← All bhajans
Granth
७. उत्तरकाण्ड · 7. Uttara Kand
Tulsidas's Ramcharitmanas — Book 7, the full text of Rama's reign in Ayodhya, the teachings of Kakabhushundi and Garuda, and the glory of devotion · Devanagari with English transliteration
हिन्दी
English
1 of 872
केकीकण्ठाभनीलं सुरवरविलसद्विप्रपादाब्जचिह्नं
शोभाढ्यं पीतवस्त्रं सरसिजनयनं सर्वदा सुप्रसन्नम्।
पाणौ नाराचचापं कपिनिकरयुतं बन्धुना सेव्यमानं
नौमीड्यं जानकीशं रघुवरमनिशं पुष्पकारूढरामम् ॥१॥
Kekīkaṇṭhābhanīlaṃ suravaravilasadviprapādābjachihnaṃ,
śobhāḍhyaṃ pītavastraṃ sarasijanayanaṃ sarvadā suprasannam,
pāṇau nārāchachāpaṃ kapinikarayutaṃ bandhunā sevyamānaṃ,
naumīḍyaṃ Jānakīśaṃ Raghuvaramaniśaṃ Puṣpakārūḍharāmam.
2 of 872
कोसलेन्द्रपदकञ्जमञ्जुलौ कोमलावजमहेशवन्दितौ।
जानकीकरसरोजलालितौ चिन्तकस्य मनभृङ्गसङ्गिनौ ॥२॥
Kosalendrapadakañjamañjulau komalāvajamaheśavanditau,
Jānakīkarasarojalālitau chintakasya manabhṛṅgasaṅginau.
3 of 872
कुन्दइन्दुदरगौरसुन्दरं अम्बिकापतिमभीष्टसिद्धिदम्।
कारुणीककलकञ्जलोचनं नौमि शङ्करमनङ्गमोचनम् ॥३॥
Kundaindudaragaurasundaraṃ Ambikāpatimabhīṣṭasiddhidam,
kāruṇīkakalakañjalochanaṃ naumi Śaṅkaramanaṅgamochanam.
4 of 872
दो०—रहा एक दिन अवधि कर अति आरत पुर लोग।
जहँ तहँ सोचहिं नारि नर कृस तन राम बियोग॥
Do—Rahā ek din avadhi kar ati ārat pur log,
jahaṅ tahaṅ sochahiṅ nāri nar kṛs tan Rām biyog.
5 of 872
सगुन होहिं सुंदर सकल मन प्रसन्न सब केर।
प्रभु आगवन जनाव जनु नगर रम्य चहुँ फेर॥
Sagun hohiṅ sundar sakal man prasanna sab ker,
prabhu āgavan janāv janu nagar ramya chahuṅ pher.
6 of 872
कौसल्यादि मातु सब मन अनंद अस होइ।
आयउ प्रभु श्री अनुजजुत कहन चहत अब कोइ॥
Kausalyādi mātu sab man anand as hoi,
āyau prabhu Śrī anujajut kahan chahat ab koi.
7 of 872
भरत नयन भुज दच्छिन फरकत बारहिं बार।
जानि सगुन मन हरष अति लागे करन बिचार॥
Bharat nayan bhuj dachhin pharakat bārahiṅ bār,
jāni sagun man haraṣ ati lāge karan bichār.
8 of 872
रहेउ एक दिन अवधि अधारा।
समुझत मन दुख भयउ अपारा॥
कारन कवन नाथ नहिं आयउ।
जानि कुटिल किधौं मोहि बिसरायउ ॥१॥
Raheu ek din avadhi adhārā,
samujhat man dukh bhayau apārā.
Kāran kavan nāth nahiṅ āyau,
jāni kuṭil kidhauṅ mohi bisarāyau. (1)
9 of 872
अहह धन्य लछिमन बड़भागी।
राम पदारबिंदु अनुरागी॥
कपटी कुटिल मोहि प्रभु चीन्हा।
ताते नाथ संग नहिं लीन्हा ॥२॥
Ahah dhanya Lachhiman baḍabhāgī,
Rām padārabindu anurāgī.
Kapaṭī kuṭil mohi prabhu chīnhā,
tāte nāth saṅg nahiṅ līnhā. (2)
10 of 872
जौं करनी समुझै प्रभु मोरी।
नहिं निस्तार कलप सत कोरी॥
जन अवगुन प्रभु मान न काऊ।
दीन बंधु अति मृदुल सुभाऊ ॥३॥
Jauṅ karanī samujhai prabhu morī,
nahiṅ nistār kalap sat korī.
Jan avagun prabhu mān na kāū,
dīn bandhu ati mṛdul subhāū. (3)
11 of 872
मोरे जियँ भरोस दृढ़ सोई।
मिलिहहिं राम सगुन सुभ होई॥
बीतें अवधि रहहिं जौं प्राना।
अधम कवन जग मोहि समाना ॥४॥
More jiyaṅ bharos dṛṛh soī,
milihahiṅ Rām sagun subh hoī.
Bīteṅ avadhi rahahiṅ jauṅ prānā,
adham kavan jag mohi samānā. (4)
12 of 872
दो०—राम बिरह सागर महँ भरत मगन मन होत।
बिप्र रूप धरि पवनसुत आइ गयउ जनु पोत ॥१(क)॥
Do—Rām birah sāgar mahaṅ Bharat magan man hot,
Bipra rūp dhari Pavanasut āi gayau janu pot. (1a)
13 of 872
बैठे देखि कुसासन जटा मुकुट कृस गात।
राम राम रघुपति जपत स्रवत नयन जलजात ॥१(ख)॥
Baiṭhe dekhi kusāsan jaṭā mukuṭ kṛs gāt,
Rām Rām Raghupati japat sravat nayan jalajāt. (1b)
14 of 872
देखत हनूमान अति हरषेउ।
पुलक गात लोचन जल बरषेउ॥
मन महँ बहुत भाँति सुख मानी।
बोलेउ श्रवन सुधा सम बानी ॥१॥
Dekhat Hanūmān ati haraṣeu,
pulak gāt lochan jal baraṣeu.
Man mahaṅ bahut bhāṅti sukh mānī,
boleu śravan sudhā sam bānī. (1)
15 of 872
जासु बिरहँ सोचहु दिन राती।
रटहु निरंतर गुन गन पाँती॥
रघुकुल तिलक सुजन सुखदाता।
आयउ कुसल देव मुनि त्राता ॥२॥
Jāsu birahaṅ sochahu din rātī,
raṭahu nirantar gun gan pāṅtī.
Raghukul tilak sujan sukhadātā,
āyau kusal dev muni trātā. (2)
16 of 872
रिपु रन जीति सुजस सुर गावत।
सीता सहित अनुज प्रभु आवत॥
सुनत बचन बिसरे सब दूखा।
तृषावंत जिमि पाइ पियूषा ॥३॥
Ripu ran jīti sujas sur gāvat,
Sītā sahit anuj prabhu āvat.
Sunat bachan bisare sab dūkhā,
tṛṣāvant jimi pāi piyūṣā. (3)
17 of 872
को तुम्ह तात कहाँ ते आए।
मोहि परम प्रिय बचन सुनाए॥
मारुत सुत मैं कपि हनुमाना।
नामु मोर सुनु कृपानिधाना ॥४॥
Ko tumh tāt kahāṅ te āe,
mohi param priya bachan sunāe.
Mārut sut maiṅ kapi Hanumānā,
nāmu mor sunu kṛpānidhānā. (4)
18 of 872
दीनबंधु रघुपति कर किंकर।
सुनत भरत भेंटेउ उठि सादर॥
मिलत प्रेम नहिं हृदयँ समाता।
नयन स्रवत जल पुलकित गाता ॥५॥
Dīnbandhu Raghupati kar kiṅkar,
sunat Bharat bheṅṭeu uṭhi sādar.
Milat prem nahiṅ hṛdayaṅ samātā,
nayan sravat jal pulakit gātā. (5)
19 of 872
कपि तव दरस सकल दुख बीते।
मिले आजु मोहि राम पिरीते॥
बार बार बूझी कुसलाता।
तो कहुँ देउँ काह सुनु भ्राता ॥६॥
Kapi tav daras sakal dukh bīte,
mile āju mohi Rām pirīte.
Bār bār būjhī kusalātā,
to kahuṅ deuṅ kāh sunu bhrātā. (6)
20 of 872
एहि संदेस सरिस जग माहीं।
करि बिचार देखेउँ कछु नाहीं॥
नाहिन तात उरिन मैं तोही।
अब प्रभु चरित सुनावहु मोही ॥७॥
Ehi sandes saris jag māhīṅ,
kari bichār dekheuṅ kachhu nāhīṅ.
Nāhin tāt urin maiṅ tohī,
ab prabhu charit sunāvahu mohī. (7)
21 of 872
तब हनुमंत नाइ पद माथा।
कहे सकल रघुपति गुन गाथा॥
कहु कपि कबहुँ कृपाल गोसाईं।
सुमिरहिं मोहि दास की नाईं ॥८॥
Tab Hanumant nāi pad māthā,
kahe sakal Raghupati gun gāthā.
Kahu kapi kabahuṅ kṛpāl gosāīṅ,
sumirahiṅ mohi dās kī nāīṅ. (8)
22 of 872
छं०—निज दास ज्यों रघुबंसभूषन कबहुँ मम सुमिरन करयो।
सुनि भरत बचन बिनीत अति कपि पुलकि तन चरनन्हि परयो॥
रघुबीर निज मुख जासु गुन गन कहत अग जग नाथ जो।
काहे न होइ बिनीत परम पुनीत सदगुन सिंधु सो॥
Chhand—Nij dās jyoṅ Raghubansabhūṣan kabahuṅ mam sumiran karyo,
suni Bharat bachan binīt ati kapi pulaki tan charananhi paryo.
Raghubīr nij mukh jāsu gun gan kahat ag jag nāth jo,
kāhe na hoi binīt param punīt sadgun sindhu so.
23 of 872
दो०—राम प्रान प्रिय नाथ तुम्ह सत्य बचन मम तात।
पुनि पुनि मिलत भरत सुनि हरष न हृदयँ समात ॥२(क)॥
Do—Rām prān priya nāth tumh satya bachan mam tāt,
puni puni milat Bharat suni haraṣ na hṛdayaṅ samāt. (2a)
24 of 872
सो०—भरत चरन सिरु नाइ तुरित गयउ कपि राम पहिं।
कही कुसल सब जाइ हरषि चलेउ प्रभु जान चढ़ि ॥२(ख)॥
So—Bharat charan siru nāi turit gayau kapi Rām pahiṅ,
kahī kusal sab jāi haraṣi chaleu prabhu jān chaḍhi. (2b)
25 of 872
हरषि भरत कोसलपुर आए।
समाचार सब गुरहि सुनाए॥
पुनि मंदिर महँ बात जनाई।
आवत नगर कुसल रघुराई ॥१॥
Haraṣi Bharat Kosalapur āe,
samāchār sab gurahi sunāe.
Puni mandir mahaṅ bāt janāī,
āvat nagar kusal Raghurāī. (1)
26 of 872
सुनत सकल जननीं उठि धाईं।
कहि प्रभु कुसल भरत समुझाई॥
समाचार पुरबासिन्ह पाए।
नर अरु नारि हरषि सब धाए ॥२॥
Sunat sakal jananīṅ uṭhi dhāīṅ,
kahi prabhu kusal Bharat samujhāī.
Samāchār purabāsinh pāe,
nar aru nāri haraṣi sab dhāe. (2)
27 of 872
दधि दुर्बा रोचन फल फूला।
नव तुलसी दल मंगल मूला॥
भरि भरि हेम थार भामिनी।
गावत चलिं सिंधुरगामिनी ॥३॥
Dadhi durbā rochan phal phūlā,
nav tulasī dal maṅgal mūlā.
Bhari bhari hem thār bhāminī,
gāvat chaliṅ sindhuragāminī. (3)
28 of 872
जे जैसेहिं तैसेहिं उठि धावहिं।
बाल बृद्ध कहँ संग न लावहिं॥
एक एकन्ह कहँ बूझहिं भाई।
तुम्ह देखे दयाल रघुराई ॥४॥
Je jaisehiṅ taisehiṅ uṭhi dhāvahiṅ,
bāl bṛddh kahaṅ saṅg na lāvahiṅ.
Ek ekanh kahaṅ būjhahiṅ bhāī,
tumh dekhe dayāl Raghurāī. (4)
29 of 872
अवधपुरी प्रभु आवत जानी।
भई सकल सोभा कै खानी॥
बहइ सुहावन त्रिबिध समीरा।
भइ सरजू अति निर्मल नीरा ॥५॥
Avadhapurī prabhu āvat jānī,
bhaī sakal sobhā kai khānī.
Bahai suhāvan tribidh samīrā,
bhai Sarajū ati nirmal nīrā. (5)
30 of 872
दो०—हरषित गुर परिजन अनुज भूसुर बृंद समेत।
चले भरत मन प्रेम अति सन्मुख कृपानिकेत ॥३(क)॥
Do—Haraṣit gur parijan anuj bhūsur bṛnd samet,
chale Bharat man prem ati sanmukh kṛpāniket. (3a)
31 of 872
बहुतक चढ़ीं अटारिन्ह निरखहिं गगन बिमान।
देखि मधुर सुर हरषित करहिं सुमंगल गान ॥३(ख)॥
Bahutak chaḍhīṅ aṭārinh nirakhahiṅ gagan bimān,
dekhi madhur sur haraṣit karahiṅ sumaṅgal gān. (3b)
32 of 872
राका ससि रघुपति पुर सिंधु देखि हरषान।
बढ़्यो कोलाहल करत जनु नारि तरंग समान ॥३(ग)॥
Rākā sasi Raghupati pur sindhu dekhi haraṣān,
baḍhyo kolāhal karat janu nāri taraṅg samān. (3c)
33 of 872
इहाँ भानुकुल कमल दिवाकर।
कपिन्ह देखावत नगर मनोहर॥
सुनु कपीस अंगद लंकेसा।
पावन पुरी रुचिर यह देसा ॥१॥
Ihāṅ bhānukul kamal divākar,
kapinh dekhāvat nagar manohar.
Sunu Kapīs Aṅgad Laṅkesā,
pāvan purī ruchir yah desā. (1)
34 of 872
जद्यपि सब बैकुंठ बखाना।
बेद पुरान बिदित जगु जाना॥
अवधपुरी सम प्रिय नहिं सोऊ।
यह प्रसंग जानइ कोउ कोऊ ॥२॥
Jadyapi sab Baikuṇṭh bakhānā,
bed purān bidit jagu jānā.
Avadhapurī sam priya nahiṅ soū,
yah prasaṅg jānai kou koū. (2)
35 of 872
जन्मभूमि मम पुरी सुहावनि।
उत्तर दिसि बह सरजू पावनि॥
जा मज्जन ते बिनहिं प्रयासा।
मम समीप नर पावहिं बासा ॥३॥
Janmabhūmi mam purī suhāvani,
uttar disi bah Sarajū pāvani.
Jā majjan te binahiṅ prayāsā,
mam samīp nar pāvahiṅ bāsā. (3)
36 of 872
अति प्रिय मोहि इहाँ के बासी।
मम धामदा पुरी सुख रासी॥
हरषे सब कपि सुनि प्रभु बानी।
धन्य अवध जो राम बखानी ॥४॥
Ati priya mohi ihāṅ ke bāsī,
mam dhāmadā purī sukh rāsī.
Haraṣe sab kapi suni prabhu bānī,
dhanya avadh jo Rām bakhānī. (4)
37 of 872
दो०—आवत देखि लोग सब कृपासिंधु भगवान।
नगर निकट प्रभु प्रेरेउ उतरेउ भूमि बिमान ॥४(क)॥
Do—Āvat dekhi log sab kṛpāsindhu Bhagavān,
nagar nikaṭ prabhu prereu utareu bhūmi bimān. (4a)
38 of 872
उतरि कहेउ प्रभु पुष्पकहि तुम्ह कुबेर पहिं जाहु।
प्रेरित राम चलेउ सो हरषु बिरहु अति ताहु ॥४(ख)॥
Utari kaheu prabhu Puṣpakahi tumh Kuber pahiṅ jāhu,
prerit Rām chaleu so haraṣu birahu ati tāhu. (4b)
39 of 872
आए भरत संग सब लोगा।
कृस तन श्रीरघुबीर बियोगा॥
बामदेव बसिष्ठ मुनिनायक।
देखे प्रभु महि धरि धनु सायक ॥१॥
Āe Bharat saṅg sab logā,
kṛs tan Śrī-Raghubīr biyogā.
Bāmadev Basiṣṭh munināyak,
dekhe prabhu mahi dhari dhanu sāyak. (1)
40 of 872
धाइ धरे गुर चरन सरोरुह।
अनुज सहित अति पुलक तनोरुह॥
भेंटि कुसल बूझी मुनिराया।
हमरें कुसल तुम्हारिहिं दाया ॥२॥
Dhāi dhare gur charan saroruh,
anuj sahit ati pulak tanoruh.
Bheṅṭi kusal būjhī munirāyā,
hamareṅ kusal tumhārihiṅ dāyā. (2)
41 of 872
सकल द्विजन्ह मिलि नायउ माथा।
धर्म धुरंधर रघुकुलनाथा॥
गहे भरत पुनि प्रभु पद पंकज।
नमत जिन्हहि सुर मुनि संकर अज ॥३॥
Sakal dvijanh mili nāyau māthā,
dharma dhurandhar Raghukulanāthā.
Gahe Bharat puni prabhu pad paṅkaj,
namat jinhahi sur muni Saṅkar Aj. (3)
42 of 872
परे भूमि नहिं उठत उठाए।
बर करि कृपासिंधु उर लाए॥
स्यामल गात रोम भए ठाढ़े।
नव राजीव नयन जल बाढ़े ॥४॥
Pare bhūmi nahiṅ uṭhat uṭhāe,
bar kari kṛpāsindhu ur lāe.
Syāmal gāt rom bhae ṭhāḍhe,
nav rājīv nayan jal bāḍhe. (4)
43 of 872
छं०—राजीव लोचन स्रवत जल तन ललित पुलकावलि बनी।
अति प्रेम हृदयँ लगाइ अनुजहि मिले प्रभु त्रिभुअन धनी॥
प्रभु मिलत अनुजहि सोह मो पहिं जाति नहिं उपमा कही।
जनु प्रेम अरु सिंगार तनु धरि मिले बर सुषमा लही ॥१॥
Chhand—Rājīv lochan sravat jal tan lalit pulakāvali banī,
ati prem hṛdayaṅ lagāi anujahi mile prabhu tribhuan dhanī.
Prabhu milat anujahi soh mo pahiṅ jāti nahiṅ upamā kahī,
janu prem aru siṅgār tanu dhari mile bar suṣamā lahī. (1)
44 of 872
बूझत कृपानिधि कुसल भरतहि बचन बेगि न आवई।
सुनु सिवा सो सुख बचन मन ते भिन्न जान जो पावई॥
अब कुसल कौसलनाथ आरत जानि जन दरसन दियो।
बूड़त बिरह बारीस कृपानिधान मोहि कर गहि लियो ॥२॥
Būjhat kṛpānidhi kusal Bharatahi bachan begi na āvaī,
sunu Sivā so sukh bachan man te bhinna jān jo pāvaī.
Ab kusal Kausalanāth ārat jāni jan darasan diyo,
būḍat birah bārīs kṛpānidhān mohi kar gahi liyo. (2)
45 of 872
दो०—पुनि प्रभु हरषि सत्रुहन भेंटे हृदयँ लगाइ।
लछिमन भरत मिले तब परम प्रेम दोउ भाइ ॥५॥
Do—Puni prabhu haraṣi Satruhan bheṅṭe hṛdayaṅ lagāi,
Lachhiman Bharat mile tab param prem dou bhāi. (5)
46 of 872
भरतानुज लछिमन पुनि भेंटे।
दुसह बिरह संभव दुख मेटे॥
सीता चरन भरत सिरु नावा।
अनुज समेत परम सुख पावा ॥१॥
Bharatānuj Lachhiman puni bheṅṭe,
dusah birah sambhav dukh meṭe.
Sītā charan Bharat siru nāvā,
anuj samet param sukh pāvā. (1)
47 of 872
प्रभु बिलोकि हरषे पुरबासी।
जनित बियोग बिपति सब नासी॥
प्रेमातुर सब लोग निहारी।
कौतुक कीन्ह कृपाल खरारी ॥२॥
Prabhu biloki haraṣe purabāsī,
janit biyog bipati sab nāsī.
Premātur sab log nihārī,
kautuk kīnh kṛpāl Kharārī. (2)
48 of 872
अमित रूप प्रगटे तेहि काला।
जथा जोग मिले सबहि कृपाला॥
कृपादृष्टि रघुबीर बिलोकी।
किए सकल नर नारि बिसोकी ॥३॥
Amit rūp pragaṭe tehi kālā,
jathā jog mile sabahi kṛpālā.
Kṛpādṛṣṭi Raghubīr bilokī,
kie sakal nar nāri bisokī. (3)
49 of 872
छन महिं सबहि मिले भगवाना।
उमा मरम यह काहुँ न जाना॥
एहि बिधि सबहि सुखी करि रामा।
आगें चले सील गुन धामा ॥४॥
Chhan mahiṅ sabahi mile Bhagavānā,
Umā maram yah kāhuṅ na jānā.
Ehi bidhi sabahi sukhī kari Rāmā,
āgeṅ chale sīl gun dhāmā. (4)
50 of 872
कौसल्यादि मातु सब धाई।
निरखि बच्छ जनु धेनु लवाई ॥५॥
Kausalyādi mātu sab dhāī,
nirakhi bachchh janu dhenu lavāī. (5)
51 of 872
छं०—जनु धेनु बालक बच्छ तजि गृहँ चरन बन परबस गईं।
दिन अंत पुर रुख स्रवत थन हुंकार करि धावत भईं॥
अति प्रेम प्रभु सब मातु भेटीं बचन मृदु बहुबिधि कहे।
गइ बिषम बिपति बियोगभव तिन्ह हरष सुख अगनित लहे॥
Chhand—Janu dhenu bālak bachchh taji gṛhaṅ charan ban parabas gaīṅ,
din ant pur rukh sravat than huṅkār kari dhāvat bhaīṅ.
Ati prem prabhu sab mātu bheṭīṅ bachan mṛdu bahubidhi kahe,
gai biṣam bipati biyogabhav tinh haraṣ sukh aganit lahe.
