rabihi bilokī. (3)
136 of 355
रुचिर रूप धरि प्रभु पहिं जाई। बोली बचन बहुत मुसुकाई॥ तुम्ह सम पुरुष न मो सम नारी। यह सँजोग बिधि रचा बिचारी ॥४॥
Rucira rūpa dhari prabhu pahiṃ jāī, bolī bacana bahuta musukāī. Tumha sama puruṣa na mo sama nārī, yaha saṃjoga bidhi racā bicārī. (4)
137 of 355
मम अनुरूप पुरुष जग माहीं। देखेउँ खोजि लोक तिहु नाहीं॥ तातें अब लगि रहिउँ कुमारी। मनु माना कछु तुम्हहि निहारी ॥५॥
Mama anurūpa puruṣa jaga māhīṃ, dekheuṃ khoji loka tihu nāhīṃ. Tāteṃ aba lagi rahiuṃ kumārī, manu mānā kachhu tumhahi nihārī. (5)
138 of 355
सीतहि चितइ कही प्रभु बाता। अहइ कुआर मोर लघु भ्राता॥ गइ लछिमन रिपु भगिनी जानी। प्रभु बिलोकि बोले मृदु बानी ॥६॥
Sītahi citai kahī prabhu bātā, ahai kuāra mora laghu bhrātā. Gai Lachhimana ripu bhaginī jānī, prabhu biloki bole mṛdu bānī. (6)
139 of 355
सुंदरि सुनु मैं उन्ह कर दासा। पराधीन नहिं तोर सुपासा॥ प्रभु समर्थ कोसलपुर राजा। जो कछु करहिं उनहि सब छाजा ॥७॥
Suṃdari sunu maiṃ unha kara dāsā, parādhīna nahiṃ tora supāsā. Prabhu samartha Kosalapura rājā, jo kachhu karahiṃ unahi saba chhājā. (7)
140 of 355
सेवक सुख चह मान भिखारी। ब्यसनी धन सुभ गति बिभिचारी॥ लोभी जसु चह चार गुमानी। नभ दुहि दूध चहत ए प्रानी ॥८॥
Sevaka sukha caha māna bhikhārī, byasanī dhana subha gati bibhicārī. Lobhī jasu caha cāra gumānī, nabha duhi dūdha cahata e prānī. (8)
141 of 355
पुनि फिरि राम निकट सो आई। प्रभु लछिमन पहिं बहुरि पठाई॥ लछिमन कहा तोहि सो बरई। जो तृन तोरि लाज परिहरई ॥९॥
Puni phiri Rāma nikaṭa so āī, prabhu Lachhimana pahiṃ bahuri paṭhāī. Lachhimana kahā tohi so barai, jo tṛna tori lāja pariharai. (9)
142 of 355
तब खिसिआनि राम पहिं गई। रूप भयंकर प्रगटत भई॥ सीतहि सभय देखि रघुराई। कहा अनुज सन सयन बुझाई ॥१०॥
Taba khisiāni Rāma pahiṃ gaī, rūpa bhayaṃkara pragaṭata bhaī. Sītahi sabhaya dekhi Raghurāī, kahā anuja sana sayana bujhāī. (10)
143 of 355
दो०—लछिमन अति लाघवँ सो नाक कान बिनु कीन्हि। ताके कर रावन कहँ मनौ चुनौती दीन्हि ॥१७॥
Do—Lachhimana ati lāghavaṃ so nāka kāna binu kīnhi, Tāke kara Rāvana kahaṃ manau cunautī dīnhi. (17)
144 of 355
नाक कान बिनु भइ बिकरारा। जनु स्रव सैल गेरु कै धारा॥ खर दूषन पहिं गइ बिलपाता। धिग धिग तव पौरुष बल भ्राता ॥१॥
Nāka kāna binu bhai bikarārā, janu srava saila geru kai dhārā. Khara dūṣana pahiṃ gai bilapātā, dhiga dhiga tava pauruṣa bala bhrātā. (1)
145 of 355
तेहिं पूछा सब कहेसि बुझाई। जातुधान सुनि सेन बनाई॥ धाए निसिचर निकर बरूथा। जनु सपच्छ कज्जल गिरि जूथा ॥२॥
Tehiṃ pūchhā saba kahesi bujhāī, jātudhāna suni sena banāī. Dhāe nisicara nikara barūthā, janu sapaccha kajjala giri jūthā. (2)
146 of 355
नाना बाहन नानाकारा। नानायुध धर घोर अपारा॥ सूपनखा आगें करि लीनी। असुभ रूप श्रुति नासा हीनी ॥३॥
Nānā bāhana nānākārā, nānāyudha dhara ghora apārā. Sūpanakhā āgeṃ kari līnī, asubha rūpa śruti nāsā hīnī. (3)
147 of 355
असगुन अमित होहिं भयकारी। गनहिं न मृत्यु बिबस सब झारी॥ गर्जहिं तर्जहिं गगन उड़ाहीं। देखि कटकु भट अति हरषाहीं ॥४॥
Asaguna amita hohiṃ bhayakārī, ganahiṃ na mṛtyu bibasa saba jhārī. Garjahiṃ tarjahiṃ gagana uṛāhīṃ, dekhi kaṭaku bhaṭa ati haraṣāhīṃ. (4)
148 of 355
कोउ कह जिअत धरहु द्वौ भाई। धरि मारहु तिय लेहु छड़ाई॥ धूरि पूरि नभ मंडल रहा। राम बोलाइ अनुज सन कहा ॥५॥
Kou kaha jiata dharahu dvau bhāī, dhari mārahu tiya lehu chhaṛāī. Dhūri pūri nabha maṃḍala rahā, Rāma bolāi anuja sana kahā. (5)
149 of 355
लै जानकिहि जाहु गिरि कंदर। आवा निसिचर कटकु भयंकर॥ रहेहु सजग सुनि प्रभु कै बानी। चले सहित श्री सर धनु पानी ॥६॥
Lai jānakihi jāhu giri kaṃdara, āvā nisicara kaṭaku bhayaṃkara. Rahehu sajaga suni prabhu kai bānī, cale sahita śrī sara dhanu pānī. (6)
150 of 355
देखि राम रिपुदल चलि आवा। बिहसि कठिन कोदंड चढ़ावा ॥७॥
Dekhi Rāma ripudala cali āvā, bihasi kaṭhina kodaṃḍa caṛhāvā. (7)
151 of 355
छं०—कोदंड कठिन चढ़ाइ सिर जट जूट बाँधत सोह क्यों। मरकत सयल पर लरत दामिनि कोटि सों जुग भुजग ज्यों॥ कटि कसि निषंग बिसाल भुज गहि चाप बिसिख सुधारि कै। चितवत मनहुँ मृगराज प्रभु गजराज घटा निहारि कै॥
Chhand—Kodaṃḍa kaṭhina caṛhāi sira jaṭa jūṭa bāṃdhata soha kyoṃ, Marakata sayala para larata dāmini koṭi soṃ juga bhujaga jyoṃ. Kaṭi kasi niṣaṃga bisāla bhuja gahi cāpa bisikha sudhāri kai, Citavata manahuṃ mṛgarāja prabhu gajarāja ghaṭā nihāri kai.
152 of 355
सो०—आइ गए बगमेल धरहु धरहु धावत सुभट। जथा बिलोकि अकेल बाल रबिहि घेरत दनुज ॥१८॥
So—Āi gae bagamela dharahu dharahu dhāvata subhaṭa, Jathā biloki akela bāla rabihi gherata danuja. (18)
153 of 355
प्रभु बिलोकि सर सकहिं न डारी। थकित भई रजनीचर धारी॥ सचिव बोलि बोले खर दूषन। यह कोउ नृपबालक नर भूषन ॥१॥
Prabhu biloki sara sakahiṃ na ḍārī, thakita bhaī rajanīcara dhārī. Saciva boli bole Khara dūṣana, yaha kou nṛpabālaka nara bhūṣana. (1)
154 of 355
नाग असुर सुर नर मुनि जेते। देखे जिते हते हम केते॥ हम भरि जन्म सुनहु सब भाई। देखी नहिं असि सुंदरताई ॥२॥
Nāga asura sura nara muni jete, dekhe jite hate hama kete. Hama bhari janma sunahu saba bhāī, dekhī nahiṃ asi suṃdaratāī. (2)
155 of 355
जद्यपि भगिनी कीन्हि कुरूपा। बध लायक नहिं पुरुष अनूपा॥ देहु तुरत निज नारि दुराई। जीअत भवन जाहु द्वौ भाई ॥३॥
Jadyapi bhaginī kīnhi kurūpā, badha lāyaka nahiṃ puruṣa anūpā. Dehu turata nija nāri durāī, jīata bhavana jāhu dvau bhāī. (3)
156 of 355
मोर कहा तुम्ह ताहि सुनावहु। तासु बचन सुनि आतुर आवहु॥ दूतन्ह कहा राम सन जाई। सुनत राम बोले मुसुकाई ॥४॥
Mora kahā tumha tāhi sunāvahu, tāsu bacana suni ātura āvahu. Dūtanha kahā Rāma sana jāī, sunata Rāma bole musukāī. (4)
157 of 355
हम छत्री मृगया बन करहीं। तुम्ह से खल मृग खोजत फिरहीं॥ रिपु बलवंत देखि नहिं डरहीं। एक बार कालहु सन लरहीं ॥५॥
Hama chhatrī mṛgayā bana karahīṃ, tumha se khala mṛga khojata phirahīṃ. Ripu balavaṃta dekhi nahiṃ ḍarahīṃ, eka bāra kālahu sana larahīṃ. (5)
158 of 355
जद्यपि मनुज दनुज कुल घालक। मुनि पालक खल सालक बालक॥ जौं न होइ बल घर फिरि जाहू। समर बिमुख मैं हतउँ न काहू ॥६॥
Jadyapi manuja danuja kula ghālaka, muni pālaka khala sālaka bālaka. Jauṃ na hoi bala ghara phiri jāhū, samara bimukha maiṃ hatauṃ na kāhū. (6)
159 of 355
रन चढ़ि करिअ कपट चतुराई। रिपु पर कृपा परम कदराई॥ दूतन्ह जाइ तुरत सब कहेऊ। सुनि खर दूषन उर अति दहेऊ॥
Rana caṛhi karia kapaṭa caturāī, ripu para kṛpā parama kadarāī. Dūtanha jāi turata saba kaheū, suni Khara dūṣana ura ati daheū.
160 of 355
छं०—उर दहेउ कहेउ कि धरहु धाए बिकट भट रजनीचरा। सर चाप तोमर सक्ति सूल कृपान परिघ परसु धरा॥ प्रभु कीन्हि धनुष टकोर प्रथम कठोर घोर भयावहा। भए बधिर ब्याकुल जातुधान न ग्यान तेहि अवसर रहा॥
Chhand—Ura daheu kaheu ki dharahu dhāe bikaṭa bhaṭa rajanīcarā, Sara cāpa tomara sakti sūla kṛpāna parigha parasu dharā. Prabhu kīnhi dhanuṣa ṭakora prathama kaṭhora ghora bhayāvahā, Bhae badhira byākula jātudhāna na gyāna tehi avasara rahā.
