← All bhajans
Granth
४. किष्किन्धाकाण्ड · 4. Kishkindha Kand
Tulsidas's Ramcharitmanas — Book 4, the full text of Bali's death, Sugriva's coronation, and the search for Sita · Devanagari with English transliteration
हिन्दी
English
1 of 193
॥ श्रीगणेशाय नम: ॥
श्रीजानकीवल्लभो विजयते
Śrī Gaṇeśāya namaḥ.
Śrī Jānakīvallabho vijayate.
2 of 193
कुन्देन्दीवरसुन्दरावतिबलौ विज्ञानधामावुभौ
शोभाढ्यौ वरधन्विनौ श्रुतिनुतौ गोविप्रवृन्दप्रियौ।
मायामानुषरूपिणौ रघुवरौ सद्धर्मवर्मौ हितौ
सीतान्वेषणतत्परौ पथिगतौ भक्तिप्रदौ तौ हि नः ॥१॥
Kundendīvarasundarāvatibalau vijñānadhāmāvubhau,
śobhāḍhyau varadhanvinau śrutinutau govipravṛndapriyau,
māyāmānuṣarūpiṇau Raghuvarau saddharmavarmau hitau,
Sītānveṣaṇatatparau pathigatau bhaktipradau tau hi naḥ. (1)
3 of 193
ब्रह्माम्भोधिसमुद्भवं कलिमलप्रध्वंसनं चाव्ययं
श्रीमच्छम्भुमुखेन्दुसुन्दरवरे संशोभितं सर्वदा।
संसारामयभेषजं सुखकरं श्रीजानकीजीवनं
धन्यास्ते कृतिनः पिबन्ति सततं श्रीरामनामामृतम् ॥२॥
Brahmāmbhodhisamudbhavaṃ kalimalapradhvaṃsanaṃ chāvyayaṃ,
Śrīmachchhambhumukhendusundaravare saṃśobhitaṃ sarvadā,
saṃsārāmayabheṣajaṃ sukhakaraṃ Śrījānakījīvanaṃ,
dhanyāste kṛtinaḥ pibanti satataṃ Śrīrāmanāmāmṛtam. (2)
4 of 193
सो०—मुक्ति जन्म महि जानि ग्यान खानि अघ हानि कर।
जहँ बस संभु भवानि सो कासी सेइअ कस न॥
So—Mukti janma mahi jāni gyāna khāni agha hāni kara,
jahaṅ basa Sambhu Bhavāni so Kāsī seia kasa na.
5 of 193
जरत सकल सुर बृंद बिषम गरल जेहिं पान किय।
तेहि न भजसि मन मंद को कृपाल संकर सरिस॥
Jarata sakala sura bṛṃda biṣama garala jehiṃ pāna kiya,
tehi na bhajasi mana maṃda ko kṛpāla Saṃkara sarisa.
6 of 193
आगें चले बहुरि रघुराया।
रिष्यमूक पर्बत निअराया॥
तहँ रह सचिव सहित सुग्रीवा।
आवत देखि अतुल बल सींवा ॥१॥
Āgeṃ chale bahuri Raghurāyā,
Riṣyamūka parbata niarāyā.
Tahaṃ raha sachiva sahita Sugrīvā,
āvata dekhi atula bala sīṃvā. (1)
7 of 193
अति सभीत कह सुनु हनुमाना।
पुरुष जुगल बल रूप निधाना॥
धरि बटु रूप देखु तैं जाई।
कहेसु जानि जियँ सयन बुझाई ॥२॥
Ati sabhīta kaha sunu Hanumānā,
puruṣa jugala bala rūpa nidhānā.
Dhari baṭu rūpa dekhu taiṃ jāī,
kahesu jāni jiyaṃ sayana bujhāī. (2)
8 of 193
पठए बालि होहिं मन मैला।
भागौं तुरत तजौं यह सैला॥
बिप्र रूप धरि कपि तहँ गयऊ।
माथ नाइ पूछत अस भयऊ ॥३॥
Paṭhae Bāli hohiṃ mana mailā,
bhāgauṃ turata tajauṃ yaha sailā.
Bipra rūpa dhari kapi tahaṃ gayaū,
mātha nāi pūchhata asa bhayaū. (3)
9 of 193
को तुम्ह स्यामल गौर सरीरा।
छत्री रूप फिरहु बन बीरा॥
कठिन भूमि कोमल पद गामी।
कवन हेतु बिचरहु बन स्वामी ॥४॥
Ko tumha syāmala gaura sarīrā,
chhatrī rūpa phirahu bana bīrā.
Kaṭhina bhūmi komala pada gāmī,
kavana hetu bicharahu bana svāmī. (4)
10 of 193
मृदुल मनोहर सुंदर गाता।
सहत दुसह बन आतप बाता॥
की तुम्ह तीनि देव महँ कोऊ।
नर नारायन की तुम्ह दोऊ ॥५॥
Mṛdula manohara suṃdara gātā,
sahata dusaha bana ātapa bātā.
Kī tumha tīni deva mahaṃ koū,
nara Nārāyana kī tumha doū. (5)
11 of 193
दो०—जग कारन तारन भव भंजन धरनी भार।
की तुम्ह अखिल भुवन पति लीन्ह मनुज अवतार ॥१॥
Do—Jaga kārana tārana bhava bhaṃjana dharanī bhāra,
kī tumha akhila bhuvana pati līnha manuja avatāra. (1)
12 of 193
कोसलेस दसरथ के जाए।
हम पितु बचन मानि बन आए॥
नाम राम लछिमन दोउ भाई।
संग नारि सुकुमारि सुहाई ॥१॥
Kosalesa Dasaratha ke jāe,
hama pitu bachana māni bana āe.
Nāma Rāma Lachhimana dou bhāī,
saṃga nāri sukumāri suhāī. (1)
13 of 193
इहाँ हरी निसिचर बैदेही।
बिप्र फिरहिं हम खोजत तेही॥
आपन चरित कहा हम गाई।
कहहु बिप्र निज कथा बुझाई ॥२॥
Ihāṃ harī nisichara Baidehī,
bipra phirahiṃ hama khojata tehī.
Āpana charita kahā hama gāī,
kahahu bipra nija kathā bujhāī. (2)
14 of 193
प्रभु पहिचानि परेउ गहि चरना।
सो सुख उमा जाइ नहिं बरना॥
पुलकित तन मुख आव न बचना।
देखत रुचिर बेष कै रचना ॥३॥
Prabhu pahichāni pareu gahi charanā,
so sukha Umā jāi nahiṃ baranā.
Pulakita tana mukha āva na bachanā,
dekhata ruchira beṣa kai rachanā. (3)
15 of 193
पुनि धीरजु धरि अस्तुति कीन्ही।
हरष हृदयँ निज नाथहि चीन्ही॥
मोर न्याउ मैं पूछा साईं।
तुम्ह पूछहु कस नर की नाईं ॥४॥
Puni dhīraju dhari astuti kīnhī,
haraṣa hṛdayaṃ nija nāthahi chīnhī.
Mora nyāu maiṃ pūchhā sāīṃ,
tumha pūchhahu kasa nara kī nāīṃ. (4)
16 of 193
तव माया बस फिरउँ भुलाना।
ता ते मैं नहिं प्रभु पहिचाना ॥५॥
Tava māyā basa phirauṃ bhulānā,
tā te maiṃ nahiṃ prabhu pahichānā. (5)
17 of 193
दो०—एकु मैं मंद मोहबस कुटिल हृदय अग्यान।
पुनि प्रभु मोहि बिसारेउ दीनबंधु भगवान ॥२॥
Do—Eku maiṃ maṃda mohabasa kuṭila hṛdaya agyāna,
puni prabhu mohi bisāreu dīnabaṃdhu Bhagavāna. (2)
18 of 193
जदपि नाथ बहु अवगुन मोरें।
सेवक प्रभुहि परै जनि भोरें॥
नाथ जीव तव मायाँ मोहा।
सो निस्तरइ तुम्हारेहिं छोहा ॥१॥
Jadapi nātha bahu avaguna moreṃ,
sevaka prabhuhi paraiṃ jani bhoreṃ.
Nātha jīva tava māyāṃ mohā,
so nistarai tumhārehiṃ chhohā. (1)
19 of 193
ता पर मैं रघुबीर दोहाई।
जानउँ नहिं कछु भजन उपाई॥
सेवक सुत पति मातु भरोसें।
रहइ असोच बनइ प्रभु पोसें ॥२॥
Tā para maiṃ Raghubīra dohāī,
jānauṃ nahiṃ kachhu bhajana upāī.
Sevaka suta pati mātu bharoseṃ,
rahai asocha banai prabhu poseṃ. (2)
20 of 193
अस कहि परेउ चरन अकुलाई।
निज तनु प्रगटि प्रीति उर छाई॥
तब रघुपति उठाइ उर लावा।
निज लोचन जल सींचि जुड़ावा ॥३॥
Asa kahi pareu charana akulāī,
nija tanu pragaṭi prīti ura chhāī.
Taba Raghupati uṭhāi ura lāvā,
nija lochana jala sīṃchi juḍāvā. (3)
21 of 193
सुनु कपि जियँ मानसि जनि ऊना।
तैं मम प्रिय लछिमन ते दूना॥
समदरसी मोहि कह सब कोऊ।
सेवक प्रिय अनन्यगति सोऊ ॥४॥
Sunu kapi jiyaṃ mānasi jani ūnā,
taiṃ mama priya Lachhimana te dūnā.
Samadarasī mohi kaha saba koū,
sevaka priya ananyagati soū. (4)
22 of 193
दो०—सो अनन्य जाकें असि मति न टरइ हनुमंत।
मैं सेवक सचराचर रूप स्वामि भगवंत ॥३॥
Do—So ananya jākeṃ asi mati na ṭarai Hanumaṃta,
maiṃ sevaka sacharāchara rūpa svāmi Bhagavaṃta. (3)
23 of 193
देखि पवनसुत पति अनुकूला।
हृदयँ हरष बीती सब सूला॥
नाथ सैल पर कपिपति रहई।
सो सुग्रीव दास तव अहई ॥१॥
Dekhi Pavanasuta pati anukūlā,
hṛdayaṃ haraṣa bītī saba sūlā.
Nātha saila para kapipati rahaī,
so Sugrīva dāsa tava ahaī. (1)
24 of 193
तेहि सन नाथ मयत्री कीजे।
दीन जानि तेहि अभय करीजे॥
सो सीता कर खोज कराइहि।
जहँ तहँ मरकट कोटि पठाइहि ॥२॥
Tehi sana nātha mayatrī kīje,
dīna jāni tehi abhaya karīje.