52 of 872
दो०—भेटेउ तनय सुमित्राँ राम चरन रति जानि।
रामहि मिलत कैकई हृदयँ बहुत सकुचानि ॥६(क)॥
Do—Bheṭeu tanay Sumitrāṅ Rām charan rati jāni,
Rāmahi milat Kaikaī hṛdayaṅ bahut sakuchāni. (6a)
53 of 872
लछिमन सब मातन्ह मिलि हरषे आसिष पाइ।
कैकइ कहँ पुनि पुनि मिले मन कर छोभु न जाइ ॥६(ख)॥
Lachhiman sab mātanh mili haraṣe āsiṣ pāi,
Kaikai kahaṅ puni puni mile man kar chhobhu na jāi. (6b)
54 of 872
सासुन्ह सबनि मिली बैदेही।
चरनन्हि लागि हरषु अति तेही॥
देहिं असीस बूझि कुसलाता।
होइ अचल तुम्हार अहिवाता ॥१॥
Sāsunh sabani milī Baidehī,
charananhi lāgi haraṣu ati tehī.
Dehiṅ asīs būjhi kusalātā,
hoi achal tumhār ahivātā. (1)
55 of 872
सब रघुपति मुख कमल बिलोकहिं।
मंगल जानि नयन जल रोकहिं॥
कनक थार आरती उतारहिं।
बार बार प्रभु गात निहारहिं ॥२॥
Sab Raghupati mukh kamal bilokahiṅ,
maṅgal jāni nayan jal rokahiṅ.
Kanak thār āratī utārahiṅ,
bār bār prabhu gāt nihārahiṅ. (2)
56 of 872
नाना भाँति निछावरि करहीं।
परमानंद हरष उर भरहीं॥
कौसल्या पुनि पुनि रघुबीरहि।
चितवति कृपासिंधु रनधीरहि ॥३॥
Nānā bhāṅti nichhāvari karahīṅ,
paramānand haraṣ ur bharahīṅ.
Kausalyā puni puni Raghubīrahi,
chitavati kṛpāsindhu ranadhīrahi. (3)
57 of 872
हृदयँ बिचारति बारहिं बारा।
कवन भाँति लंकापति मारा॥
अति सुकुमार जुगल मेरे बारे।
निसिचर सुभट महाबल भारे ॥४॥
Hṛdayaṅ bichārati bārahiṅ bārā,
kavan bhāṅti Laṅkāpati mārā.
Ati sukumār jugal mere bāre,
nisichar subhaṭ mahābal bhāre. (4)
58 of 872
दो०—लछिमन अरु सीता सहित प्रभुहि बिलोकति मातु।
परमानंद मगन मन पुनि पुनि पुलकित गातु ॥७॥
Do—Lachhiman aru Sītā sahit prabhuhi bilokati mātu,
paramānand magan man puni puni pulakit gātu. (7)
59 of 872
लंकापति कपीस नल नीला।
जामवंत अंगद सुभसीला॥
हनुमदादि सब बानर बीरा।
धरे मनोहर मनुज सरीरा ॥१॥
Laṅkāpati Kapīs Nal Nīlā,
Jāmavant Aṅgad subhasīlā.
Hanumadādi sab bānar bīrā,
dhare manohar manuj sarīrā. (1)
60 of 872
भरत सनेह सील ब्रत नेमा।
सादर सब बरनहिं अति प्रेमा॥
देखि नगरबासिन्ह कै रीती।
सकल सराहहिं प्रभु पद प्रीती ॥२॥
Bharat saneh sīl brat nemā,
sādar sab baranahiṅ ati premā.
Dekhi nagarabāsinh kai rītī,
sakal sarāhahiṅ prabhu pad prītī. (2)
61 of 872
पुनि रघुपति सब सखा बोलाए।
मुनि पद लागहु सकल सिखाए॥
गुर बसिष्ठ कुलपूज्य हमारे।
इन्ह की कृपाँ दनुज रन मारे ॥३॥
Puni Raghupati sab sakhā bolāe,
muni pad lāgahu sakal sikhāe.
Gur Basiṣṭh kulapūjya hamāre,
inh kī kṛpāṅ danuj ran māre. (3)
62 of 872
ए सब सखा सुनहु मुनि मेरे।
भए समर सागर कहँ बेरे॥
मम हित लागि जन्म इन्ह हारे।
भरतहु ते मोहि अधिक पिआरे ॥४॥
E sab sakhā sunahu muni mere,
bhae samar sāgar kahaṅ bere.
Mam hit lāgi janma inh hāre,
Bharatahu te mohi adhik piāre. (4)
63 of 872
सुनि प्रभु बचन मगन सब भए।
निमिष निमिष उपजत सुख नए ॥५॥
Suni prabhu bachan magan sab bhae,
nimiṣ nimiṣ upajat sukh nae. (5)
64 of 872
दो०—कौसल्या के चरनन्हि पुनि तिन्ह नायउ माथ।
आसिष दीन्हे हरषि तुम्ह प्रिय मम जिमि रघुनाथ ॥८(क)॥
Do—Kausalyā ke charananhi puni tinh nāyau māth,
āsiṣ dīnhe haraṣi tumh priya mam jimi Raghunāth. (8a)
65 of 872
सुमन बृष्टि नभ संकुल भवन चले सुखकंद।
चढ़ी अटारिन्ह देखहिं नगर नारि नर बृंद ॥८(ख)॥
Suman bṛṣṭi nabh saṅkul bhavan chale sukhakand,
chaḍhī aṭārinh dekhahiṅ nagar nāri nar bṛnd. (8b)
66 of 872
कंचन कलस बिचित्र सँवारे।
सबहिं धरे सजि निज निज द्वारे॥
बंदनवार पताका केतू।
सबन्हि बनाए मंगल हेतू ॥१॥
Kanchan kalas bichitra saṅvāre,
sabahiṅ dhare saji nij nij dvāre.
Bandanavār patākā ketū,
sabanhi banāe maṅgal hetū. (1)
67 of 872
बीथीं सकल सुगंध सिंचाई।
गजमनि रचि बहु चौक पुराई॥
नाना भाँति सुमंगल साजे।
हरषि नगर निसान बहु बाजे ॥२॥
Bīthīṅ sakal sugandh siṅchāī,
gajamani rachi bahu chauk purāī.
Nānā bhāṅti sumaṅgal sāje,
haraṣi nagar nisān bahu bāje. (2)
68 of 872
जहँ तहँ नारि निछावरि करहीं।
देहिं असीस हरष उर भरहीं॥
कंचन थार आरतीं नाना।
जुबतीं सजें करहिं सुभ गाना ॥३॥
Jahaṅ tahaṅ nāri nichhāvari karahīṅ,
dehiṅ asīs haraṣ ur bharahīṅ.
Kanchan thār āratīṅ nānā,
jubatīṅ sajeṅ karahiṅ subh gānā. (3)
69 of 872
करहिं आरती आरतिहर कें।
रघुकुल कमल बिपिन दिनकर कें॥
पुर सोभा संपति कल्याना।
निगम सेष सारदा बखाना ॥४॥
Karahiṅ āratī āratihar keṅ,
Raghukul kamal bipin dinakar keṅ.
Pur sobhā sampati kalyānā,
nigam Seṣ Sāradā bakhānā. (4)
70 of 872
तेउ यह चरित देखि ठगि रहहीं।
उमा तासु गुन नर किमि कहहीं ॥५॥
Teu yah charit dekhi ṭhagi rahahīṅ,
Umā tāsu gun nar kimi kahahīṅ. (5)
71 of 872
दो०—नारि कुमुदिनीं अवध सर रघुपति बिरह दिनेस।
अस्त भएँ बिगसत भईं निरखि राम राकेस ॥९(क)॥
Do—Nāri kumudinīṅ avadh sar Raghupati birah dines,
ast bhaeṅ bigasat bhaīṅ nirakhi Rām Rākes. (9a)
72 of 872
होहिं सगुन सुभ बिबिध बिधि बाजहिं गगन निसान।
पुर नर नारि सनाथ करि भवन चले भगवान ॥९(ख)॥
Hohiṅ sagun subh bibidh bidhi bājahiṅ gagan nisān,
pur nar nāri sanāth kari bhavan chale Bhagavān. (9b)
73 of 872
प्रभु जानी कैकई लजानी।
प्रथम तासु गृह गए भवानी॥
ताहि प्रबोधि बहुत सुख दीन्हा।
पुनि निज भवन गवन हरि कीन्हा ॥१॥
Prabhu jānī Kaikaī lajānī,
pratham tāsu gṛh gae Bhavānī.
Tāhi prabodhi bahut sukh dīnhā,
puni nij bhavan gavan Hari kīnhā. (1)
74 of 872
कृपासिंधु जब मंदिर गए।
पुर नर नारि सुखी सब भए॥
गुर बसिष्ठ द्विज लिए बुलाई।
आजु सुघरी सुदिन समुदाई ॥२॥
Kṛpāsindhu jab mandir gae,
pur nar nāri sukhī sab bhae.
Gur Basiṣṭh dvij lie bulāī,
āju sugharī sudin samudāī. (2)
75 of 872
सब द्विज देहु हरषि अनुसासन।
रामचंद्र बैठहिं सिंघासन॥
मुनि बसिष्ठ के बचन सुहाए।
सुनत सकल बिप्रन्ह अति भाए ॥३॥
Sab dvij dehu haraṣi anusāsan,
Rāmachandra baiṭhahiṅ siṅghāsan.
Muni Basiṣṭh ke bachan suhāe,
sunat sakal bipranh ati bhāe. (3)
76 of 872
कहहिं बचन मृदु बिप्र अनेका।
जग अभिराम राम अभिषेका॥
अब मुनिबर बिलंब नहिं कीजै।
महाराज कहँ तिलक करीजै ॥४॥
Kahahiṅ bachan mṛdu bipra anekā,
jag abhirām Rām abhiṣekā.
Ab munibar bilamb nahiṅ kījai,
mahārāj kahaṅ tilak karījai. (4)
77 of 872
दो०—तब मुनि कहेउ सुमंत्र सन सुनत चलेउ हरषाइ।
रथ अनेक बहु बाजि गज तुरत सँवारे जाइ ॥१०(क)॥
Do—Tab muni kaheu Sumantra san sunat chaleu haraṣāi,
rath anek bahu bāji gaj turat saṅvāre jāi. (10a)
78 of 872
जहँ तहँ धावन पठइ पुनि मंगल द्रब्य मगाइ।
हरष समेत बसिष्ठ पद पुनि सिरु नायउ आइ ॥१०(ख)॥
Jahaṅ tahaṅ dhāvan paṭhai puni maṅgal drabya magāi,
haraṣ samet Basiṣṭh pad puni siru nāyau āi. (10b)
79 of 872
अवधपुरी अति रुचिर बनाई।
देवन्ह सुमन बृष्टि झरि लाई॥
राम कहा सेवकन्ह बुलाई।
प्रथम सखन्ह अन्हवावहु जाई ॥१॥
Avadhapurī ati ruchir banāī,
devanh suman bṛṣṭi jhari lāī.
Rām kahā sevakanh bulāī,
pratham sakhanh anhavāvahu jāī. (1)
80 of 872
सुनत बचन जहँ तहँ जन धाए।
सुग्रीवादि तुरत अन्हवाए॥
पुनि करुनानिधि भरतु हँकारे।
निज कर राम जटा निरुआरे ॥२॥
Sunat bachan jahaṅ tahaṅ jan dhāe,
Sugrīvādi turat anhavāe.
Puni karunānidhi Bharatu haṅkāre,
nij kar Rām jaṭā niruāre. (2)
81 of 872
अन्हवाए प्रभु तीनिउ भाई।
भगत बछल कृपाल रघुराई॥
भरत भाग्य प्रभु कोमलताई।
सेष कोटि सत सकहिं न गाई ॥३॥
Anhavāe prabhu tīniu bhāī,
bhagat bachhal kṛpāl Raghurāī.
Bharat bhāgya prabhu komalatāī,
Seṣ koṭi sat sakahiṅ na gāī. (3)
82 of 872
पुनि निज जटा राम बिबराए।
गुर अनुसासन मागि नहाए॥
करि मज्जन प्रभु भूषन साजे।
अंग अनंग देखि सत लाजे ॥४॥
Puni nij jaṭā Rām bibarāe,
gur anusāsan māgi nahāe.
Kari majjan prabhu bhūṣan sāje,
aṅg anaṅg dekhi sat lāje. (4)
83 of 872
दो०—सासुन्ह सादर जानकिहि मज्जन तुरत कराइ।
दिब्य बसन बर भूषन अँग अँग सजे बनाइ ॥११(क)॥
Do—Sāsunh sādar Jānakihi majjan turat karāi,
dibya basan bar bhūṣan aṅg aṅg saje banāi. (11a)
84 of 872
राम बाम दिसि सोभति रमा रूप गुन खानि।
देखि मातु सब हरषीं जन्म सुफल निज जानि ॥११(ख)॥
Rām bām disi sobhati Ramā rūp gun khāni,
dekhi mātu sab haraṣīṅ janma suphal nij jāni. (11b)
85 of 872
सुनु खगेस तेहि अवसर ब्रह्मा सिव मुनि बृंद।
चढ़ि बिमान आए सब सुर देखन सुखकंद ॥११(ग)॥
Sunu khages tehi avasar Brahmā Siv muni bṛnd,
chaḍhi bimān āe sab sur dekhan sukhakand. (11c)
86 of 872
प्रभु बिलोकि मुनि मन अनुरागा।
तुरत दिब्य सिंघासन मागा॥
रबि सम तेज सो बरनि न जाई।
बैठे राम द्विजन्ह सिरु नाई ॥१॥
Prabhu biloki muni man anurāgā,
turat dibya siṅghāsan māgā.
Rabi sam tej so barani na jāī,
baiṭhe Rām dvijanh siru nāī. (1)
87 of 872
जनकसुता समेत रघुराई।
पेखि प्रहरषे मुनि समुदाई॥
बेद मंत्र तब द्विजन्ह उचारे।
नभ सुर मुनि जय जयति पुकारे ॥२॥
Janakasutā samet Raghurāī,
pekhi praharaṣe muni samudāī.
Bed mantra tab dvijanh uchāre,
nabh sur muni jay jayati pukāre. (2)
88 of 872
प्रथम तिलक बसिष्ठ मुनि कीन्हा।
पुनि सब बिप्रन्ह आयसु दीन्हा॥
सुत बिलोकि हरषीं महतारी।
बार बार आरती उतारी ॥३॥
Pratham tilak Basiṣṭh muni kīnhā,
puni sab bipranh āyasu dīnhā.
Sut biloki haraṣīṅ mahatārī,
bār bār āratī utārī. (3)
89 of 872
बिप्रन्ह दान बिबिधि बिधि दीन्हे।
जाचक सकल अजाचक कीन्हे॥
सिंघासन पर त्रिभुअन साईं।
देखि सुरन्ह दुंदुभीं बजाई ॥४॥
Bipranh dān bibidhi bidhi dīnhe,
jāchak sakal ajāchak kīnhe.
Siṅghāsan par tribhuan sāīṅ,
dekhi suranh dundubhīṅ bajāī. (4)
90 of 872
छं०—नभ दुंदुभीं बाजहिं बिपुल गंधर्ब किंनर गावहीं।
नाचहिं अपछरा बृंद परमानंद सुर मुनि पावहीं॥
भरतादि अनुज बिभीषनांगद हनुमदादि समेत ते।
गहें छत्र चामर ब्यजन धनु असि चर्म सक्ति बिराजते ॥१॥
Chhand—Nabh dundubhīṅ bājahiṅ bipul gandharba kinnar gāvahīṅ,
nāchahiṅ apachharā bṛnd paramānand sur muni pāvahīṅ.
Bharatādi anuj Bibhīṣanāṅgad Hanumadādi samet te,
gaheṅ chhatra chāmar byajan dhanu asi charma sakti birājate. (1)
91 of 872
श्री सहित दिनकर बंस भूषन काम बहु छबि सोहई।
नव अंबुधर बर गात अंबर पीत सुर मन मोहई॥
मुकुटांगदादि बिचित्र भूषन अंग अंगन्हि प्रति सजे।
अंभोज नयन बिसाल उर भुज धन्य नर निरखंति जे ॥२॥
Śrī sahit dinakar bans bhūṣan kām bahu chhabi sohaī,
nav ambudhar bar gāt ambar pīt sur man mohaī.
Mukuṭāṅgadādi bichitra bhūṣan aṅg aṅganhi prati saje,
ambhoj nayan bisāl ur bhuj dhanya nar nirakhanti je. (2)
92 of 872
दो०—वह सोभा समाज सुख कहत न बनइ खगेस।
बरनहिं सारद सेष श्रुति सो रस जान महेस ॥१२(क)॥
Do—Vah sobhā samāj sukh kahat na banai khages,
baranahiṅ Sārad Seṣ śruti so ras jān Mahes. (12a)
93 of 872
भिन्न भिन्न अस्तुति करि गए सुर निज निज धाम।
बंदी बेष बेद तब आए जहँ श्रीराम ॥१२(ख)॥
Bhinna bhinna astuti kari gae sur nij nij dhām,
bandī beṣ bed tab āe jahaṅ Śrī Rām. (12b)
94 of 872
प्रभु सर्बग्य कीन्ह अति आदर कृपानिधान।
लखेउ न काहूँ मरम कछु लगे करन गुन गान ॥१२(ग)॥
Prabhu sarbagya kīnh ati ādar kṛpānidhān,
lakheu na kāhūṅ maram kachhu lage karan gun gān. (12c)
95 of 872
छं०—जय सगुन निर्गुन रूप रूप अनूप भूप सिरोमने।
दसकंधरादि प्रचंड निसिचर प्रबल खल भुजबल हने॥
अवतार नर संसार भार बिभंजि दारुन दुख दहे।
जय प्रनतपाल दयाल प्रभु संजुक्त सक्ति नमामहे ॥१॥
Chhand—Jay sagun nirgun rūp rūp anūp bhūp siromane,
dasakandharādi prachaṇḍ nisichar prabal khal bhujbal hane.
Avatār nar sansār bhār bibhañji dārun dukh dahe,
jay pranatapāl dayāl prabhu sanjukta sakti namāmahe. (1)
96 of 872
तव बिषम माया बस सुरासुर नाग नर अग जग हरे।
भव पंथ भ्रमत अमित दिवस निसि काल कर्म गुननि भरे॥
जे नाथ करि करुना बिलोके त्रिबिधि दुख ते निर्बहे।
भव खेद छेदन दच्छ हम कहुँ रच्छ राम नमामहे ॥२॥
Tav biṣam māyā bas surāsur nāg nar ag jag hare,
bhav panth bhramat amit divas nisi kāl karma gunani bhare.
Je nāth kari karunā biloke tribidhi dukh te nirbahe,
bhav khed chhedan dachh ham kahuṅ rachh Rām namāmahe. (2)
97 of 872
जे ग्यान मान बिमत्त तव भव हरनि भक्ति न आदरी।
ते पाइ सुर दुर्लभ पदादपि परत हम देखत हरी॥
बिस्वास करि सब आस परिहरि दास तव जे होइ रहे।
जपि नाम तव बिनु श्रम तरहिं भव नाथ सो समरामहे ॥३॥
Je gyān mān bimatta tav bhav harani bhakti na ādarī,
te pāi sur durlabh padādapi parat ham dekhat harī.
Bisvās kari sab ās parihari dās tav je hoi rahe,
japi nām tav binu śram tarahiṅ bhav nāth so samarāmahe. (3)
98 of 872
जे चरन सिव अज पूज्य रज सुभ परसि मुनिपतिनी तरी।
नख निर्गता मुनि बंदिता त्रैलोक पावनि सुरसरी॥
ध्वज कुलिस अंकुस कंज जुत बन फिरत कंटक किन लहे।
पद कंज द्वंद मुकुंद राम रमेस नित्य भजामहे ॥४॥
Je charan Siv Aj pūjya raj subh parasi munipatinī tarī,
nakh nirgatā muni banditā trailok pāvani surasarī.
Dhvaj kulis aṅkus kañj jut ban phirat kaṇṭak kin lahe,
pad kañj dvand Mukund Rām Rames nitya bhajāmahe. (4)
99 of 872
अब्यक्तमूलमनादि तरु त्वच चारि निगमागम भने।
षट कंध साखा पंच बीस अनेक पर्न सुमन घने॥
फल जुगल बिधि कटु मधुर बेलि अकेलि जेहि आश्रित रहे।
पल्लवत फूलत नवल नित संसार बिटप नमामहे ॥५॥
Abyaktamūlamanādi taru tvach chāri nigamāgam bhane,
ṣaṭ kandh sākhā panch bīs anek parn suman ghane.
Phal jugal bidhi kaṭu madhur beli akeli jehi āśrit rahe,
pallavat phūlat naval nit sansār biṭap namāmahe. (5)
100 of 872
जे ब्रह्म अजमद्वैतमनुभवगम्य मन पर ध्यावहीं।
ते कहहुँ जानहुँ नाथ हम तव सगुन जस नित गावहीं॥
करुनायतन प्रभु सदगुनाकर देव यह बर मागहीं।
मन बचन कर्म बिकार तजि तव चरन हम अनुरागहीं ॥६॥
Je Brahma ajamadvaitamanubhavagamya man par dhyāvahīṅ,
te kahahuṅ jānahuṅ nāth ham tav sagun jas nit gāvahīṅ.
Karunāyatan prabhu sadgunākar dev yah bar māgahīṅ,
man bachan karma bikār taji tav charan ham anurāgahīṅ. (6)
101 of 872
दो०—सब के देखत बेदन्ह बिनती कीन्हि उदार।
अंतर्धान भए पुनि गए ब्रह्म आगार ॥१३(क)॥
Do—Sab ke dekhat bedanh binatī kīnhi udār,
antardhān bhae puni gae Brahma āgār. (13a)
102 of 872
बैनतेय सुनु संभु तब आए जहँ रघुबीर।
बिनय करत गदगद गिरा पूरित पुलक सरीर ॥१३(ख)॥
Bainatey sunu Sambhu tab āe jahaṅ Raghubīr,
binay karat gadgad girā pūrit pulak sarīr. (13b)
103 of 872
छं०—जय राम रमारमनं समनं।
भवताप भयाकुल पाहि जनं॥
अवधेस सुरेस रमेस बिभो।
सरनागत मागत पाहि प्रभो ॥१॥
Chhand—Jaya Rām ramāramanaṃ samanaṃ,
bhavatāp bhayākul pāhi janaṃ.