161 of 355
दो०—सावधान होइ धाए जानि सबल आराति। लागे बरषन राम पर अस्त्र सस्त्र बहुभाँति ॥१९(क)॥
Do—Sāvadhāna hoi dhāe jāni sabala ārāti, Lāge baraṣana Rāma para astra sastra bahubhām̐ti. (19a)
162 of 355
तिन्ह के आयुध तिल सम करि काटे रघुबीर। तानि सरासन श्रवन लगि पुनि छाँड़े निज तीर ॥१९(ख)॥
Tinha ke āyudha tila sama kari kāṭe Raghubīra, Tāni sarāsana śravana lagi puni chām̐ṛe nija tīra. (19b)
163 of 355
छं०—तब चले बान कराल। फुंकरत जनु बहु ब्याल॥ कोपेउ समर श्रीराम। चले बिसिख निसित निकाम॥
Chhand—Taba cale bāna karāla, phuṅkarata janu bahu byāla. Kopeu samara śrīrāma, cale bisikha nisita nikāma.
164 of 355
अवलोकि खरतर तीर। मुरि चले निसिचर बीर॥ भए क्रुद्ध तीनिउ भाइ। जो भागि रन ते जाइ॥
Avaloki Kharatara tīra, muri cale nisicara bīra. Bhae kruddha tīniu bhāi, jo bhāgi rana te jāi.
165 of 355
तेहि बधब हम निज पानि। फिरे मरन मन महुँ ठानि॥ आयुध अनेक प्रकार। सनमुख ते करहिं प्रहार॥
Tehi badhaba hama nija pāni, phire marana mana mahum̐ ṭhāni. Āyudha aneka prakāra, sanamukha te karahiṃ prahāra.
166 of 355
रिपु परम कोपे जानि। प्रभु धनुष सर संधानि॥ छाँड़े बिपुल नाराच। लगे कटन बिकट पिसाच॥
Ripu parama kope jāni, prabhu dhanuṣa sara saṃdhāni. Chām̐ṛe bipula nārāca, lage kaṭana bikaṭa pisāca.
167 of 355
उर सीस भुज कर चरन। जहँ तहँ लगे महि परन॥ चिक्करत लागत बान। धर परत कुधर समान॥
Ura sīsa bhuja kara carana, jaham̐ taham̐ lage mahi parana. Cikkarata lāgata bāna, dhara parata kudhara samāna.
168 of 355
भट कटत तन सत खंड। पुनि उठत करि पाषंड॥ नभ उड़त बहु भुज मुंड। बिनु मौलि धावत रुंड॥
Bhaṭa kaṭata tana sata khaṇḍa, puni uṭhata kari pāṣaṇḍa. Nabha uṛata bahu bhuja muṇḍa, binu mauli dhāvata ruṇḍa.
169 of 355
खग कंक काक सृगाल। कटकटहिं कठिन कराल॥
Khaga kaṅka kāka sṛgāla, kaṭakaṭahiṃ kaṭhina karāla.
170 of 355
छं०—कटकटहिं जंबुक भूत प्रेत पिसाच खर्पर संचहीं। बेताल बीर कपाल ताल बजाइ जोगिनि नंचहीं॥ रघुबीर बान प्रचंड खंडहिं भटन्ह के उर भुज सिरा। जहँ तहँ परहिं उठि लरहिं धर धरु धरु करहिं भयकर गिरा॥
Chhand—Kaṭakaṭahiṃ jaṃbuka bhūta preta pisāca Kharpara saṃcahīṃ, Betāla bīr kapāla tāla bajāi jogini naṃcahīṃ. Raghubīra bāna pracaṇḍa khaṇḍahiṃ bhaṭanha ke ura bhuja sirā, Jaham̐ taham̐ parahiṃ uṭhi larahiṃ dhara dharu dharu karahiṃ bhayakara girā.
171 of 355
अंतावरीं गहि उड़त गीध पिसाच कर गहि धावहीं। संग्राम पुर बासी मनहुँ बहु बाल गुड़ी उड़ावहीं॥ मारे पछारे उर बिदारे बिपुल भट कहँरत परे। अवलोकि निज दल बिकल भट तिसिरादि खर दूषन फिरे ॥२॥
Aṃtāvarīṃ gahi uṛata gīdha pisāca kara gahi dhāvahīṃ, Saṃgrāma pura bāsī manahum̐ bahu bāla guṛī uṛāvahīṃ. Māre pachāre ura bidāre bipula bhaṭa kaham̐rata pare, Avaloki nija dala bikala bhaṭa Tisirādi Khara dūṣana phire. (2)
172 of 355
सर सक्ति तोमर परसु सूल कृपान एकहि बारहीं। करि कोप श्रीरघुबीर पर अगनित निसाचर डारहीं॥ प्रभु निमिष महुँ रिपु सर निवारि पचारि डारे सायका। दस दस बिसिख उर माझ मारे सकल निसिचर नायका ॥३॥
Sara sakti tomara parasu sūla kṛpāna ekahi bārahīṃ, Kari kopa śrīraghubīra para aganita nisācara ḍārahīṃ. Prabhu nimiṣa mahum̐ ripu sara nivāri pacāri ḍāre sāyakā, Dasa dasa bisikha ura mājha māre sakala nisicara nāyakā. (3)
173 of 355
महि परत उठि भट भिरत मरत न करत माया अति घनी। सुर डरत चौदह सहस प्रेत बिलोकि एक अवध धनी॥ सुर मुनि सभय प्रभु देखि मायानाथ अति कौतुक करयो। देखहिं परसपर राम करि संग्राम रिपु दल लरि मरयो ॥४॥
Mahi parata uṭhi bhaṭa bhirata marata na karata māyā ati ghanī, Sura ḍarata caudaha sahasa preta biloki eka avadha dhanī. Sura muni sabhaya prabhu dekhi māyānātha ati kautuka karayo, Dekhahiṃ parasapara Rāma kari saṃgrāma ripu dala lari marayo. (4)
174 of 355
दो०—राम राम कहि तनु तजहिं पावहिं पद निर्बान। करि उपाय रिपु मारे छन महुँ कृपानिधान ॥२०(क)॥
Do—Rāma Rāma kahi tanu tajahiṃ pāvahiṃ pada nirbāna, Kari upāya ripu māre chana mahum̐ kṛpānidhāna. (20a)
175 of 355
हरषित बरषहिं सुमन सुर बाजहिं गगन निसान। अस्तुति करि करि सब चले सोभित बिबिध बिमान ॥२०(ख)॥
Haraṣita baraṣahiṃ sumana sura bājahiṃ gagana nisāna, Astuti kari kari saba cale sobhita bibidha bimāna. (20b)
176 of 355
जब रघुनाथ समर रिपु जीते। सुर नर मुनि सब के भय बीते॥ तब लछिमन सीतहि लै आए। प्रभु पद परत हरषि उर लाए॥
Jaba Raghunātha samara ripu jīte, sura nara muni saba ke bhaya bīte. Taba Lachimana sītahi lai āe, prabhu pada parata haraṣi ura lāe.
177 of 355
सीता चितव स्याम मृदु गाता। परम प्रेम लोचन न अघाता॥ पंचबटीं बसि श्रीरघुनायक। करत चरित सुर मुनि सुखदायक॥
Sītā citava syāma mṛdu gātā, parama prema locana na aghātā. Paṃcabaṭīṃ basi śrīraghunāyaka, karata carita sura muni sukhadāyaka.
178 of 355
धुआँ देखि खरदूषन केरा। जाइ सुपनखाँ रावन प्रेरा॥ बोली बचन क्रोध करि भारी। देस कोस कै सुरति बिसारी॥
Dhuām̐ dekhi Kharadūṣana kerā, jāi supanakhām̐ Rāvana prerā. Bolī bacana krodha kari bhārī, desa kosa kai surati bisārī.
179 of 355
करसि पान सोवसि दिनु राती। सुधि नहिं तव सिर पर आराती॥ राज नीति बिनु धन बिनु धर्मा। हरिहि समर्पें बिनु सतकर्मा॥ बिद्या बिनु बिबेक उपजाएँ। श्रम फल पढ़ें किएँ अरु पाएँ॥ संग तें जती कुमंत्र ते राजा। मान ते ग्यान पान तें लाजा॥
Karasi pāna sovasi dinu rātī, sudhi nahiṃ tava sira para ārātī. Rāja nīti binu dhana binu dharmā, harihi samarpeṃ binu satakarmā. Bidyā binu bibeka upajāeṃ, śrama phala paḍheṃ kieṃ aru pāeṃ. Saṃga teṃ jatī kumaṃtra te rājā, māna te gyāna pāna teṃ lājā.
180 of 355
प्रीति प्रनय बिनु मद ते गुनी। नासहिं बेगि नीति अस सुनी॥
Prīti pranaya binu mada te gunī, nāsahiṃ begi nīti asa sunī.
181 of 355
सो०—रिपु रुज पावक पाप प्रभु अहि गनिअ न छोट करि। अस कहि बिबिध बिलाप करि लागी रोदन करन ॥२१(क)॥
So—Ripu ruja pāvaka pāpa prabhu ahi gania na choṭa kari, Asa kahi bibidha bilāpa kari lāgī rodana karana. (21a)
182 of 355
दो०—सभा माझ परि ब्याकुल बहु प्रकार कह रोइ। तोहि जिअत दसकंधर मोरि कि असि गति होइ ॥२१(ख)॥
Do—Sabhā mājha pari byākula bahu prakāra kaha roi, Tohi jiata dasakaṃdhara mori ki asi gati hoi. (21b)
183 of 355
सुनत सभासद उठे अकुलाई। समुझाई गहि बाँह उठाई॥ कह लंकेस कहसि निज बाता। केइँ तव नासा कान निपाता॥
Sunata sabhāsada uṭhe akulāī, samujhāī gahi bām̐ha uṭhāī. Kaha laṃkesa kahasi nija bātā, keim̐ tava nāsā kāna nipātā.
184 of 355
अवध नृपति दसरथ के जाए। पुरुष सिंघ बन खेलन आए॥ समुझि परी मोहि उन्ह कै करनी। रहित निसाचर करिहहिं धरनी॥
Avadha nṛpati dasaratha ke jāe, puruṣa siṃgha bana khelana āe. Samujhi parī mohi unha kai karanī, rahita nisācara karihahiṃ dharanī.
185 of 355
जिन्ह कर भुजबल पाइ दसानन। अभय भए बिचरत मुनि कानन॥ देखत बालक काल समाना। परम धीर धन्वी गुन नाना॥
Jinha kara bhujabala pāi Dasānana, abhaya bhae bicarata muni kānana. Dekhata bālaka kāla samānā, parama dhīra dhanvī guna nānā.
186 of 355
अतुलित बल प्रताप द्वौ भाता। खल बध रत सुर मुनि सुखदाता॥ सोभा धाम राम अस नामा। तिन्ह के संग नारि एक स्यामा॥
Atulita bala pratāpa dvau bhātā, khala badha rata sura muni sukhadātā. Sobhā dhāma Rāma asa nāmā, tinha ke saṃga nāri eka syāmā.
187 of 355
रूप रासि बिधि नारि सँवारी। रति सत कोटि तासु बलिहारी॥ तासु अनुज काटे श्रुति नासा। सुनि तव भगिनि करहिं परिहासा॥
Rūpa rāsi bidhi nāri sam̐vārī, rati sata koṭi tāsu balihārī. Tāsu anuja kāṭe śruti nāsā, suni tava bhagini karahiṃ parihāsā.
188 of 355
खर दूषन सुनि लगे पुकारा। छन महुँ सकल कटक उन्ह मारा॥ खर दूषन तिसिरा कर घाता। सुनि दससीस जरे सब गाता॥
Khara dūṣana suni lage pukārā, chana mahum̐ sakala kaṭaka unha mārā. Khara dūṣana Tisirā kara ghātā, suni Dasasīsa jare saba gātā.