So Sītā kara khoja karāihi,
jahaṃ tahaṃ marakaṭa koṭi paṭhāihi. (2)
25 of 193
एहि बिधि सकल कथा समुझाई।
लिए दुऔ जन पीठि चढ़ाई॥
जब सुग्रीवँ राम कहुँ देखा।
अतिसय जन्म धन्य करि लेखा ॥३॥
Ehi bidhi sakala kathā samujhāī,
lie duau jana pīṭhi chaḍhāī.
Jaba Sugrīvaṃ Rāma kahuṃ dekhā,
atisaya janma dhanya kari lekhā. (3)
26 of 193
सादर मिलेउ नाइ पद माथा।
भेंटेउ अनुज सहित रघुनाथा॥
कपि कर मन बिचार एहि रीती।
करिहहिं बिधि मो सन ए प्रीती ॥४॥
Sādara mileu nāi pada māthā,
bheṃṭeu anuja sahita Raghunāthā.
Kapi kara mana bichāra ehi rītī,
karihahiṃ bidhi mo sana e prītī. (4)
27 of 193
दो०—तब हनुमंत उभय दिसि की सब कथा सुनाइ।
पावक साखी देइ करि जोरी प्रीति दृढ़ाइ ॥४॥
Do—Taba Hanumaṃta ubhaya disi kī saba kathā sunāi,
pāvaka sākhī dei kari jorī prīti dṛḍhāi. (4)
28 of 193
कीन्हि प्रीति कछु बीच न राखा।
लछिमन राम चरित सब भाषा॥
कह सुग्रीव नयन भरि बारी।
मिलिहि नाथ मिथिलेसकुमारी ॥१॥
Kīnhi prīti kachhu bīcha na rākhā,
Lachhimana Rāma charita saba bhāṣā.
Kaha Sugrīva nayana bhari bārī,
milihi nātha Mithilesakumārī. (1)
29 of 193
मंत्रिन्ह सहित इहाँ एक बारा।
बैठ रहेउँ मैं करत बिचारा॥
गगन पंथ देखी मैं जाता।
परबस परी बहुत बिलपाता ॥२॥
Maṃtrinha sahita ihāṃ eka bārā,
baiṭha raheuṃ maiṃ karata bichārā.
Gagana paṃtha dekhī maiṃ jātā,
parabasa parī bahuta bilapātā. (2)
30 of 193
राम राम हा राम पुकारी।
हमहि देखि दीन्हेउ पट डारी॥
मागा राम तुरत तेहिं दीन्हा।
पट उर लाइ सोच अति कीन्हा ॥३॥
Rāma Rāma hā Rāma pukārī,
hamahi dekhi dīnheu paṭa ḍārī.
Māgā Rāma turata tehiṃ dīnhā,
paṭa ura lāi socha ati kīnhā. (3)
31 of 193
कह सुग्रीव सुनहु रघुबीरा।
तजहु सोच मन आनहु धीरा॥
सब प्रकार करिहउँ सेवकाई।
जेहि बिधि मिलिहि जानकी आई ॥४॥
Kaha Sugrīva sunahu Raghubīrā,
tajahu socha mana ānahu dhīrā.
Saba prakāra karihauṃ sevakāī,
jehi bidhi milihi Jānakī āī. (4)
32 of 193
दो०—सखा बचन सुनि हरषे कृपासिंधु बलसींव।
कारन कवन बसहु बन मोहि कहहु सुग्रीव ॥५॥
Do—Sakhā bachana suni haraṣe kṛpāsiṃdhu balasīṃva,
kārana kavana basahu bana mohi kahahu Sugrīva. (5)
33 of 193
नाथ बालि अरु मैं द्वौ भाई।
प्रीति रही कछु बरनि न जाई॥
मयसुत मायावी तेहि नाऊँ।
आवा सो प्रभु हमरें गाऊँ ॥१॥
Nātha Bāli aru maiṃ dvau bhāī,
prīti rahī kachhu barani na jāī.
Mayasuta Māyāvī tehi nāūṃ,
āvā so prabhu hamareṃ gāūṃ. (1)
34 of 193
अर्ध राति पुर द्वार पुकारा।
बाली रिपु बल सहइ न पारा॥
धावा बालि देखि सो भागा।
मैं पुनि गयउँ बंधु सँग लागा ॥२॥
Ardha rāti pura dvāra pukārā,
Bālī ripu bala sahai na pārā.
Dhāvā Bāli dekhi so bhāgā,
maiṃ puni gayauṃ baṃdhu saṃga lāgā. (2)
35 of 193
गिरिबर गुहाँ पैठ सो जाई।
तब बालीं मोहि कहा बुझाई॥
परिखेसु मोहि एक पखवारा।
नहिं आवौं तब जानेसु मारा ॥३॥
Giribara guhāṃ paiṭha so jāī,
taba Bālīṃ mohi kahā bujhāī.
Parikhesu mohi eka pakhavārā,
nahiṃ āvauṃ taba jānesu mārā. (3)
36 of 193
मास दिवस तहँ रहेउँ खरारी।
निसरी रुधिर धार तहँ भारी॥
बालि हतेसि मोहि मारिहि आई।
सिला देइ तहँ चलेउँ पराई ॥४॥
Māsa divasa tahaṃ raheuṃ Kharārī,
nisarī rudhira dhāra tahaṃ bhārī.
Bāli hatesi mohi mārihi āī,
silā dei tahaṃ chaleuṃ parāī. (4)
37 of 193
मंत्रिन्ह पुर देखा बिनु साईं।
दीन्हेउ मोहि राज बरिआईं॥
बाली ताहि मारि गृह आवा।
देखि मोहि जियँ भेद बढ़ावा ॥५॥
Maṃtrinha pura dekhā binu sāīṃ,
dīnheu mohi rāja bariāīṃ.
Bālī tāhi māri gṛha āvā,
dekhi mohi jiyaṃ bheda baḍhāvā. (5)
38 of 193
रिपु सम मोहि मारेसि अति भारी।
हरि लीन्हेसि सर्बसु अरु नारी॥
ताकें भय रघुबीर कृपाला।
सकल भुवन मैं फिरेउँ बिहाला ॥६॥
Ripu sama mohi māresi ati bhārī,
hari līnhesi sarbasu aru nārī.
Tākeṃ bhaya Raghubīra kṛpālā,
sakala bhuvana maiṃ phireuṃ bihālā. (6)
39 of 193
इहाँ साप बस आवत नाहीं।
तदपि सभीत रहउँ मन माहीं॥
सुनि सेवक दुख दीनदयाला।
फरकि उठीं द्वै भुजा बिसाला ॥७॥
Ihāṃ sāpa basa āvata nāhīṃ,
tadapi sabhīta rahauṃ mana māhīṃ.
Suni sevaka dukha Dīnadayālā,
pharaki uṭhīṃ dvai bhujā bisālā. (7)
40 of 193
दो०—सुनु सुग्रीव मारिहउँ बालिहि एकहिं बान।
ब्रह्म रुद्र सरनागत गएँ न उबरिहिं प्रान ॥६॥
Do—Sunu Sugrīva mārihauṃ Bālihi ekahiṃ bāna,
Brahma Rudra saranāgata gaeṃ na ubarihiṃ prāna. (6)
41 of 193
जे न मित्र दुख होहिं दुखारी।
तिन्हहि बिलोकत पातक भारी॥
निज दुख गिरि सम रज करि जाना।
मित्रक दुख रज मेरु समाना ॥१॥
Je na mitra dukha hohiṃ dukhārī,
tinhahi bilokata pātaka bhārī.
Nija dukha giri sama raja kari jānā,
mitraka dukha raja Meru samānā. (1)
42 of 193
जिन्ह कें असि मति सहज न आई।
ते सठ कत हठि करत मिताई॥
कुपथ निवारि सुपंथ चलावा।
गुन प्रगटै अवगुनन्हि दुरावा ॥२॥
Jinha keṃ asi mati sahaja na āī,
te saṭha kata haṭhi karata mitāī.
Kupatha nivāri supaṃtha chalāvā,
guna pragaṭai avagunanhi durāvā. (2)
43 of 193
देत लेत मन संक न धरई।
बल अनुमान सदा हित करई॥
बिपति काल कर सतगुन नेहा।
श्रुति कह संत मित्र गुन एहा ॥३॥
Deta leta mana saṃka na dharaī,
bala anumāna sadā hita karaī.
Bipati kāla kara satguna nehā,
śruti kaha saṃta mitra guna ehā. (3)
44 of 193
आगें कह मृदु बचन बनाई।
पाछें अनहित मन कुटिलाई॥
जाकर चित अहि गति सम भाई।
अस कुमित्र परिहरेहिं भलाई ॥४॥
Āgeṃ kaha mṛdu bachana banāī,
pāchheṃ anahita mana kuṭilāī.
Jākara chita ahi gati sama bhāī,
asa kumitra pariharehiṃ bhalāī. (4)
45 of 193
सेवक सठ नृप कृपन कुनारी।
कपटी मित्र सूल सम चारी॥
सखा सोच त्यागहु बल मोरें।
सब बिधि घटब काज मैं तोरें ॥५॥
Sevaka saṭha nṛpa kṛpana kunārī,
kapaṭī mitra sūla sama chārī.
Sakhā socha tyāgahu bala moreṃ,
saba bidhi ghaṭaba kāja maiṃ toreṃ. (5)
46 of 193
कह सुग्रीव सुनहु रघुबीरा।
बालि महाबल अति रनधीरा॥
दुंदुभि अस्थि ताल देखराए।
बिनु प्रयास रघुनाथ ढहाए ॥६॥
Kaha Sugrīva sunahu Raghubīrā,
Bāli mahābala ati ranadhīrā.
Duṃdubhi asthi tāla dekharāe,
binu prayāsa Raghunātha ḍhahāe. (6)
47 of 193
देखि अमित बल बाढ़ी प्रीती।
बालि बधब इन्ह भइ परतीती॥
बार बार नावइ पद सीसा।
प्रभुहि जानि मन हरष कपीसा ॥७॥
Dekhi amita bala bāḍhī prītī,
Bāli badhaba inha bhai paratītī.
Bāra bāra nāvai pada sīsā,
prabhuhi jāni mana haraṣa kapīsā. (7)
48 of 193
उपजा ग्यान बचन तब बोला।
नाथ कृपाँ मन भयउ अलोला॥
सुख संपति परिवार बड़ाई।
सब परिहरि करिहउँ सेवकाई ॥८॥
Upajā gyāna bachana taba bolā,
nātha kṛpāṃ mana bhayau alolā.