Avadhes sures rames bibho,
saranāgat māgat pāhi prabho. (1)
104 of 872
दससीस बिनासन बीस भुजा।
कृत दूरि महा महि भूरि रुजा॥
रजनीचर बृंद पतंग रहे।
सर पावक तेज प्रचंड दहे ॥२॥
Dassīs bināsan bīs bhujā,
kṛt dūri mahā mahi bhūri rujā.
Rajanīchar bṛnd pataṅg rahe,
sar pāvak tej prachaṇḍ dahe. (2)
105 of 872
महि मंडल मंडन चारुतरं।
धृत सायक चाप निषंग बरं॥
मद मोह महा ममता रजनी।
तम पुंज दिवाकर तेज अनी ॥३॥
Mahi maṇḍal maṇḍan chārutaraṃ,
dhṛt sāyak chāp niṣaṅg baraṃ.
Mad moh mahā mamatā rajanī,
tam puñj divākar tej anī. (3)
106 of 872
मनजात किरात निपात किए।
मृग लोग कुभोग सरेन हिए॥
हति नाथ अनाथनि पाहि हरे।
बिषया बन पावँ भूलि परे ॥४॥
Manajāt kirāt nipāt kie,
mṛg log kubhog saren hie.
Hati nāth anāthani pāhi Hare,
biṣayā ban pāvaṅ bhūli pare. (4)
107 of 872
बहु रोग बियोगन्हि लोग हए।
भवदंघ्रि निरादर के फल ए॥
भव सिंधु अगाध परे नर ते।
पद पंकज प्रेम न जे करते ॥५॥
Bahu rog biyoganhi log hae,
bhavadaṅghri nirādar ke phal e.
Bhav sindhu agādh pare nar te,
pad paṅkaj prem na je karate. (5)
108 of 872
अति दीन मलीन दुखी नितहीं।
जिन्ह कें पद पंकज प्रीति नहीं॥
अवलंब भवंत कथा जिन्ह कें।
प्रिय संत अनंत सदा तिन्ह कें ॥६॥
Ati dīn malīn dukhī nitahīṅ,
jinh keṅ pad paṅkaj prīti nahīṅ.
Avalaṃb bhavant kathā jinh keṅ,
priya sant anant sadā tinh keṅ. (6)
109 of 872
नहिं राग न लोभ न मान मदा।
तिन्ह कें सम बैभव वा बिपदा॥
एहि ते तव सेवक होत मुदा।
मुनि त्यागत जोग भरोस सदा ॥७॥
Nahiṅ rāg na lobh na mān madā,
tinh keṅ sam baibhav vā bipadā.
Ehi te tav sevak hot mudā,
muni tyāgat jog bharos sadā. (7)
110 of 872
करि प्रेम निरंतर नेम लिएँ।
पद पंकज सेवत सुद्ध हिएँ॥
सम मानि निरादर आदरही।
सब संत सुखी बिचरंति मही ॥८॥
Kari prem nirantar nem lieṅ,
pad paṅkaj sevat suddh hieṅ.
Sam māni nirādar ādarahī,
sab sant sukhī bicharanti mahī. (8)
111 of 872
मुनि मानस पंकज भृंग भजे।
रघुबीर महा रनधीर अजे॥
तव नाम जपामि नमामि हरी।
भव रोग महागद मान अरी ॥९॥
Muni mānas paṅkaj bhṛṅg bhaje,
Raghubīr mahā ranadhīr aje.
Tav nām japāmi namāmi Harī,
bhav rog mahāgad mān arī. (9)
112 of 872
गुन सील कृपा परमायतनं।
प्रनमामि निरंतर श्रीरमनं॥
रघुनंद निकंदय द्वंद्वघनं।
महिपाल बिलोकय दीनजनं ॥१०॥
Gun sīl kṛpā paramāyatanaṃ,
pranamāmi nirantar śrīramanaṃ.
Raghunand nikandaya dvandvaghanaṃ,
mahipāl bilokaya dīnajanaṃ. (10)
113 of 872
दो०—बार बार बर मागउँ हरषि देहु श्रीरंग।
पद सरोज अनपायनी भगति सदा सतसंग ॥१४(क)॥
Do—Bār bār bar māgauṅ haraṣi dehu Śrīraṅg,
pad saroj anapāyanī bhagati sadā satasaṅg. (14a)
114 of 872
बरनि उमापति राम गुन हरषि गए कैलास।
तब प्रभु कपिन्ह दिवाए सब बिधि सुखप्रद बास ॥१४(ख)॥
Barani Umāpati Rām gun haraṣi gae Kailās,
tab prabhu kapinh divāe sab bidhi sukhaprad bās. (14b)
115 of 872
सुनु खगपति यह कथा पावनी।
त्रिबिध ताप भव भय दावनी॥
महाराज कर सुभ अभिषेका।
सुनत लहहिं नर बिरति बिबेका ॥१॥
Sunu khagapati yah kathā pāvanī,
tribidh tāp bhav bhay dāvanī.
Mahārāj kar subh abhiṣekā,
sunat lahahiṅ nar birati bibekā. (1)
116 of 872
जे सकाम नर सुनहिं जे गावहिं।
सुख संपति नाना बिधि पावहिं॥
सुर दुर्लभ सुख करि जग माहीं।
अंतकाल रघुपति पुर जाहीं ॥२॥
Je sakām nar sunahiṅ je gāvahiṅ,
sukh sampati nānā bidhi pāvahiṅ.
Sur durlabh sukh kari jag māhīṅ,
antakāl Raghupati pur jāhīṅ. (2)
117 of 872
सुनहिं बिमुक्त बिरत अरु बिषई।
लहहिं भगति गति संपति नई॥
खगपति राम कथा मैं बरनी।
स्वमति बिलास त्रास दुख हरनी ॥३॥
Sunahiṅ bimukt birat aru biṣaī,
lahahiṅ bhagati gati sampati naī.
Khagapati Rām kathā maiṅ baranī,
svamati bilās trās dukh haranī. (3)
118 of 872
बिरति बिबेक भगति दृढ़ करनी।
मोह नदी कहँ सुंदर तरनी॥
नित नव मंगल कौसलपुरी।
हरषित रहहिं लोग सब कुरी ॥४॥
Birati bibek bhagati dṛḍh karanī,
moh nadī kahaṅ sundar taranī.
Nit nav maṅgal Kausalapurī,
haraṣit rahahiṅ log sab kurī. (4)
119 of 872
नित नइ प्रीति राम पद पंकज।
सब कें जिन्हहि नमत सिव मुनि अज॥
मंगन बहु प्रकार पहिराए।
द्विजन्ह दान नाना बिधि पाए ॥५॥
Nit nai prīti Rām pad paṅkaj,
sab keṅ jinhahi namat Siv muni Aj.
Maṅgan bahu prakār pahirāe,
dvijanh dān nānā bidhi pāe. (5)
120 of 872
दो०—ब्रह्मानंद मगन कपि सब कें प्रभु पद प्रीति।
जात न जाने दिवस तिन्ह गए मास षट बीति ॥१५॥
Do—Brahmānand magan kapi sab keṅ prabhu pad prīti,
jāt na jāne divas tinh gae mās ṣaṭ bīti. (15)
121 of 872
बिसरे गृह सपनेहुँ सुधि नाहीं।
जिमि परद्रोह संत मन माहीं॥
तब रघुपति सब सखा बोलाए।
आइ सबन्हि सादर सिरु नाए ॥१॥
Bisare gṛh sapanehuṅ sudhi nāhīṅ,
jimi paradroh sant man māhīṅ.
Tab Raghupati sab sakhā bolāe,
āi sabanhi sādar siru nāe. (1)
122 of 872
परम प्रीति समीप बैठारे।
भगत सुखद मृदु बचन उचारे॥
तुम्ह अति कीन्हि मोरि सेवकाई।
मुख पर केहि बिधि करौं बड़ाई ॥२॥
Param prīti samīp baiṭhāre,
bhagat sukhad mṛdu bachan uchāre.
Tumh ati kīnhi mori sevakāī,
mukh par kehi bidhi karauṅ baḍāī. (2)
123 of 872
ताते मोहि तुम्ह अति प्रिय लागे।
मम हित लागि भवन सुख त्यागे॥
अनुज राज संपति बैदेही।
देह गेह परिवार सनेही ॥३॥
Tāte mohi tumh ati priya lāge,
mam hit lāgi bhavan sukh tyāge.
Anuj rāj sampati Baidehī,
deh geh parivār sanehī. (3)
124 of 872
सब मम प्रिय नहिं तुम्हहि समाना।
मृषा न कहउँ मोर यह बाना॥
सब कें प्रिय सेवक यह नीती।
मोरें अधिक दास पर प्रीती ॥४॥
Sab mam priya nahiṅ tumhahi samānā,
mṛṣā na kahauṅ mor yah bānā.
Sab keṅ priya sevak yah nītī,
moreṅ adhik dās par prītī. (4)
125 of 872
दो०—अब गृह जाहु सखा सब भजेहु मोहि दृढ़ नेम।
सदा सर्बगत सर्बहित जानि करेहु अति प्रेम ॥१६॥
Do—Ab gṛh jāhu sakhā sab bhajehu mohi dṛḍh nem,
sadā sarbagat sarbahit jāni karehu ati prem. (16)
126 of 872
सुनि प्रभु बचन मगन सब भए।
को हम कहाँ बिसरि तन गए॥
एकटक रहे जोरि कर आगे।
सकहिं न कछु कहि अति अनुरागे ॥१॥
Suni prabhu bachan magan sab bhae,
ko ham kahāṅ bisari tan gae.
Ekaṭak rahe jori kar āge,
sakahiṅ na kachhu kahi ati anurāge. (1)
127 of 872
परम प्रेम तिन्ह कर प्रभु देखा।
कहा बिबिधि बिधि ग्यान बिसेषा॥
प्रभु सन्मुख कछु कहन न पारहिं।
पुनि पुनि चरन सरोज निहारहिं ॥२॥
Param prem tinh kar prabhu dekhā,
kahā bibidhi bidhi gyān biseṣā.
Prabhu sanmukh kachhu kahan na pārahiṅ,
puni puni charan saroj nihārahiṅ. (2)
128 of 872
तब प्रभु भूषन बसन मगाए।
नाना रंग अनूप सुहाए॥
सुग्रीवहि प्रथमहिं पहिराए।
बसन भरत निज हाथ बनाए ॥३॥
Tab prabhu bhūṣan basan magāe,
nānā raṅg anūp suhāe.
Sugrīvahi prathamahiṅ pahirāe,
basan Bharat nij hāth banāe. (3)
129 of 872
प्रभु प्रेरित लछिमन पहिराए।
लंकापति रघुपति मन भाए॥
अंगद बैठ रहा नहिं डोला।
प्रीति देखि प्रभु ताहि न बोला ॥४॥
Prabhu prerit Lachhiman pahirāe,
Laṅkāpati Raghupati man bhāe.
Aṅgad baiṭh rahā nahiṅ ḍolā,
prīti dekhi prabhu tāhi na bolā. (4)
130 of 872
दो०—जामवंत नीलादि सब पहिराए रघुनाथ।
हियँ धरि राम रूप सब चले नाइ पद माथ ॥१७(क)॥
Do—Jāmavant nīlādi sab pahirāe Raghunāth,
hiyaṅ dhari Rām rūp sab chale nāi pad māth. (17a)
131 of 872
तब अंगद उठि नाइ सिरु सजल नयन कर जोरि।
अति बिनीत बोलेउ बचन मनहुँ प्रेम रस बोरि ॥१७(ख)॥
Tab Aṅgad uṭhi nāi siru sajal nayan kar jori,
ati binīt boleu bachan manahuṅ prem ras bori. (17b)
132 of 872
सुनु सर्बग्य कृपा सुख सिंधो।
दीन दयाकर आरत बंधो॥
मरती बेर नाथ मोहि बाली।
गयउ तुम्हारेहि कोंछें घाली ॥१॥
Sunu sarbagya kṛpā sukh sindho,
dīn dayākar ārat bandho.
Maratī ber nāth mohi Bālī,
gayau tumhārehi koṅchheṅ ghālī. (1)
133 of 872
असरन सरन बिरदु संभारी।
मोहि जनि तजहु भगत हितकारी॥
मोरें तुम्ह प्रभु गुर पितु माता।
जाउँ कहाँ तजि पद जलजाता ॥२॥
Asaran saran biradu sambhārī,
mohi jani tajahu bhagat hitakārī.
Moreṅ tumh prabhu gur pitu mātā,
jāuṅ kahāṅ taji pad jalajātā. (2)
134 of 872
तुम्हहि बिचारि कहहु नरनाहा।
प्रभु तजि भवन काज मम काहा॥
बालक ग्यान बुद्धि बल हीना।
राखहु सरन नाथ जन दीना ॥३॥
Tumhahi bichāri kahahu naranāhā,
prabhu taji bhavan kāj mam kāhā.
Bālak gyān buddhi bal hīnā,
rākhahu saran nāth jan dīnā. (3)
135 of 872
नीचि टहल गृह कै सब करिहउँ।
पद पंकज बिलोकि भव तरिहउँ॥
अस कहि चरन परेउ प्रभु पाही।
अब जनि नाथ कहहु गृह जाही ॥४॥
Nīchi ṭahal gṛh kai sab karihauṅ,
pad paṅkaj biloki bhav tarihauṅ.
As kahi charan pareu prabhu pāhī,
ab jani nāth kahahu gṛh jāhī. (4)
136 of 872
दो०—अंगद बचन बिनीत सुनि रघुपति करुना सींव।
प्रभु उठाइ उर लायउ सजल नयन राजीव ॥१८(क)॥
Do—Aṅgad bachan binīt suni Raghupati karunā sīṅv,
prabhu uṭhāi ur lāyau sajal nayan rājīv. (18a)
137 of 872
निज उर माल बसन मनि बालितनय पहिराइ।
बिदा कीन्हि भगवान तब बहु प्रकार समुझाइ ॥१८(ख)॥
Nij ur māl basan mani Bālitanay pahirāi,
bidā kīnhi Bhagavān tab bahu prakār samujhāi. (18b)
138 of 872
भरत अनुज सौमित्रि समेता।
पठवन चले भगत कृत चेता॥
अंगद हृदयँ प्रेम नहिं थोरा।
फिरि फिरि चितव राम कीं ओरा ॥१॥
Bharat anuj Saumitri sametā,
paṭhavan chale bhagat kṛt chetā.
Aṅgad hṛdayaṅ prem nahiṅ thorā,
phiri phiri chitav Rām kīṅ orā. (1)
139 of 872
बार बार कर दंड प्रनामा।
मन अस रहन कहहिं मोहि रामा॥
राम बिलोकनि बोलनि चलनी।
सुमिरि सुमिरि सोचत हँसि मिलनी ॥२॥
Bār bār kar daṇḍ pranāmā,
man as rahan kahahiṅ mohi Rāmā.
Rām bilokani bolani chalanī,
sumiri sumiri sochat haṅsi milanī. (2)
140 of 872
प्रभु रुख देखि बिनय बहु भाषी।
चलेउ हृदयँ पद पंकज राखी॥
अति आदर सब कपि पहुँचाए।
भाइन्ह सहित भरत पुनि आए ॥३॥
Prabhu rukh dekhi binay bahu bhāṣī,
chaleu hṛdayaṅ pad paṅkaj rākhī.
Ati ādar sab kapi pahuṅchāe,
bhāinh sahit Bharat puni āe. (3)
141 of 872
तब सुग्रीव चरन गहि नाना।
भाँति बिनय कीन्हे हनुमाना॥
दिन दस करि रघुपति पद सेवा।
पुनि तव चरन देखिहउँ देवा ॥४॥
Tab Sugrīv charan gahi nānā,
bhāṅti binay kīnhe Hanumānā.
Din das kari Raghupati pad sevā,
puni tav charan dekhihauṅ devā. (4)
142 of 872
पुन्य पुंज तुम्ह पवनकुमारा।
सेवहु जाइ कृपा आगारा॥
अस कहि कपि सब चले तुरंता।
अंगद कहइ सुनहु हनुमंता ॥५॥
Punya puñj tumh Pavanakumārā,
sevahu jāi kṛpā āgārā.
As kahi kapi sab chale turantā,
Aṅgad kahai sunahu Hanumantā. (5)
143 of 872
दो०—कहेहु दंडवत प्रभु सैं तुम्हहि कहउँ कर जोरि।
बार बार रघुनायकहि सुरति कराएहु मोरि ॥१९(क)॥
Do—Kahehu daṇḍavat prabhu saiṅ tumhahi kahauṅ kar jori,
bār bār Raghunāyakahi surati karāehu mori. (19a)
144 of 872
अस कहि चलेउ बालिसुत फिरि आयउ हनुमंत।
तासु प्रीति प्रभु सन कही मगन भए भगवंत ॥१९(ख)॥
As kahi chaleu Bālisut phiri āyau Hanumant,
tāsu prīti prabhu san kahī magan bhae Bhagavant. (19b)
145 of 872
कुलिसहु चाहि कठोर अति कोमल कुसुमहु चाहि।
चित्त खगेस राम कर समुझि परइ कहु काहि ॥१९(ग)॥
Kulisahu chāhi kaṭhor ati komal kusumahu chāhi,
chitt khages Rām kar samujhi parai kahu kāhi. (19c)
146 of 872
पुनि कृपाल लियो बोलि निषादा।
दीन्हे भूषन बसन प्रसादा॥
जाहु भवन मम सुमिरन करेहू।
मन क्रम बचन धर्म अनुसरेहू ॥१॥
Puni kṛpāl liyo boli niṣādā,
dīnhe bhūṣan basan prasādā.
Jāhu bhavan mam sumiran karehū,
man kram bachan dharma anusarehū. (1)
147 of 872
तुम्ह मम सखा भरत सम भ्राता।
सदा रहेहु पुर आवत जाता॥
बचन सुनत उपजा सुख भारी।
परेउ चरन भरि लोचन बारी ॥२॥
Tumh mam sakhā Bharat sam bhrātā,
sadā rahehu pur āvat jātā.
Bachan sunat upajā sukh bhārī,
pareu charan bhari lochan bārī. (2)
148 of 872
चरन नलिन उर धरि गृह आवा।
प्रभु सुभाउ परिजनन्हि सुनावा॥
रघुपति चरित देखि पुरबासी।
पुनि पुनि कहहिं धन्य सुखरासी ॥३॥
Charan nalin ur dhari gṛh āvā,
prabhu subhāu parijananhi sunāvā.
Raghupati charit dekhi purabāsī,
puni puni kahahiṅ dhanya sukharāsī. (3)
149 of 872
राम राज बैठें त्रैलोका।
हरषित भए गए सब सोका॥
बयरु न कर काहू सन कोई।
राम प्रताप बिषमता खोई ॥४॥
Rām rāj baiṭheṅ trailokā,
haraṣit bhae gae sab sokā.
Bayaru na kar kāhū san koī,
Rām pratāp biṣamatā khoī. (4)
150 of 872
दो०—बरनाश्रम निज निज धरम निरत बेद पथ लोग।
चलहिं सदा पावहिं सुखहि नहिं भय सोक न रोग ॥२०॥
Do—Baranāśram nij nij dharam nirat bed path log,
chalahiṅ sadā pāvahiṅ sukhahi nahiṅ bhay sok na rog. (20)
151 of 872
दैहिक दैविक भौतिक तापा।
राम राज नहिं काहुहि ब्यापा॥
सब नर करहिं परस्पर प्रीती।
चलहिं स्वधर्म निरत श्रुति नीती ॥१॥
Daihik daivik bhautik tāpā,
Rām rāj nahiṅ kāhuhi byāpā.
Sab nar karahiṅ paraspar prītī,
chalahiṅ svadharma nirat śruti nītī. (1)
152 of 872
चारिउ चरन धर्म जग माहीं।
पूरि रहा सपनेहुँ अघ नाहीं॥
राम भगति रत नर अरु नारी।
सकल परम गति के अधिकारी ॥२॥
Chāriu charan dharma jag māhīṅ,
pūri rahā sapanehuṅ agh nāhīṅ.
Rām bhagati rat nar aru nārī,
sakal param gati ke adhikārī. (2)
153 of 872
अल्पमृत्यु नहिं कवनिउ पीरा।
सब सुंदर सब बिरुज सरीरा॥
नहिं दरिद्र कोउ दुखी न दीना।
नहिं कोउ अबुध न लच्छन हीना ॥३॥
Alpamṛtyu nahiṅ kavaniu pīrā,
sab sundar sab biruj sarīrā.
Nahiṅ daridra kou dukhī na dīnā,
nahiṅ kou abudh na lachchhan hīnā. (3)
154 of 872
सब निर्दंभ धर्मरत पुनी।
नर अरु नारि चतुर सब गुनी॥
सब गुनग्य पंडित सब ग्यानी।
सब कृतग्य नहिं कपट सयानी ॥४॥
Sab nirdaṃbh dharmarat punī,
nar aru nāri chatur sab gunī.
Sab gunagya paṇḍit sab gyānī,
sab kṛtagya nahiṅ kapaṭ sayānī. (4)
155 of 872
दो०—राम राज नभगेस सुनु सचराचर जग माहिं।
काल कर्म सुभाव गुन कृत दुख काहुहि नाहिं ॥२१॥
Do—Rām rāj nabhages sunu sacharāchar jag māhiṅ,
kāl karma subhāv gun kṛt dukh kāhuhi nāhiṅ. (21)
156 of 872
भूमि सप्त सागर मेखला।
एक भूप रघुपति कोसला॥
भुअन अनेक रोम प्रति जासू।
यह प्रभुता कछु बहुत न तासू ॥१॥
Bhūmi sapt sāgar mekhalā,
ek bhūp Raghupati Kosalā.
Bhuan anek rom prati jāsū,
yah prabhutā kachhu bahut na tāsū. (1)
157 of 872
सो महिमा समुझत प्रभु केरी।
यह बरनत हीनता घनेरी॥
सोउ महिमा खगेस जिन्ह जानी।
फिरि एहिं चरित तिन्हहुँ रति मानी ॥२॥
So mahimā samujhat prabhu kerī,
yah baranat hīnatā ghanerī.