189 of 355
दो०—सूपनखहि समुझाइ करि बल बोलेसि बहु भाँति। गयउ भवन अति सोचबस नीद परइ नहिं राति ॥२२॥
Do—Sūpankhahi samujhāi kari bala bolesi bahu bhām̐ti, Gayau bhavana ati socabasa nīda parai nahiṃ rāti. (22)
190 of 355
सुर नर असुर नाग खग माहीं। मोरे अनुचर कहँ कोउ नाहीं॥ खर दूषन मोहि सम बलवंता। तिन्हहि को मारइ बिनु भगवंता॥
Sura nara asura nāga khaga māhīṃ, more anucara kaham̐ kou nāhīṃ. Khara dūṣana mohi sama balavaṃtā, tinhahi ko mārai binu bhagavaṃtā.
191 of 355
सुर रंजन भंजन महि भारा। जौं भगवंत लीन्ह अवतारा॥ तौ मैं जाइ बैरु हठि करऊँ। प्रभु सर प्रान तजें भव तरऊँ॥
Sura raṃjana bhaṃjana mahi bhārā, jauṃ bhagavaṃta līnha avatārā. Tau maiṃ jāi bairu haṭhi karaūṃ, prabhu sara prāna tajeṃ bhava taraūṃ.
192 of 355
होइहि भजनु न तामस देहा। मन क्रम बचन मंत्र दृढ़ एहा॥ जौं नररूप भूपसुत कोऊ। हरिहउँ नारि जीति रन दोऊ॥
Hoihi bhajanu na tāmasa dehā, mana krama bacana maṃtra dṛḍha ehā. Jauṃ nararūpa bhūpasuta koū, harihaum̐ nāri jīti rana doū.
193 of 355
चला अकेल जान चढ़ि तहवाँ। बस मारीच सिंधु तट जहवाँ॥ इहाँ राम जसि जुगुति बनाई। सुनहु उमा सो कथा सुहाई॥
Calā akela jāna caṛhi tahavām̐, basa Mārīca siṃdhu taṭa jahavām̐. Ihām̐ Rāma jasi juguti banāī, sunahu Umā so kathā suhāī.
194 of 355
दो०—लछिमन गए बनहिं जब लेन मूल फल कंद। जनकसुता सन बोले बिहसि कृपा सुख बृंद ॥२३॥
Do—Lachimana gae banahiṃ jaba lena mūla phala kaṃda, Janakasutā sana bole bihasi kṛpā sukha bṛṃda. (23)
195 of 355
सुनहु प्रिया ब्रत रुचिर सुसीला। मैं कछु करबि ललित नरलीला॥ तुम्ह पावक महुँ करहु निवासा। जौ लगि करौं निसाचर नासा॥
Sunahu priyā brata rucira susīlā, maiṃ kachu karabi lalita naralīlā. Tumha pāvaka mahum̐ karahu nivāsā, jau lagi karauṃ nisācara nāsā.
196 of 355
जबहिं राम सब कहा बखानी। प्रभु पद धरि हियँ अनल समानी॥ निज प्रतिबिंब राखि तहँ सीता। तैसइ सील रूप सुबिनीता॥
Jabahiṃ Rāma saba kahā bakhānī, prabhu pada dhari hiyam̐ anala samānī. Nija pratibiṃba rākhi taham̐ Sītā, taisai sīla rūpa subinītā.
197 of 355
लछिमनहूँ यह मरमु न जाना। जो कछु चरित रचा भगवाना॥ दसमुख गयउ जहाँ मारीचा। नाइ माथ स्वारथ रत नीचा॥
Lachimanahūṃ yaha maramu na jānā, jo kachu carita racā bhagavānā. Dasamukha gayau jahām̐ Mārīcā, nāi mātha svāratha rata nīcā.
198 of 355
नवनि नीच कै अति दुखदाई। जिमि अंकुस धनु उरग बिलाई॥ भयदायक खल कै प्रिय बानी। जिमि अकाल के कुसुम भवानी॥
Navani nīca kai ati dukhadāī, jimi aṃkusa dhanu uraga bilāī. Bhayadāyaka khala kai priya bānī, jimi akāla ke kusuma Bhavānī.
199 of 355
दो०—करि पूजा मारीच तब सादर पूछी बात। कवन हेतु मन ब्यग्र अति अकसर आयहु तात ॥२४॥
Do—Kari pūjā Mārīca taba sādara pūchī bāta, Kavana hetu mana byagra ati akasara āyahu tāta. (24)
200 of 355
दसमुख सकल कथा तेहि आगें। कही सहित अभिमान अभागें॥ होहु कपट मृग तुम्ह छलकारी। जेहि बिधि हरि आनौं नृपनारी॥
Dasamukha sakala kathā tehi āgeṃ, kahī sahita abhimāna abhāgeṃ. Hohu kapaṭa mṛga tumha chalakārī, jehi bidhi hari ānauṃ nṛpanārī.
201 of 355
तेहिं पुनि कहा सुनहु दससीसा। ते नररूप चराचर ईसा॥ तासों तात बयरु नहिं कीजै। मारें मरिअ जिआएँ जीजै॥
Tehiṃ puni kahā sunahu Dasasīsā, te nararūpa carācara īsā. Tāsoṃ tāta bayaru nahiṃ kījai, māreṃ maria jiāeṃ jījai.
202 of 355
मुनि मख राखन गयउ कुमारा। बिनु फर सर रघुपति मोहि मारा॥ सत जोजन आयउँ छन माहीं। तिन्ह सन बयरु किएँ भल नाहीं॥
Muni makha rākhana gayau kumārā, binu phara sara Raghupati mohi mārā. Sata jojana āyaum̐ chana māhīṃ, tinha sana bayaru kieṃ bhala nāhīṃ.
203 of 355
भइ मम कीट भृंग की नाई। जहँ तहँ मैं देखउँ दोउ भाई॥ जौं नर तात तदपि अति सूरा। तिन्हहि बिरोधि न आइहि पूरा॥
Bhai mama kīṭa bhṛṃga kī nāī, jaham̐ taham̐ maiṃ dekhaum̐ dou bhāī. Jauṃ nara tāta tadapi ati sūrā, tinhahi birodhi na āihi pūrā.
204 of 355
दो०—जेहिं ताड़का सुबाहु हति खंडेउ हर कोदंड। खर दूषन तिसिरा बधेउ मनुज कि अस बरिबंड ॥२५॥
Do—Jehiṃ tāṛakā subāhu hati khaṇḍeu hara kodaṇḍa, Khara dūṣana Tisirā badheu manuja ki asa baribaṇḍa. (25)
205 of 355
जाहु भवन कुल कुसल बिचारी। सुनत जरा दीन्हिसि बहु गारी॥ गुरु जिमि मूढ़ करसि मम बोधा। कहु जग मोहि समान को जोधा॥
Jāhu bhavana kula kusala bicārī, sunata jarā dīnhisi bahu gārī. Guru jimi mūṛha karasi mama bodhā, kahu jaga mohi samāna ko jodhā.
206 of 355
तब मारीच हृदयँ अनुमाना। नवहि बिरोधें नहिं कल्याना॥ सस्त्री मर्मी प्रभु सठ धनी। बैद बंदि कबि भानस गुनी॥
Taba Mārīca hṛdayam̐ anumānā, navahi birodheṃ nahiṃ kalyānā. Sastrī marmī prabhu saṭha dhanī, baida baṃdi kabi bhānasa gunī.
207 of 355
उभय भाँति देखा निज मरना। तब ताकिसि रघुनायक सरना॥ उतरु देत मोहि बधब अभागें। कस न मरौं रघुपति सर लागें॥
Ubhaya bhām̐ti dekhā nija maranā, taba tākisi Raghunāyaka saranā. Utaru deta mohi badhaba abhāgeṃ, kasa na maraum̐ Raghupati sara lāgeṃ.
208 of 355
अस जियँ जानि दसानन संगा। चला राम पद प्रेम अभंगा॥ मन अति हरष जनाव न तेही। आजु देखिहउँ परम सनेही॥
Asa jiyam̐ jāni Dasānana saṃgā, calā Rāma pada prema abhaṃgā. Mana ati haraṣa janāva na tehī, āju dekhihaum̐ parama sanehī.
209 of 355
छं०—निज परम प्रीतम देखि लोचन सुफल करि सुख पाइहौं। श्री सहित अनुज समेत कृपानिकेत पद मन लाइहौं॥ निर्बान दायक क्रोध जा कर भगति अबसहि बसकरी। निज पानि सर संधानि सो मोहि बधिहि सुखसागर हरी॥
Chhand—Nija parama prītama dekhi locana suphala kari sukha pāihauṃ, Śrī sahita anuja sameta kṛpāniketa pada mana lāihauṃ. Nirbāna dāyaka krodha jā kara bhagati abasahi basakarī, Nija pāni sara saṃdhāni so mohi badhihi sukhasāgara harī.
210 of 355
दो०—मम पाछें धर धावत धरें सरासन बान। फिरि फिरि प्रभुहि बिलोकिहउँ धन्य न मो सम आन ॥२६॥
Do—Mama pācheṃ dhara dhāvata dhareṃ sarāsana bāna, Phiri phiri prabhuhi bilokihaum̐ dhanya na mo sama āna. (26)
211 of 355
तेहि बन निकट दसानन गयऊ। तब मारीच कपटमृग भयऊ॥ अति बिचित्र कछु बरनि न जाई। कनक देह मनि रचित बनाई॥
Tehi bana nikaṭa Dasānana gayaū, taba Mārīca kapaṭamṛga bhayaū. Ati bicitra kachu barani na jāī, kanaka deha mani racita banāī.
212 of 355
सीता परम रुचिर मृग देखा। अंग अंग सुमनोहर बेषा॥ सुनहु देव रघुबीर कृपाला। एहि मृग कर अति सुंदर छाला॥
Sītā parama rucira mṛga dekhā, aṃga aṃga sumanohara beṣā. Sunahu deva Raghubīra kṛpālā, ehi mṛga kara ati suṃdara chālā.
213 of 355
सत्यसंध प्रभु बधि करि एही। आनहु चर्म कहति बैदेही॥ तब रघुपति जानत सब कारन। उठे हरषि सुर काजु सँवारन॥
Satyasaṃdha prabhu badhi kari ehī, ānahu carma kahati Baidehī. Taba Raghupati jānata saba kārana, uṭhe haraṣi sura kāju sam̐vārana.
214 of 355
मृग बिलोकि कटि परिकर बाँधा। करतल चाप रुचिर सर साँधा॥ प्रभु लछिमनहि कहा समुझाई। फिरत बिपिन निसिचर बहु भाई॥
Mṛga biloki kaṭi parikara bām̐dhā, karatala cāpa rucira sara sām̐dhā. Prabhu Lachimanahi kahā samujhāī, phirata bipina nisicara bahu bhāī.
215 of 355
सीता केरि करेहु रखवारी। बुधि बिबेक बल समय बिचारी॥ प्रभुहि बिलोकि चला मृग भाजी। धाए रामु सरासन साजी॥
Sītā keri karehu rakhavārī, budhi bibeka bala samaya bicārī. Prabhuhi biloki calā mṛga bhājī, dhāe Rāmu sarāsana sājī.
216 of 355
निगम नेति सिव ध्यान न पावा। मायामृग पाछें सो धावा॥ कबहुँ निकट पुनि दूरि पराई। कबहुँक प्रगटइ कबहुँ छपाई॥
Nigama neti siva dhyāna na pāvā, māyāmṛga pācheṃ so dhāvā. Kabahum̐ nikaṭa puni dūri parāī, kabahum̐ka pragaṭai kabahum̐ chapāī.