Sukha saṃpati parivāra baḍāī,
saba parihari karihauṃ sevakāī. (8)
49 of 193
ए सब राम भगति के बाधक।
कहहिं संत तव पद अवराधक॥
सत्रु मित्र सुख दुख जग माहीं।
मायाकृत परमारथ नाहीं ॥९॥
E saba Rāma bhagati ke bādhaka,
kahahiṃ saṃta tava pada avarādhaka.
Satru mitra sukha dukha jaga māhīṃ,
māyākṛta paramāratha nāhīṃ. (9)
50 of 193
बालि परम हित जासु प्रसादा।
मिलेहु राम तुम्ह समन बिषादा॥
सपनें जेहि सन होइ लराई।
जागें समुझत मन सकुचाई ॥१०॥
Bāli parama hita jāsu prasādā,
milehu Rāma tumha samana biṣādā.
Sapaneṃ jehi sana hoi larāī,
jāgeṃ samujhata mana sakuchāī. (10)
51 of 193
अब प्रभु कृपा करहु एहि भाँती।
सब तजि भजनु करौं दिन राती॥
सुनि बिराग संजुत कपि बानी।
बोले बिहँसि रामु धनुपानी ॥११॥
Aba prabhu kṛpā karahu ehi bhāṃtī,
saba taji bhajanu karauṃ dina rātī.
Suni birāga saṃjuta kapi bānī,
bole bihaṃsi Rāmu dhanupānī. (11)
52 of 193
जो कछु कहेहु सत्य सब सोई।
सखा बचन मम मृषा न होई॥
नट मरकट इव सबहि नचावत।
रामु खगेस बेद अस गावत ॥१२॥
Jo kachhu kahehu satya saba soī,
sakhā bachana mama mṛṣā na hoī.
Naṭa marakaṭa iva sabahi nachāvata,
Rāmu Khagesa beda asa gāvata. (12)
53 of 193
लै सुग्रीव संग रघुनाथा।
चले चाप सायक गहि हाथा॥
तब रघुपति सुग्रीव पठावा।
गर्जेसि जाइ निकट बल पावा ॥१३॥
Lai Sugrīva saṃga Raghunāthā,
chale chāpa sāyaka gahi hāthā.
Taba Raghupati Sugrīva paṭhāvā,
garjesi jāi nikaṭa bala pāvā. (13)
54 of 193
सुनत बालि क्रोधातुर धावा।
गहि कर चरन नारि समुझावा॥
सुनु पति जिन्हहि मिलेउ सुग्रीवा।
ते द्वौ बंधु तेज बल सींवा ॥१४॥
Sunata Bāli krodhātura dhāvā,
gahi kara charana nāri samujhāvā.
Sunu pati jinhahi mileu Sugrīvā,
te dvau baṃdhu teja bala sīṃvā. (14)
55 of 193
कोसलेस सुत लछिमन रामा।
कालहु जीति सकहिं संग्रामा ॥१५॥
Kosalesa suta Lachhimana Rāmā,
kālahu jīti sakahiṃ saṃgrāmā. (15)
56 of 193
दो०—कह बाली सुनु भीरु प्रिय समदरसी रघुनाथ।
जौं कदाचि मोहि मारहिं तौ पुनि होउँ सनाथ ॥७॥
Do—Kaha Bālī sunu bhīru priya samadarasī Raghunātha,
jauṃ kadāchi mohi mārahiṃ tau puni houṃ sanātha. (7)
57 of 193
अस कहि चला महा अभिमानी।
तृन समान सुग्रीवहि जानी॥
भिरे उभौ बाली अति तर्जा।
मुठिका मारि महाधुनि गर्जा ॥१॥
Asa kahi chalā mahā abhimānī,
tṛna samāna Sugrīvahi jānī.
Bhire ubhau Bālī ati tarjā,
muṭhikā māri mahādhuni garjā. (1)
58 of 193
तब सुग्रीव बिकल होइ भागा।
मुष्टि प्रहार बज्र सम लागा॥
मैं जो कहा रघुबीर कृपाला।
बंधु न होइ मोर यह काला ॥२॥
Taba Sugrīva bikala hoi bhāgā,
muṣṭi prahāra bajra sama lāgā.
Maiṃ jo kahā Raghubīra kṛpālā,
baṃdhu na hoi mora yaha kālā. (2)
59 of 193
एकरूप तुम्ह भ्राता दोऊ।
तेहि भ्रम तें नहिं मारेउँ सोऊ॥
कर परसा सुग्रीव सरीरा।
तनु भा कुलिस गई सब पीरा ॥३॥
Ekarūpa tumha bhrātā doū,
tehi bhrama teṃ nahiṃ māreuṃ soū.
Kara parasā Sugrīva sarīrā,
tanu bhā kulisa gaī saba pīrā. (3)
60 of 193
मेली कंठ सुमन कै माला।
पठवा पुनि बल देइ बिसाला॥
पुनि नाना बिधि भई लराई।
बिटप ओट देखहिं रघुराई ॥४॥
Melī kaṃṭha sumana kai mālā,
paṭhavā puni bala dei bisālā.
Puni nānā bidhi bhaī larāī,
biṭapa oṭa dekhahiṃ Raghurāī. (4)
61 of 193
दो०—बहु छल बल सुग्रीव कर हियँ हारा भय मानि।
मारा बालि राम तब हृदय माझ सर तानि ॥८॥
Do—Bahu chala bala Sugrīva kara hiyaṃ hārā bhaya māni,
Mārā Bāli Rāma taba hṛdaya mājha sara tāni. (8)
62 of 193
परा बिकल महि सर के लागें।
पुनि उठि बैठ देखि प्रभु आगें॥
स्याम गात सिर जटा बनाएँ।
अरुन नयन सर चाप चढ़ाएँ ॥१॥
Parā bikala mahi sara ke lāgeṃ,
puni uṭhi baiṭha dekhi prabhu āgeṃ,
Syāma gāta sira jaṭā banāeṃ,
aruna nayana sara cāpa caḍhāeṃ. (1)
63 of 193
पुनि पुनि चितइ चरन चित दीन्हा।
सुफल जन्म माना प्रभु चीन्हा॥
हृदयँ प्रीति मुख बचन कठोरा।
बोला चितइ राम की ओरा ॥२॥
Puni puni citai carana cita dīnhā,
suphala janma mānā prabhu cīnhā,
Hṛdayaṃ prīti mukha bacana kaṭhorā,
bolā citai Rāma kī orā. (2)
64 of 193
धर्म हेतु अवतरेहु गोसाईं।
मारेहु मोहि ब्याध की नाईं॥
मैं बैरी सुग्रीव पिआरा।
अवगुन कवन नाथ मोहि मारा ॥३॥
Dharma hetu avatarehu gosāīṃ,
mārehu mohi byādha kī nāīṃ,
Maiṃ bairī Sugrīva piārā,
avaguna kavana nātha mohi mārā. (3)
65 of 193
अनुज बधू भगिनी सुत नारी।
सुनु सठ कन्या सम ए चारी॥
इन्हहि कुदृष्टि बिलोकइ जोई।
ताहि बधें कछु पाप न होई ॥४॥
Anuja badhū bhaginī suta nārī,
sunu saṭha kanyā sama e cārī,
Inhahi kudṛṣṭi bilokai joī,
tāhi badheṃ kachu pāpa na hoī. (4)
66 of 193
मूढ़ तोहि अतिसय अभिमाना।
नारि सिखावन करसि न काना॥
मम भुज बल आश्रित तेहि जानी।
मारा चहसि अधम अभिमानी ॥५॥
Mūḍha tohi atisaya abhimānā,
nāri sikhāvana karasi na kānā,
Mama bhuja bala āśrita tehi jānī,
mārā cahasi adhama abhimānī. (5)
67 of 193
दो०—सुनहु राम स्वामी सन चल न चातुरी मोरि।
प्रभु अजहूँ मैं पापी अंतकाल गति तोरि ॥९॥
Do—Sunahu Rāma svāmī sana cala na cāturī mori,
Prabhu ajahūṃ maiṃ pāpī antakāla gati tori. (9)
68 of 193
सुनत राम अति कोमल बानी।
बालि सीस परसेउ निज पानी॥
अचल करौं तनु राखहु प्राना।
बालि कहा सुनु कृपानिधाना ॥१॥
Sunata Rāma ati komala bānī,
Bāli sīsa paraseu nija pānī,
Acala karauṃ tanu rākhahu prānā,
Bāli kahā sunu kṛpānidhānā. (1)
69 of 193
जन्म जन्म मुनि जतनु कराहीं।
अंत राम कहि आवत नाहीं॥
जासु नाम बल संकर कासी।
देत सबहि सम गति अबिनासी ॥२॥
Janma janma muni jatanu karāhīṃ,
anta Rāma kahi āvata nāhīṃ,
Jāsu nāma bala saṃkara Kāsī,
deta sabahi sama gati abināsī. (2)
70 of 193
मम लोचन गोचर सोइ आवा।
बहुरि कि प्रभु अस बनिहि बनावा ॥३॥
Mama locana gocara soi āvā,
bahuri ki prabhu asa banihi banāvā. (3)
71 of 193
छं०—सो नयन गोचर जासु गुन नित नेति कहि श्रुति गावहीं।
जिति पवन मन गो निरस करि मुनि ध्यान कबहुँक पावहीं॥
मोहि जानि अति अभिमान बस प्रभु कहेउ राखु सरीरही।
अस कवन सठ हठि काटि सुरतरु बारि करिहि बबूरही ॥१॥
अब नाथ करि करुना बिलोकहु देहु जो बर मागऊँ।
जेहिं जोनि जन्मौं कर्म बस तहँ राम पद अनुरागऊँ॥
यह तनय मम सम बिनय बल कल्यानप्रद प्रभु लीजिऐ।
गहि बाँह सुर नर नाह आपन दास अंगद कीजिऐ ॥२॥
Chhand—So nayana gocara jāsu guna nita neti kahi śruti gāvahīṃ,
jiti pavana mana go nirasa kari muni dhyāna kabahum̐ka pāvahīṃ,
Mohi jāni ati abhimāna basa prabhu kaheu rākhu sarīrahī,
asa kavana saṭha haṭhi kāṭi surataru bāri karihi babūrahī,
Aba nātha kari karunā bilokahu dehu jo bara māgaūṃ,