Sou mahimā khages jinh jānī,
phiri ehiṅ charit tinhahuṅ rati mānī. (2)
158 of 872
सोउ जाने कर फल यह लीला।
कहहिं महा मुनिबर दमसीला॥
राम राज कर सुख संपदा।
बरनि न सकइ फनीस सारदा ॥३॥
Sou jāne kar phal yah līlā,
kahahiṅ mahā munibar damasīlā.
Rām rāj kar sukh sampadā,
barani na sakai phanīs Sāradā. (3)
159 of 872
सब उदार सब पर उपकारी।
बिप्र चरन सेवक नर नारी॥
एकनारि ब्रत रत सब झारी।
ते मन बच क्रम पति हितकारी ॥४॥
Sab udār sab par upakārī,
bipra charan sevak nar nārī.
Ekanāri brat rat sab jhārī,
te man bach kram pati hitakārī. (4)
160 of 872
दो०—दंड जतिन्ह कर भेद जहँ नर्तक नृत्य समाज।
जीतहु मनहि सुनिअ अस रामचंद्र कें राज ॥२२॥
Do—Daṇḍ jatinh kar bhed jahaṅ nartak nṛtya samāj,
jītahu manahi sunia as Rāmachandra keṅ rāj. (22)
161 of 872
फूलहिं फरहिं सदा तरु कानन।
रहहिं एक सँग गज पंचानन॥
खग मृग सहज बयरु बिसराई।
सबन्हि परस्पर प्रीति बढ़ाई ॥१॥
Phūlahiṅ pharahiṅ sadā taru kānan,
rahahiṅ ek saṅg gaj pañchānan.
Khag mṛg sahaj bayaru bisarāī,
sabanhi paraspar prīti baḍhāī. (1)
162 of 872
कूजहिं खग मृग नाना बृंदा।
अभय चरहिं बन करहिं अनंदा॥
सीतल सुरभि पवन बह मंदा।
गुंजत अलि लै चलि मकरंदा ॥२॥
Kūjahiṅ khag mṛg nānā bṛndā,
abhay charahiṅ ban karahiṅ anandā.
Sītal surabhi pavan bah mandā,
guñjat ali lai chali makarandā. (2)
163 of 872
लता बिटप मागें मधु चवहीं।
मनभावतो धेनु पय स्रवहीं॥
ससि संपन्न सदा रह धरनी।
त्रेताँ भइ कृतजुग कै करनी ॥३॥
Latā biṭap māgeṅ madhu chavahīṅ,
manabhāvato dhenu pay sravahīṅ.
Sasi sampanna sadā rah dharanī,
Tretāṅ bhai kṛtajug kai karanī. (3)
164 of 872
प्रगटीं गिरिन्ह बिबिधि मनि खानी।
जगदातमा भूप जग जानी॥
सरिता सकल बहहिं बर बारी।
सीतल अमल स्वाद सुखकारी ॥४॥
Pragaṭīṅ girinh bibidhi mani khānī,
jagadātamā bhūp jag jānī.
Saritā sakal bahahiṅ bar bārī,
sītal amal svād sukhakārī. (4)
165 of 872
सागर निज मरजादाँ रहहीं।
डारहिं रत्न तटन्हि नर लहहीं॥
सरसिज संकुल सकल तड़ागा।
अति प्रसन्न दस दिसा बिभागा ॥५॥
Sāgar nij marajādāṅ rahahīṅ,
ḍārahiṅ ratna taṭanhi nar lahahīṅ.
Sarasij saṅkul sakal taḍāgā,
ati prasanna das disā bibhāgā. (5)
166 of 872
दो०—बिधु महि पूर मयूखन्हि रबि तप जेतनेहि काज।
मागें बारिद देहिं जल रामचंद्र कें राज ॥२३॥
Do—Bidhu mahi pūr mayūkhanhi rabi tap jetanehi kāj,
māgeṅ bārid dehiṅ jal Rāmachandra keṅ rāj. (23)
167 of 872
कोटिन्ह बाजिमेध प्रभु कीन्हे।
दान अनेक द्विजन्ह कहँ दीन्हे॥
श्रुति पथ पालक धर्म धुरंधर।
गुनातीत अरु भोग पुरंदर ॥१॥
Koṭinh bājimedh prabhu kīnhe,
dān anek dvijanh kahaṅ dīnhe.
Śruti path pālak dharma dhurandhar,
gunātīt aru bhog Purandar. (1)
168 of 872
पति अनुकूल सदा रह सीता।
सोभा खानि सुसील बिनीता॥
जानति कृपासिंधु प्रभुताई।
सेवति चरन कमल मन लाई ॥२॥
Pati anukūl sadā rah Sītā,
sobhā khāni susīl binītā.
Jānati kṛpāsindhu prabhutāī,
sevati charan kamal man lāī. (2)
169 of 872
जद्यपि गृहँ सेवक सेवकिनी।
बिपुल सदा सेवा बिधि गुनी॥
निज कर गृह परिचरजा करई।
रामचंद्र आयसु अनुसरई ॥३॥
Jadyapi gṛhaṅ sevak sevakinī,
bipul sadā sevā bidhi gunī.
Nij kar gṛh paricharajā karaī,
Rāmachandra āyasu anusaraī. (3)
170 of 872
जेहि बिधि कृपासिंधु सुख मानइ।
सोइ कर श्री सेवा बिधि जानइ॥
कौसल्यादि सासु गृह माहीं।
सेवइ सबन्हि मान मद नाहीं ॥४॥
Jehi bidhi kṛpāsindhu sukh mānai,
soi kar Śrī sevā bidhi jānai.
Kausalyādi sāsu gṛh māhīṅ,
sevai sabanhi mān mad nāhīṅ. (4)
171 of 872
उमा रमा ब्रह्मादि बंदिता।
जगदंबा संततमनिंदिता ॥५॥
Umā Ramā Brahmādi banditā,
jagadaṃbā santatamaninditā. (5)
172 of 872
दो०—जासु कृपा कटाच्छु सुर चाहत चितव न सोइ।
राम पदारबिंद रति करति सुभावहि खोइ ॥२४॥
Do—Jāsu kṛpā kaṭāchchhu sur chāhat chitav na soi,
Rām padārabind rati karati subhāvahi khoi. (24)
173 of 872
सेवहिं सानकूल सब भाई।
राम चरन रति अति अधिकाई॥
प्रभु मुख कमल बिलोकत रहहीं।
कबहुँ कृपाल हमहि कछु कहहीं ॥१॥
Sevahiṅ sānakūl sab bhāī,
Rām charan rati ati adhikāī.
Prabhu mukh kamal bilokat rahahīṅ,
kabahuṅ kṛpāl hamahi kachhu kahahīṅ. (1)
174 of 872
राम करहिं भ्रातन्ह पर प्रीती।
नाना भाँति सिखावहिं नीती॥
हरषित रहहिं नगर के लोगा।
करहिं सकल सुर दुर्लभ भोगा ॥२॥
Rām karahiṅ bhrātanh par prītī,
nānā bhāṅti sikhāvahiṅ nītī.
Haraṣit rahahiṅ nagar ke logā,
karahiṅ sakal sur durlabh bhogā. (2)
175 of 872
अहनिसि बिधिहि मनावत रहहीं।
श्रीरघुबीर चरन रति चहहीं॥
दुइ सुत सुंदर सीताँ जाए।
लव कुस बेद पुरानन्ह गाए ॥३॥
Ahanisi bidhihi manāvat rahahīṅ,
Śrīraghubīr charan rati chahahīṅ.
Dui sut sundar Sītāṅ jāe,
Lav Kus bed purānanh gāe. (3)
176 of 872
दोउ बिजई बिनई गुन मंदिर।
हरि प्रतिबिंब मनहुँ अति सुंदर॥
दुइ दुइ सुत सब भ्रातन्ह केरे।
भए रूप गुन सील घनेरे ॥४॥
Dou bijaī binaī gun mandir,
Hari pratibiṃb manahuṅ ati sundar.
Dui dui sut sab bhrātanh kere,
bhae rūp gun sīl ghanere. (4)
177 of 872
दो०—ग्यान गिरा गोतीत अज माया मन गुन पार।
सोइ सच्चिदानंद घन कर नर चरित उदार ॥२५॥
Do—Gyān girā gotīt aj māyā man gun pār,
soi sachchidānand ghan kar nar charit udār. (25)
178 of 872
प्रातकाल सरऊ करि मज्जन।
बैठहिं सभाँ संग द्विज सज्जन॥
बेद पुरान बसिष्ठ बखानहिं।
सुनहिं राम जद्यपि सब जानहिं ॥१॥
Prātakāl Sarū kari majjan,
baiṭhahiṅ sabhāṅ saṅg dvij sajjan.
Bed purān Basiṣṭh bakhānahiṅ,
sunahiṅ Rām jadyapi sab jānahiṅ. (1)
179 of 872
अनुजन्ह संजुत भोजन करहीं।
देखि सकल जननीं सुख भरहीं॥
भरत सत्रुहन दोनउ भाई।
सहित पवनसुत उपबन जाई ॥२॥
Anujanh sanjut bhojan karahīṅ,
dekhi sakal jananīṅ sukh bharahīṅ.
Bharat Satruhan donau bhāī,
sahit Pavanasut upaban jāī. (2)
180 of 872
बूझहिं बैठि राम गुन गाहा।
कह हनुमान सुमति अवगाहा॥
सुनत बिमल गुन अति सुख पावहिं।
बहुरि बहुरि करि बिनय कहावहिं ॥३॥
Būjhahiṅ baiṭhi Rām gun gāhā,
kah Hanumān sumati avagāhā.
Sunat bimal gun ati sukh pāvahiṅ,
bahuri bahuri kari binay kahāvahiṅ. (3)
181 of 872
सब कें गृह गृह होहिं पुराना।
राम चरित पावन बिधि नाना॥
नर अरु नारि राम गुन गानहिं।
करहिं दिवस निसि जात न जानहिं ॥४॥
Sab keṅ gṛh gṛh hohiṅ purānā,
Rām charit pāvan bidhi nānā.
Nar aru nāri Rām gun gānahiṅ,
karahiṅ divas nisi jāt na jānahiṅ. (4)
182 of 872
दो०—अवधपुरी बासिन्ह कर सुख संपदा समाज।
सहस सेष नहिं कहि सकहिं जहँ नृप राम बिराज ॥२६॥
Do—Avadhapurī bāsinh kar sukh sampadā samāj,
sahas Ṣeṣ nahiṅ kahi sakahiṅ jahaṅ nṛp Rām birāj. (26)
183 of 872
नारदादि सनकादि मुनीसा।
दरसन लागि कोसलाधीसा॥
दिन प्रति सकल अजोध्या आवहिं।
देखि नगरु बिरागु बिसरावहिं ॥१॥
Nāradādi Sanakādi munīsā,
darasan lāgi Kosalādhīsā.
Din prati sakal Ajodhyā āvahiṅ,
dekhi nagaru birāgu bisarāvahiṅ. (1)
184 of 872
जातरूप मनि रचित अटारीं।
नाना रंग रुचिर गच ढारीं॥
पुर चहुँ पास कोट अति सुंदर।
रचे कँगूरा रंग रंग बर ॥२॥
Jātarūp mani rachit aṭārīṅ,
nānā raṅg ruchir gach ḍhārīṅ.
Pur chahuṅ pās koṭ ati sundar,
rache kaṅgūrā raṅg raṅg bar. (2)
185 of 872
नव ग्रह निकर अनीक बनाई।
जनु घेरी अमरावति आई॥
महि बहु रंग रचित गच काँचा।
जो बिलोकि मुनिबर मन नाचा ॥३॥
Nav grah nikar anīk banāī,
janu gherī Amarāvati āī.
Mahi bahu raṅg rachit gach kāṅchā,
jo biloki munibar man nāchā. (3)
186 of 872
धवल धाम ऊपर नभ चुंबत।
कलस मनहुँ रबि ससि दुति निंदत॥
बहु मनि रचित झरोखा भ्राजहिं।
गृह गृह प्रति मनि दीप बिराजहिं ॥४॥
Dhaval dhām ūpar nabh chuṃbat,
kalas manahuṅ rabi sasi duti nindat.
Bahu mani rachit jharokhā bhrājahiṅ,
gṛh gṛh prati mani dīp birājahiṅ. (4)
187 of 872
छं०—मनि दीप राजहिं भवन भ्राजहिं देहरीं बिद्रुम रची।
मनि खंभ भीति बिरंचि बिरची कनक मनि मरकत खची॥
सुंदर मनोहर मंदिरायत अजिर रुचिर फटिक रचे।
प्रति द्वार द्वार कपाट पुरट बनाइ बहु बज्रन्हि खचे॥
Chhand—Mani dīp rājahiṅ bhavan bhrājahiṅ deharīṅ bidrum rachī,
mani khaṃbh bhīti biranchi birachī kanak mani marakat khachī.
Sundar manohar mandirāyat ajir ruchir phaṭik rache,
prati dvār dvār kapāṭ puraṭ banāi bahu bajranhi khache.
188 of 872
दो०—चारु चित्रसाला गृह गृह प्रति लिखे बनाइ।
राम चरित जे निरख मुनि ते मन लेहिं चोराइ ॥२७॥
Do—Chāru chitrasālā gṛh gṛh prati likhe banāi,
Rām charit je nirakh muni te man lehiṅ chorāi. (27)
189 of 872
सुमन बाटिका सबहिं लगाईं।
बिबिध भाँति करि जतन बनाईं॥
लता ललित बहु जाति सुहाईं।
फूलहिं सदा बसंत कि नाईं ॥१॥
Suman bāṭikā sabahiṅ lagāīṅ,
bibidh bhāṅti kari jatan banāīṅ.
Latā lalit bahu jāti suhāīṅ,
phūlahiṅ sadā basant ki nāīṅ. (1)
190 of 872
गुंजत मधुकर मुखर मनोहर।
मारुत त्रिबिधि सदा बह सुंदर॥
नाना खग बालकन्हि जिआए।
बोलत मधुर उड़ात सुहाए ॥२॥
Guñjat madhukar mukhar manohar,
mārut tribidhi sadā bah sundar.
Nānā khag bālakanhi jiāe,
bolat madhur uḍāt suhāe. (2)
191 of 872
मोर हंस सारस पारावत।
भवननि पर सोभा अति पावत॥
जहँ तहँ देखहिं निज परिछाहीं।
बहु बिधि कूजहिं नृत्य कराहीं ॥३॥
Mor haṃs sāras pārāvat,
bhavanani par sobhā ati pāvat.
Jahaṅ tahaṅ dekhahiṅ nij parichhāhīṅ,
bahu bidhi kūjahiṅ nṛtya karāhīṅ. (3)
192 of 872
सुक सारिका पढ़ावहिं बालक।
कहहु राम रघुपति जनपालक॥
राज दुआर सकल बिधि चारू।
बीथीं चौहट रुचिर बजारू ॥४॥
Suk sārikā paḍhāvahiṅ bālak,
kahahu Rām Raghupati janapālak.
Rāj duār sakal bidhi chārū,
bīthīṅ chauhaṭ ruchir bajārū. (4)
193 of 872
छं०—बाजार रुचिर न बनइ बरनत बस्तु बिनु गथ पाइए।
जहँ भूप रमानिवास तहँ की संपदा किमि गाइए॥
बैठे बजाज सराफ बनिक अनेक मनहुँ कुबेर ते।
सब सुखी सब सच्चरित सुंदर नारि नर सिसु जरठ जे॥
Chhand—Bājār ruchir na banai baranat bastu binu gath pāie,
jahaṅ bhūp Ramānivās tahaṅ kī sampadā kimi gāie.
Baiṭhe bajāj sarāph banik anek manahuṅ Kuber te,
sab sukhī sab sachcharit sundar nāri nar sisu jaraṭh je.
194 of 872
दो०—उत्तर दिसि सरजू बह निर्मल जल गंभीर।
बाँधे घाट मनोहर स्वल्प पंक नहिं तीर ॥२८॥
Do—Uttar disi Sarajū bah nirmal jal gaṃbhīr,
bāṅdhe ghāṭ manohar svalp paṅk nahiṅ tīr. (28)
195 of 872
दूरि फराक रुचिर सो घाटा।
जहँ जल पिअहिं बाजि गज ठाटा॥
पनिघट परम मनोहर नाना।
तहाँ न पुरुष करहिं अस्नाना ॥१॥
Dūri pharāk ruchir so ghāṭā,
jahaṅ jal piahiṅ bāji gaj ṭhāṭā.
Panighaṭ param manohar nānā,
tahāṅ na puruṣ karahiṅ asnānā. (1)
196 of 872
राजघाट सब बिधि सुंदर बर।
मज्जहिं तहाँ बरन चारिउ नर॥
तीर तीर देवन्ह के मंदिर।
चहुँ दिसि तिन्ह के उपबन सुंदर ॥२॥
Rājghāṭ sab bidhi sundar bar,
majjahiṅ tahāṅ baran chāriu nar.
Tīr tīr devanh ke mandir,
chahuṅ disi tinh ke upaban sundar. (2)
197 of 872
कहुँ कहुँ सरिता तीर उदासी।
बसहिं ग्यान रत मुनि संन्यासी॥
तीर तीर तुलसिका सुहाई।
बृंद बृंद बहु मुनिन्ह लगाई ॥३॥
Kahuṅ kahuṅ saritā tīr udāsī,
basahiṅ gyān rat muni sannyāsī.
Tīr tīr tulasikā suhāī,
bṛnd bṛnd bahu muninh lagāī. (3)
198 of 872
पुर सोभा कछु बरनि न जाई।
बाहेर नगर परम रुचिराई॥
देखत पुरी अखिल अघ भागा।
बन उपबन बापिका तड़ागा ॥४॥
Pur sobhā kachhu barani na jāī,
bāher nagar param ruchirāī.
Dekhat purī akhil agh bhāgā,
ban upaban bāpikā taḍāgā. (4)
199 of 872
छं०—बापीं तड़ाग अनूप कूप मनोहरायत सोहहीं।
सोपान सुंदर नीर निर्मल देखि सुर मुनि मोहहीं॥
बहु रंग कंज अनेक खग कूजहिं मधुप गुंजारहीं।
आराम रम्य पिकादि खग रव जनु पथिक हंकारहीं॥
Chhand—Bāpīṅ taḍāg anūp kūp manoharāyat sohahīṅ,
sopān sundar nīr nirmal dekhi sur muni mohahīṅ.
Bahu raṅg kañj anek khag kūjahiṅ madhup guñjārahīṅ,
ārām ramya pikādi khag rav janu pathik haṅkārahīṅ.
200 of 872
दो०—रमानाथ जहँ राजा सो पुर बरनि कि जाइ।
अनिमादिक सुख संपदा रहीं अवध सब छाइ ॥२९॥
Do—Ramānāth jahaṅ rājā so pur barani ki jāi,
animādik sukh sampadā rahīṅ Avadh sab chhāi. (29)
201 of 872
जहँ तहँ नर रघुपति गुन गावहिं।
बैठि परसपर इहइ सिखावहिं॥
भजहु प्रनत प्रतिपालक रामहि।
सोभा सील रूप गुन धामहि ॥१॥
Jahaṅ tahaṅ nar Raghupati gun gāvahiṅ,
baiṭhi parasapar ihai sikhāvahiṅ.
Bhajahu pranat pratipālak Rāmahi,
sobhā sīl rūp gun dhāmahi. (1)
202 of 872
जलज बिलोचन स्यामल गातहि।
पलक नयन इव सेवक त्रातहि॥
धृत सर रुचिर चाप तूनीरहि।
संत कंज बन रबि रनधीरहि ॥२॥
Jalaj bilochan syāmal gātahi,
palak nayan iv sevak trātahi.
Dhṛt sar ruchir chāp tūnīrahi,
sant kañj ban rabi ranadhīrahi. (2)
203 of 872
काल कराल ब्याल खगराजहि।
नमत राम अकाम ममता जहि॥
लोभ मोह मृगजूथ किरातहि।
मनसिज करि हरि जन सुखदातहि ॥३॥
Kāl karāl byāl khagarājahi,
namat Rām akām mamatā jahi.
Lobh moh mṛgajūth kirātahi,
manasij kari hari jan sukhadātahi. (3)
204 of 872
संसय सोक निबिड़ तम भानुहि।
दनुज गहन घन दहन कृसानुहि॥
जनकसुता समेत रघुबीरहि।
कस न भजहु भंजन भव भीरहि ॥४॥
Saṃsay sok nibiḍ tam bhānuhi,
danuj gahan ghan dahan kṛsānuhi.
Janakasutā samet Raghubīrahi,
kas na bhajahu bhañjan bhav bhīrahi. (4)
205 of 872
बहु बासना मसक हिम रासिहि।
सदा एकरस अज अबिनासिहि॥
मुनि रंजन भंजन महि भारहि।
तुलसिदास के प्रभुहि उदारहि ॥५॥
Bahu bāsanā masak him rāsihi,
sadā ekaras aj abināsihi.
Muni rañjan bhañjan mahi bhārahi,
Tulasidās ke prabhuhi udārahi. (5)
206 of 872
दो०—एहि बिधि नगर नारि नर करहिं राम गुन गान।
सानुकूल सब पर रहहिं संतत कृपानिधान ॥३०॥
Do—Ehi bidhi nagar nāri nar karahiṅ Rām gun gān,
sānukūl sab par rahahiṅ santat kṛpānidhān. (30)
207 of 872
जब ते राम प्रताप खगेसा।
उदित भयउ अति प्रबल दिनेसा॥
पूरि प्रकास रहेउ तिहुँ लोका।
बहुतेन्ह सुख बहुतन मन सोका ॥१॥
Jab te Rām pratāp khagesā,
udit bhayau ati prabal dinesā.
Pūri prakās raheu tihuṅ lokā,
bahutenh sukh bahutan man sokā. (1)
208 of 872
जिन्हहि सोक ते कहउँ बखानी।
प्रथम अबिद्या निसा नसानी॥
अघ उलूक जहँ तहाँ लुकाने।
काम क्रोध कैरव सकुचाने ॥२॥
Jinhahi sok te kahauṅ bakhānī,
pratham abidyā nisā nasānī.
Agh ulūk jahaṅ tahāṅ lukāne,
kām krodh kairav sakuchāne. (2)
209 of 872
बिबिध कर्म गुन काल सुभाऊ।
ए चकोर सुख लहहिं न काऊ॥
मत्सर मान मोह मद चोरा।
इन्ह कर हुनर न कवनिहुँ ओरा ॥३॥
Bibidh karma gun kāl subhāū,
e chakor sukh lahahiṅ na kāū.