217 of 355
प्रगटत दुरत करत छल भूरी। एहि बिधि प्रभुहि गयउ लै दूरी॥ तब तकि राम कठिन सर मारा। धरनि परेउ करि घोर पुकारा॥
Pragaṭata durata karata chala bhūrī, ehi bidhi prabhuhi gayau lai dūrī. Taba taki Rāma kaṭhina sara mārā, dharani pareu kari ghora pukārā.
218 of 355
लछिमन कर प्रथमहिं लै नामा। पाछें सुमिरेसि मन महुँ रामा॥ प्रान तजत प्रगटेसि निज देहा। सुमिरेसि रामु समेत सनेहा॥
Lachimana kara prathamahiṃ lai nāmā, pācheṃ sumiresi mana mahum̐ Rāmā. Prāna tajata pragaṭesi nija dehā, sumiresi Rāmu sameta sanehā.
219 of 355
अंतर प्रेम तासु पहिचाना। मुनि दुर्लभ गति दीन्हि सुजाना ॥९॥
Aṃtara prema tāsu pahicānā, muni durlabha gati dīnhi sujānā. (9)
220 of 355
दो०—बिपुल सुमन सुर बरषहिं गावहिं प्रभु गुन गाथ। निज पद दीन्ह असुर कहुँ दीनबंधु रघुनाथ ॥२७॥
Do—Bipula sumana sura baraṣahiṃ gāvahiṃ prabhu guna gātha, Nija pada dīnha asura kahum̐ dīnabaṃdhu Raghunātha. (27)
221 of 355
खल बधि तुरत फिरे रघुबीरा। सोह चाप कर कटि तूनीरा॥ आरत गिरा सुनी जब सीता। कह लछिमन सन परम सभीता॥
Khala badhi turata phire Raghubīrā, soha cāpa kara kaṭi tūnīrā. Ārata girā sunī jaba Sītā, kaha Lachimana sana parama sabhītā.
222 of 355
जाहु बेगि संकट अति भ्राता। लछिमन बिहसि कहा सुनु माता॥ भृकुटि बिलास सृष्टि लय होई। सपनेहुँ संकट परइ कि सोई॥
Jāhu begi saṃkaṭa ati bhrātā, Lachimana bihasi kahā sunu mātā. Bhṛkuṭi bilāsa sṛṣṭi laya hoī, sapanehum̐ saṃkaṭa parai ki soī.
223 of 355
मरम बचन जब सीता बोला। हरि प्रेरित लछिमन मन डोला॥ बन दिसि देव सौंपि सब काहू। चले जहाँ रावन ससि राहू॥
Marama bacana jaba Sītā bolā, hari prerita Lachimana mana ḍolā. Bana disi deva saum̐pi saba kāhū, cale jahām̐ Rāvana sasi rāhū.
224 of 355
सून बीच दसकंधर देखा। आवा निकट जती के बेषा॥ जाकें डर सुर असुर डेराहीं। निसि न नीद दिन अन्न न खाहीं॥
Sūna bīca dasakaṃdhara dekhā, āvā nikaṭa jatī ke beṣā. Jākeṃ ḍara sura asura ḍerāhīṃ, nisi na nīda dina anna na khāhīṃ.
225 of 355
सो दससीस स्वान की नाईं। इत उत चितइ चला भड़िहाईं॥ इमि कुपंथ पग देत खगेसा। रह न तेज तन बुधि बल लेसा॥
So Dasasīsa svāna kī nāīṃ, ita uta citai calā bhaṛihāī. Imi kupaṃtha paga deta khagesā, raha na teja tana budhi bala lesā.
226 of 355
नाना बिधि करि कथा सुहाई। राजनीति भय प्रीति देखाई॥ कह सीता सुनु जती गोसाईं। बोलेहु बचन दुष्ट की नाईं॥
Nānā bidhi kari kathā suhāī, rājanīti bhaya prīti dekhāī. Kaha Sītā sunu jatī gosāīṃ, bolehu bacana duṣṭa kī nāīṃ.
227 of 355
तब रावन निज रूप देखावा। भई सभय जब नाम सुनावा॥ कह सीता धरि धीरजु गाढ़ा। आइ गयउ प्रभु रहु खल ठाढ़ा॥
Taba Rāvana nija rūpa dekhāvā, bhaī sabhaya jaba nāma sunāvā. Kaha Sītā dhari dhīraju gāṛhā, āi gayau prabhu rahu khala ṭhāṛhā.
228 of 355
जिमि हरिबधुहि छुद्र सस चाहा। भएसि कालबस निसिचर नाहा॥ सुनत बचन दससीस रिसाना। मन महुँ चरन बंदि सुख माना॥
Jimi haribadhuhi chudra sasa cāhā, bhaesi kālabasa nisicara nāhā. Sunata bacana Dasasīsa risānā, mana mahum̐ carana baṃdi sukha mānā.
229 of 355
दो०—क्रोधवंत तब रावन लीन्हिसि रथ बैठाइ। चला गगनपथ आतुर भयँ रथ हाँकि न जाइ ॥२८॥
Do—Krodhavaṃta taba Rāvana līnhisi ratha baiṭhāi, Calā gaganapatha ātura bhayam̐ ratha hām̐ki na jāi. (28)
230 of 355
हा जग एक बीर रघुराया। केहिं अपराध बिसारेहु दाया॥ आरति हरन सरन सुखदायक। हा रघुकुल सरोज दिननायक॥
Hā jaga eka bīra raghurāyā, kehiṃ aparādha bisārehu dāyā. Ārati harana sarana sukhadāyaka, hā Raghukula saroja dinanāyaka.
231 of 355
हा लछिमन तुम्हार नहिं दोसा। सो फलु पायउँ कीन्हेउँ रोसा॥ बिबिध बिलाप करति बैदेही। भूरि कृपा प्रभु दूरि सनेही॥
Hā Lachimana tumhāra nahiṃ dosā, so phalu pāyaum̐ kīnheum̐ rosā. Bibidha bilāpa karati Baidehī, bhūri kṛpā prabhu dūri sanehī.
232 of 355
बिपति मोरि को प्रभुहि सुनावा। पुरोडास चह रासभ खावा॥ सीता कै बिलाप सुनि भारी। भए चराचर जीव दुखारी॥
Bipati mori ko prabhuhi sunāvā, purodāsa caha rāsabha khāvā. Sītā kai bilāpa suni bhārī, bhae carācara jīva dukhārī.
233 of 355
गीधराज सुनि आरत बानी। रघुकुलतिलक नारि पहिचानी॥ अधम निसाचर लीन्हें जाई। जिमि मलेछ बस कपिला गाई॥
Gīdharāja suni ārata bānī, Raghukulatilaka nāri pahicānī. Adhama nisācara līnheṃ jāī, jimi malecha basa kapilā gāī.
234 of 355
सीते पुत्रि करसि जनि त्रासा। करिहउँ जातुधान कर नासा॥ धावा क्रोधवंत खग कैसें। छूटइ पबि परबत कहुँ जैसें॥
Sīte putri karasi jani trāsā, karihaum̐ jātudhāna kara nāsā. Dhāvā krodhvaṃta khaga kaiseṃ, chūṭai pabi parabata kahum̐ jaiseṃ.
235 of 355
रे रे दुष्ट ठाढ़ किन होही। निर्भय चलेसि न जानेहि मोही॥ आवत देखि कृतांत समाना। फिरि दसकंधर कर अनुमाना॥
Re re duṣṭa ṭhāṛha kina hohī, nirbhaya calesi na jānehi mohī. Āvata dekhi kṛtāṃta samānā, phiri dasakaṃdhara kara anumānā.
236 of 355
की मैनाक कि खगपति होई। मम बल जान सहित पति सोई॥ जाना जरठ जटायू एहा। मम कर तीरथ छाँड़िहि देहा॥
Kī maināka ki khagapati hoī, mama bala jāna sahita pati soī. Jānā jaraṭha Jaṭāyū ehā, mama kara tīratha chām̐ṛihi dehā.
237 of 355
सुनत गीध क्रोधातुर धावा। कह सुनु रावन मोर सिखावा॥ तजि जानकिहि कुसल गृह जाहू। नाहिं त अस होइहि बहुबाहू॥
Sunata gīdha krodhātura dhāvā, kaha sunu Rāvana mora sikhāvā. Taji jānakihi kusala gṛha jāhū, nāhiṃ ta asa hoihi bahubāhū.
238 of 355
राम रोष पावक अति घोरा। होइहि सकल सलभ कुल तोरा॥ उतरु न देत दसानन जोधा। तबहिं गीध धावा करि क्रोधा॥
Rāma roṣa pāvaka ati ghorā, hoihi sakala salabha kula torā. Utaru na deta Dasānana jodhā, tabahiṃ gīdha dhāvā kari krodhā.
239 of 355
धरि कच बिरथ कीन्ह महि गिरा। सीतहि राखि गीध पुनि फिरा॥ चोंचन्ह मारि बिदारेसि देही। दंड एक भइ मुरुछा तेही१०॥
Dhari kaca biratha kīnha mahi girā, sītahi rākhi gīdha puni phirā. Coṃcanha māri bidāresi dehī, daṃḍa eka bhai muruchā tehī.