jehiṃ joni janmauṃ karma basa tahaṃ Rāma pada anurāgaūṃ,
Yaha tanaya mama sama binaya bala kalyānaprada prabhu lījiai,
gahi bāṃha sura nara nāha āpana dāsa Aṃgada kījiai. (2)
72 of 193
दो०—राम चरन दृढ़ प्रीति करि बालि कीन्ह तनु त्याग।
सुमन माल जिमि कंठ ते गिरत न जानइ नाग ॥१०॥
Do—Rāma carana dṛḍha prīti kari Bāli kīnha tanu tyāga,
Sumana māla jimi kaṃṭha te girata na jānai nāga. (10)
73 of 193
राम बालि निज धाम पठावा।
नगर लोग सब ब्याकुल धावा॥
नाना बिधि बिलाप कर तारा।
छूटे केस न देह सँभारा ॥१॥
Rāma Bāli nija dhāma paṭhāvā,
nagara loga saba byākula dhāvā,
Nānā bidhi bilāpa kara Tārā,
chūṭe kesa na deha saṃbhārā. (1)
74 of 193
तारा बिकल देखि रघुराया।
दीन्ह ग्यान हरि लीन्ही माया॥
छिति जल पावक गगन समीरा।
पंच रचित अति अधम सरीरा ॥२॥
Tārā bikala dekhi Raghurāyā,
dīnha gyāna hari līnhī māyā,
Chiti jala pāvaka gagana samīrā,
paṃca racita ati adhama sarīrā. (2)
75 of 193
प्रगट सो तनु तव आगें सोवा।
जीव नित्य केहि लगि तुम्ह रोवा॥
उपजा ग्यान चरन तब लागी।
लीन्हेसि परम भगति बर मागी ॥३॥
Pragaṭa so tanu tava āgeṃ sovā,
jīva nitya kehi lagi tumha rovā,
Upajā gyāna carana taba lāgī,
līnhesi parama bhagati bara māgī. (3)
76 of 193
उमा दारु जोषित की नाईं।
सबहि नचावत रामु गोसाईं॥
तब सुग्रीवहि आयसु दीन्हा।
मृतक कर्म बिधिवत सब कीन्हा ॥४॥
Umā dāru joṣita kī nāīṃ,
sabahi nacāvata Rāmu gosāīṃ,
Taba Sugrīvahi āyasu dīnhā,
mṛtaka karma bidhivata saba kīnhā. (4)
77 of 193
राम कहा अनुजहि समुझाई।
राज देहु सुग्रीवहि जाई॥
रघुपति चरन नाइ करि माथा।
चले सकल प्रेरित रघुनाथा ॥५॥
Rāma kahā anujahi samujhāī,
rāja dehu Sugrīvahi jāī,
Raghupati carana nāi kari māthā,
cale sakala prerita Raghunāthā. (5)
78 of 193
दो०—लछिमन तुरत बोलाए पुरजन बिप्र समाज।
राजु दीन्ह सुग्रीव कहँ अंगद कहँ जुबराज ॥११॥
Do—Lachimana turata bolāe purajana bipra samāja,
Rāju dīnha Sugrīva kahaṃ Aṃgada kahaṃ jubarāja. (11)
79 of 193
उमा राम सम हित जग माहीं।
गुरु पितु मातु बंधु प्रभु नाहीं॥
सुर नर मुनि सब कै यह रीती।
स्वारथ लागि करहिं सब प्रीती ॥१॥
Umā Rāma sama hita jaga māhīṃ,
guru pitu mātu baṃdhu prabhu nāhīṃ,
Sura nara muni saba kai yaha rītī,
svāratha lāgi karahiṃ saba prītī. (1)
80 of 193
बालि त्रास ब्याकुल दिन राती।
तन बहु ब्रन चिंताँ जर छाती॥
सोइ सुग्रीव कीन्ह कपिराऊ।
अति कृपाल रघुबीर सुभाऊ ॥२॥
Bāli trāsa byākula dina rātī,
tana bahu brana ciṃtāṃ jara chātī,
Soi Sugrīva kīnha kapirāū,
ati kṛpāla Raghubīra subhāū. (2)
81 of 193
जानतहूँ अस प्रभु परिहरहीं।
काहे न बिपति जाल नर परहीं॥
पुनि सुग्रीवहि लीन्ह बोलाई।
बहु प्रकार नृपनीति सिखाई ॥३॥
Jānatahūṃ asa prabhu pariharahiṃ,
kāhe na bipati jāla nara parahiṃ,
Puni Sugrīvahi līnha bolāī,
bahu prakāra nṛpanīti sikhāī. (3)
82 of 193
कह प्रभु सुनु सुग्रीव हरीसा।
पुर न जाउँ दस चारि बरीसा॥
गत ग्रीषम बरषा रितु आई।
रहिहउँ निकट सैल पर छाई ॥४॥
Kaha prabhu sunu Sugrīva harīsā,
pura na jāuṃ dasa cāri barīsā,
Gata grīṣama baraṣā ritu āī,
rahihauṃ nikaṭa saila para chāī. (4)
83 of 193
अंगद सहित करहु तुम्ह राजू।
संतत हृदयँ धरेहु मम काजू॥
जब सुग्रीव भवन फिरि आए।
रामु प्रबरषन गिरि पर छाए ॥५॥
Aṃgada sahita karahu tumha rājū,
saṃtata hṛdayaṃ dharehu mama kājū,
Jaba Sugrīva bhavana phiri āe,
Rāmu prabaraṣana giri para chāe. (5)
84 of 193
दो०—प्रथमहिं देवन्ह गिरि गुहा राखेउ रुचिर बनाइ।
राम कृपानिधि कछु दिन बास करहिंगे आइ ॥१२॥
Do—Prathamahiṃ devanha giri guhā rākheu rucira banāi,
Rāma kṛpānidhi kachu dina bāsa karahiṃge āi. (12)
85 of 193
सुंदर बन कुसुमित अति सोभा।
गुंजत मधुप निकर मधु लोभा॥
कंद मूल फल पत्र सुहाए।
भए बहुत जब ते प्रभु आए ॥१॥
Suṃdara bana kusumita ati sobhā,
guṃjata madhupa nikara madhu lobhā,
Kaṃda mūla phala patra suhāe,
bhae bahuta jaba te prabhu āe. (1)
86 of 193
देखि मनोहर सैल अनूपा।
रहे तहँ अनुज सहित सुरभूपा॥
मधुकर खग मृग तनु धरि देवा।
करहिं सिद्ध मुनि प्रभु कै सेवा ॥२॥
Dekhi manohara saila anūpā,
rahe tahaṃ anuja sahita surabhūpā,
Madhukara khaga mṛga tanu dhari devā,
karahiṃ siddha muni prabhu kai sevā. (2)
87 of 193
मंगलरूप भयउ बन तब ते।
कीन्ह निवास रमापति जब ते॥
फटिक सिला अति सुभ्र सुहाई।
सुख आसीन तहाँ द्वौ भाई ॥३॥
Maṃgalarūpa bhayau bana taba te,
kīnha nivāsa Ramāpati jaba te,
Phaṭika silā ati subhra suhāī,
sukha āsīna tahāṃ dvau bhāī. (3)
88 of 193
कहत अनुज सन कथा अनेका।
भगति बिरति नृपनीति बिबेका॥
बरषा काल मेघ नभ छाए।
गरजत लागत परम सुहाए ॥४॥
Kahata anuja sana kathā anekā,
bhagati birati nṛpanīti bibekā,
Baraṣā kāla megha nabha chāe,
garajata lāgata parama suhāe. (4)
89 of 193
दो०—लछिमन देखु मोर गन नाचत बारिद पेखि।
गृही बिरतिरत हरष जस बिष्नुभगत कहुँ देखि ॥१३॥
Do—Lachimana dekhu mora gana nācata bārida pekhi,
Gṛhī biratirata haraṣa jasa biṣnubhagata kahuṃ dekhi. (13)
90 of 193
घन घमंड नभ गरजत घोरा।
प्रिया हीन डरपत मन मोरा॥
दामिनि दमक रह न घन माहीं।
खल कै प्रीति जथा थिर नाहीं ॥१॥
Ghana ghamaṃḍa nabha garajata ghorā,
priyā hīna ḍarapata mana morā,
Dāmini damaka raha na ghana māhīṃ,
khala kai prīti jathā thira nāhīṃ. (1)
91 of 193
बरषहिं जलद भूमि निअराएँ।
जथा नवहिं बुध बिद्या पाएँ॥
बूँद अघात सहहिं गिरि कैसें।
खल के बचन संत सह जैसें ॥२॥
Baraṣahiṃ jalada bhūmi niarāeṃ,
jathā navahiṃ budha bidyā pāeṃ,
Būṃda aghāta sahahiṃ giri kaiseṃ,
khala ke bacana saṃta saha jaiseṃ. (2)
92 of 193
छुद्र नदीं भरि चलीं तोराई।
जस थोरेहुँ धन खल इतराई॥
भूमि परत भा ढाबर पानी।
जनु जीवहि माया लपटानी ॥३॥
Chudra nadīṃ bhari calīṃ torāī,
jasa thorehuṃ dhana khala itarāī,
Bhūmi parata bhā ḍhābara pānī,
janu jīvahi māyā lapaṭānī. (3)
93 of 193
समिटि समिटि जल भरहिं तलावा।
जिमि सदगुन सज्जन पहिं आवा॥
सरिता जल जलनिधि महुँ जाई।
होइ अचल जिमि जिव हरि पाई ॥४॥
Samiṭi samiṭi jala bharahiṃ talāvā,
jimi sadaguna sajjana pahiṃ āvā,
Saritā jala jalanidhi mahuṃ jāī,
hoi acala jimi jiva hari pāī. (4)
94 of 193
दो०—हरित भूमि तृन संकुल समुझि परहिं नहिं पंथ।
जिमि पाखंड बाद तें गुप्त होहिं सदग्रंथ ॥१४॥
Do—Harita bhūmi tṛna saṃkula samujhi parahiṃ nahiṃ paṃtha,
Jimi pākhaṃḍa bāda teṃ gupta hohiṃ sadagraṃtha. (14)
95 of 193
दादुर धुनि चहु दिसा सुहाई।
बेद पढ़हिं जनु बटु समुदाई॥
नव पल्लव भए बिटप अनेका।
साधक मन जस मिलें बिबेका ॥१॥