Matsar mān moh mad chorā,
inh kar hunar na kavanihuṅ orā. (3)
210 of 872
धरम तड़ाग ग्यान बिग्याना।
ए पंकज बिकसे बिधि नाना॥
सुख संतोष बिराग बिबेका।
बिगत सोक ए कोक अनेका ॥४॥
Dharam taḍāg gyān bigyānā,
e paṅkaj bikase bidhi nānā.
Sukh santoṣ birāg bibekā,
bigat sok e kok anekā. (4)
211 of 872
दो०—यह प्रताप रबि जाकें उर जब करइ प्रकास।
पछिले बाढ़हिं प्रथम जे कहे ते पावहिं नास ॥३१॥
Do—Yah pratāp rabi jākeṅ ur jab karai prakās,
pachhile bāḍhahiṅ pratham je kahe te pāvahiṅ nās. (31)
212 of 872
भ्रातन्ह सहित रामु एक बारा।
संग परम प्रिय पवनकुमारा॥
सुंदर उपबन देखन गए।
सब तरु कुसुमित पल्लव नए ॥१॥
Bhrātanh sahit Rāmu ek bārā,
saṅg param priya Pavankumārā,
sundar upaban dekhan gae,
sab taru kusumit pallav nae. (1)
213 of 872
जानि समय सनकादिक आए।
तेज पुंज गुन सील सुहाए॥
ब्रह्मानंद सदा लयलीना।
देखत बालक बहुकालीना ॥२॥
Jāni samay Sanakādik āe,
tej puñj gun sīl suhāe,
Brahmānand sadā layalīnā,
dekhat bālak bahukālīnā. (2)
214 of 872
रूप धरें जनु चारिउ बेदा।
समदरसी मुनि बिगत बिभेदा॥
आसा बसन ब्यसन यह तिन्हहीं।
रघुपति चरित होइ तहँ सुनहीं ॥३॥
Rūp dhareṅ janu chāriu bedā,
samadarasī muni bigat bibhedā,
āsā basan byasan yah tinhahīṅ,
Raghupati charit hoi tahaṅ sunahīṅ. (3)
215 of 872
तहाँ रहे सनकादि भवानी।
जहँ घटसंभव मुनिबर ग्यानी॥
राम कथा मुनिबर बहु बरनी।
ग्यान जोनि पावक जिमि अरनी ॥४॥
Tahāṅ rahe Sanakādi Bhavānī,
jahaṅ Ghaṭasambhav munibar gyānī,
Rām kathā munibar bahu baranī,
gyān joni pāvak jimi aranī. (4)
216 of 872
दो०—देखि राम मुनि आवत हरषि दंडवत कीन्ह।
स्वागत पूँछि पीत पट प्रभु बैठन कहँ दीन्ह ॥३२॥
Do—Dekhi Rām muni āvat haraṣi daṇḍavat kīnh,
svāgat pūṅchhi pīt paṭ prabhu baiṭhan kahaṅ dīnh. (32)
217 of 872
कीन्ह दंडवत तीनिउँ भाई।
सहित पवनसुत सुख अधिकाई॥
मुनि रघुपति छबि अतुल बिलोकी।
भए मगन मन सके न रोकी ॥१॥
Kīnh daṇḍavat tīniuṅ bhāī,
sahit Pavansut sukh adhikāī,
muni Raghupati chhabi atul bilokī,
bhae magan man sake na rokī. (1)
218 of 872
स्यामल गात सरोरुह लोचन।
सुंदरता मंदिर भव मोचन॥
एकटक रहे निमेष न लावहिं।
प्रभु कर जोरें सीस नवावहिं ॥२॥
Syāmal gāt saroruh lochan,
sundartā mandir bhav mochan,
ekaṭak rahe nimeṣ na lāvahiṅ,
prabhu kar joreṅ sīs navāvahiṅ. (2)
219 of 872
तिन्ह कै दसा देखि रघुबीरा।
स्रवत नयन जल पुलक सरीरा॥
कर गहि प्रभु मुनिबर बैठारे।
परम मनोहर बचन उचारे ॥३॥
Tinh kai dasā dekhi Raghubīrā,
sravat nayan jal pulak sarīrā,
kar gahi prabhu munibar baiṭhāre,
param manohar bachan uchāre. (3)
220 of 872
आजु धन्य मैं सुनहु मुनीसा।
तुम्हरें दरस जाहिं अघ खीसा॥
बड़े भाग पाइब सतसंगा।
बिनहिं प्रयास होहिं भवभंगा ॥४॥
Āju dhanya maiṅ sunahu munīsā,
tumhareṅ daras jāhiṅ agh khīsā,
baḍe bhāg pāib satasaṅgā,
binahiṅ prayās hohiṅ bhavabhaṅgā. (4)
221 of 872
दो०—संत संग अपबर्ग कर कामी भव कर पंथ।
कहहिं संत कबि कोबिद श्रुति पुरान सद्ग्रंथ ॥३३॥
Do—Sant saṅg apabarg kar kāmī bhav kar panth,
kahahiṅ sant kabi kobid shruti purān sadgranth. (33)
222 of 872
सुनि प्रभु बचन हरषि मुनि चारी।
पुलकित तन अस्तुति अनुसारी॥
जय भगवंत अनंत अनामय।
अनघ अनेक एक करुनामय ॥१॥
Suni prabhu bachan haraṣi muni chārī,
pulakit tan astuti anusārī,
jay bhagavant anant anāmay,
anagh anek ek karunāmay. (1)
223 of 872
जय निर्गुन जय जय गुन सागर।
सुख मंदिर सुंदर अति नागर॥
जय इंदिरा रमन जय भूधर।
अनुपम अज अनादि सोभाकर ॥२॥
Jay nirgun jay jay gun sāgar,
sukh mandir sundar ati nāgar,
jay Indirā raman jay bhūdhar,
anupam aj anādi sobhākar. (2)
224 of 872
ग्यान निधान अमान मानप्रद।
पावन सुजस पुरान बेद बद॥
तग्य कृतग्य अग्यता भंजन।
नाम अनेक अनाम निरंजन ॥३॥
Gyān nidhān amān mānprad,
pāvan sujas purān bed bad,
tagya kṛtagya agyatā bhañjan,
nām anek anām nirañjan. (3)
225 of 872
सर्ब सर्बगत सर्ब उरालय।
बससि सदा हम कहुँ परिपालय॥
द्वंद बिपति भव फंद बिभंजय।
हृदि बसि राम काम मद गंजय ॥४॥
Sarb sarbagat sarb urālay,
basasi sadā ham kahuṅ paripālay,
dvaṅd bipati bhav phand bibhañjay,
hṛdi basi Rām kām mad gañjay. (4)
226 of 872
दो०—परमानंद कृपायतन मन परिपूरन काम।
प्रेम भगति अनपायनी देहु हमहि श्रीराम ॥३४॥
Do—Paramānand kṛpāyatan man paripūran kām,
prem bhagati anapāyanī dehu hamahi Shrīrām. (34)
227 of 872
देहु भगति रघुपति अति पावनि।
त्रिबिधि ताप भव दाप नसावनि॥
प्रनत काम सुरधेनु कलपतरु।
होइ प्रसन्न दीजै प्रभु यह बरु ॥१॥
Dehu bhagati Raghupati ati pāvani,
tribidhi tāp bhav dāp nasāvani,
pranat kām suradhenu kalapataru,
hoi prasanna dījai prabhu yah baru. (1)
228 of 872
भव बारिधि कुंभज रघुनायक।
सेवत सुलभ सकल सुख दायक॥
मन संभव दारुन दुख दारय।
दीनबंधु समता बिस्तारय ॥२॥
Bhav bāridhi kuṃbhaj Raghunāyak,
sevat sulabh sakal sukh dāyak,
man sambhav dārun dukh dāray,
dīnbandhu samatā bistāray. (2)
229 of 872
आस त्रास इरिषादि निवारक।
बिनय बिबेक बिरति बिस्तारक॥
भूप मौलि मनि मंडन धरनी।
देहि भगति संसृति सरि तरनी ॥३॥
Ās trās iriṣādi nivārak,
binay bibek birati bistārak,
bhūp mauli mani maṇḍan dharanī,
dehi bhagati sansṛti sari taranī. (3)
230 of 872
मुनि मन मानस हंस निरंतर।
चरन कमल बंदित अज संकर॥
रघुकुल केतु सेतु श्रुति रच्छक।
काल करम सुभाउ गुन भच्छक ॥४॥
Muni man mānas hans nirantar,
charan kamal bandit aj Saṅkar,
Raghukul ketu setu shruti rachchhak,
kāl karam subhāu gun bhachchhak. (4)
231 of 872
तारन तरन हरन सब दूषन।
तुलसिदास प्रभु त्रिभुवन भूषन ॥५॥
Tāran taran haran sab dūṣan,
Tulasīdās prabhu tribhuvan bhūṣan. (5)
232 of 872
दो०—बार बार अस्तुति करि प्रेम सहित सिरु नाइ।
ब्रह्म भवन सनकादि गे अति अभीष्ट बर पाइ ॥३५॥
Do—Bār bār astuti kari prem sahit siru nāi,
Brahma bhavan Sanakādi ge ati abhīṣṭ bar pāi. (35)
233 of 872
सनकादिक बिधि लोक सिधाए।
भ्रातन्ह राम चरन सिर नाए॥
पूछत प्रभुहि सकल सकुचाहीं।
चितवहिं सब मारुतसुत पाहीं ॥१॥
Sanakādik Bidhi lok sidhāe,
bhrātanh Rām charan sir nāe,
pūchhat prabhuhi sakal sakuchāhīṅ,
chitavahiṅ sab Mārutsut pāhīṅ. (1)
234 of 872
सुनी चहहिं प्रभु मुख कै बानी।
जो सुनि होइ सकल भ्रम हानी॥
अंतरजामी प्रभु सभ जाना।
बूझत कहहु काह हनुमाना ॥२॥
Sunī chahahiṅ prabhu mukh kai bānī,
jo suni hoi sakal bhram hānī,
antarjāmī prabhu sabh jānā,
būjhat kahahu kāh Hanumānā. (2)
235 of 872
जोरि पानि कह तब हनुमंता।
सुनहु दीनदयाल भगवंता॥
नाथ भरत कछु पूँछन चहहीं।
प्रस्न करत मन सकुचत अहहीं ॥३॥
Jori pāni kah tab Hanumantā,
sunahu Dīndayāl bhagavantā,
nāth Bharat kachhu pūṅchhan chahahīṅ,
prasna karat man sakuchat ahahīṅ. (3)
236 of 872
तुम्ह जानहु कपि मोर सुभाऊ।
भरतहि मोहि कछु अंतर काऊ॥
सुनि प्रभु बचन भरत गहे चरना।
सुनहु नाथ प्रनतारति हरना ॥४॥
Tumh jānahu kapi mor subhāū,
Bharatahi mohi kachhu antar kāū,
suni prabhu bachan Bharat gahe charanā,
sunahu nāth pranatārati haranā. (4)
237 of 872
दो०—नाथ न मोहि संदेह कछु सपनेहुँ सोक न मोह।
केवल कृपा तुम्हारिहि कृपानंद संदोह ॥३६॥
Do—Nāth na mohi sandeh kachhu sapanehuṅ sok na moh,
keval kṛpā tumhārihi kṛpānand sandoh. (36)
238 of 872
करउँ कृपानिधि एक ढिठाई।
मैं सेवक तुम्ह जन सुखदाई॥
संतन्ह कै महिमा रघुराई।
बहु बिधि बेद पुरानन्ह गाई ॥१॥
Karauṅ kṛpānidhi ek ḍhiṭhāī,
maiṅ sevak tumh jan sukhadāī,
santanh kai mahimā Raghurāī,
bahu bidhi bed purānanh gāī. (1)
239 of 872
श्रीमुख तुम्ह पुनि कीन्हि बड़ाई।
तिन्ह पर प्रभुहि प्रीति अधिकाई॥
सुना चहउँ प्रभु तिन्ह कर लच्छन।
कृपासिंधु गुन ग्यान बिचच्छन ॥२॥
Shrīmukh tumh puni kīnhi baḍāī,
tinh par prabhuhi prīti adhikāī,
sunā chahauṅ prabhu tinh kar lachchhan,
kṛpāsindhu gun gyān bichachchhan. (2)
240 of 872
संत असंत भेद बिलगाई।
प्रनतपाल मोहि कहहु बुझाई॥
संतन्ह के लच्छन सुनु भ्राता।
अगनित श्रुति पुरान बिख्याता ॥३॥
Sant asant bhed bilagāī,
pranatpāl mohi kahahu bujhāī,
santanh ke lachchhan sunu bhrātā,
aganit shruti purān bikhyātā. (3)
241 of 872
संत असंतन्हि कै असि करनी।
जिमि कुठार चंदन आचरनी॥
काटइ परसु मलय सुनु भाई।
निज गुन देइ सुगंध बसाई ॥४॥
Sant asantanhi kai asi karanī,
jimi kuṭhār chandan ācharanī,
kāṭai parasu malay sunu bhāī,
nij gun dei sugandh basāī. (4)
242 of 872
दो०—ताते सुर सीसन्ह चढ़त जग बल्लभ श्रीखंड।
अनल दाहि पीटत घनहिं परसु बदन यह दंड ॥३७॥
Do—Tāte sur sīsanh chaḍhat jag ballabh Shrīkhaṇḍ,
anal dāhi pīṭat ghanahiṅ parasu badan yah daṇḍ. (37)
243 of 872
बिषय अलंपट सील गुनाकर।
पर दुख दुख सुख सुख देखे पर॥
सम अभूतरिपु बिमद बिरागी।
लोभामरष हरष भय त्यागी ॥१॥
Biṣay alaṃpaṭ sīl gunākar,
par dukh dukh sukh sukh dekhe par,
sam abhūtaripu bimad birāgī,
lobhāmarṣ haraṣ bhay tyāgī. (1)
244 of 872
कोमलचित दीनन्ह पर दाया।
मन बच क्रम मम भगति अमाया॥
सबहि मानप्रद आपु अमानी।
भरत प्रान सम मम ते प्रानी ॥२॥
Komalchit dīnanh par dāyā,
man bach kram mam bhagati amāyā,
sabahi mānprad āpu amānī,
Bharat prān sam mam te prānī. (2)
245 of 872
बिगत काम मम नाम परायन।
सांति बिरति बिनती मुदितायन॥
सीतलता सरलता मयत्री।
द्विज पद प्रीति धर्म जनयत्री ॥३॥
Bigat kām mam nām parāyan,
sāṅti birati binatī muditāyan,
sītalatā saralatā mayatrī,
dvij pad prīti dharma janayatrī. (3)
246 of 872
ए सब लच्छन बसहिं जासु उर।
जानेहु तात संत संतत फुर॥
सम दम नियम नीति नहिं डोलहिं।
परुष बचन कबहूँ नहिं बोलहिं ॥४॥
E sab lachchhan basahiṅ jāsu ur,
jānehu tāt sant santat phur,
sam dam niyam nīti nahiṅ ḍolahiṅ,
paruṣ bachan kabahūṅ nahiṅ bolahiṅ. (4)
247 of 872
दो०—निंदा अस्तुति उभय सम ममता मम पद कंज।
ते सज्जन मम प्रानप्रिय गुन मंदिर सुखपुंज ॥३८॥
Do—Nindā astuti ubhay sam mamatā mam pad kañj,
te sajjan mam prānpriya gun mandir sukhapuñj. (38)
248 of 872
सुनहु असंतन्ह केर सुभाऊ।
भूलेहुँ संगति करिअ न काऊ॥
तिन्ह कर संग सदा दुखदाई।
जिमि कपिलहि घालइ हरहाई ॥१॥
Sunahu asantanh ker subhāū,
bhūlehuṅ saṅgati karia na kāū,
tinh kar saṅg sadā dukhadāī,
jimi kapilahi ghālai harahāī. (1)
249 of 872
खलन्ह हृदयँ अति ताप बिसेषी।
जरहिं सदा पर संपति देखी॥
जहँ कहुँ निंदा सुनहिं पराई।
हरषहिं मनहुँ परी निधि पाई ॥२॥
Khalanh hṛdayaṅ ati tāp biseṣī,
jarahiṅ sadā par sampati dekhī,
jahaṅ kahuṅ nindā sunahiṅ parāī,
haraṣahiṅ manahuṅ parī nidhi pāī. (2)
250 of 872
काम क्रोध मद लोभ परायन।
निर्दय कपटी कुटिल मलायन॥
बयरु अकारन सब काहू सों।
जो कर हित अनहित ताहू सों ॥३॥
Kām krodh mad lobh parāyan,
nirday kapaṭī kuṭil malāyan,
bayaru akāran sab kāhū soṅ,
jo kar hit anahit tāhū soṅ. (3)
251 of 872
झूठइ लेना झूठइ देना।
झूठइ भोजन झूठ चबेना॥
बोलहिं मधुर बचन जिमि मोरा।
खाइ महा अहि हृदय कठोरा ॥४॥
Jhūṭhai lenā jhūṭhai denā,
jhūṭhai bhojan jhūṭh chabenā,
bolahiṅ madhur bachan jimi morā,
khāi mahā ahi hṛday kaṭhorā. (4)
252 of 872
दो०—पर द्रोही पर दार रत पर धन पर अपबाद।
ते नर पाँवर पापमय देह धरें मनुजाद ॥३९॥
Do—Par drohī par dār rat par dhan par apabād,
te nar pāṅvar pāpamay deh dhareṅ manujād. (39)
253 of 872
लोभइ ओढ़न लोभइ डासन।
सिस्नोदर पर जमपुर त्रास न॥
काहू की जौं सुनहिं बड़ाई।
स्वास लेहिं जनु जूड़ी आई ॥१॥
Lobhai oḍhan lobhai ḍāsan,
sisnodar par jampur trās na,
kāhū kī jauṅ sunahiṅ baḍāī,
svās lehiṅ janu jūḍī āī. (1)
254 of 872
जब काहू कै देखहिं बिपती।
सुखी भए मानहुँ जग नृपती॥
स्वारथ रत परिवार बिरोधी।
लंपट काम लोभ अति क्रोधी ॥२॥
Jab kāhū kai dekhahiṅ bipatī,
sukhī bhae mānahuṅ jag nṛpatī,
svārath rat parivār birodhī,
laṃpaṭ kām lobh ati krodhī. (2)
255 of 872
मातु पिता गुर बिप्र न मानहिं।
आपु गए अरु घालहिं आनहिं॥
करहिं मोह बस द्रोह परावा।
संत संग हरि कथा न भावा ॥३॥
Mātu pitā gur bipra na mānahiṅ,
āpu gae aru ghālahiṅ ānahiṅ,
karahiṅ moh bas droh parāvā,
sant saṅg hari kathā na bhāvā. (3)
256 of 872
अवगुन सिंधु मंदमति कामी।
बेद बिदूषक परधन स्वामी॥
बिप्र द्रोह पर द्रोह बिसेषा।
दंभ कपट जियँ धरें सुबेषा ॥४॥
Avagun sindhu mandmati kāmī,
bed bidūṣak pardhan svāmī,
bipra droh par droh biseṣā,
daṃbh kapaṭ jiyaṅ dhareṅ subeṣā. (4)
257 of 872
दो०—ऐसे अधम मनुज खल कृतजुग त्रेताँ नाहिं।
द्वापर कछुक बृंद बहु होइहहिं कलिजुग माहिं ॥४०॥
Do—Aise adham manuj khal Kṛtajug Tretāṅ nāhiṅ,
Dvāpar kachhuk bṛnd bahu hoihahiṅ Kalijug māhiṅ. (40)
258 of 872
पर हित सरिस धर्म नहिं भाई।
पर पीड़ा सम नहिं अधमाई॥
निर्नय सकल पुरान बेद कर।
कहेउँ तात जानहिं कोबिद नर ॥१॥
Par hit saris dharma nahiṅ bhāī,
par pīḍā sam nahiṅ adhamāī,
nirnay sakal purān bed kar,
kaheuṅ tāt jānahiṅ kobid nar. (1)
259 of 872
नर सरीर धरि जे पर पीरा।
करहिं ते सहहिं महा भव भीरा॥
करहिं मोह बस नर अघ नाना।
स्वारथ रत परलोक नसाना ॥२॥
Nar sarīr dhari je par pīrā,
karahiṅ te sahahiṅ mahā bhav bhīrā,
karahiṅ moh bas nar agh nānā,
svārath rat paralok nasānā. (2)
260 of 872
कालरूप तिन्ह कहँ मैं भ्राता।
सुभ अरु असुभ कर्म फल दाता॥
अस बिचारि जे परम सयाने।
भजहिं मोहि संसृत दुख जाने ॥३॥
Kālrūp tinh kahaṅ maiṅ bhrātā,
subh aru asubh karma phal dātā,
as bichāri je param sayāne,
bhajahiṅ mohi sansṛt dukh jāne. (3)
261 of 872
त्यागहिं कर्म सुभासुभ दायक।
भजहिं मोहि सुर नर मुनि नायक॥
संत असंतन्ह के गुन भाषे।
ते न परहिं भव जिन्ह लखि राखे ॥४॥
Tyāgahiṅ karma subhāsubh dāyak,
bhajahiṅ mohi sur nar muni nāyak,
sant asantanh ke gun bhāṣe,
te na parahiṅ bhav jinh lakhi rākhe. (4)
262 of 872
दो०—सुनहु तात माया कृत गुन अरु दोष अनेक।
गुन यह उभय न देखिअहिं देखिअ सो अबिबेक ॥४१॥
Do—Sunahu tāt māyā kṛt gun aru doṣ anek,
gun yah ubhay na dekhiahiṅ dekhia so abibek. (41)
263 of 872
श्रीमुख बचन सुनत सब भाई।
हरषे प्रेम न हृदयँ समाई॥
करहिं बिनय अति बारहिं बारा।
हनूमान हियँ हरष अपारा ॥१॥
Shrīmukh bachan sunat sab bhāī,
haraṣe prem na hṛdayaṅ samāī,
karahiṅ binay ati bārahiṅ bārā,
Hanūmān hiyaṅ haraṣ apārā. (1)
264 of 872
पुनि रघुपति निज मंदिर गए।
एहि बिधि चरित करत नित नए॥
बार बार नारद मुनि आवहिं।
चरित पुनीत राम के गावहिं ॥२॥
Puni Raghupati nij mandir gae,
ehi bidhi charit karat nit nae,
bār bār Nārad muni āvahiṅ,
charit punīt Rām ke gāvahiṅ. (2)
265 of 872
नित नव चरित देखि मुनि जाहीं।
ब्रह्मलोक सब कथा कहाहीं॥
सुनि बिरंचि अतिसय सुख मानहिं।