240 of 355
तब सक्रोध निसिचर खिसिआना। काढ़ेसि परम कराल कृपाना॥ काटेसि पंख परा खग धरनी। सुमिरि राम करि अदभुत करनी ॥११॥
Taba sakrodh nisichar khisiānā, kāḍhesi param karāl kṛpānā. Kāṭesi paṅkh parā khag dharanī, sumiri Rām kari adbhut karanī. (11)
241 of 355
सीतहि जान चढ़ाइ बहोरी। चला उताइल त्रास न थोरी॥ करति बिलाप जाति नभ सीता। ब्याध बिबस जनु मृगी सभीता ॥१२॥
Sītahi jān chaḍhāi bahorī, chalā utāil trās na thorī. Karati bilāp jāti nabh Sītā, byādh bibas janu mṛgī sabhītā. (12)
242 of 355
गिरि पर बैठे कपिन्ह निहारी। कहि हरि नाम दीन्ह पट डारी॥ एहि बिधि सीतहि सो लै गयऊ। बन असोक महँ राखत भयऊ ॥१३॥
Giri par baiṭhe kapinha nihārī, kahi hari nām dīnh paṭ ḍārī. Ehi bidhi sītahi so lai gayaū, ban asok mahaṃ rākhat bhayaū. (13)
243 of 355
दो०—हारि परा खल बहु बिधि भय अरु प्रीति देखाइ। तब असोक पादप तर राखिसि जतन कराइ ॥२९(क)॥
Do—Hāri parā khal bahu bidhi bhaya aru prīti dekhāi, Taba asok pādap tar rākhisi jatan karāi. (29a)
244 of 355
जेहि बिधि कपट कुरंग सँग धाइ चले श्रीराम। सो छबि सीता राखि उर रटति रहति हरिनाम ॥२९(ख)॥
Jehi bidhi kapaṭ kurang sang dhāi chale śrīrām, So chhabi Sītā rākhi ur raṭati rahati harināma. (29b)
245 of 355
रघुपति अनुजहि आवत देखी। बाहिज चिंता कीन्हि बिसेषी॥ जनकसुता परिहरिहु अकेली। आयहु तात बचन मम पेली ॥१॥
Raghupati anujahi āvat dekhī, bāhij chintā kīnhi biseṣī. Janakasutā pariharihu akelī, āyahu tāta bachan mama pelī. (1)
246 of 355
निसिचर निकर फिरहिं बन माहीं। मम मन सीता आश्रम नाहीं॥ गहि पद कमल अनुज कर जोरी। कहेउ नाथ कछु मोहि न खोरी ॥२॥
Nisicara nikara phirahiṃ bana māhīṃ, mama mana Sītā āśrama nāhīṃ. Gahi pada kamala anuja kara jorī, kaheu nātha kachu mohi na khorī. (2)
247 of 355
अनुज समेत गए प्रभु तहवाँ। गोदावरि तट आश्रम जहवाँ॥ आश्रम देखि जानकी हीना। भए बिकल जस प्राकृत दीना ॥३॥
Anuja sameta gae prabhu tahavām̐, godāvari taṭa āśrama jahavām̐. Āśrama dekhi Jānakī hīnā, bhae bikala jasa prākṛta dīnā. (3)
248 of 355
हा गुन खानि जानकी सीता। रूप सील ब्रत नेम पुनीता॥ लछिमन समुझाए बहु भाँती। पूछत चले लता तरु पाँती ॥४॥
Hā guna khāni Jānakī Sītā, rūpa sīla brata nema punītā. Lachimana samujhāe bahu bhām̐tī, pūchata cale latā taru pām̐tī. (4)
249 of 355
हे खग मृग हे मधुकर श्रेनी। तुम्ह देखी सीता मृगनैनी॥ खंजन सुक कपोत मृग मीना। मधुप निकर कोकिला प्रबीना ॥५॥
He khaga mṛga he madhukara śrenī, tumha dekhī Sītā mṛganainī. Khaṃjana suka kapota mṛga mīnā, madhupa nikara kokilā prabīnā. (5)
250 of 355
कुंद कली दाड़िम दामिनी। कमल सरद ससि अहिभामिनी॥ बरुन पास मनोज धनु हंसा। गज केहरि निज सुनत प्रसंसा ॥६॥
Kuṃda kalī dāṛima dāminī, kamala sarada sasi ahibhāminī. Baruna pāsa manoja dhanu haṃsā, gaja kehari nija sunata prasaṃsā. (6)
251 of 355
श्रीफल कनक कदलि हरषाहीं। नेकु न संक सकुच मन माहीं॥ सुनु जानकी तोहि बिनु आजू। हरषे सकल पाइ जनु राजू ॥७॥
Śrīphala kanaka kadali haraṣāhīṃ, neku na saṃka sakuca mana māhīṃ. Sunu Jānakī tohi binu ājū, haraṣe sakala pāi janu rājū. (7)
252 of 355
किमि सहि जात अनख तोहि पाहीं। प्रिया बेगि प्रगटसि कस नाहीं॥ एहि बिधि खोजत बिलपत स्वामी। मनहु महा बिरही अति कामी ॥८॥
Kimi sahi jāta anakha tohi pāhīṃ, priyā begi pragaṭasi kasa nāhīṃ. Ehi bidhi khojata bilapata svāmī, manahu mahā birahī ati kāmī. (8)
253 of 355
पूरनकाम राम सुख रासी। मनुजचरित कर अज अबिनासी॥ आगें परा गीधपति देखा। सुमिरत राम चरन जिन्ह रेखा ॥९॥
Pūranakāma Rāma sukha rāsī, manujacarita kara aja abināsī. Āgem̐ parā gīdhapati dekhā, sumirata Rāma carana jinha rekhā. (9)
254 of 355
दो०—कर सरोज सिर परसेउ कृपासिंधु रघुबीर। निरखि राम छबि धाम मुख बिगत भई सब पीर ॥३०॥
Do—Kara saroja sira paraseu kṛpāsiṃdhu Raghubīra, Nirakhi Rāma chabi dhāma mukha bigata bhaī saba pīra. (30)
255 of 355
तब कह गीध बचन धरि धीरा। सुनहु राम भंजन भव भीरा॥ नाथ दसानन यह गति कीन्ही। तेहिं खल जनकसुता हरि लीन्ही ॥१॥
Taba kaha gīdha bacana dhari dhīrā, sunahu Rāma bhaṃjana bhava bhīrā. Nātha Dasānana yaha gati kīnhī, tehiṃ khala Janakasutā hari līnhī. (1)
256 of 355
लै दच्छिन दिसि गयउ गोसाईं। बिलपति अति कुररी की नाईं॥ दरस लागि प्रभु राखेउँ प्राना। चलन चहत अब कृपानिधाना ॥२॥
Lai dacchina disi gayau gosāīm̐, bilapati ati kururī kī nāīm̐. Darasa lāgi prabhu rākheum̐ prānā, calana cahata aba kṛpānidhānā. (2)
257 of 355
राम कहा तनु राखहु ताता। मुख मुसुकाइ कही तेहिं बाता॥ जा कर नाम मरत मुख आवा। अधमउ मुकुत होइ श्रुति गावा ॥३॥
Rāma kahā tanu rākhahu tātā, mukha musukāi kahī tehiṃ bātā. Jā kara nāma marata mukha āvā, adhamau mukuta hoi śruti gāvā. (3)
258 of 355
सो मम लोचन गोचर आगें। राखौं देह नाथ केहि खाँगें॥ जल भरि नयन कहहिं रघुराई। तात कर्म निज तें गति पाई ॥४॥
So mama locana gocara āgem̐, rākhaum̐ deha nātha kehi khām̐gem̐. Jala bhari nayana kahahiṃ Raghurāī, tāta karma nija tem̐ gati pāī. (4)
259 of 355
परहित बस जिन्ह के मन माहीं। तिन्ह कहुँ जग दुर्लभ कछु नाहीं॥ तनु तजि तात जाहु मम धामा। देउँ काह तुम्ह पूरनकामा ॥५॥
Parahita basa jinha ke mana māhīṃ, tinha kahum̐ jaga durlabha kachu nāhīṃ. Tanu taji tāta jāhu mama dhāmā, deum̐ kāha tumha pūranakāmā. (5)
260 of 355
दो०—सीता हरन तात जनि कहहु पिता सन जाइ। जौं मैं राम त कुल सहित कहिहि दसानन आइ ॥३१॥
Do—Sītā harana tāta jani kahahu pitā sana jāi, Jaum̐ maiṃ Rāma ta kula sahita kahihi Dasānana āi. (31)
261 of 355
गीध देह तजि धरि हरि रूपा। भूषन बहु पट पीत अनूपा॥ स्याम गात बिसाल भुज चारी। अस्तुति करत नयन भरि बारी ॥१॥
Gīdha deha taji dhari hari rūpā, bhūṣana bahu paṭa pīta anūpā. Syāma gāta bisāla bhuja cārī, astuti karata nayana bhari bārī. (1)
262 of 355
छं०—जय राम रूप अनूप निर्गुन सगुन गुन प्रेरक सही। दससीस बाहु प्रचंड खंडन चंड सर मंडन मही। पाथोद गात सरोज मुख राजीव आयत लोचनं। नित नौमि रामु कृपाल बाहु बिसाल भव भय मोचनं ॥१॥
Chhand—Jaya Rāma rūpa anūpa nirguna saguna guna preraka sahī, Dasasīsa bāhu pracaṃḍa khaṃḍana caṃḍa sara maṃḍana mahī, Pāthoda gāta saroja mukha rājīva āyata locanaṃ, Nita naumi Rāmu kṛpāla bāhu bisāla bhava bhaya mocanaṃ. (1)
263 of 355
बलमप्रमेयमनादिमजमब्यक्तमेकमगोचरं। गोबिंद गोपर द्वंद्वहर बिग्यानघन धरनीधरं॥ जे राम मंत्र जपंत संत अनंत जन मन रंजनं। नित नौमि राम अकाम प्रिय कामादि खल दल गंजनं ॥२॥
Balamaprameyamanādimajamabyaktamekamagocaraṃ, gobiṃda gopara dvaṃdvahara bigyānaghana dharanīdharaṃ. Je Rāma maṃtra japaṃta saṃta anaṃta jana mana raṃjanaṃ, nita naumi Rāma akāma priya kāmādi khala dala gaṃjanaṃ. (2)
264 of 355
जेहि श्रुति निरंजन ब्रह्म ब्यापक बिरज अज कहि गावहीं। करि ध्यान ग्यान बिराग जोग अनेक मुनि जेहि पावहीं॥ सो प्रगट करुना कंद सोभा बृंद अग जग मोहई। मम हृदय पंकज भृंग अंग अनंग बहु छबि सोहई ॥३॥
Jehi śruti niraṃjana brahma byāpaka biraja aja kahi gāvahīṃ, kari dhyāna gyāna birāga joga aneka muni jehi pāvahīṃ. So pragaṭa karunā kaṃda sobhā bṛṃda aga jaga mohaī, mama hṛdaya paṃkaja bhṛṃga aṃga anaṃga bahu chabi sohaī. (3)
265 of 355