Dādura dhuni cahu disā suhāī,
beda paḍhahiṃ janu baṭu samudāī,
Nava pallava bhae biṭapa anekā,
sādhaka mana jasa mileṃ bibekā. (1)
96 of 193
अर्क जवास पात बिनु भयऊ।
जस सुराज खल उद्यम गयऊ॥
खोजत कतहुँ मिलइ नहिं धूरी।
करइ क्रोध जिमि धरमहि दूरी ॥२॥
Arka javāsa pāta binu bhayaū,
jasa surāja khala udyama gayaū,
Khojata katahuṃ milai nahiṃ dhūrī,
karai krodha jimi dharamahi dūrī. (2)
97 of 193
ससि संपन्न सोह महि कैसी।
उपकारी कै संपति जैसी॥
निसि तम घन खद्योत बिराजा।
जनु दंभिन्ह कर मिला समाजा ॥३॥
Sasi saṃpanna soha mahi kaisī,
upakārī kai saṃpati jaisī,
Nisi tama ghana khadyota birājā,
janu daṃbhinha kara milā samājā. (3)
98 of 193
महाबृष्टि चलि फूटि किआरीं।
जिमि सुतंत्र भएँ बिगरहिं नारीं॥
कृषी निरावहिं चतुर किसाना।
जिमि बुध तजहिं मोह मद माना ॥४॥
Mahābṛṣṭi cali phūṭi kiārīṃ,
jimi sutaṃtra bhaeṃ bigarahiṃ nārīṃ,
Kṛṣī nirāvahiṃ catura kisānā,
jimi budha tajahiṃ moha mada mānā. (4)
99 of 193
देखिअत चक्रबाक खग नाहीं।
कलिहि पाइ जिमि धर्म पराहीं॥
ऊषर बरषइ तृन नहिं जामा।
जिमि हरिजन हियँ उपज न कामा ॥५॥
Dekhiata cakrabāka khaga nāhīṃ,
kalihi pāi jimi dharma parāhīṃ,
Ūṣara baraṣai tṛna nahiṃ jāmā,
jimi harijana hiyaṃ upaja na kāmā. (5)
100 of 193
बिबिध जंतु संकुल महि भ्राजा।
प्रजा बाढ़ जिमि पाइ सुराजा॥
जहँ तहँ रहे पथिक थकि नाना।
जिमि इंद्रिय गन उपजें ग्याना ॥६॥
Bibidha jaṃtu saṃkula mahi bhrājā,
prajā bāḍha jimi pāi surājā,
Jahaṃ tahaṃ rahe pathika thaki nānā,
jimi iṃdriya gana upajeṃ gyānā. (6)
101 of 193
दो०—कबहुँ प्रबल बह मारुत जहँ तहँ मेघ बिलाहिं।
जिमि कपूत के उपजें कुल सद्धर्म नसाहिं ॥१५(क)॥
Do—Kabahuṃ prabala baha māruta jahaṃ tahaṃ megha bilāhiṃ,
Jimi kapūta ke upajeṃ kula saddharma nasāhiṃ. (15a)
102 of 193
कबहुँ दिवस महँ निबिड़ तम कबहुँक प्रगट पतंग।
बिनसइ उपजइ ग्यान जिमि पाइ कुसंग सुसंग ॥१५(ख)॥
Kabahuṃ divasa mahaṃ nibiḍa tama kabahuṃka pragaṭa pataṃga,
Binasai upajai gyāna jimi pāi kusaṃga susaṃga. (15b)
103 of 193
बरषा बिगत सरद रितु आई।
लछिमन देखहु परम सुहाई॥
फूलें कास सकल महि छाई।
जनु बरषाँ कृत प्रगट बुढ़ाई ॥१॥
Baraṣā bigata sarada ritu āī,
Lachimana dekhahu parama suhāī,
Phūleṃ kāsa sakala mahi chāī,
janu baraṣāṃ kṛta pragaṭa buḍhāī. (1)
104 of 193
उदित अगस्ति पंथ जल सोषा।
जिमि लोभहि सोषइ संतोषा॥
सरिता सर निर्मल जल सोहा।
संत हृदय जस गत मद मोहा ॥२॥
Udita agasti paṃtha jala soṣā,
jimi lobhahi soṣai saṃtoṣā,
Saritā sara nirmala jala sohā,
saṃta hṛdaya jasa gata mada mohā. (2)
105 of 193
रस रस सूख सरित सर पानी।
ममता त्याग करहिं जिमि ग्यानी॥
जानि सरद रितु खंजन आए।
पाइ समय जिमि सुकृत सुहाए ॥३॥
Rasa rasa sūkha sarita sara pānī,
mamatā tyāga karahiṃ jimi gyānī,
Jāni sarada ritu khaṃjana āe,
pāi samaya jimi sukṛta suhāe. (3)
106 of 193
पंक न रेनु सोह असि धरनी।
नीति निपुन नृप कै जसि करनी॥
जल संकोच बिकल भइँ मीना।
अबुध कुटुंबी जिमि धनहीना ॥४॥
Paṃka na renu soha asi dharanī,
nīti nipuna nṛpa kai jasi karanī,
Jala saṃkoca bikala bhaiṃ mīnā,
abudha kuṭuṃbī jimi dhanahīnā. (4)
107 of 193
बिनु घन निर्मल सोह अकासा।
हरिजन इव परिहरि सब आसा॥
कहुँ कहुँ बृष्टि सारदी थोरी।
कोउ एक पाव भगति जिमि मोरी ॥५॥
Binu ghana nirmala soha akāsā,
harijana iva parihari saba āsā,
Kahuṃ kahuṃ bṛṣṭi sāradī thorī,
kou eka pāva bhagati jimi morī. (5)
108 of 193
दो०—चले हरषि तजि नगर नृप तापस बनिक भिखारि।
जिमि हरिभगति पाइ श्रम तजहिं आश्रमी चारि ॥१६॥
Do—Cale haraṣi taji nagara nṛpa tāpasa banika bhikhāri,
Jimi haribhagati pāi śrama tajahiṃ āśramī cāri. (16)
109 of 193
सुखी मीन जे नीर अगाधा।
जिमि हरि सरन न एकउ बाधा॥
फूलें कमल सोह सर कैसा।
निर्गुन ब्रह्म सगुन भएँ जैसा ॥१॥
Sukhī mīna je nīra agādhā,
jimi hari sarana na ekau bādhā,
Phūleṃ kamala soha sara kaisā,
nirguna brahma saguna bhaeṃ jaisā. (1)
110 of 193
गुंजत मधुकर मुखर अनूपा।
सुंदर खग रव नाना रूपा॥
चक्रबाक मन दुख निसि पेखी।
जिमि दुर्जन पर संपति देखी ॥२॥
Guṃjata madhukara mukhara anūpā,
suṃdara khaga rava nānā rūpā,
Cakrabāka mana dukha nisi pekhī,
jimi durjana para saṃpati dekhī. (2)
111 of 193
चातक रटत तृषा अति ओही।
जिमि सुख लहइ न संकरद्रोही॥
सरदातप निसि ससि अपहरई।
संत दरस जिमि पातक टरई ॥३॥
Cātaka raṭata tṛṣā ati ohī,
jimi sukha lahai na saṃkaradrohī,
Saradātapa nisi sasi apaharaī,
saṃta darasa jimi pātaka ṭaraī. (3)
112 of 193
देखि इंदु चकोर समुदाई।
चितवहिं जिमि हरिजन हरि पाई॥
मसक दंस बीते हिम त्रासा।
जिमि द्विज द्रोह किएँ कुल नासा ॥४॥
Dekhi iṃdu cakora samudāī,
citavahiṃ jimi harijana hari pāī,
Masaka daṃsa bīte hima trāsā,
jimi dvija droha kieṃ kula nāsā. (4)
113 of 193
दो०—भूमि जीव संकुल रहे गए सरद रितु पाइ।
सदगुर मिलें जाहिं जिमि संसय भ्रम समुदाइ ॥१७॥
Do—Bhūmi jīva saṃkula rahe gae sarada ritu pāi,
Sadagura mileṃ jāhiṃ jimi saṃsaya bhrama samudāi. (17)
114 of 193
बरषा गत निर्मल रितु आई।
सुधि न तात सीता कै पाई॥
एक बार कैसेहुँ सुधि जानौं।
कालहु जीति निमिष महुँ आनौं ॥१॥
Baraṣā gata nirmala ritu āī,
sudhi na tāta Sītā kai pāī,
Eka bāra kaisehuṃ sudhi jānauṃ,
kālahu jīti nimiṣa mahuṃ ānauṃ. (1)
115 of 193
कतहुँ रहउ जौं जीवति होई।
तात जतन करि आनउँ सोई॥
सुग्रीवहुँ सुधि मोरि बिसारी।
पावा राज कोस पुर नारी ॥२॥
Katahuṃ rahau jauṃ jīvati hoī,
tāta jatana kari ānauṃ soī,
Sugrīvahuṃ sudhi mori bisārī,
pāvā rāja kosa pura nārī. (2)
116 of 193
जेहिं सायक मारा मैं बाली।
तेहिं सर हतौं मूढ़ कहँ काली॥
जासु कृपाँ छूटहिं मद मोहा।
ता कहुँ उमा कि सपनेहुँ कोहा ॥३॥
Jehiṃ sāyaka mārā maiṃ Bālī,
tehiṃ sara hatauṃ mūḍha kahaṃ kālī,
Jāsu kṛpāṃ chūṭahiṃ mada mohā,
tā kahuṃ Umā ki sapanehuṃ kohā. (3)
117 of 193
जानहिं यह चरित्र मुनि ग्यानी।
जिन्ह रघुबीर चरन रति मानी॥
लछिमन क्रोधवंत प्रभु जाना।
धनुष चढ़ाइ गहे कर बाना ॥४॥
Jānahiṃ yaha caritra muni gyānī,
jinha Raghubīra carana rati mānī,
Lachimana krodhavaṃta prabhu jānā,
dhanuṣa caḍhāi gahe kara bānā. (4)
118 of 193
दो०—तब अनुजहि समुझावा रघुपति करुना सींव।
भय देखाइ लै आवहु तात सखा सुग्रीव ॥१८॥
Do—Taba anujahi samujhāvā Raghupati karunā sīṃva,
Bhaya dekhāi lai āvahu tāta sakhā Sugrīva. (18)
119 of 193
इहाँ पवनसुत हृदयँ बिचारा।
राम काजु सुग्रीवँ बिसारा॥
निकट जाइ चरनन्हि सिरु नावा।
चारिहु बिधि तेहि कहि समुझावा ॥१॥