पुनि पुनि तात करहु गुन गानहिं ॥३॥
Nit nav charit dekhi muni jāhīṅ,
Brahmalok sab kathā kahāhīṅ,
suni Birañchi atisay sukh mānahiṅ,
puni puni tāt karahu gun gānahiṅ. (3)
266 of 872
सनकादिक नारदहि सराहहिं।
जद्यपि ब्रह्म निरत मुनि आहहिं॥
सुनि गुन गान समाधि बिसारी।
सादर सुनहिं परम अधिकारी ॥४॥
Sanakādik Nāradahi sarāhahiṅ,
jadyapi brahma nirat muni āhahiṅ,
suni gun gān samādhi bisārī,
sādar sunahiṅ param adhikārī. (4)
267 of 872
दो०—जीवनमुक्त ब्रह्मपर चरित सुनहिं तजि ध्यान।
जे हरि कथाँ न करहिं रति तिन्ह के हिय पाषान ॥४२॥
Do—Jīvanmukt brahmapar charit sunahiṅ taji dhyān,
je hari kathāṅ na karahiṅ rati tinh ke hiy pāṣān. (42)
268 of 872
एक बार रघुनाथ बोलाए।
गुर द्विज पुरबासी सब आए॥
बैठे गुर मुनि अरु द्विज सज्जन।
बोले बचन भगत भव भंजन ॥१॥
Ek bār Raghunāth bolāe,
gur dvij purabāsī sab āe,
baiṭhe gur muni aru dvij sajjan,
bole bachan bhagat bhav bhañjan. (1)
269 of 872
सुनहु सकल पुरजन मम बानी।
कहउँ न कछु ममता उर आनी॥
नहिं अनीति नहिं कछु प्रभुताई।
सुनहु करहु जो तुम्हहि सोहाई ॥२॥
Sunahu sakal purajan mam bānī,
kahauṅ na kachhu mamatā ur ānī,
nahiṅ anīti nahiṅ kachhu prabhutāī,
sunahu karahu jo tumhahi sohāī. (2)
270 of 872
सोइ सेवक प्रियतम मम सोई।
मम अनुसासन मानै जोई॥
जौं अनीति कछु भाषौं भाई।
तौ मोहि बरजहु भय बिसराई ॥३॥
Soi sevak priyatam mam soī,
mam anusāsan mānai joī,
jauṅ anīti kachhu bhāṣauṅ bhāī,
tau mohi barajahu bhay bisarāī. (3)
271 of 872
बड़ें भाग मानुष तनु पावा।
सुर दुर्लभ सब ग्रंथन्हि गावा॥
साधन धाम मोच्छ कर द्वारा।
पाइ न जेहिं परलोक सँवारा ॥४॥
Baḍeṅ bhāg mānuṣ tanu pāvā,
sur durlabh sab granthanhi gāvā,
sādhan dhām mochchh kar dvārā,
pāi na jehiṅ paralok saṅvārā. (4)
272 of 872
दो०—सो परत्र दुख पावइ सिर धुनि धुनि पछिताइ।
कालहि कर्महि ईस्वरहि मिथ्या दोस लगाइ ॥४३॥
Do—So paratra dukh pāvai sir dhuni dhuni pachhitāi,
kālahi karmahi īsvarahi mithyā dos lagāi. (43)
273 of 872
एहि तन कर फल बिषय न भाई।
स्वर्गउ स्वल्प अंत दुखदाई॥
नर तनु पाइ बिषयँ मन देहीं।
पलटि सुधा ते सठ बिष लेहीं ॥१॥
Ehi tan kar phal biṣay na bhāī,
svargau svalp ant dukhadāī,
nar tanu pāi biṣayaṅ man dehīṅ,
palaṭi sudhā te saṭh biṣ lehīṅ. (1)
274 of 872
ताहि कबहुँ भल कहइ न कोई।
गुंजा ग्रहइ परस मनि खोई॥
आकर चारि लच्छ चौरासी।
जोनि भ्रमत यह जिव अबिनासी ॥२॥
Tāhi kabahuṅ bhal kahai na koī,
guñjā grahai paras mani khoī,
ākar chāri lachchh chaurāsī,
joni bhramat yah jiv abināsī. (2)
275 of 872
फिरत सदा माया कर प्रेरा।
काल कर्म सुभाव गुन घेरा॥
कबहुँक करि करुना नर देही।
देत ईस बिनु हेतु सनेही ॥३॥
Phirat sadā māyā kar prerā,
kāl karma subhāv gun gherā,
kabahuṅk kari karunā nar dehī,
det īs binu hetu sanehī. (3)
276 of 872
नर तनु भव बारिधि कहुँ बेरो।
सन्मुख मरुत अनुग्रह मेरो॥
करनधार सदगुर दृढ़ नावा।
दुर्लभ साज सुलभ करि पावा ॥४॥
Nar tanu bhav bāridhi kahuṅ bero,
sanmukh marut anugrah mero,
karanadhār sadgur dṛḍh nāvā,
durlabh sāj sulabh kari pāvā. (4)
277 of 872
दो०—जो न तरै भव सागर नर समाज अस पाइ।
सो कृत निंदक मंदमति आत्महन गति जाइ ॥४४॥
Do—Jo na tarai bhav sāgar nar samāj as pāi,
so kṛt nindak mandmati ātmahan gati jāi. (44)
278 of 872
जौं परलोक इहाँ सुख चहहू।
सुनि मम बचन हृदयँ दृढ़ गहहू॥
सुलभ सुखद मारग यह भाई।
भगति मोरि पुरान श्रुति गाई ॥१॥
Jauṅ paralok ihāṅ sukh chahahū,
suni mam bachan hṛdayaṅ dṛḍh gahahū,
sulabh sukhad mārag yah bhāī,
bhagati mori purān shruti gāī. (1)
279 of 872
ग्यान अगम प्रत्यूह अनेका।
साधन कठिन न मन कहुँ टेका॥
करत कष्ट बहु पावइ कोऊ।
भक्ति हीन मोहि प्रिय नहिं सोऊ ॥२॥
Gyān agam pratyūh anekā,
sādhan kaṭhin na man kahuṅ ṭekā,
karat kaṣṭ bahu pāvai koū,
bhakti hīn mohi priya nahiṅ soū. (2)
280 of 872
भक्ति सुतंत्र सकल सुख खानी।
बिनु सतसंग न पावहिं प्रानी॥
पुन्य पुंज बिनु मिलहिं न संता।
सतसंगति संसृति कर अंता ॥३॥
Bhakti sutantra sakal sukh khānī,
binu satsaṅg na pāvahiṅ prānī,
punya puñj binu milahiṅ na santā,
satsaṅgati sansṛti kar antā. (3)
281 of 872
पुन्य एक जग महुँ नहिं दूजा।
मन क्रम बचन बिप्र पद पूजा॥
सानुकूल तेहि पर मुनि देवा।
जो तजि कपटु करइ द्विज सेवा ॥४॥
Punya ek jag mahuṅ nahiṅ dūjā,
man kram bachan bipra pad pūjā,
sānukūl tehi par muni devā,
jo taji kapaṭu karai dvij sevā. (4)
282 of 872
दो०—औरउ एक गुपुत मत सबहि कहउँ कर जोरि।
संकर भजन बिना नर भगति न पावइ मोरि ॥४५॥
Do—Aurau ek gupt mat sabahi kahauṅ kar jori,
Saṅkar bhajan binā nar bhagati na pāvai mori. (45)
283 of 872
कहहु भगति पथ कवन प्रयासा।
जोग न मख जप तप उपवासा॥
सरल सुभाव न मन कुटिलाई।
जथा लाभ संतोष सदाई ॥१॥
Kahahu bhagati path kavan prayāsā,
jog na makh jap tap upavāsā,
saral subhāv na man kuṭilāī,
jathā lābh santoṣ sadāī. (1)
284 of 872
मोर दास कहाइ नर आसा।
करइ तौ कहहु कहा बिस्वासा॥
बहुत कहउँ का कथा बढ़ाई।
एहि आचरन बस्य मैं भाई ॥२॥
Mor dās kahāi nar āsā,
karai tau kahahu kahā bisvāsā,
bahut kahauṅ kā kathā baḍhāī,
ehi ācharan basya maiṅ bhāī. (2)
285 of 872
बैर न बिग्रह आस न त्रासा।
सुखमय ताहि सदा सब आसा॥
अनारंभ अनिकेत अमानी।
अनघ अरोष दच्छ बिग्यानी ॥३॥
Bair na bigrah ās na trāsā,
sukhamay tāhi sadā sab āsā,
anārambh aniket amānī,
anagh aroṣ dachchh bigyānī. (3)
286 of 872
प्रीति सदा सज्जन संसर्गा।
तृन सम बिषय स्वर्ग अपबर्गा॥
भगति पच्छ हठ नहिं सठताई।
दुष्ट तर्क सब दूरि बहाई ॥४॥
Prīti sadā sajjan sansargā,
tṛn sam biṣay svarg apabargā,
bhagati pachchh haṭh nahiṅ saṭhatāī,
duṣṭ tark sab dūri bahāī. (4)
287 of 872
दो०—मम गुन ग्राम नाम रत गत ममता मद मोह।
ता कर सुख सोइ जानइ परानंद संदोह ॥४६॥
Do—Mam gun grām nām rat gat mamatā mad moh,
tā kar sukh soi jānai parānand sandoh. (46)
288 of 872
सुनत सुधासम बचन राम के।
गहे सबनि पद कृपाधाम के॥
जननि जनक गुर बंधु हमारे।
कृपा निधान प्रान ते प्यारे ॥१॥
Sunat sudhāsam bachan Rām ke,
gahe sabani pad kṛpādhām ke,
janani janak gur bandhu hamāre,
kṛpā nidhān prān te pyāre. (1)
289 of 872
तनु धनु धाम राम हितकारी।
सब बिधि तुम्ह प्रनतारति हारी॥
असि सिख तुम्ह बिनु देइ न कोऊ।
मातु पिता स्वारथ रत ओऊ ॥२॥
Tanu dhanu dhām Rām hitakārī,
sab bidhi tumh pranatārati hārī,
asi sikh tumh binu dei na koū,
mātu pitā svārath rat oū. (2)
290 of 872
हेतु रहित जग जुग उपकारी।
तुम्ह तुम्हार सेवक असुरारी॥
स्वारथ मीत सकल जग माहीं।
सपनेहुँ प्रभु परमारथ नाहीं ॥३॥
Hetu rahit jag jug upakārī,
tumh tumhār sevak asurārī,
svārath mīt sakal jag māhīṅ,
sapanehuṅ prabhu paramārath nāhīṅ. (3)
291 of 872
सब के बचन प्रेम रस साने।
सुनि रघुनाथ हृदयँ हरषाने॥
निज निज गृह गए आयसु पाई।
बरनत प्रभु बतकही सुहाई ॥४॥
Sab ke bachan prem ras sāne,
suni Raghunāth hṛdayaṅ haraṣāne,
nij nij gṛh gae āyasu pāī,
baranat prabhu batakahī suhāī. (4)
292 of 872
दो०—उमा अवधबासी नर नारि कृतारथ रूप।
ब्रह्म सच्चिदानंद घन रघुनायक जहँ भूप ॥४७॥
Do—Umā Avadhabāsī nar nāri kṛtārath rūp,
brahma sachchidānand ghan Raghunāyak jahaṅ bhūp. (47)
293 of 872
एक बार बसिष्ठ मुनि आए।
जहाँ राम सुखधाम सुहाए॥
अति आदर रघुनायक कीन्हा।
पद पखारि पादोदक लीन्हा ॥१॥
Ek bār Basiṣṭh muni āe,
jahāṅ Rām sukhadhām suhāe,
ati ādar Raghunāyak kīnhā,
pad pakhāri pādodak līnhā. (1)
294 of 872
राम सुनहु मुनि कह कर जोरी।
कृपासिंधु बिनती कछु मोरी॥
देखि देखि आचरन तुम्हारा।
होत मोह मम हृदयँ अपारा ॥२॥
Rām sunahu muni kah kar jorī,
kṛpāsindhu binatī kachhu morī,
dekhi dekhi ācharan tumhārā,
hot moh mam hṛdayaṅ apārā. (2)
295 of 872
महिमा अमिति बेद नहिं जाना।
मैं केहि भाँति कहउँ भगवाना॥
उपरोहित्य कर्म अति मंदा।
बेद पुरान सुमृति कर निंदा ॥३॥
Mahimā amiti bed nahiṅ jānā,
maiṅ kehi bhāṅti kahauṅ bhagavānā,
uparohitya karma ati mandā,
bed purān sumṛti kar nindā. (3)
296 of 872
जब न लेउँ मैं तब बिधि मोही।
कहा लाभ आगें सुत तोही॥
परमातमा ब्रह्म नर रूपा।
होइहि रघुकुल भूषन भूपा ॥४॥
Jab na leuṅ maiṅ tab Bidhi mohī,
kahā lābh āgeṅ sut tohī,
Paramātamā brahma nar rūpā,
hoihi Raghukul bhūṣan bhūpā. (4)
297 of 872
दो०—तब मैं हृदयँ बिचारा जोग जग्य ब्रत दान।
जा कहुँ करिअ सो पैहउँ धर्म न एहि सम आन ॥४८॥
Do—Tab maiṅ hṛdayaṅ bichārā jog jagya brat dān,
jā kahuṅ karia so paihauṅ dharma na ehi sam ān. (48)
298 of 872
जप तप नियम जोग निज धर्मा।
श्रुति संभव नाना सुभ कर्मा॥
ग्यान दया दम तीरथ मज्जन।
जहँ लगि धर्म कहत श्रुति सज्जन ॥१॥
Jap tap niyam jog nij dharmā,
shruti sambhav nānā subh karmā,
gyān dayā dam tīrath majjan,
jahaṅ lagi dharma kahat shruti sajjan. (1)
299 of 872
आगम निगम पुरान अनेका।
पढ़े सुने कर फल प्रभु एका॥
तव पद पंकज प्रीति निरंतर।
सब साधन कर यह फल सुंदर ॥२॥
Āgam nigam purān anekā,
paḍhe sune kar phal prabhu ekā,
tav pad paṅkaj prīti nirantar,
sab sādhan kar yah phal sundar. (2)
300 of 872
छूटइ मल कि मलहि के धोएँ।
घृत कि पाव कोइ बारि बिलोएँ॥
प्रेम भगति जल बिनु रघुराई।
अभिअंतर मल कबहुँ न जाई ॥३॥
Chhūṭai mal ki malahi ke dhoeṅ,
ghṛt ki pāv koi bāri biloeṅ,
prem bhagati jal binu Raghurāī,
abhiantar mal kabahuṅ na jāī. (3)
301 of 872
सोइ सर्बग्य तग्य सोइ पंडित।
सोइ गुन गृह बिग्यान अखंडित॥
दच्छ सकल लच्छन जुत सोई।
जाकें पद सरोज रति होई ॥४॥
Soi sarbagya tagya soi paṇḍit,
soi gun gṛh bigyān akhaṇḍit,
dachchh sakal lachchhan jut soī,
jākeṅ pad saroj rati hoī. (4)
302 of 872
दो०—नाथ एक बर मागउँ राम कृपा करि देहु।
जन्म जन्म प्रभु पद कमल कबहुँ घटै जनि नेहु ॥४९॥
Do—Nāth ek bar māgauṅ Rām kṛpā kari dehu,
janma janma prabhu pad kamal kabahuṅ ghaṭai jani nehu. (49)
303 of 872
अस कहि मुनि बसिष्ठ गृह आए।
कृपासिंधु के मन अति भाए॥
हनूमान भरतादिक भ्राता।
संग लिए सेवक सुखदाता ॥१॥
As kahi muni Basiṣṭh gṛh āe,
kṛpāsindhu ke man ati bhāe,
Hanūmān Bharatādik bhrātā,
saṅg lie sevak sukhadātā. (1)
304 of 872
पुनि कृपाल पुर बाहेर गए।
गज रथ तुरग मगावत भए॥
देखि कृपा करि सकल सराहे।
दिए उचित जिन्ह जिन्ह तेइ चाहे ॥२॥
Puni kṛpāl pur bāher gae,
gaj rath turag magāvat bhae,
dekhi kṛpā kari sakal sarāhe,
die uchit jinh jinh tei chāhe. (2)
305 of 872
हरन सकल श्रम प्रभु श्रम पाई।
गए जहाँ सीतल अवँराई॥
भरत दीन्ह निज बसन डसाई।
बैठे प्रभु सेवहिं सब भाई ॥३॥
Haran sakal shram prabhu shram pāī,
gae jahāṅ sītal avaṅrāī,
Bharat dīnh nij basan ḍasāī,
baiṭhe prabhu sevahiṅ sab bhāī. (3)
306 of 872
मारुतसुत तब मारुत करई।
पुलक बपुष लोचन जल भरई॥
हनूमान सम नहिं बड़भागी।
नहिं कोउ राम चरन अनुरागी॥
गिरिजा जासु प्रीति सेवकाई।
बार बार प्रभु निज मुख गाई॥
४-५॥
Mārutsut tab mārut karaī,
pulak bapuṣ lochan jal bharaī,
Hanūmān sam nahiṅ baḍbhāgī,
nahiṅ kou Rām charan anurāgī,
Girijā jāsu prīti sevakāī,
bār bār prabhu nij mukh gāī. (4-5)
307 of 872
दो०—तेहिं अवसर मुनि नारद आए करतल बीन।
गावन लगे राम कल कीरति सदा नबीन ॥५०॥
Do—Tehiṅ avasar muni Nārad āe karatal bīn,
gāvan lage Rām kal kīrati sadā nabīn. (50)
308 of 872
मामवलोकय पंकज लोचन।
कृपा बिलोकनि सोच बिमोचन॥
नील तामरस स्याम काम अरि।
हृदय कंज मकरंद मधुप हरि ॥१॥
Māmavalokaya paṅkaj lochan,
kṛpā bilokani soch bimochan,
nīl tāmaras syām kām ari,
hṛday kañj makarand madhup hari. (1)
309 of 872
जातुधान बरूथ बल भंजन।
मुनि सज्जन रंजन अघ गंजन॥
भूसुर ससि नव बृंद बलाहक।
असरन सरन दीन जन गाहक ॥२॥
Jātudhān barūth bal bhañjan,
muni sajjan rañjan agh gañjan,
bhūsur sasi nav bṛnd balāhak,
asaran saran dīn jan gāhak. (2)
310 of 872
भुज बल बिपुल भार महि खंडित।
खर दूषन बिराध बध पंडित॥
रावनारि सुखरूप भूपबर।
जय दसरथ कुल कुमुद सुधाकर ॥३॥
Bhuj bal bipul bhār mahi khaṇḍit,
Khar Dūṣan Birādh badh paṇḍit,
Rāvanāri sukharūp bhūpbar,
jay Dasarath kul kumud sudhākar. (3)
311 of 872
सुजस पुरान बिदित निगमागम।
गावत सुर मुनि संत समागम॥
कारुनीक ब्यलीक मद खंडन।
सब बिधि कुसल कोसला मंडन ॥४॥
Sujas purān bidit nigamāgam,
gāvat sur muni sant samāgam,
kārunīk byalīk mad khaṇḍan,
sab bidhi kusal Kosalā maṇḍan. (4)
312 of 872
कलि मल मथन नाम ममताहन।
तुलसिदास प्रभु पाहि प्रनत जन ॥५॥
Kali mal mathan nām mamatāhan,
Tulasīdās prabhu pāhi pranat jan. (5)
313 of 872
दो०—प्रेम सहित मुनि नारद बरनि राम गुन ग्राम।
सोभासिंधु हृदयँ धरि गए जहाँ बिधि धाम ॥५१॥
Do—Prem sahit muni Nārad barani Rām gun grām,
sobhāsindhu hṛdayaṅ dhari gae jahāṅ Bidhi dhām. (51)
314 of 872
गिरिजा सुनहु बिसद यह कथा।
मैं सब कही मोरि मति जथा॥
राम चरित सत कोटि अपारा।
श्रुति सारदा न बरनै पारा ॥१॥
Girijā sunahu bisad yah kathā,
maiṅ sab kahī mori mati jathā,
Rām charit sat koṭi apārā,
shruti Sāradā na baranai pārā. (1)
315 of 872
राम अनंत अनंत गुनानी।
जन्म कर्म अनंत नामानी॥
जल सीकर महि रज गनि जाहीं।
रघुपति चरित न बरनि सिराहीं ॥२॥
Rām anant anant gunānī,
janma karma anant nāmānī,
jal sīkar mahi raj gani jāhīṅ,
Raghupati charit na barani sirāhīṅ. (2)
316 of 872
बिमल कथा हरि पद दायनी।
भगति होइ सुनि अनपायनी॥
उमा कहिउँ सब कथा सुहाई।
जो भुसुंडि खगपतिहि सुनाई ॥३॥
Bimal kathā hari pad dāyanī,
bhagati hoi suni anapāyanī,
Umā kahiuṅ sab kathā suhāī,
jo Bhusuṇḍi khagapatihi sunāī. (3)
317 of 872
कछुक राम गुन कहेउँ बखानी।
अब का कहौं सो कहहु भवानी॥
सुनि सुभ कथा उमा हरषानी।
बोली अति बिनीत मृदु बानी ॥४॥
Kachhuk Rām gun kaheuṅ bakhānī,
ab kā kahauṅ so kahahu Bhavānī,
suni subh kathā Umā haraṣānī,
bolī ati binīt mṛdu bānī. (4)
318 of 872
धन्य धन्य मैं धन्य पुरारी।
सुनेउँ राम गुन भव भय हारी ॥५॥
Dhanya dhanya maiṅ dhanya Purārī,
suneuṅ Rām gun bhav bhay hārī. (5)
319 of 872
दो०—तुम्हरी कृपाँ कृपायतन अब कृतकृत्य न मोह।
जानेउँ राम प्रताप प्रभु चिदानंद संदोह ॥५२(क)॥
Do—Tumharī kṛpāṅ kṛpāyatan ab kṛtakṛtya na moh,
jāneuṅ Rām pratāp prabhu chidānand sandoh. (52a)
320 of 872
नाथ तवानन ससि स्रवत कथा सुधा रघुबीर।
श्रवन पुटन्हि मन पान करि नहिं अघात मतिधीर ॥५२(ख)॥
Nāth tavānan sasi sravat kathā sudhā Raghubīr,
sravan puṭanhi man pān kari nahiṅ aghāt matidhīr. (52b)
321 of 872
राम चरित जे सुनत अघाहीं।
रस बिसेष जाना तिन्ह नाहीं॥
जीवनमुक्त महामुनि जेऊ।
हरि गुन सुनहिं निरंतर तेऊ ॥१॥
Rām charit je sunat aghāhīṅ,
ras biseṣ jānā tinh nāhīṅ.