जो अगम सुगम सुभाव निर्मल असम सम सीतल सदा। पस्यंति जं जोगी जतन करि करत मन गो बस सदा॥ सो राम रमा निवास संतत दास बस त्रिभुवन धनी। मम उर बसउ सो समन संसृति जासु कीरति पावनी ॥४॥
Jo agama sugama subhāva nirmala asama sama sītala sadā, pasyaṃti jaṃ jogī jatana kari karata mana go basa sadā. So Rāma ramā nivāsa saṃtata dāsa basa tribhuvana dhanī, mama ura basau so samana saṃsṛti jāsu kīrati pāvanī. (4)
266 of 355
दो०—अबिरल भगति मागि बर गीध गयउ हरिधाम। तेहि की क्रिया जथोचित निज कर कीन्ही राम ॥३२॥
Do—Abirala bhagati māgi bara gīdha gayau haridhāma, Tehi kī kriyā jathocita nija kara kīnhī Rāma. (32)
267 of 355
कोमल चित अति दीनदयाला। कारन बिनु रघुनाथ कृपाला॥ गीध अधम खग आमिष भोगी। गति दीन्ही जो जाचत जोगी ॥१॥
Komala cita ati dīnadayālā, kārana binu Raghunātha kṛpālā. Gīdha adhama khaga āmiṣa bhogī, gati dīnhī jo jācata jogī. (1)
268 of 355
सुनहु उमा ते लोग अभागी। हरि तजि होहिं बिषय अनुरागी॥ पुनि सीतहि खोजत द्वौ भाई। चले बिलोकत बन बहुताई ॥२॥
Sunahu Umā te loga abhāgī, hari taji hohiṃ biṣaya anurāgī. Puni sītahi khojata dvau bhāī, cale bilokata bana bahutāī. (2)
269 of 355
संकुल लता बिटप घन कानन। बहु खग मृग तहँ गज पंचानन॥ आवत पंथ कबंध निपाता। तेहिं सब कही साप कै बाता ॥३॥
Saṃkula latā biṭapa ghana kānana, bahu khaga mṛga taham̐ gaja paṃcānana. Āvata paṃtha kabaṃdha nipātā, tehiṃ saba kahī sāpa kai bātā. (3)
270 of 355
दुरबासा मोहि दीन्ही सापा। प्रभु पद पेखि मिटा सो पापा॥ सुनु गंधर्ब कहउँ मैं तोही। मोहि न सोहाइ ब्रह्मकुल द्रोही ॥४॥
Durabāsā mohi dīnhī sāpā, prabhu pada pekhi miṭā so pāpā. Sunu gaṃdharba kahaum̐ maiṃ tohī, mohi na sohāi brahmakula drohī. (4)
271 of 355
दो०—मन क्रम बचन कपट तजि जो कर भूसुर सेव। मोहि समेत बिरंचि सिव बस ताकें सब देव ॥३३॥
Do—Mana krama bacana kapaṭa taji jo kara bhūsura seva, Mohi sameta biraṃci siva basa tākem̐ saba deva. (33)
272 of 355
सापत ताड़त परुष कहंता। बिप्र पूज्य अस गावहिं संता॥ पूजिअ बिप्र सील गुन हीना। सूद्र न गुन गन ग्यान प्रबीना ॥१॥
Sāpata tāṛata paruṣa kahaṃtā, bipra pūjya asa gāvahiṃ saṃtā. Pūjia bipra sīla guna hīnā, sūdra na guna gana gyāna prabīnā. (1)
273 of 355
कहि निज धर्म ताहि समुझावा। निज पद प्रीति देखि मन भावा॥ रघुपति चरन कमल सिरु नाई। गयउ गगन आपनि गति पाई ॥२॥
Kahi nija dharma tāhi samujhāvā, nija pada prīti dekhi mana bhāvā. Raghupati carana kamala siru nāī, gayau gagana āpani gati pāī. (2)
274 of 355
ताहि देइ गति राम उदारा। सबरी कें आश्रम पगु धारा॥ सबरी देखि राम गृहँ आए। मुनि के बचन समुझि जियँ भाए ॥३॥
Tāhi dei gati Rāma udārā, Sabarī kem̐ āśrama pagu dhārā. Sabarī dekhi Rāma gṛham̐ āe, muni ke bacana samujhi jiyam̐ bhāe. (3)
275 of 355
सरसिज लोचन बाहु बिसाला। जटा मुकुट सिर उर बनमाला॥ स्याम गौर सुंदर दोउ भाई। सबरी परी चरन लपटाई ॥४॥
Sarasija locana bāhu bisālā, jaṭā mukuṭa sira ura banamālā. Syāma gaura suṃdara dou bhāī, Sabarī parī carana lapaṭāī. (4)
276 of 355
प्रेम मगन मुख बचन न आवा। पुनि पुनि पद सरोज सिर नावा॥ सादर जल लै चरन पखारे। पुनि सुंदर आसन बैठारे ॥५॥
Prema magana mukha bacana na āvā, puni puni pada saroja sira nāvā. Sādara jala lai carana pakhāre, puni suṃdara āsana baiṭhāre. (5)
277 of 355
दो०—कंद मूल फल सुरस अति दिए राम कहुँ आनि। प्रेम सहित प्रभु खाए बारंबार बखानि ॥३४॥
Do—Kaṃda mūla phala surasa ati die Rāma kahum̐ āni, Prema sahita prabhu khāe bāraṃbāra bakhāni. (34)
278 of 355
पानि जोरि आगें भइ ठाढ़ी। प्रभुहि बिलोकि प्रीति अति बाढ़ी॥ केहि बिधि अस्तुति करौं तुम्हारी। अधम जाति मैं जड़मति भारी ॥१॥
Pāni jori āgem̐ bhai ṭhāṛhī, prabhuhi biloki prīti ati bāṛhī. Kehi bidhi astuti karaum̐ tumhārī, adhama jāti maiṃ jaṛamati bhārī. (1)
279 of 355
अधम ते अधम अधम अति नारी। तिन्ह महँ मैं मतिमंद अघारी॥ कह रघुपति सुनु भामिनि बाता। मानउँ एक भगति कर नाता ॥२॥
Adhama te adhama adhama ati nārī, tinha maham̐ maiṃ matimaṃda aghārī. Kaha Raghupati sunu bhāmini bātā, mānaum̐ eka bhagati kara nātā. (2)
280 of 355
जाति पाँति कुल धर्म बड़ाई। धन बल परिजन गुन चतुराई॥ भगति हीन नर सोहइ कैसा। बिनु जल बारिद देखिअ जैसा ॥३॥
Jāti pām̐ti kula dharma baṛāī, dhana bala parijana guna caturāī. Bhagati hīna nara sohai kaisā, binu jala bārida dekhia jaisā. (3)
281 of 355
नवधा भगति कहउँ तोहि पाहीं। सावधान सुनु धरु मन माहीं॥ प्रथम भगति संतन्ह कर संगा। दूसरि रति मम कथा प्रसंगा ॥४॥
Navadhā bhagati kahaum̐ tohi pāhīṃ, sāvadhāna sunu dharu mana māhīṃ. Prathama bhagati saṃtanha kara saṃgā, dūsari rati mama kathā prasaṃgā. (4)
282 of 355
दो०—गुर पद पंकज सेवा तीसरि भगति अमान। चौथि भगति मम गुन गन करइ कपट तजि गान ॥३५॥
Do—Gura pada paṃkaja sevā tīsari bhagati amāna, Cauthi bhagati mama guna gana karai kapaṭa taji gāna. (35)
283 of 355
मंत्र जाप मम दृढ़ बिस्वासा। पंचम भजन सो बेद प्रकासा॥ छठ दम सील बिरति बहु करमा। निरत निरंतर सज्जन धरमा ॥१॥
Maṃtra jāpa mama dṛṛha bisvāsā, paṃcama bhajana so beda prakāsā. Chaṭha dama sīla birati bahu karamā, nirata niraṃtara sajjana dharamā. (1)
284 of 355
सातवँ सम मोहि मय जग देखा। मोतें संत अधिक करि लेखा॥ आठवँ जथालाभ संतोषा। सपनेहुँ नहिं देखइ परदोषा ॥२॥
Sātavam̐ sama mohi maya jaga dekhā, motem̐ saṃta adhika kari lekhā. Āṭhavam̐ jathālābha saṃtoṣā, sapanehum̐ nahiṃ dekhai paradoṣā. (2)
285 of 355
नवम सरल सब सन छलहीना। मम भरोस हियँ हरष न दीना॥ नव महुँ एकउ जिन्ह कें होई। नारि पुरुष सचराचर कोई ॥३॥
Navama sarala saba sana chalahīnā, mama bharosa hiyam̐ haraṣa na dīnā. Nava mahum̐ ekau jinha kem̐ hoī, nāri puruṣa sacarācara koī. (3)
286 of 355
सोइ अतिसय प्रिय भामिनि मोरें। सकल प्रकार भगति दृढ़ तोरें॥ जोगि बृंद दुरलभ गति जोई। तो कहुँ आजु सुलभ भइ सोई ॥४॥
Soi atisaya priya bhāmini morem̐, sakala prakāra bhagati dṛṛha torem̐. Jogi bṛṃda duralabha gati joī, to kahum̐ āju sulabha bhai soī. (4)
287 of 355
मम दरसन फल परम अनूपा। जीव पाव निज सहज सरूपा॥ जनकसुता कइ सुधि भामिनी। जानहि कहु करिबरगामिनी ॥५॥
Mama darasana phala parama anūpā, jīva pāva nija sahaja sarūpā. Janakasutā kai sudhi bhāminī, jānahi kahu karibaragāminī. (5)
288 of 355
पंपा सरहि जाहु रघुराई। तहँ होइहि सुग्रीव मिताई॥ सो सब कहिहि देव रघुबीरा। जानतहूँ पूछहु मतिधीरा ॥६॥
Paṃpā sarahi jāhu Raghurāī, taham̐ hoihi Sugrīva mitāī. So saba kahihi deva Raghubīrā, jānatahūm̐ pūchahu matidhīrā. (6)
289 of 355
बार बार प्रभु पद सिरु नाई। प्रेम सहित सब कथा सुनाई ॥७॥
Bāra bāra prabhu pada siru nāī, prema sahita saba kathā sunāī. (7)
290 of 355
छं०—कहि कथा सकल बिलोकि हरि मुख हृदयँ पद पंकज धरे। तजि जोग पावक देह हरि पद लीन भइ जहँ नहिं फिरे॥ नर बिबिध कर्म अधर्म बहु मत सोकप्रद सब त्यागहू। बिस्वास करि कह दास तुलसी राम पद अनुरागहू॥
Chhand—Kahi kathā sakala biloki hari mukha hṛdayam̐ pada paṃkaja dhare, Taji joga pāvaka deha hari pada līna bhai jaham̐ nahiṃ phire. Nara bibidha karma adharma bahu mata sokaprada saba tyāgahū, Bisvāsa kari kaha dāsa tulasī Rāma pada anurāgahū.