Ihāṃ pavanasuta hṛdayaṃ bicārā,
Rāma kāju Sugrīvaṃ bisārā,
Nikaṭa jāi carananhi siru nāvā,
cārihu bidhi tehi kahi samujhāvā. (1)
120 of 193
सुनि सुग्रीवँ परम भय माना।
बिषयँ मोर हरि लीन्हेउ ग्याना॥
अब मारुतसुत दूत समूहा।
पठवहु जहँ तहँ बानर जूहा ॥२॥
Suni Sugrīvaṃ parama bhaya mānā,
biṣayaṃ mora hari līnheu gyānā,
Aba mārutasuta dūta samūhā,
paṭhavahu jahaṃ tahaṃ bānara jūhā. (2)
121 of 193
कहहु पाख महुँ आव न जोई।
मोरें कर ता कर बध होई॥
तब हनुमंत बोलाए दूता।
सब कर करि सनमान बहूता ॥३॥
Kahahu pākha mahuṃ āva na joī,
moreṃ kara tā kara badha hoī,
Taba Hanumaṃta bolāe dūtā,
saba kara kari sanamāna bahūtā. (3)
122 of 193
भय अरु प्रीति नीति देखराई।
चले सकल चरनन्हि सिर नाई॥
एहि अवसर लछिमन पुर आए।
क्रोध देखि जहँ तहँ कपि धाए ॥४॥
Bhaya aru prīti nīti dekharāī,
cale sakala carananhi sira nāī,
Ehi avasara Lachimana pura āe,
krodha dekhi jahaṃ tahaṃ kapi dhāe. (4)
123 of 193
दो०—धनुष चढ़ाइ कहा तब जारि करउँ पुर छार।
ब्याकुल नगर देखि तब आयउ बालिकुमार ॥१९॥
Do—Dhanuṣa caḍhāi kahā taba jāri karauṃ pura chāra,
Byākula nagara dekhi taba āyau Bālikumāra. (19)
124 of 193
चरन नाइ सिरु बिनती कीन्ही।
लछिमन अभय बाँह तेहि दीन्ही॥
क्रोधवंत लछिमन सुनि काना।
कह कपीस अति भयँ अकुलाना ॥१॥
Carana nāi siru binatī kīnhī,
Lachimana abhaya bāṃha tehi dīnhī,
Krodhavaṃta Lachimana suni kānā,
kaha kapīsa ati bhayaṃ akulānā. (1)
125 of 193
सुनु हनुमंत संग लै तारा।
करि बिनती समुझाउ कुमारा॥
तारा सहित जाइ हनुमाना।
चरन बंदि प्रभु सुजस बखाना ॥२॥
Sunu Hanumaṃta saṃga lai Tārā,
kari binatī samujhāu kumārā,
Tārā sahita jāi Hanumānā,
carana baṃdi prabhu sujasa bakhānā. (2)
126 of 193
करि बिनती मंदिर लै आए।
चरन पखारि पलँग बैठाए॥
तब कपीस चरनन्हि सिरु नावा।
गहि भुज लछिमन कंठ लगावा ॥३॥
Kari binatī maṃdira lai āe,
carana pakhāri palaṃga baiṭhāe,
Taba kapīsa carananhi siru nāvā,
gahi bhuja Lachimana kaṃṭha lagāvā. (3)
127 of 193
नाथ बिषय सम मद कछु नाहीं।
मुनि मन मोह करइ छन माहीं॥
सुनत बिनीत बचन सुख पावा।
लछिमन तेहि बहु बिधि समुझावा ॥४॥
Nātha biṣaya sama mada kachu nāhīṃ,
muni mana moha karai chana māhīṃ,
Sunata binīta bacana sukha pāvā,
Lachimana tehi bahu bidhi samujhāvā. (4)
128 of 193
पवन तनय सब कथा सुनाई।
जेहि बिधि गए दूत समुदाई ॥५॥
Pavana tanaya saba kathā sunāī,
jehi bidhi gae dūta samudāī. (5)
129 of 193
दो०—हरषि चले सुग्रीव तब अंगदादि कपि साथ।
रामानुज आगें करि आए जहँ रघुनाथ ॥२०॥
Do—Haraṣi cale Sugrīva taba Aṃgadādi kapi sātha,
Rāmānuja āgeṃ kari āe jahaṃ Raghunātha. (20)
130 of 193
नाइ चरन सिरु कह कर जोरी।
नाथ मोहि कछु नाहिन खोरी॥
अतिसय प्रबल देव तव माया।
छूटइ राम करहु जौं दाया ॥१॥
Nāi carana siru kaha kara jorī,
nātha mohi kachu nāhina khorī,
Atisaya prabala deva tava māyā,
chūṭai Rāma karahu jauṃ dāyā. (1)
131 of 193
बिषय बस्य सुर नर मुनि स्वामी।
मैं पावँर पसु कपि अति कामी॥
नारि नयन सर जाहि न लागा।
घोर क्रोध तम निसि जो जागा ॥२॥
Biṣaya basya sura nara muni svāmī,
maiṃ pāvaṃra pasu kapi ati kāmī,
Nāri nayana sara jāhi na lāgā,
ghora krodha tama nisi jo jāgā. (2)
132 of 193
लोभ पाँस जेहिं गर न बँधाया।
सो नर तुम्ह समान रघुराया॥
यह गुन साधन तें नहिं होई।
तुम्हरी कृपाँ पाव कोइ कोई ॥३॥
Lobha pāṃsa jehiṃ gara na baṃdhāyā,
so nara tumha samāna Raghurāyā,
Yaha guna sādhana teṃ nahiṃ hoī,
tumharī kṛpāṃ pāva koi koī. (3)
133 of 193
तब रघुपति बोले मुसुकाई।
तुम्ह प्रिय मोहि भरत जिमि भाई॥
अब सोइ जतनु करहु मन लाई।
जेहि बिधि सीता कै सुधि पाई ॥४॥
Taba Raghupati bole musukāī,
tumha priya mohi bharata jimi bhāī,
Aba soi jatanu karahu mana lāī,
jehi bidhi Sītā kai sudhi pāī. (4)
134 of 193
दो०—एहि बिधि होत बतकही आए बानर जूथ।
नाना बरन सकल दिसि देखिअ कीस बरूथ ॥२१॥
Do—Ehi bidhi hota batakahī āe bānara jūtha,
Nānā barana sakala disi dekhia kīsa barūtha. (21)
135 of 193
बानर कटक उमा मैं देखा।
सो मूरख जो करन चह लेखा॥
आइ राम पद नावहिं माथा।
निरखि बदनु सब होहिं सनाथा ॥१॥
Bānara kaṭaka Umā maiṃ dekhā,
so mūrakha jo karana caha lekhā,
Āi Rāma pada nāvahiṃ māthā,
nirakhi badanu saba hohiṃ sanāthā. (1)
136 of 193
अस कपि एक न सेना माहीं।
राम कुसल जेहि पूछी नाहीं॥
यह कछु नहिं प्रभु कइ अधिकाई।
बिस्वरूप ब्यापक रघुराई ॥२॥
Asa kapi eka na senā māhīṃ,
Rāma kusala jehi pūchī nāhīṃ,
Yaha kachu nahiṃ prabhu kai adhikāī,
bisvarūpa byāpaka Raghurāī. (2)
137 of 193
ठाढ़े जहँ तहँ आयसु पाई।
कह सुग्रीव सबहि समुझाई॥
राम काजु अरु मोर निहोरा।
बानर जूथ जाहु चहुँ ओरा ॥३॥
Ṭhāḍhe jahaṃ tahaṃ āyasu pāī,
kaha Sugrīva sabahi samujhāī,
Rāma kāju aru mora nihorā,
bānara jūtha jāhu cahuṃ orā. (3)
138 of 193
जनकसुता कहुँ खोजहु जाई।
मास दिवस महँ आएहु भाई॥
अवधि मेटि जो बिनु सुधि पाएँ।
आवइ बनिहि सो मोहि मराएँ ॥४॥
Janakasutā kahuṃ khojahu jāī,
māsa divasa mahaṃ āehu bhāī,
Avadhi meṭi jo binu sudhi pāeṃ,
āvai banihi so mohi marāeṃ. (4)
139 of 193
दो०—बचन सुनत सब बानर जहँ तहँ चले तुरंत।
तब सुग्रीवँ बोलाए अंगद नल हनुमंत ॥२२॥
Do—Bacana sunata saba bānara jahaṃ tahaṃ cale turaṃta,
Taba Sugrīvaṃ bolāe Aṃgada nala Hanumaṃta. (22)
140 of 193
सुनहु नील अंगद हनुमाना।
जामवंत मतिधीर सुजाना॥
सकल सुभट मिलि दच्छिन जाहू।
सीता सुधि पूछेहु सब काहू ॥१॥
Sunahu nīla Aṃgada Hanumānā,
Jāmavaṃta matidhīra sujānā,
Sakala subhaṭa mili dacchina jāhū,
Sītā sudhi pūchehu saba kāhū. (1)
141 of 193
मन क्रम बचन सो जतन बिचारेहु।
रामचंद्र कर काजु सँवारेहु॥
भानु पीठि सेइअ उर आगी।
स्वामिहि सर्ब भाव छल त्यागी ॥२॥
Mana krama bacana so jatna bicārehu,
Rāmacaṃdra kara kāju saṃvārehu,
Bhānu pīṭhi seia ura āgī,
svāmihi sarba bhāva chala tyāgī. (2)
142 of 193
तजि माया सेइअ परलोका।
मिटहिं सकल भवसंभव सोका॥
देह धरे कर यह फलु भाई।
भजिअ राम सब काम बिहाई ॥३॥
Taji māyā seia paralokā,
miṭahiṃ sakala bhavasaṃbhava sokā,
Deha dhare kara yaha phalu bhāī,
bhajia Rāma saba kāma bihāī. (3)
143 of 193
सोइ गुनग्य सोई बड़भागी।
जो रघुबीर चरन अनुरागी॥
आयसु मागि चरन सिरु नाई।
चले हरषि सुमिरत रघुराई ॥४॥
Soi gunagya soī baḍabhāgī,
jo Raghubīra carana anurāgī,
Āyasu māgi carana siru nāī,
cale haraṣi sumirata Raghurāī. (4)
144 of 193
पाछें पवन तनय सिरु नावा।
जानि काज प्रभु निकट बोलावा॥
परसा सीस सरोरुह पानी।