Jīvanmukta mahāmuni jeū,
Hari gun sunahiṅ nirantar teū. (1)
322 of 872
भव सागर चह पार जो पावा।
राम कथा ता कहँ दृढ़ नावा॥
बिषइन्ह कहँ पुनि हरि गुन ग्रामा।
श्रवन सुखद अरु मन अभिरामा ॥२॥
Bhav sāgar chah pār jo pāvā,
Rām kathā tā kahaṅ dṛḍh nāvā.
Biṣainh kahaṅ puni Hari gun grāmā,
shravan sukhad aru man abhirāmā. (2)
323 of 872
श्रवनवंत अस को जग माहीं।
जाहि न रघुपति चरित सोहाहीं॥
ते जड़ जीव निजात्मक घाती।
जिन्हहि न रघुपति कथा सोहाती ॥३॥
Shravanvant as ko jag māhīṅ,
jāhi na Raghupati charit sohāhīṅ.
Te jaḍ jīv nijātmak ghātī,
jinhahi na Raghupati kathā sohātī. (3)
324 of 872
हरिचरित्र मानस तुम्ह गावा।
सुनि मैं नाथ अमिति सुख पावा॥
तुम्ह जो कही यह कथा सुहाई।
कागभसुंडि गरुड़ प्रति गाई ॥४॥
Haricharitra Mānas tumh gāvā,
suni maiṅ Nāth amiti sukh pāvā.
Tumh jo kahī yah kathā suhāī,
Kāgabhasuṇḍi Garuḍ prati gāī. (4)
325 of 872
दो०—बिरति ग्यान बिग्यान दृढ़ राम चरन अति नेह।
बायस तन रघुपति भगति मोहि परम संदेह ॥५३॥
Do—Birati gyān bigyān dṛḍh Rām charan ati neh,
bāyas tan Raghupati bhagati mohi param sandeh. (53)
326 of 872
नर सहस्त्र महँ सुनहु पुरारी।
कोउ एक होइ धर्म ब्रतधारी॥
धर्मसील कोटिक महँ कोई।
बिषय बिमुख बिराग रत होई ॥१॥
Nar sahastra mahaṅ sunahu Purārī,
kou ek hoi dharma bratadhārī.
Dharmasīl koṭik mahaṅ koī,
biṣay bimukh birāg rat hoī. (1)
327 of 872
कोटि बिरक्त मध्य श्रुति कहई।
सम्यक ग्यान सकृत कोउ लहई॥
ग्यानवंत कोटिक महँ कोऊ।
जीवनमुक्त सकृत जग सोऊ ॥२॥
Koṭi birakta madhya shruti kahaī,
samyak gyān sakṛt kou lahaī.
Gyānvant koṭik mahaṅ koū,
jīvanmukta sakṛt jag soū. (2)
328 of 872
तिन्ह सहस्त्र महुँ सब सुख खानी।
दुर्लभ ब्रह्म लीन बिग्यानी॥
धर्मसील बिरक्त अरु ग्यानी।
जीवनमुक्त ब्रह्मपर प्रानी ॥३॥
Tinh sahastra mahuṅ sab sukh khānī,
durlabh Brahma līn bigyānī.
Dharmasīl birakta aru gyānī,
jīvanmukta brahmapar prānī. (3)
329 of 872
सब ते सो दुर्लभ सुरराया।
राम भगति रत गत मद माया॥
सो हरिभगति काग किमि पाई।
बिस्वनाथ मोहि कहहु बुझाई ॥४॥
Sab te so durlabh Surarāyā,
Rām bhagati rat gat mad māyā.
So haribhagati kāg kimi pāī,
Bisvanāth mohi kahahu bujhāī. (4)
330 of 872
दो०—राम परायन ग्यान रत गुनागार मति धीर।
नाथ कहहु केहि कारन पायउ काक सरीर ॥५४॥
Do—Rām parāyan gyān rat gunāgār mati dhīr,
Nāth kahahu kehi kāran pāyau kāk sarīr. (54)
331 of 872
यह प्रभु चरित पवित्र सुहावा।
कहहु कृपाल काग कहँ पावा॥
तुम्ह केहि भाँति सुना मदनारी।
कहहु मोहि अति कौतुक भारी ॥१॥
Yah prabhu charit pavitra suhāvā,
kahahu kṛpāl kāg kahaṅ pāvā.
Tumh kehi bhāṅti sunā Madanārī,
kahahu mohi ati kautuk bhārī. (1)
332 of 872
गरुड़ महाग्यानी गुन रासी।
हरि सेवक अति निकट निवासी॥
तेहिं केहि हेतु काग सन जाई।
सुनी कथा मुनि निकर बिहाई ॥२॥
Garuḍ mahāgyānī gun rāsī,
Hari sevak ati nikaṭ nivāsī.
Tehiṅ kehi hetu kāg san jāī,
sunī kathā muni nikar bihāī. (2)
333 of 872
कहहु कवन बिधि भा संबादा।
दोउ हरिभगत काग उरगादा॥
गौरि गिरा सुनि सरल सुहाई।
बोले सिव सादर सुख पाई ॥३॥
Kahahu kavan bidhi bhā sambādā,
dou haribhagat kāg uragādā.
Gauri girā suni saral suhāī,
bole Siv sādar sukh pāī. (3)
334 of 872
धन्य सती पावन मति तोरी।
रघुपति चरन प्रीति नहिं थोरी॥
सुनहु परम पुनीत इतिहासा।
जो सुनि सकल लोक भ्रम नासा ॥४॥
Dhanya Satī pāvan mati torī,
Raghupati charan prīti nahiṅ thorī.
Sunahu param punīt itihāsā,
jo suni sakal lok bhram nāsā. (4)
335 of 872
उपजइ राम चरन बिस्वासा।
भव निधि तर नर बिनहिं प्रयासा ॥५॥
Upajai Rām charan bisvāsā,
bhav nidhi tar nar binahiṅ prayāsā. (5)
336 of 872
दो०—ऐसिअ प्रस्न बिहंगपति कीन्हि काग सन जाइ।
सो सब सादर कहिहउँ सुनहु उमा मन लाइ ॥५५॥
Do—Aisia prasna bihangapati kīnhi kāg san jāi,
so sab sādar kahihauṅ sunahu Umā man lāi. (55)
337 of 872
मैं जिमि कथा सुनी भव मोचनि।
सो प्रसंग सुनु सुमुखि सुलोचनि॥
प्रथम दच्छ गृह तव अवतारा।
सती नाम तब रहा तुम्हारा ॥१॥
Maiṅ jimi kathā sunī bhav mochani,
so prasang sunu sumukhi sulochani.
Pratham Dachchha gṛh tav avatārā,
Satī nām tab rahā tumhārā. (1)
338 of 872
दच्छ जग्य तव भा अपमाना।
तुम्ह अति क्रोध तजे तब प्राना॥
मम अनुचरन्ह कीन्ह मख भंगा।
जानहु तुम्ह सो सकल प्रसंगा ॥२॥
Dachchha jagya tav bhā apamānā,
tumh ati krodh taje tab prānā.
Mam anucharanh kīnh makh bhangā,
jānahu tumh so sakal prasangā. (2)
339 of 872
तब अति सोच भयउ मन मोरें।
दुखी भयउँ बियोग प्रिय तोरें॥
सुंदर बन गिरि सरित तड़ागा।
कौतुक देखत फिरउँ बेरागा ॥३॥
Tab ati soch bhayau man moreṅ,
dukhī bhayauṅ biyog priya toreṅ.
Sundar ban giri sarit taḍāgā,
kautuk dekhat phirauṅ berāgā. (3)
340 of 872
गिरि सुमेर उत्तर दिसि दूरी।
नील सैल एक सुंदर भूरी॥
तासु कनकमय सिखर सुहाए।
चारि चारु मोरे मन भाए ॥४॥
Giri Sumer uttar disi dūrī,
nīl sail ek sundar bhūrī.
Tāsu kanakamay sikhar suhāe,
chāri chāru more man bhāe. (4)
341 of 872
तिन्ह पर एक एक बिटप बिसाला।
बट पीपर पाकरी रसाला॥
सैलोपरि सर सुंदर सोहा।
मनि सोपान देखि मन मोहा ॥५॥
Tinh par ek ek biṭap bisālā,
baṭ pīpar pākarī rasālā.
Sailopari sar sundar sohā,
mani sopān dekhi man mohā. (5)
342 of 872
दो०—सीतल अमल मधुर जल जलज बिपुल बहुरंग।
कूजत कल रव हंस गन गुंजत मंजुल भृंग ॥५६॥
Do—Sītal amal madhur jal jalaj bipul bahurang,
kūjat kal rav hans gan gunjat manjul bhṛng. (56)
343 of 872
तेहिं गिरि रुचिर बसइ खग सोई।
तासु नास कल्पांत न होई॥
माया कृत गुन दोष अनेका।
मोह मनोज आदि अबिबेका ॥१॥
Tehiṅ giri ruchir basai khag soī,
tāsu nās kalpānt na hoī.
Māyā kṛt gun doṣ anekā,
moh manoj ādi abibekā. (1)
344 of 872
रहे ब्यापि समस्त जग माहीं।
तेहि गिरि निकट कबहुँ नहिं जाहीं॥
तहँ बसि हरिहि भजइ जिमि कागा।
सो सुनु उमा सहित अनुरागा ॥२॥
Rahe byāpi samasta jag māhīṅ,
tehi giri nikaṭ kabahuṅ nahiṅ jāhīṅ.
Tahaṅ basi harihi bhajai jimi kāgā,
so sunu Umā sahit anurāgā. (2)
345 of 872
पीपर तरु तर ध्यान सो धरई।
जाप जग्य पाकरि तर करई॥
आँब छाँह कर मानस पूजा।
तजि हरि भजनु काजु नहिं दूजा ॥३॥
Pīpar taru tar dhyān so dharaī,
jāp jagya pākari tar karaī.
Āṅb chhāṅh kar mānas pūjā,
taji Hari bhajanu kāju nahiṅ dūjā. (3)
346 of 872
बर तर कह हरि कथा प्रसंगा।
आवहिं सुनहिं अनेक बिहंगा॥
राम चरित बिचित्र बिधि नाना।
प्रेम सहित कर सादर गाना ॥४॥
Bar tar kah Hari kathā prasangā,
āvahiṅ sunahiṅ anek bihangā.
Rām charit bichitra bidhi nānā,
prem sahit kar sādar gānā. (4)
347 of 872
सुनहिं सकल मति बिमल मराला।
बसहिं निरंतर जे तेहिं ताला॥
जब मैं जाइ सो कौतुक देखा।
उर उपजा आनंद बिसेषा ॥५॥
Sunahiṅ sakal mati bimal marālā,
basahiṅ nirantar je tehiṅ tālā.
Jab maiṅ jāi so kautuk dekhā,
ur upajā ānand biseṣā. (5)
348 of 872
दो०—तब कछु काल मराल तनु धरि तहँ कीन्ह निवास।
सादर सुनि रघुपति गुन पुनि आयउँ कैलास ॥५७॥
Do—Tab kachhu kāl marāl tanu dhari tahaṅ kīnh nivās,
sādar suni Raghupati gun puni āyauṅ Kailās. (57)
349 of 872
गिरिजा कहेउँ सो सब इतिहासा।
मैं जेहि समय गयउँ खग पासा॥
अब सो कथा सुनहु जेहि हेतू।
गयउ काग पहिं खग कुल केतू ॥१॥
Girijā kaheuṅ so sab itihāsā,
maiṅ jehi samay gayauṅ khag pāsā.
Ab so kathā sunahu jehi hetū,
gayau kāg pahiṅ khag kul ketū. (1)
350 of 872
जब रघुनाथ कीन्हि रन क्रीड़ा।
समुझत चरित होति मोहि ब्रीड़ा॥
इंद्रजीत कर आपु बँधायो।
तब नारद मुनि गरुड़ पठायो ॥२॥
Jab Raghunāth kīnhi ran krīḍā,
samujhat charit hoti mohi brīḍā.
Indrajīt kar āpu baṅdhāyo,
tab Nārad muni Garuḍ paṭhāyo. (2)
351 of 872
बंधन काटि गयो उरगादा।
उपजा हृदयँ प्रचंड बिषादा॥
प्रभु बंधन समुझत बहु भाँती।
करत बिचार उरग आराती ॥३॥
Bandhan kāṭi gayo uragādā,
upajā hṛdayaṅ prachaṇḍ biṣādā.
Prabhu bandhan samujhat bahu bhāṅtī,
karat bichār urag ārātī. (3)
352 of 872
ब्यापक ब्रह्म बिरज बागीसा।
माया मोह पार परमीसा॥
सो अवतार सुनेउँ जग माहीं।
देखेउँ सो प्रभाव कछु नाहीं ॥४॥
Byāpak Brahma biraj bāgīsā,
māyā moh pār paramīsā.
So avatār suneuṅ jag māhīṅ,
dekheuṅ so prabhāv kachhu nāhīṅ. (4)
353 of 872
दो०—भव बंधन ते छूटहिं नर जपि जा कर नाम।
खर्ब निसाचर बाँधेउ नागपास सोइ राम ॥५८॥
Do—Bhav bandhan te chhūṭahiṅ nar japi jā kar nām,
kharba nisāchar bāṅdheu nāgapās soi Rām. (58)
354 of 872
नाना भाँति मनहि समुझावा।
प्रगट न ग्यान हृदयँ भ्रम छावा॥
खेद खिन्न मन तर्क बढ़ाई।
भयउ मोहबस तुम्हरिहिं नाई ॥१॥
Nānā bhāṅti manahi samujhāvā,
pragaṭ na gyān hṛdayaṅ bhram chhāvā.
Khed khinna man tarka baḍhāī,
bhayau mohabas tumharihiṅ nāī. (1)
355 of 872
ब्याकुल गयउ देवरिषि पाहीं।
कहेसि जो संसय निज मन माहीं॥
सुनि नारदहि लागि अति दाया।
सुनु खग प्रबल राम कै माया ॥२॥
Byākul gayau devariṣi pāhīṅ,
kahesi jo sansay nij man māhīṅ.
Suni Nāradahi lāgi ati dāyā,
sunu khag prabal Rām kai māyā. (2)
356 of 872
जो ग्यानिन्ह कर चित अपहरई।
बरिआईं बिमोह मन करई॥
जेहिं बहु बार नचावा मोही।
सोइ ब्यापी बिहंगपति तोही ॥३॥
Jo gyāninh kar chit apaharaī,
bariāīṅ bimoh man karaī.
Jehiṅ bahu bār nachāvā mohī,
soi byāpī bihangapati tohī. (3)
357 of 872
महामोह उपजा उर तोरें।
मिटिहि न बेगि कहें खग मोरें॥
चतुरानन पहिं जाहु खगेसा।
सोइ करेहु जेहि होइ निदेसा ॥४॥
Mahāmoh upajā ur toreṅ,
miṭihi na begi kaheṅ khag moreṅ.
Chaturānan pahiṅ jāhu khagesā,
soi karehu jehi hoi nidesā. (4)
358 of 872
दो०—अस कहि चले देवरिषि करत राम गुन गान।
हरि माया बल बरनत पुनि पुनि परम सुजान ॥५९॥
Do—As kahi chale devariṣi karat Rām gun gān,
Hari māyā bal baranat puni puni param sujān. (59)
359 of 872
तब खगपति बिरंचि पहिं गयऊ।
निज संदेह सुनावत भयऊ॥
सुनि बिरंचि रामहि सिरु नावा।
समुझि प्रताप प्रेम अति छावा ॥१॥
Tab khagapati Biranchi pahiṅ gayaū,
nij sandeh sunāvat bhayaū.
Suni Biranchi Rāmahi siru nāvā,
samujhi pratāp prem ati chhāvā. (1)
360 of 872
मन महुँ करइ बिचार बिधाता।
माया बस कबि कोबिद ग्याता॥
हरि माया कर अमिति प्रभावा।
बिपुल बार जेहिं मोहि नचावा ॥२॥
Man mahuṅ karai bichār Bidhātā,
māyā bas kabi kobid gyātā.
Hari māyā kar amiti prabhāvā,
bipul bār jehiṅ mohi nachāvā. (2)
361 of 872
अग जगमय जग मम उपराजा।
नहिं आचरज मोह खगराजा॥
तब बोले बिधि गिरा सुहाई।
जान महेस राम प्रभुताई ॥३॥
Ag jagamay jag mam uparājā,
nahiṅ ācharaj moh khagarājā.
Tab bole Bidhi girā suhāī,
jān Mahes Rām prabhutāī. (3)
362 of 872
बैनतेय संकर पहिं जाहू।
तात अनत पूछहु जनि काहू॥
तहँ होइहि तव संसय हानी।
चलेउ बिहंग सुनत बिधि बानी ॥४॥
Bainatey Saṅkar pahiṅ jāhū,
tāt anat pūchhahu jani kāhū.
Tahaṅ hoihi tav sansay hānī,
chaleu bihang sunat Bidhi bānī. (4)
363 of 872
दो०—परमातुर बिहंगपति आयउ तब मो पास।
जात रहेउँ कुबेर गृह रहिहु उमा कैलास ॥६०॥
Do—Paramātur bihangapati āyau tab mo pās,
jāt raheuṅ Kuber gṛh rahihu Umā Kailās. (60)
364 of 872
तेहिं मम पद सादर सिरु नावा।
पुनि आपन संदेह सुनावा॥
सुनि ता करि बिनती मृदु बानी।
प्रेम सहित मैं कहेउँ भवानी ॥१॥
Tehiṅ mam pad sādar siru nāvā,
puni āpan sandeh sunāvā.
Suni tā kari binatī mṛdu bānī,
prem sahit maiṅ kaheuṅ Bhavānī. (1)
365 of 872
मिलेहु गरुड़ मारग महँ मोही।
कवन भाँति समुझावौं तोही॥
तबहिं होइ सब संसय भंगा।
जब बहु काल करिअ सतसंगा ॥२॥
Milehu Garuḍ mārag mahaṅ mohī,
kavan bhāṅti samujhāvauṅ tohī.
Tabahiṅ hoi sab sansay bhangā,
jab bahu kāl karia satasangā. (2)
366 of 872
सुनिअ तहाँ हरिकथा सुहाई।
नाना भाँति मुनिन्ह जो गाई॥
जेहि महुँ आदि मध्य अवसाना।
प्रभु प्रतिपाद्य राम भगवाना ॥३॥
Sunia tahāṅ harikathā suhāī,
nānā bhāṅti muninh jo gāī.
Jehi mahuṅ ādi madhya avasānā,
prabhu pratipādya Rām Bhagavānā. (3)
367 of 872
नित हरि कथा होत जहँ भाई।
पठवउँ तहाँ सुनहु तुम्ह जाई॥
जाइहि सुनत सकल संदेहा।
राम चरन होइहि अति नेहा ॥४॥
Nit Hari kathā hot jahaṅ bhāī,
paṭhavauṅ tahāṅ sunahu tumh jāī.
Jāihi sunat sakal sandehā,
Rām charan hoihi ati nehā. (4)
368 of 872
दो०—बिनु सतसंग न हरि कथा तेहि बिनु मोह न भाग।
मोह गएँ बिनु राम पद होइ न दृढ़ अनुराग ॥६१॥
Do—Binu satasang na hari kathā tehi binu moh na bhāg,
moh gaeṅ binu Rām pad hoi na dṛḍh anurāg. (61)
369 of 872
मिलहिं न रघुपति बिनु अनुरागा।
किएँ जोग तप ग्यान बिरागा॥
उत्तर दिसि सुंदर गिरि नीला।
तहँ रह काकभुसुंडि सुसीला ॥१॥
Milahiṅ na Raghupati binu anurāgā,
kieṅ jog tap gyān birāgā.
Uttar disi sundar giri nīlā,
tahaṅ rah Kākabhusuṇḍi susīlā. (1)
370 of 872
राम भगति पथ परम प्रबीना।
ग्यानी गुन गृह बहु कालीना॥
राम कथा सो कहइ निरंतर।
सादर सुनहिं बिबिध बिहंगबर ॥२॥
Rām bhagati path param prabīnā,
gyānī gun gṛh bahu kālīnā.
Rām kathā so kahai nirantar,
sādar sunahiṅ bibidh bihangabar. (2)
371 of 872
जाइ सुनहु तहँ हरि गुन भूरी।
होइहि मोह जनित दुख दूरी॥
मैं जब तेहि सब कहा बुझाई।
चलेउ हरषि मम पद सिरु नाई ॥३॥
Jāi sunahu tahaṅ hari gun bhūrī,
hoihi moh janit dukh dūrī.
Maiṅ jab tehi sab kahā bujhāī,
chaleu haraṣi mam pad siru nāī. (3)
372 of 872
ताते उमा न मैं समुझावा।
रघुपति कृपाँ मरमु मैं पावा॥
होइहि कीन्ह कबहुँ अभिमाना।
सो खोवै चह कृपानिधाना ॥४॥
Tāte Umā na maiṅ samujhāvā,
Raghupati kṛpāṅ maramu maiṅ pāvā.
Hoihi kīnh kabahuṅ abhimānā,
so khovai chah kṛpānidhānā. (4)
373 of 872
कछु तेहि ते पुनि मैं नहिं राखा।
समुझइ खग खगही कै भाषा॥
प्रभु माया बलवंत भवानी।
जाहि न मोह कवन अस ग्यानी ॥५॥
Kachhu tehi te puni maiṅ nahiṅ rākhā,
samujhai khag khagahī kai bhāṣā.