291 of 355
दो०—जाति हीन अघ जन्म महि मुक्त कीन्हि असि नारि। महामंद मन सुख चहसि ऐसे प्रभुहि बिसारि ॥३६॥
Do—Jāti hīna agha janma mahi mukta kīnhi asi nāri, Mahāmaṃda mana sukha chahasi aise prabhuhi bisāri. (36)
292 of 355
चले राम त्यागा बन सोऊ। अतुलित बल नर केहरि दोऊ॥ बिरही इव प्रभु करत बिषादा। कहत कथा अनेक संबादा ॥१॥
Cale Rāma tyāgā bana soū, atulita bala nara kehari doū. Birahī iva prabhu karata biṣādā, kahata kathā aneka saṃbādā. (1)
293 of 355
लछिमन देखु बिपिन कइ सोभा। देखत केहि कर मन नहिं छोभा॥ नारि सहित सब खग मृग बृंदा। मानहुँ मोरि करत हहिं निंदा ॥२॥
Lachimana dekhu bipina kai sobhā, dekhata kehi kara mana nahiṃ chobhā. Nāri sahita saba khaga mṛga bṛṃdā, mānahum̐ mori karata hahiṃ niṃdā. (2)
294 of 355
हमहि देखि मृग निकर पराहीं। मृगीं कहहिं तुम्ह कहँ भय नाहीं॥ तुम्ह आनंद करहु मृग जाए। कंचन मृग खोजन ए आए ॥३॥
Hamahi dekhi mṛga nikara parāhīṃ, mṛgīṃ kahahiṃ tumha kaham̐ bhaya nāhīṃ. Tumha ānaṃda karahu mṛga jāe, kaṃcana mṛga khojana e āe. (3)
295 of 355
संग लाइ करिनीं करि लेहीं। मानहुँ मोहि सिखावनु देहीं॥ सास्त्र सुचिंतित पुनि पुनि देखिअ। भूप सुसेवित बस नहिं लेखिअ ॥४॥
Saṃga lāi karinīṃ kari lehīṃ, mānahum̐ mohi sikhāvanu dehīṃ. Sāstra suciṃtita puni puni dekhia, bhūpa susevita basa nahiṃ lekhia. (4)
296 of 355
राखिअ नारि जदपि उर माहीं। जुबती सास्त्र नृपति बस नाहीं॥ देखहु तात बसंत सुहावा। प्रिया हीन मोहि भय उपजावा ॥५॥
Rākhia nāri jadapi ura māhīṃ, jubatī sāstra nṛpati basa nāhīṃ. Dekhahu tāta basaṃta suhāvā, priyā hīna mohi bhaya upajāvā. (5)
297 of 355
दो०—बिरह बिकल बलहीन मोहि जानेसि निपट अकेल। सहित बिपिन मधुकर खग मदन कीन्ह बगमेल ॥३७(क)॥
Do—Biraha bikala balahīna mohi jānesi nipaṭa akela, Sahita bipina madhukara khaga madana kīnha bagamela. (37a)
298 of 355
देखि गयउ भ्राता सहित तासु दूत सुनि बात। डेरा कीन्हेउ मनहुँ तब कटकु हटकि मनजात ॥३७(ख)॥
Dekhi gayau bhrātā sahita tāsu dūta suni bāta, ḍerā kīnheu manahum̐ taba kaṭaku haṭaki manajāta. (37b)
299 of 355
बिटप बिसाल लता अरुझानी। बिबिध बितान दिए जनु तानी॥ कदलि ताल बर धुजा पताका। देखि न मोह धीर मन जाका ॥१॥
Biṭapa bisāla latā arujhānī, bibidha bitāna die janu tānī. Kadali tāla bara dhujā patākā, dekhi na moha dhīra mana jākā. (1)
300 of 355
बिबिध भाँति फूले तरु नाना। जनु बानैत बने बहु बाना॥ कहुँ कहुँ सुंदर बिटप सुहाए। जनु भट बिलग बिलग होइ छाए ॥२॥
Bibidha bhām̐ti phūle taru nānā, janu bānaita bane bahu bānā. Kahum̐ kahum̐ suṃdara biṭapa suhāe, janu bhaṭa bilaga bilaga hoi chāe. (2)
301 of 355
कूजत पिक मानहुँ गज माते। ढेक महोख ऊँट बिसराते॥ मोर चकोर कीर बर बाजी। पारावत मराल सब ताजी ॥३॥
Kūjata pika mānahum̐ gaja māte, ḍheka mahokha ūm̐ṭa bisarāte. Mora cakora kīra bara bājī, pārāvata marāla saba tājī. (3)
302 of 355
तीतिर लावक पदचर जूथा। बरनि न जाइ मनोज बरूथा॥ रथ गिरि सिला दुंदुभीं झरना। चातक बंदी गुन गन बरना ॥४॥
Tītira lāvaka padacara jūthā, barani na jāi manoja barūthā. Ratha giri silā duṃdubhīṃ jharanā, cātaka baṃdī guna gana baranā. (4)
303 of 355
मधुकर मुखर भेरि सहनाई। त्रिबिध बयारि बसीठीं आई॥ चतुरंगिनी सेन सँग लीन्हें। बिचरत सबहि चुनौती दीन्हें ॥५॥
Madhukara mukhara bheri sahanāī, tribidha bayāri basīṭhīṃ āī. Caturaṃginī sena sam̐ga līnhem̐, bicarata sabahi cunautī dīnhem̐. (5)
304 of 355
लछिमन देखत काम अनीका। रहहिं धीर तिन्ह कै जग लीका॥ एहि कें एक परम बल नारी। तेहि तें उबर सुभट सोइ भारी ॥६॥
Lachimana dekhata kāma anīkā, rahahiṃ dhīra tinha kai jaga līkā. Ehi kem̐ eka parama bala nārī, tehi tem̐ ubara subhaṭa soi bhārī. (6)
305 of 355
दो०—तात तीनि अति प्रबल खल काम क्रोध अरु लोभ। मुनि बिग्यान धाम मन करहिं निमिष महुँ छोभ ॥३८(क)॥
Do—Tāta tīni ati prabala khala kāma krodha aru lobha, Muni bigyāna dhāma mana karahiṃ nimiṣa mahum̐ chobha. (38a)
306 of 355
लोभ कें इच्छा दंभ बल काम कें केवल नारि। क्रोध कें परुष बचन बल मुनिबर कहहिं बिचारि ॥३८(ख)॥
Lobha kem̐ icchā daṃbha bala kāma kem̐ kevala nāri, krodha kem̐ paruṣa bacana bala munibara kahahiṃ bicāri. (38b)
307 of 355
गुनातीत सचराचर स्वामी। राम उमा सब अंतरजामी॥ कामिन्ह कै दीनता देखाई। धीरन्ह कें मन बिरति दृढ़ाई ॥१॥
Gunātīta sacarācara svāmī, Rāma Umā saba aṃtarajāmī. Kāminha kai dīnatā dekhāī, dhīranha kem̐ mana birati dṛṛhāī. (1)
308 of 355
क्रोध मनोज लोभ मद माया। छूटहिं सकल राम कीं दाया॥ सो नर इंद्रजाल नहिं भूला। जा पर होइ सो नट अनुकूला ॥२॥
Krodha manoja lobha mada māyā, chūṭahiṃ sakala Rāma kīṃ dāyā. So nara iṃdrajāla nahiṃ bhūlā, jā para hoi so naṭa anukūlā. (2)
309 of 355
उमा कहउँ मैं अनुभव अपना। सत हरि भजनु जगत सब सपना॥ पुनि प्रभु गए सरोबर तीरा। पंपा नाम सुभग गंभीरा ॥३॥
Umā kahaum̐ maiṃ anubhava apanā, sata hari bhajanu jagata saba sapanā. Puni prabhu gae sarobara tīrā, paṃpā nāma subhaga gaṃbhīrā. (3)
310 of 355
संत हृदय जस निर्मल बारी। बाँधे घाट मनोहर चारी॥ जहँ तहँ पिअहिं बिबिध मृग नीरा। जनु उदार गृह जाचक भीरा ॥४॥
Saṃta hṛdaya jasa nirmala bārī, bām̐dhe ghāṭa manohara cārī. Jaham̐ taham̐ piahiṃ bibidha mṛga nīrā, janu udāra gṛha jācaka bhīrā. (4)
311 of 355
दो०—पुरइनि सघन ओट जल बेगि न पाइअ मर्म। मायाछन्न न देखिऐ जैसें निर्गुन ब्रह्म ॥३९(क)॥
Do—Puraini saghana oṭa jala begi na pāia marma, Māyāchanna na dekhiai jaisem̐ nirguna brahma. (39a)
312 of 355
सुखी मीन सब एकरस अति अगाध जल माहिं। जथा धर्मसीलन्ह के दिन सुख संजुत जाहिं ॥३९(ख)॥
Sukhī mīna saba ekarasa ati agādha jala māhiṃ, jathā dharmasīlanha ke dina sukha saṃjuta jāhiṃ. (39b)
313 of 355
बिकसे सरसिज नाना रंगा। मधुर मुखर गुंजत बहु भृंगा॥ बोलत जलकुक्कुट कलहंसा। प्रभु बिलोकि जनु करत प्रसंसा ॥१॥
Bikase sarasija nānā raṃgā, madhura mukhara guṃjata bahu bhṛṃgā. Bolata jalakukkuṭa kalahaṃsā, prabhu biloki janu karata prasaṃsā. (1)
314 of 355
चक्रबाक बक खग समुदाई। देखत बनइ बरनि नहिं जाई॥ सुंदर खग गन गिरा सुहाई। जात पथिक जनु लेत बोलाई ॥२॥
Cakrabāka baka khaga samudāī, dekhata banai barani nahiṃ jāī. Suṃdara khaga gana girā suhāī, jāta pathika janu leta bolāī. (2)
315 of 355
ताल समीप मुनिन्ह गृह छाए। चहु दिसि कानन बिटप सुहाए॥ चंपक बकुल कदंब तमाला। पाटल पनस परास रसाला ॥३॥
Tāla samīpa muninha gṛha chāe, cahu disi kānana biṭapa suhāe. Caṃpaka bakula kadaṃba tamālā, pāṭala panasa parāsa rasālā. (3)
316 of 355
नव पल्लव कुसुमित तरु नाना। चंचरीक पटली कर गाना॥ सीतल मंद सुगंध सुभाऊ। संतत बहइ मनोहर बाऊ ॥४॥
Nava pallava kusumita taru nānā, caṃcarīka paṭalī kara gānā. Sītala maṃda sugaṃdha subhāū, saṃtata bahai manohara bāū. (4)
317 of 355
कुहू कुहू कोकिल धुनि करहीं। सुनि रव सरस ध्यान मुनि टरहीं ॥५॥
Kuhū kuhū kokila dhuni karahīṃ, suni rava sarasa dhyāna muni ṭarahīṃ. (5)
318 of 355
दो०—फल भारन नमि बिटप सब रहे भूमि निअराइ। पर उपकारी पुरुष जिमि नवहिं सुसंपति पाइ ॥४०॥
Do—Phala bhārana nami biṭapa saba rahe bhūmi niarāi, Para upakārī puruṣa jimi navahiṃ susaṃpati pāi. (40)
319 of 355
देखि राम अति रुचिर तलावा। मज्जनु कीन्ह परम सुख पावा॥ देखी सुंदर तरुबर छाया। बैठे अनुज सहित रघुराया ॥१॥
Dekhi Rāma ati rucira talāvā, majjanu kīnha parama sukha pāvā. Dekhī suṃdara tarubara chāyā, baiṭhe anuja sahita raghurāyā. (1)
320 of 355
तहँ पुनि सकल देव मुनि आए। अस्तुति करि निज धाम सिधाए॥ बैठे परम प्रसन्न कृपाला। कहत अनुज सन कथा रसाला ॥२॥
Taham̐ puni sakala deva muni āe, astuti kari nija dhāma sidhāe. Baiṭhe parama prasanna kṛpālā, kahata anuja sana kathā rasālā. (2)
321 of 355
बिरहवंत भगवंतहि देखी। नारद मन भा सोच बिसेषी॥ मोर साप करि अंगीकारा। सहत राम नाना दुख भारा ॥३॥
Birahavaṃta bhagavaṃtahi dekhī, Nārada mana bhā soca biseṣī. Mora sāpa kari aṃgīkārā, sahata Rāma nānā dukha bhārā. (3)
322 of 355
ऐसे प्रभुहि बिलोकउँ जाई। पुनि न बनिहि अस अवसरु आई॥ यह बिचारि नारद कर बीना। गए जहाँ प्रभु सुख आसीना ॥४॥
Aise prabhuhi bilokaum̐ jāī, puni na banihi asa avasaru āī. Yaha bicāri Nārada kara bīnā, gae jahām̐ prabhu sukha āsīnā. (4)
323 of 355
गावत राम चरित मृदु बानी। प्रेम सहित बहु भाँति बखानी॥ करत दंडवत लिए उठाई। राखे बहुत बार उर लाई ॥५॥
Gāvata Rāma carita mṛdu bānī, prema sahita bahu bhām̐ti bakhānī. Karata daṃḍavata lie uṭhāī, rākhe bahuta bāra ura lāī. (5)
324 of 355