करमुद्रिका दीन्हि जन जानी ॥५॥
Pācheṃ pavana tanaya siru nāvā,
jāni kāja prabhu nikaṭa bolāvā,
Parsā sīsa saroruha pānī,
karamudrikā dīnhi jana jānī. (5)
145 of 193
बहु प्रकार सीतहि समुझाएहु।
कहि बल बिरह बेगि तुम्ह आएहु॥
हनुमत जन्म सुफल करि माना।
चलेउ हृदयँ धरि कृपानिधाना ॥६॥
Bahu prakāra Sītahi samujhāehu,
kahi bala biraha begi tumha āehu,
Hanumata janma suphala kari mānā,
caleu hṛdayaṃ dhari kṛpānidhānā. (6)
146 of 193
जद्यपि प्रभु जानत सब बाता।
राजनीति राखत सुरत्राता ॥७॥
Jadyapi prabhu jānata saba bātā,
rājanīti rākhata suratrātā. (7)
147 of 193
दो०—चले सकल बन खोजत सरिता सर गिरि खोह।
राम काज लयलीन मन बिसरा तन कर छोह ॥२३॥
Do—Cale sakala bana khojata saritā sara giri khoha,
Rāma kāja layalīna mana bisarā tana kara choha. (23)
148 of 193
कतहुँ होइ निसिचर सैं भेंटा।
प्रान लेहिं एक एक चपेटा॥
बहु प्रकार गिरि कानन हेरहिं।
कोउ मुनि मिलइ ताहि सब घेरहिं ॥१॥
Katahuṃ hoi nisicara saiṃ bheṃṭā,
prāna lehiṃ eka eka capeṭā,
Bahu prakāra giri kānana herahiṃ,
kou muni milai tāhi saba gherahiṃ. (1)
149 of 193
लागि तृषा अतिसय अकुलाने।
मिलइ न जल घन गहन भुलाने॥
मन हनुमान कीन्ह अनुमाना।
मरन चहत सब बिनु जल पाना ॥२॥
Lāgi tṛṣā atisaya akulāne,
milai na jala ghana gahana bhulāne,
Mana Hanumāna kīnha anumānā,
marana cahata saba binu jala pānā. (2)
150 of 193
चढ़ि गिरि सिखर चहूँ दिसि देखा।
भूमि बिबर एक कौतुक पेखा॥
चक्रबाक बक हंस उड़ाहीं।
बहुतक खग प्रबिसहिं तेहि माहीं ॥३॥
Chaṛhi giri sikhar chahū̃ disi dekhā,
bhūmi bibar ek kautuk pekhā,
Chakrabāk bak haṃs uṛāhī̃,
bahutak khag prabisahiṃ tehi māhī̃. (3)
151 of 193
गिरि ते उतरि पवनसुत आवा।
सब कहुँ लै सोइ बिबर देखावा॥
आगें कै हनुमंतहि लीन्हा।
पैठे बिबर बिलंबु न कीन्हा ॥४॥
Giri te utari pavansut āvā,
sab kahũ lai soi bibar dekhāvā,
Āgeṃ kai Hanumantahi līnhā,
paiṭhe bibar bilambu na kīnhā. (4)
152 of 193
दो०—दीख जाइ उपबन बर सर बिगसित बहु कंज।
मंदिर एक रुचिर तहँ बैठि नारि तप पुंज ॥२४॥
Do—Dīkh jāi upaban bar sar bigasit bahu kanj,
Mandir ek ruchir tahā̃ baiṭhi nāri tap punj. (24)
153 of 193
दूरि ते ताहि सबन्हि सिरु नावा।
पूछें निज बृत्तांत सुनावा॥
तेहिं तब कहा करहु जल पाना।
खाहु सुरस सुंदर फल नाना ॥१॥
Dūri te tāhi sabanhi siru nāvā,
pūchheṃ nij bṛttānt sunāvā,
Tehiṃ tab kahā karahu jal pānā,
khāhu suras sundar phal nānā. (1)
154 of 193
मज्जनु कीन्ह मधुर फल खाए।
तासु निकट पुनि सब चलि आए॥
तेहिं सब आपनि कथा सुनाई।
मैं अब जाब जहाँ रघुराई ॥२॥
Majjanu kīnh madhur phal khāe,
tāsu nikaṭ puni sab chali āe,
Tehiṃ sab āpani kathā sunāī,
maiṃ ab jāb jahā̃ Raghurāī. (2)
155 of 193
मूदहु नयन बिबर तजि जाहू।
पैहहु सीतहि जनि पछिताहू॥
नयन मूदि पुनि देखहिं बीरा।
ठाढ़े सकल सिंधु कें तीरा ॥३॥
Mūdahu nayan bibar taji jāhū,
paihahu Sītahi jani pachhitāhū,
Nayan mūdi puni dekhahiṃ bīrā,
ṭhāṛhe sakal sindhu keṃ tīrā. (3)
156 of 193
सो पुनि गई जहाँ रघुनाथा।
जाइ कमल पद नाएसि माथा॥
नाना भाँति बिनय तेहिं कीन्ही।
अनपायनी भगति प्रभु दीन्ही ॥४॥
So puni gaī jahā̃ Raghunāthā,
jāi kamal pad nāesi māthā,
Nānā bhā̃ti binay tehiṃ kīnhī,
anapāyanī bhagati prabhu dīnhī. (4)
157 of 193
दो०—बदरीबन कहुँ सो गई प्रभु अग्या धरि सीस।
उर धरि राम चरन जुग जे बंदत अज ईस ॥२५॥
Do—Badarīban kahũ so gaī prabhu agyā dhari sīs,
Ur dhari Rām charan jug je bandat aj īs. (25)
158 of 193
इहाँ बिचारहिं कपि मन माहीं।
बीती अवधि काज कछु नाहीं॥
सब मिलि कहहिं परस्पर बाता।
बिनु सुधि लएँ करब का भ्राता ॥१॥
Ihā̃ bichārahiṃ kapi man māhī̃,
bītī avadhi kāj kachhu nāhī̃,
Sab mili kahahiṃ paraspar bātā,
binu sudhi laeṃ karab kā bhrātā. (1)
159 of 193
कह अंगद लोचन भरि बारी।
दुहुँ प्रकार भइ मृत्यु हमारी॥
इहाँ न सुधि सीता कै पाई।
उहाँ गएँ मारिहि कपिराई ॥२॥
Kah aṅgad lochan bhari bārī,
duhũ prakār bhai mṛtyu hamārī,
Ihā̃ na sudhi Sītā kai pāī,
uhā̃ gaeṃ mārihi kapirāī. (2)
160 of 193
पिता बधे पर मारत मोही।
राखा राम निहोर न ओही॥
पुनि पुनि अंगद कह सब पाहीं।
मरन भयउ कछु संसय नाहीं ॥३॥
Pitā badhe par mārat mohī,
rākhā Rām nihor na ohī,
Puni puni aṅgad kah sab pāhī̃,
maran bhayau kachhu sansay nāhī̃. (3)
161 of 193
अंगद बचन सुनत कपि बीरा।
बोलि न सकहिं नयन बह नीरा॥
छन एक सोच मगन होइ रहे।
पुनि अस बचन कहत सब भए ॥४॥
Aṅgad bachan sunat kapi bīrā,
boli na sakahiṃ nayan bah nīrā,
Chhan ek soch magan hoi rahe,
puni as bachan kahat sab bhae. (4)
162 of 193
हम सीता कै सुधि लीन्हें बिना।
नहिं जैहैं जुबराज प्रबीना॥
अस कहि लवन सिंधु तट जाई।
बैठे कपि सब दर्भ डसाई ॥५॥
Ham Sītā kai sudhi līnheṃ binā,
nahiṃ jaihaiṃ jubarāj prabīnā,
As kahi lavan sindhu taṭ jāī,
baiṭhe kapi sab darbh ḍasāī. (5)
163 of 193
जामवंत अंगद दुख देखी।
कहीं कथा उपदेस बिसेषी॥
तात राम कहुँ नर जनि मानहु।
निर्गुन ब्रह्म अजित अज जानहु ॥६॥
Jāmavant aṅgad dukh dekhī,
kahī̃ kathā updes biseṣī,
Tāt Rām kahũ nar jani mānahu,
nirgun brahma ajit aj jānahu. (6)
164 of 193
हम सब सेवक अति बड़भागी।
संतत सगुन ब्रह्म अनुरागी ॥७॥
Ham sab sevak ati baṛabhāgī,
santat sagun brahma anurāgī. (7)
165 of 193
दो०—निज इच्छाँ प्रभु अवतरइ सुर महि गो द्विज लागि।
सगुन उपासक संग तहँ रहहिं मोच्छ सब त्यागि ॥२६॥
Do—Nij ichchhā̃ prabhu avatarai sur mahi go dvij lāgi,
Sagun upāsak saṅg tahā̃ rahahiṃ mochchh sab tyāgi. (26)
166 of 193
एहि बिधि कथा कहहिं बहु भाँती।
गिरि कंदराँ सुनी संपाती॥
बाहेर होइ देखि बहु कीसा।
मोहि अहार दीन्ह जगदीसा ॥१॥
Ehi bidhi kathā kahahiṃ bahu bhā̃tī,
giri kandarā̃ sunī Sampātī,
Bāher hoi dekhi bahu kīsā,
mohi ahār dīnh jagadīsā. (1)
167 of 193
आजु सबहि कहँ भच्छन करऊँ।
दिन बहु चले अहार बिनु मरऊँ॥
कबहुँ न मिल भरि उदर अहारा।
आजु दीन्ह बिधि एकहिं बारा ॥२॥
Āju sabahi kahā̃ bhachchhan karaū̃,
din bahu chale ahār binu maraū̃,
Kabahũ na mil bhari udar ahārā,
āju dīnh bidhi ekahiṃ bārā. (2)
168 of 193
डरपे गीध बचन सुनि काना।
अब भा मरन सत्य हम जाना॥
कपि सब उठे गीध कहँ देखी।
जामवंत मन सोच बिसेषी ॥३॥
Ḍarape gīdh bachan suni kānā,
ab bhā maran satya ham jānā,
Kapi sab uṭhe gīdh kahā̃ dekhī,
Jāmavant man soch biseṣī. (3)
169 of 193
कह अंगद बिचारि मन माहीं।
धन्य जटायू सम कोउ नाहीं॥
राम काज कारन तनु त्यागी।
हरि पुर गयउ परम बड़भागी ॥४॥
Kah aṅgad bichāri man māhī̃,
dhanya jaṭāyū sam kou nāhī̃,
Rām kāj kāran tanu tyāgī,
hari pur gayau param baṛabhāgī. (4)
170 of 193
सुनि खग हरष सोक जुत बानी।
आवा निकट कपिन्ह भय मानी॥
तिन्हहि अभय करि पूछेसि जाई।
कथा सकल तिन्ह ताहि सुनाई ॥५॥
Suni khag haraṣ sok jut bānī,
āvā nikaṭ kapinh bhay mānī,
Tinhahi abhay kari pūchhesi jāī,
kathā sakal tinh tāhi sunāī. (5)
171 of 193
सुनि संपाति बंधु कै करनी।
रघुपति महिमा बहुबिधि बरनी ॥६॥
Suni Sampāti bandhu kai karanī,
Raghupati mahimā bahubidhi baranī. (6)
172 of 193
दो०—मोहि लै जाहु सिंधुतट देउँ तिलांजलि ताहि।
बचन सहाइ करबि मैं पैहहु खोजहु जाहि ॥२७॥
Do—Mohi lai jāhu sindhutaṭ deũ tilāñjali tāhi,
Bachan sahāi karabi maiṃ paihahu khojahu jāhi. (27)
173 of 193
अनुज क्रिया करि सागर तीरा।
कहि निज कथा सुनहु कपि बीरा॥
हम द्वौ बंधु प्रथम तरुनाई।
गगन गए रबि निकट उड़ाई ॥१॥
Anuj kriyā kari sāgar tīrā,
kahi nij kathā sunahu kapi bīrā,
Ham dvau bandhu pratham tarunāī,
gagan gae rabi nikaṭ uṛāī. (1)
174 of 193
तेज न सहि सक सो फिरि आवा।
मैं अभिमानी रबि निअरावा॥
जरे पंख अति तेज अपारा।
परेउँ भूमि करि घोर चिकारा ॥२॥
Tej na sahi sak so phiri āvā,
maiṃ abhimānī rabi niarāvā,
Jare paṅkh ati tej apārā,
pareũ bhūmi kari ghor chikārā. (2)
175 of 193
मुनि एक नाम चंद्रमा ओही।
लागी दया देखि करि मोही॥
बहु प्रकार तेहिं ग्यान सुनावा।
देहजनित अभिमान छड़ावा ॥३॥
Muni ek nām chandramā ohī,
lāgī dayā dekhi kari mohī,
Bahu prakār tehiṃ gyān sunāvā,
dehajanit abhimān chhaṛāvā. (3)
176 of 193
त्रेताँ ब्रह्म मनुज तनु धरिही।
तासु नारि निसिचर पति हरिही॥
तासु खोज पठइहि प्रभु दूता।
तिन्हहि मिलें तैं होब पुनीता ॥४॥
Tretā̃ brahma manuj tanu dharihī,
tāsu nāri nisichar pati harihī,
Tāsu khoj paṭhaihi prabhu dūtā,
tinhahi mileṃ taiṃ hob punītā. (4)
177 of 193
जमिहहिं पंख करसि जनि चिंता।
तिन्हहि देखाइ देहेसु तैं सीता॥
मुनि कइ गिरा सत्य भइ आजू।
सुनि मम बचन करहु प्रभु काजू ॥५॥
Jamihahiṃ paṅkh karasi jani chintā,
tinhahi dekhāi dehesu taiṃ Sītā,
Muni kai girā satya bhai ājū,
suni mam bachan karahu prabhu kājū. (5)
178 of 193
गिरि त्रिकूट ऊपर बस लंका।
तहँ रह रावन सहज असंका॥
तहँ असोक उपबन जहँ रहई।
सीता बैठि सोच रत अहई ॥६॥
Giri Trikūṭ ūpar bas laṅkā,
tahā̃ rah Rāvan sahaj asaṅkā,
Tahā̃ asok upaban jahā̃ rahaī,
Sītā baiṭhi soch rat ahaī. (6)
179 of 193
दो०—मैं देखउँ तुम्ह नाहीं गीधहि दृष्टि अपार।
बूढ़ भयउँ न त करतेउँ कछुक सहाय तुम्हार ॥२८॥
Do—Maiṃ dekhaũ tumh nāhī̃ gīdhahi dṛṣṭi apār,
Būṛh bhayaũ na ta karateũ kachhuk sahāy tumhār. (28)
180 of 193
जो नाघइ सत जोजन सागर।
करइ सो राम काज मति आगर॥
मोहि बिलोकि धरहु मन धीरा।
राम कृपाँ कस भयउ सरीरा ॥१॥
Jo nāghai sat jojan sāgar,
karai so Rām kāj mati āgar,
Mohi biloki dharahu man dhīrā,
Rām kṛpā̃ kas bhayau sarīrā. (1)
181 of 193
पापिउ जा कर नाम सुमिरहीं।
अति अपार भवसागर तरहीं॥
तासु दूत तुम्ह तजि कदराई।
राम हृदयँ धरि करहु उपाई ॥२॥
Pāpiu jā kar nām sumirahī̃,
ati apār bhavasāgar tarahī̃,
Tāsu dūt tumh taji kadarāī,
Rām hṛdayā̃ dhari karahu upāī. (2)
182 of 193
अस कहि गरुड़ गीध जब गयऊ।
तिन्ह के मन अति बिसमय भयऊ॥
निज निज बल सब काहूँ भाषा।
पार जाइ कर संसय राखा ॥३॥
As kahi Garuṛ gīdh jab gayaū,
tinh ke man ati bisamay bhayaū,
Nij nij bal sab kāhū̃ bhāṣā,
pār jāi kar sansay rākhā. (3)
183 of 193
जरठ भयउँ अब कहइ रिछेसा।
नहिं तन रहा प्रथम बल लेसा॥
जबहिं त्रिबिक्रम भए खरारी।
तब मैं तरुन रहेउँ बल भारी ॥४॥
Jaraṭh bhayaũ ab kahai richhesā,
nahiṃ tan rahā pratham bal lesā,
Jabahiṃ tribikram bhae kharārī,
tab maiṃ tarun raheũ bal bhārī. (4)
184 of 193
दो०—बलि बाँधत प्रभु बाढ़ेउ सो तनु बरनि न जाइ।
उभय घरी महँ दीन्हीं सात प्रदच्छिन धाइ ॥२९॥
Do—Bali bā̃dhat prabhu bāṛheu so tanu barani na jāi,
Ubhay gharī mahā̃ dīnhī̃ sāt pradachchhin dhāi. (29)
185 of 193
अंगद कहइ जाउँ मैं पारा।
जियँ संसय कछु फिरती बारा॥
जामवंत कह तुम्ह सब लायक।
पठइअ किमि सबही कर नायक ॥१॥
Aṅgad kahai jāũ maiṃ pārā,
jiyā̃ sansay kachhu phiratī bārā,
Jāmavant kah tumh sab lāyak,
paṭhaia kimi sabahī kar nāyak. (1)
186 of 193
कहइ रीछपति सुनु हनुमाना।
का चुप साधि रहेहु बलवाना॥
पवन तनय बल पवन समाना।
बुधि बिबेक बिग्यान निधाना ॥२॥
Kahai rīchhapati sunu Hanumānā,
kā chup sādhi raheu balavānā,
Pavan tanay bal pavan samānā,
budhi bibek bigyān nidhānā. (2)
187 of 193
कवन सो काज कठिन जग माहीं।
जो नहिं होइ तात तुम्ह पाहीं॥
राम काज लगि तव अवतारा।
सुनतहिं भयउ पर्बताकारा ॥३॥
Kavan so kāj kaṭhin jag māhī̃,
jo nahiṃ hoi tāt tumh pāhī̃,
Rām kāj lagi tav avatārā,
sunatahiṃ bhayau parbatākārā. (3)
188 of 193
कनक बरन तन तेज बिराजा।
मानहुँ अपर गिरिन्ह कर राजा॥
सिंहनाद करि बारहिं बारा।
लीलहिं नाघउँ जलनिधि खारा ॥४॥
Kanak baran tan tej birājā,
mānahũ apar girinh kar rājā,
Siṃhanād kari bārahiṃ bārā,
līlahiṃ nāghaũ jalanidhi khārā. (4)
189 of 193
सहित सहाय रावनहि मारी।
आनउँ इहाँ त्रिकूट उपारी॥
जामवंत मैं पूँछउँ तोही।
उचित सिखावनु दीजहु मोही ॥५॥
Sahit sahāy Rāvanahi mārī,
ānaũ ihā̃ Trikūṭ upārī,
Jāmavant maiṃ pū̃chhaũ tohī,
uchit sikhāvanu dījahu mohī. (5)
190 of 193
एतना करहु तात तुम्ह जाई।
सीतहि देखि कहहु सुधि आई॥
तब निज भुज बल राजिवनैना।
कौतुक लागि संग कपि सेना ॥६॥
Etanā karahu tāt tumh jāī,
Sītahi dekhi kahahu sudhi āī,
Tab nij bhuj bal rājivanainā,
kautuk lāgi saṅg kapi senā. (6)
191 of 193
छं०—कपि सेन संग सँघारि निसिचर रामु सीतहि आनिहैं।
त्रैलोक पावन सुजसु सुर मुनि नारदादि बखानिहैं॥
जो सुनत गावत कहत समुझत परम पद नर पावई।
रघुबीर पद पाथोज मधुकर दास तुलसी गावई॥
Chhand—Kapi sen saṅg sā̃ghāri nisichar Rāmu Sītahi ānihaiṃ,
Trailok pāvan sujasu sur muni Nāradādi bakhānihaiṃ,
Jo sunat gāvat kahat samujhat param pad nar pāvaī,
Raghubīr pad pāthoj madhukar dās tulasī gāvaī.
192 of 193
दो०—भव भेषज रघुनाथ जसु सुनहिं जे नर अरु नारि।
तिन्ह कर सकल मनोरथ सिद्ध करहिं त्रिसिरारि ॥३०(क)॥
Do—Bhav bheṣaj Raghunāth jasu sunahiṃ je nar aru nāri,
Tinh kar sakal manorath siddh karahiṃ trisirāri. (30a)
193 of 193
सो०—नीलोत्पल तन स्याम काम कोटि सोभा अधिक।
सुनिअ तासु गुन ग्राम जासु नाम अघ खग बधिक ॥३०(ख)॥
So—Nīlotpal tan syām kām koṭi sobhā adhik,
Sunia tāsu gun grām jāsu nām agh khag badhik. (30b)
https://www.bhajanusa.com
Viewed … times