स्वागत पूँछि निकट बैठारे। लछिमन सादर चरन पखारे ॥६॥
Svāgata pūm̐chi nikaṭa baiṭhāre, Lachimana sādara carana pakhāre. (6)
325 of 355
दो०—नाना बिधि बिनती करि प्रभु प्रसन्न जियँ जानि। नारद बोले बचन तब जोरि सरोरुह पानि ॥४१॥
Do—Nānā bidhi binatī kari prabhu prasanna jiyam̐ jāni, Nārada bole bacana taba jori saroruha pāni. (41)
326 of 355
सुनहु उदार सहज रघुनायक। सुंदर अगम सुगम बर दायक॥ देहु एक बर मागउँ स्वामी। जद्यपि जानत अंतरजामी ॥१॥
Sunahu udāra sahaja Raghunāyaka, suṃdara agama sugama bara dāyaka. Dehu eka bara māgaum̐ svāmī, jadyapi jānata aṃtarajāmī. (1)
327 of 355
जानहु मुनि तुम्ह मोर सुभाऊ। जन सन कबहुँ कि करउँ दुराऊ॥ कवन बस्तु असि प्रिय मोहि लागी। जो मुनिबर न सकहु तुम्ह मागी ॥२॥
Jānahu muni tumha mora subhāū, jana sana kabahum̐ ki karaum̐ durāū. Kavana bastu asi priya mohi lāgī, jo munibara na sakahu tumha māgī. (2)
328 of 355
जन कहुँ कछु अदेय नहिं मोरें। अस बिस्वास तजहु जनि भोरें॥ तब नारद बोले हरषाई। अस बर मागउँ करउँ ढिठाई ॥३॥
Jana kahum̐ kachu adeya nahiṃ morem̐, asa bisvāsa tajahu jani bhorem̐. Taba Nārada bole haraṣāī, asa bara māgaum̐ karaum̐ ḍhiṭhāī. (3)
329 of 355
जद्यपि प्रभु के नाम अनेका। श्रुति कह अधिक एक तें एका॥ राम सकल नामन्ह तें अधिका। होउ नाथ अघ खग गन बधिका ॥४॥
Jadyapi prabhu ke nāma anekā, śruti kaha adhika eka tem̐ ekā. Rāma sakala nāmanha tem̐ adhikā, hou nātha agha khaga gana badhikā. (4)
330 of 355
दो०—राका रजनी भगति तव राम नाम सोइ सोम। अपर नाम उडगन बिमल बसहुँ भगत उर ब्योम ॥४२(क)॥
Do—Rākā rajanī bhagati tava Rāma nāma soi soma, Apara nāma uḍagana bimala basahum̐ bhagata ura byoma. (42a)
331 of 355
एवमस्तु मुनि सन कहेउ कृपासिंधु रघुनाथ। तब नारद मन हरष अति प्रभु पद नायउ माथ ॥४२(ख)॥
Evamastu muni sana kaheu kṛpāsiṃdhu Raghunātha, taba Nārada mana haraṣa ati prabhu pada nāyau mātha. (42b)
332 of 355
अति प्रसन्न रघुनाथहि जानी। पुनि नारद बोले मृदु बानी॥ राम जबहिं प्रेरउ निज माया। मोहेहु मोहि सुनहु रघुराया ॥१॥
Ati prasanna Raghunāthahi jānī, puni Nārada bole mṛdu bānī. Rāma jabahiṃ preraú nija māyā, mohehu mohi sunahu raghurāyā. (1)
333 of 355
तब बिबाह मैं चाहउँ कीन्हा। प्रभु केहि कारन करै न दीन्हा॥ सुनु मुनि तोहि कहउँ सहरोसा। भजहिं जे मोहि तजि सकल भरोसा ॥२॥
Taba bibāha maiṃ cāhaum̐ kīnhā, prabhu kehi kārana karai na dīnhā. Sunu muni tohi kahaum̐ saharosā, bhajahiṃ je mohi taji sakala bharosā. (2)
334 of 355
करउँ सदा तिन्ह कै रखवारी। जिमि बालक राखइ महतारी॥ गह सिसु बच्छ अनल अहि धाई। तहँ राखइ जननी अरगाई ॥३॥
Karaum̐ sadā tinha kai rakhavārī, jimi bālaka rākhai mahatārī. Gaha sisu baccha anala ahi dhāī, taham̐ rākhai jananī aragāī. (3)
335 of 355
प्रौढ़ भएँ तेहि सुत पर माता। प्रीति करइ नहिं पाछिलि बाता॥ मोरें प्रौढ़ तनय सम ग्यानी। बालक सुत सम दास अमानी ॥४॥
Prauṛh bhaĕṁ tehi suta para mātā, prīti karai nahiṁ pāchili bātā. Morĕṁ prauṛh tanaya sama gyānī, bālaka suta sama dāsa amānī. (4)
336 of 355
जनहि मोर बल निज बल ताही। दुहु कहँ काम क्रोध रिपु आही॥ यह बिचारि पंडित मोहि भजहीं। पाएहुँ ग्यान भगति नहिं तजहीं ॥५॥
Janahi mora bala nija bala tāhī, duhu kahaṁ kāma krodha ripu āhī. Yaha bicāri paṇḍita mohi bhajahīṁ, pāehuṁ gyāna bhagati nahiṁ tajahīṁ. (5)
337 of 355
दो०—काम क्रोध लोभादि मद प्रबल मोह कै धारि। तिन्ह महँ अति दारुन दुखद मायारूपी नारि ॥४३॥
Do—Kāma krodha lobhādi mada prabala moha kai dhāri, Tinha mahaṁ ati dāruna dukhada māyārūpī nāri. (43)
338 of 355
सुनु मुनि कह पुरान श्रुति संता। मोह बिपिन कहुँ नारि बसंता॥ जप तप नेम जलाश्रय झारी। होइ ग्रीषम सोषइ सब नारी ॥१॥
Sunu muni kaha purāna śruti santā, moha bipina kahuṁ nāri basantā. Japa tapa nema jalāśraya jhārī, hoi grīṣama soṣai saba nārī. (1)
339 of 355
काम क्रोध मद मत्सर भेका। इन्हहि हरषप्रद बरषा एका॥ दुर्बासना कुमुद समुदाई। तिन्ह कहँ सरद सदा सुखदाई ॥२॥
Kāma krodha mada matsara bhekā, inhahi haraṣaprada baraṣā ekā. Durbāsanā kumuda samudāī, tinha kahaṁ sarada sadā sukhadāī. (2)
340 of 355
धर्म सकल सरसीरुह बृंदा। होइ हिम तिन्हहि दहइ सुख मंदा॥ पुनि ममता जवास बहुताई। पलुहइ नारि सिसिर रितु पाई ॥३॥
Dharma sakala sarasīruha bṛndā, hoi hima tinhahi dahai sukha mandā. Puni mamatā javāsa bahutāī, paluhai nāri sisira ritu pāī. (3)
341 of 355
पाप उलूक निकर सुखकारी। नारि निबिड़ रजनी अँधिआरी॥ बुधि बल सील सत्य सब मीना। बनसी सम त्रिय कहहिं प्रबीना ॥४॥
Pāpa ulūka nikara sukhakārī, nāri nibiṛa rajanī aṁdhiārī. Budhi bala sīla satya saba mīnā, banasī sama triya kahahiṁ prabīnā. (4)
342 of 355
दो०—अवगुन मूल सूलप्रद प्रमदा सब दुख खानि। ताते कीन्ह निवारन मुनि मैं यह जियँ जानि ॥४४॥
Do—Avaguna mūla sūlaprada pramadā saba dukha khāni, Tāte kīnha nivārana muni maiṁ yaha jiyaṁ jāni. (44)
343 of 355
सुनि रघुपति के बचन सुहाए। मुनि तन पुलक नयन भरि आए॥ कहहु कवन प्रभु कै असि रीती। सेवक पर ममता अरु प्रीती ॥१॥
Suni Raghupati ke bacana suhāe, muni tana pulaka nayana bhari āe. Kahahu kavana prabhu kai asi rītī, sevaka para mamatā aru prītī. (1)
344 of 355
जे न भजहिं अस प्रभु भ्रम त्यागी। ग्यान रंक नर मंद अभागी॥ पुनि सादर बोले मुनि नारद। सुनहु राम बिग्यान बिसारद ॥२॥
Je na bhajahiṁ asa prabhu bhrama tyāgī, gyāna raṁka nara manda abhāgī. Puni sādara bole muni Nārada, sunahu Rāma bigyāna bisārada. (2)
345 of 355
संतन्ह के लच्छन रघुबीरा। कहहु नाथ भव भंजन भीरा॥ सुनु मुनि संतन्ह के गुन कहऊँ। जिन्ह ते मैं उन्ह कें बस रहऊँ ॥३॥
Santanha ke lacchana Raghubīrā, kahahu nātha bhava bhaṁjana bhīrā. Sunu muni santanha ke guna kahaūṁ, jinha te maiṁ unha kĕṁ basa rahaūṁ. (3)
346 of 355
षट बिकार जित अनघ अकामा। अचल अकिंचन सुचि सुखधामा॥ अमित बोध अनीह मितभोगी। सत्यसार कबि कोबिद जोगी ॥४॥
Ṣaṭa bikāra jita anagha akāmā, acala akiṁcana suci sukhadhāmā. Amita bodha anīha mitabhogī, satyasāra kabi kobida jogī. (4)
347 of 355
सावधान मानद मदहीना। धीर धर्म गति परम प्रबीना ॥५॥
Sāvadhāna mānada madahīnā, dhīra dharma gati parama prabīnā. (5)
348 of 355
दो०—गुनागार संसार दुख रहित बिगत संदेह। तजि मम चरन सरोज प्रिय तिन्ह कहुँ देह न गेह ॥४५॥
Do—Gunāgāra saṁsāra dukha rahita bigata saṁdeha, Taji mama carana saroja priya tinha kahuṁ deha na geha. (45)
349 of 355
निज गुन श्रवन सुनत सकुचाहीं। पर गुन सुनत अधिक हरषाहीं॥ सम सीतल नहिं त्यागहिं नीती। सरल सुभाउ सबहि सन प्रीती ॥१॥
Nija guna śravana sunata sakucāhīṁ, para guna sunata adhika haraṣāhīṁ. Sama sītala nahiṁ tyāgahiṁ nītī, sarala subhāu sabahi sana prītī. (1)
350 of 355
जप तप ब्रत दम संजम नेमा। गुरु गोबिंद बिप्र पद प्रेमा॥ श्रद्धा छमा मयत्री दाया। मुदिता मम पद प्रीति अमाया ॥२॥
Japa tapa brata dama saṁjama nemā, guru gobiṁda bipra pada premā. Śraddhā chamā mayatrī dāyā, mudita mama pada prīti amāyā. (2)
351 of 355
बिरति बिबेक बिनय बिग्याना। बोध जथारथ बेद पुराना॥ दंभ मान मद करहिं न काऊ। भूलि न देहिं कुमारग पाऊ ॥३॥
Birati bibeka binaya bigyānā, bodha jathāratha beda purānā. Daṁbha māna mada karahiṁ na kāū, bhūli na dehiṁ kumāraga pāū. (3)
352 of 355
गावहिं सुनहिं सदा मम लीला। हेतु रहित परहित रत सीला॥ मुनि सुनु साधुन्ह के गुन जेते। कहि न सकहिं सारद श्रुति तेते ॥४॥
Gāvahiṁ sunahiṁ sadā mama līlā, hetu rahita parahita rata sīlā. Muni sunu sādhunha ke guna jete, kahi na sakahiṁ sārada śruti tete. (4)
353 of 355
छं०—कहि सक न सारद सेष नारद सुनत पद पंकज गहे। अस दीनबंधु कृपाल अपने भगत गुन निज मुख कहे॥ सिरु नाइ बारहिं बार चरननि ब्रह्मपुर नारद गए। ते धन्य तुलसीदास आस बिहाइ जे हरि रँग रँए॥
Chhand—Kahi saka na sārada seṣa Nārada sunata pada paṁkaja gahe, Asa dīnabaṁdhu kṛpāla apane bhagata guna nija mukha kahe. Siru nāi bārahiṁ bāra carananhi brahmapura Nārada gae, Te dhanya tulasīdāsa āsa bihāi je hari raṁga raṁe.
354 of 355
दो०—रावनारि जसु पावन गावहिं सुनहिं जे लोग। राम भगति दृढ़ पावहिं बिनु बिराग जप जोग ॥४६(क)॥
Do—Rāvanāri jasu pāvana gāvahiṁ sunahiṁ je loga, Rāma bhagati dṛṛha pāvahiṁ binu birāga japa joga. (46a)
355 of 355
दीप सिखा सम जुबति तन मन जनि होसि पतंग। भजहि राम तजि काम मद करहि सदा सतसंग ॥४६(ख)॥
Dīpa sikhā sama jubati tana mana jani hosi pataṁga, Bhajahi Rāma taji kāma mada karahi sadā satasaṁga. (46b)
https://www.bhajanusa.com
Viewed … times