Prabhu māyā balavant Bhavānī,
jāhi na moh kavan as gyānī. (5)
374 of 872
दो०—ग्यानी भगत सिरोमनि त्रिभुवनपति कर जान।
ताहि मोह माया नर पावँर करहिं गुमान ॥६२(क)॥
Do—Gyānī bhagat siromani tribhuvanapati kar jān,
tāhi moh māyā nar pāvaṅr karahiṅ gumān. (62a)
375 of 872
सिव बिरंचि कहुँ मोहइ को है बपुरा आन।
अस जियँ जानि भजहिं मुनि माया पति भगवान ॥६२(ख)॥
Siv Biranchi kahuṅ mohai ko hai bapurā ān,
as jiyaṅ jāni bhajahiṅ muni māyā pati Bhagavān. (62b)
376 of 872
गयउ गरुड़ जहँ बसइ भुसुंडा।
मति अकुंठ हरि भगति अखंडा॥
देखि सैल प्रसन्न मन भयऊ।
माया मोह सोच सब गयऊ ॥१॥
Gayau Garuḍ jahaṅ basai Bhusuṇḍā,
mati akuṇṭh hari bhagati akhaṇḍā.
Dekhi sail prasanna man bhayaū,
māyā moh soch sab gayaū. (1)
377 of 872
करि तड़ाग मज्जन जलपाना।
बट तर गयउ हृदयँ हरषाना॥
बृद्ध बृद्ध बिहंग तहँ आए।
सुनै राम के चरित सुहाए ॥२॥
Kari taḍāg majjan jalapānā,
baṭ tar gayau hṛdayaṅ haraṣānā.
Bṛddha bṛddha bihang tahaṅ āe,
sunai Rām ke charit suhāe. (2)
378 of 872
कथा अरंभ करै सोइ चाहा।
तेही समय गयउ खगनाहा॥
आवत देखि सकल खगराजा।
हरषेउ बायस सहित समाजा ॥३॥
Kathā arambh karai soi chāhā,
tehī samay gayau khaganāhā.
Āvat dekhi sakal khagarājā,
haraṣeu bāyas sahit samājā. (3)
379 of 872
अति आदर खगपति कर कीन्हा।
स्वागत पूछि सुआसन दीन्हा॥
करि पूजा समेत अनुरागा।
मधुर बचन तब बोलेउ कागा ॥४॥
Ati ādar khagapati kar kīnhā,
svāgat pūchhi suāsan dīnhā.
Kari pūjā samet anurāgā,
madhur bachan tab boleu kāgā. (4)
380 of 872
दो०—नाथ कृतारथ भयउँ मैं तव दरसन खगराज।
आयसु देहु सो करौं अब प्रभु आयहु केहि काज ॥६३(क)॥
Do—Nāth kṛtārath bhayauṅ maiṅ tav darasan khagarāj,
āyasu dehu so karauṅ ab prabhu āyahu kehi kāj. (63a)
381 of 872
सदा कृतारथ रूप तुम्ह कह मृदु बचन खगेस।
जेहि कै अस्तुति सादर निज मुख कीन्हि महेस ॥६३(ख)॥
Sadā kṛtārath rūp tumh kah mṛdu bachan khages,
jehi kai astuti sādar nij mukh kīnhi Mahes. (63b)
382 of 872
सुनहु तात जेहि कारन आयउँ।
सो सब भयउ दरस तव पायउँ॥
देखि परम पावन तव आश्रम।
गयउ मोह संसय नाना भ्रम ॥१॥
Sunahu tāt jehi kāran āyauṅ,
so sab bhayau daras tav pāyauṅ.
Dekhi param pāvan tav āshram,
gayau moh sansay nānā bhram. (1)
383 of 872
अब श्रीराम कथा अति पावनि।
सदा सुखद दुख पुंज नसावनि॥
सादर तात सुनावहु मोही।
बार बार बिनवउँ प्रभु तोही ॥२॥
Ab Shrī Rām kathā ati pāvani,
sadā sukhad dukh punj nasāvani.
Sādar tāt sunāvahu mohī,
bār bār binavauṅ prabhu tohī. (2)
384 of 872
सुनत गरुड़ कै गिरा बिनीता।
सरल सुप्रेम सुखद सुपुनीता॥
भयउ तासु मन परम उछाहा।
लाग कहै रघुपति गुन गाहा ॥३॥
Sunat Garuḍ kai girā binītā,
saral suprem sukhad supunītā.
Bhayau tāsu man param uchhāhā,
lāg kahai Raghupati gun gāhā. (3)
385 of 872
प्रथमहिं अति अनुराग भवानी।
रामचरित सर कहेसि बखानी॥
पुनि नारद कर मोह अपारा।
कहेसि बहुरि रावन अवतारा ॥४॥
Prathamahiṅ ati anurāg Bhavānī,
Rāmcharit sar kahesi bakhānī.
Puni Nārad kar moh apārā,
kahesi bahuri Rāvan avatārā. (4)
386 of 872
प्रभु अवतार कथा पुनि गाईं।
तब सिसु चरित कहेसि मन लाईं ॥५॥
Prabhu avatār kathā puni gāīṅ,
tab sisu charit kahesi man lāīṅ. (5)
387 of 872
दो०—बालचरित कहि बिबिधि बिधि मन महँ परम उछाह।
रिषि आगवन कहेसि पुनि श्रीरघुबीर बिबाह ॥६४॥
Do—Bālcharit kahi bibidhi bidhi man mahaṅ param uchhāh,
riṣi āgavan kahesi puni Shrī Raghubīr bibāh. (64)
388 of 872
बहुरि राम अभिषेक प्रसंगा।
पुनि नृप बचन राज रस भंगा॥
पुरबासिन्ह कर बिरह बिषादा।
कहेसि राम लछिमन संबादा ॥१॥
Bahuri Rām abhiṣek prasangā,
puni nṛp bachan rāj ras bhangā.
Purabāsinh kar birah biṣādā,
kahesi Rām Lachhiman sambādā. (1)
389 of 872
बिपिन गवन केवट अनुरागा।
सुरसरि उतरि निवास प्रयागा॥
बालमीक प्रभु मिलन बखाना।
चित्रकूट जिमि बसे भगवाना ॥२॥
Bipin gavan Kevaṭ anurāgā,
Surasari utari nivās Prayāgā.
Bālamīk prabhu milan bakhānā,
Chitrakūṭ jimi base Bhagavānā. (2)
390 of 872
सचिवागवन नगर नृप मरना।
भरतागवन प्रेम बहु बरना॥
करि नृप क्रिया संग पुरबासी।
भरत गए जहँ प्रभु सुख रासी ॥३॥
Sachivāgavan nagar nṛp maranā,
Bharatāgavan prem bahu baranā.
Kari nṛp kriyā sang purabāsī,
Bharat gae jahaṅ prabhu sukh rāsī. (3)
391 of 872
पुनि रघुपति बहु बिधि समुझाए।
लै पादुका अवधपुर आए॥
भरत रहनि सुरपति सुत करनी।
प्रभु अरु अत्रि भेंट पुनि बरनी ॥४॥
Puni Raghupati bahu bidhi samujhāe,
lai pādukā avadhapur āe.
Bharat rahani Surapati sut karanī,
prabhu aru Atri bheṅṭ puni baranī. (4)
392 of 872
दो०—कहि बिराध बध जेहि बिधि देह तजी सरभंग।
बरनि सुतीछन प्रीति पुनि प्रभु अगस्ति सतसंग ॥६५॥
Do—Kahi Birādh badh jehi bidhi deh tajī Sarabhang,
barani Sutīchhan prīti puni prabhu Agasti satasang. (65)
393 of 872
कहि दंडक बन पावनताई।
गीध मइत्री पुनि तेहिं गाई॥
पुनि प्रभु पंचबटीं कृत बासा।
भंजी सकल मुनिन्ह की त्रासा ॥१॥
Kahi Daṇḍak ban pāvanatāī,
gīdh maitrī puni tehiṅ gāī.
Puni prabhu Panchabaṭīṅ kṛt bāsā,
bhanjī sakal muninh kī trāsā. (1)
394 of 872
पुनि लछिमन उपदेस अनूपा।
सूपनखा जिमि कीन्हि कुरूपा॥
खर दूषन बध बहुरि बखाना।
जिमि सब मरमु दसानन जाना ॥२॥
Puni Lachhiman upades anūpā,
Sūpanakhā jimi kīnhi kurūpā.
Khar Dūṣan badh bahuri bakhānā,
jimi sab maramu Dasānan jānā. (2)
395 of 872
दसकंधर मारीच बतकही।
जेहि बिधि भई सो सब तेहिं कही॥
पुनि माया सीता कर हरना।
श्रीरघुबीर बिरह कछु बरना ॥३॥
Dasakandhar Mārīch batakahī,
jehi bidhi bhaī so sab tehiṅ kahī.
Puni māyā Sītā kar haranā,
Shrī Raghubīr birah kachhu baranā. (3)
396 of 872
पुनि प्रभु गीध क्रिया जिमि कीन्ही।
बधि कबंध सबरिहि गति दीन्ही॥
बहुरि बिरह बरनत रघुबीरा।
जेहि बिधि गए सरोबर तीरा ॥४॥
Puni prabhu gīdh kriyā jimi kīnhī,
badhi Kabandh Sabarihi gati dīnhī.
Bahuri birah baranat Raghubīrā,
jehi bidhi gae sarobar tīrā. (4)
397 of 872
दो०—प्रभु नारद संबाद कहि मारुति मिलन प्रसंग।
पुनि सुग्रीव मिताई बालि प्रान कर भंग ॥६६(क)॥
Do—Prabhu Nārad sambād kahi Māruti milan prasang,
puni Sugrīv mitāī Bāli prān kar bhang. (66a)
398 of 872
कपिहि तिलक करि प्रभु कृत सैल प्रबरषन बास।
बरनन बर्षा सरद अरु राम रोष कपि त्रास ॥६६(ख)॥
Kapihi tilak kari prabhu kṛt sail prabarṣan bās,
baranan barṣā sarad aru Rām roṣ kapi trās. (66b)
399 of 872
जेहि बिधि कपिपति कीस पठाए।
सीता खोज सकल दिसि धाए॥
बिबर प्रबेस कीन्ह जेहि भाँती।
कपिन्ह बहोरि मिला संपाती ॥१॥
Jehi bidhi kapipati kīs paṭhāe,
Sītā khoj sakal disi dhāe.
Bibar prabes kīnh jehi bhāṅtī,
kapinh bahori milā Sampātī. (1)
400 of 872
सुनि सब कथा समीरकुमारा।
नाघत भयउ पयोधि अपारा॥
लंकाँ कपि प्रबेस जिमि कीन्हा।
पुनि सीतहि धीरजु जिमि दीन्हा ॥२॥
Suni sab kathā Samīrakumārā,
nāghat bhayau payodhi apārā.
Lankāṅ kapi prabes jimi kīnhā,
puni Sītahi dhīraju jimi dīnhā. (2)
401 of 872
बन उजारि रावनहि प्रबोधी।
पुर दहि नाघेउ बहुरि पयोधी॥
आए कपि सब जहँ रघुराई।
बैदेही की कुसल सुनाई ॥३॥
Ban ujāri Rāvanahi prabodhī,
pur dahi nāgheu bahuri payodhī.
Āe kapi sab jahaṅ Raghurāī,
Baidehī kī kusal sunāī. (3)
402 of 872
सेन समेति जथा रघुबीरा।
उतरे जाइ बारिनिधि तीरा॥
मिला बिभीषन जेहि बिधि आई।
सागर निग्रह कथा सुनाई ॥४॥
Sen sameti jathā Raghubīrā,
utare jāi bārinidhi tīrā.
Milā Bibhīṣan jehi bidhi āī,
sāgar nigrah kathā sunāī. (4)
403 of 872
दो०—सेतु बाँधि कपि सेन जिमि उतरी सागर पार।
गयउ बसीठी बीरबर जेहि बिधि बालिकुमार ॥६७(क)॥
Do—Setu bāṅdhi kapi sen jimi utarī sāgar pār,
gayau basīṭhī bīrabar jehi bidhi Bālikumār. (67a)
404 of 872
निसिचर कीस लराई बरनिसि बिबिध प्रकार।
कुंभकरन घननाद कर बल पौरुष संघार ॥६७(ख)॥
Nisichar kīs larāī baranisi bibidh prakār,
Kuṅbhakaran Ghananād kar bal pauruṣ sanghār. (67b)
405 of 872
निसिचर निकर मरन बिधि नाना।
रघुपति रावन समर बखाना॥
रावन बध मंदोदरि सोका।
राज बिभीषन देव असोका ॥१॥
Nisichar nikar maran bidhi nānā,
Raghupati Rāvan samar bakhānā.
Rāvan badh Mandodari sokā,
rāj Bibhīṣan dev asokā. (1)
406 of 872
सीता रघुपति मिलन बहोरी।
सुरन्ह कीन्हि अस्तुति कर जोरी॥
पुनि पुष्पक चढ़ि कपिन्ह समेता।
अवध चले प्रभु कृपा निकेता ॥२॥
Sītā Raghupati milan bahorī,
suranh kīnhi astuti kar jorī.
Puni Puṣpak chaḍhi kapinh sametā,
Avadh chale prabhu kṛpā niketā. (2)
407 of 872
जेहि बिधि राम नगर निज आए।
बायस बिसद चरित सब गाए॥
कहेसि बहोरि राम अभिषेका।
पुर बरनत नृपनीति अनेका ॥३॥
Jehi bidhi Rām nagar nij āe,
bāyas bisad charit sab gāe.
Kahesi bahori Rām abhiṣekā,
pur baranat nṛpanīti anekā. (3)
408 of 872
कथा समस्त भुसुंड बखानी।
जो मैं तुम्ह सन कही भवानी॥
सुनि सब राम कथा खगनाहा।
कहत बचन मन परम उछाहा ॥४॥
Kathā samasta Bhusuṇḍ bakhānī,
jo maiṅ tumh san kahī Bhavānī.
Suni sab Rām kathā khaganāhā,
kahat bachan man param uchhāhā. (4)
409 of 872
सो०—गयउ मोर संदेह सुनेउँ सकल रघुपति चरित।
भयउ राम पद नेह तव प्रसाद बायस तिलक ॥६८(क)॥
So—Gayau mor sandeh suneuṅ sakal Raghupati charit,
bhayau Rām pad neh tav prasād bāyas tilak. (68a)
410 of 872
मोहि भयउ अति मोह प्रभु बंधन रन महुँ निरखि।
चिदानंद संदोह राम बिकल कारन कवन ॥६८(ख)॥
Mohi bhayau ati moh prabhu bandhan ran mahuṅ nirakhi,
chidānand sandoh Rām bikal kāran kavan. (68b)
411 of 872
देखि चरित अति नर अनुसारी।
भयउ हृदयँ मम संसय भारी॥
सोइ भ्रम अब हित करि मैं माना।
कीन्ह अनुग्रह कृपानिधाना ॥१॥
Dekhi charit ati nar anusārī,
bhayau hṛdayaṅ mam sansay bhārī.
Soi bhram ab hit kari maiṅ mānā,
kīnh anugrah kṛpānidhānā. (1)
412 of 872
जो अति आतप ब्याकुल होई।
तरु छाया सुख जानइ सोई॥
जौं नहिं होत मोह अति मोही।
मिलतेउँ तात कवन बिधि तोही ॥२॥
Jo ati ātap byākul hoī,
taru chhāyā sukh jānai soī.
Jauṅ nahiṅ hot moh ati mohī,
milateuṅ tāt kavan bidhi tohī. (2)
413 of 872
सुनतेउँ किमि हरि कथा सुहाई।
अति बिचित्र बहु बिधि तुम्ह गाई॥
निगमागम पुरान मत एहा।
कहहिं सिद्ध मुनि नहिं संदेहा ॥३॥
Sunateuṅ kimi hari kathā suhāī,
ati bichitra bahu bidhi tumh gāī.
Nigamāgam purān mat ehā,
kahahiṅ siddh muni nahiṅ sandehā. (3)
414 of 872
संत बिसुद्ध मिलहिं परि तेही।
चितवहिं राम कृपा करि जेही॥
राम कृपाँ तव दरसन भयऊ।
तव प्रसाद सब संसय गयऊ ॥४॥
Sant bisuddh milahiṅ pari tehī,
chitavahiṅ Rām kṛpā kari jehī.
Rām kṛpāṅ tav darasan bhayaū,
tav prasād sab sansay gayaū. (4)
415 of 872
दो०—सुनि बिहंगपति बानी सहित बिनय अनुराग।
पुलक गात लोचन सजल मन हरषेउ अति काग ॥६९(क)॥
Do—Suni bihangapati bānī sahit binay anurāg,
pulak gāt lochan sajal man haraṣeu ati kāg. (69a)
416 of 872
श्रोता सुमति सुसील सुचि कथा रसिक हरिदास।
पाइ उमा अति गोप्यमपि सज्जन करहिं प्रकास ॥६९(ख)॥
Shrotā sumati susīl suchi kathā rasik haridās,
pāi Umā ati gopyamapi sajjan karahiṅ prakās. (69b)
417 of 872
बोलेउ काकभसुंड बहोरी।
नभग नाथ पर प्रीति न थोरी॥
सब बिधि नाथ पूज्य तुम्ह मेरे।
कृपापात्र रघुनायक केरे ॥१॥
Boleu Kākabhasuṇḍ bahorī,
nabhag nāth par prīti na thorī.
Sab bidhi nāth pūjya tumh mere,
kṛpāpātra Raghunāyak kere. (1)
418 of 872
तुम्हहि न संसय मोह न माया।
मो पर नाथ कीन्हि तुम्ह दाया॥
पठइ मोह मिस खगपति तोही।
रघुपति दीन्हि बड़ाई मोही ॥२॥
Tumhahi na sansay moh na māyā,
mo par nāth kīnhi tumh dāyā.
Paṭhai moh mis khagapati tohī,
Raghupati dīnhi baḍāī mohī. (2)
419 of 872
तुम्ह निज मोह कही खगसाईं।
सो नहिं कछु आचरज गोसाईं॥
नारद भव बिरंचि सनकादी।
जे मुनिनायक आतमबादी ॥३॥
Tumh nij moh kahī khagasāīṅ,
so nahiṅ kachhu ācharaj gosāīṅ.
Nārad Bhav Biranchi Sanakādī,
je muninayak ātamabādī. (3)
420 of 872
मोह न अंध कीन्ह केहि केही।
को जग काम नचाव न जेही॥
तृस्नाँ केहि न कीन्ह बौराहा।
केहि कर हृदय क्रोध नहिं दाहा ॥४॥
Moh na andh kīnh kehi kehī,
ko jag kām nachāv na jehī.
Tṛsnāṅ kehi na kīnh baurāhā,
kehi kar hṛday krodh nahiṅ dāhā. (4)
421 of 872
दो०—ग्यानी तापस सूर कबि कोबिद गुन आगार।
केहि कै लोभ बिडंबना कीन्हि न एहिं संसार ॥७०(क)॥
Do—Gyānī tāpas sūr kabi kobid gun āgār,
kehi kai lobh biḍambanā kīnhi na ehiṅ sansār. (70a)
422 of 872
श्रीमद बक्र न कीन्ह केहि प्रभुता बधिर न काहि।
मृगलोचनि के नैन सर को अस लाग न जाहि ॥७०(ख)॥
Shrīmad bakra na kīnh kehi prabhutā badhir na kāhi,
mṛgalochani ke nain sar ko as lāg na jāhi. (70b)
423 of 872
गुन कृत सन्यपात नहिं केही।
कोउ न मान मद तजेउ निबेही॥
जोबन ज्वर केहि नहिं बलकावा।
ममता केहि कर जस न नसावा ॥१॥
Gun kṛt sanyapāt nahiṅ kehī,
kou na mān mad tajeu nibehī.
Joban jvar kehi nahiṅ balakāvā,
mamatā kehi kar jas na nasāvā. (1)
424 of 872
मच्छर काहि कलंक न लावा।
काहि न सोक समीर डोलावा॥
चिंता साँपिनि को नहिं खाया।
को जग जाहि न ब्यापी माया ॥२॥
Machchhar kāhi kalank na lāvā,
kāhi na sok samīr ḍolāvā.
Chintā sāṅpini ko nahiṅ khāyā,
ko jag jāhi na byāpī māyā. (2)
425 of 872
कीट मनोरथ दारु सरीरा।
जेहि न लाग घुन को अस धीरा॥
सुत बित लोक ईषना तीनी।
केहि कै मति इन्ह कृत न मलीनी ॥३॥
Kīṭ manorath dāru sarīrā,
jehi na lāg ghun ko as dhīrā.
Sut bit lok īṣanā tīnī,
kehi kai mati inh kṛt na malīnī. (3)
426 of 872
यह सब माया कर परिवारा।
प्रबल अमित को बरनै पारा॥
सिव चतुरानन जाहि डेराहीं।
अपर जीव केहि लेखे माहीं ॥४॥
Yah sab māyā kar parivārā,
prabal amit ko baranai pārā.
Siv Chaturānan jāhi ḍerāhīṅ,
apar jīv kehi lekhe māhīṅ. (4)
427 of 872
दो०—ब्यापि रहेउ संसार महुँ माया कटक प्रचंड।
सेनापति कामादि भट दंभ कपट पाषंड ॥७१(क)॥
Do—Byāpi raheu sansār mahuṅ māyā kaṭak prachaṇḍ,
senāpati kāmādi bhaṭ dambh kapaṭ pāṣaṇḍ. (71a)
428 of 872
सो दासी रघुबीर कै समुझें मिथ्या सोपि।
छूट न राम कृपा बिनु नाथ कहउँ पद रोपि ॥७१(ख)॥
So dāsī Raghubīr kai samujheṅ mithyā sopi,
chhūṭ na Rām kṛpā binu nāth kahauṅ pad ropi. (71b)
429 of 872
जो माया सब जगहि नचावा।
जासु चरित लखि काहुँ न पावा॥
सोइ प्रभु भ्रू बिलास खगराजा।
नाच नटी इव सहित समाजा ॥१॥
Jo māyā sab jagahi nachāvā,
jāsu charit lakhi kāhuṅ na pāvā.
Soi prabhu bhrū bilās khagarājā,
nāch naṭī iv sahit samājā. (1)
430 of 872
सोइ सच्चिदानंद घन रामा।
अज बिग्यान रूप बल धामा॥
ब्यापक ब्याप्य अखंड अनंता।
अखिल अमोघसक्ति भगवंता ॥२॥
Soi sachchidānand ghan Rāmā,
aj bigyān rūp bal dhāmā.
Byāpak byāpya akhaṇḍ anantā,
akhil amoghasakti bhagavantā. (2)
431 of 872
अगुन अदभ्र गिरा गोतीता।
सबदरसी अनवद्य अजीता॥
निर्मम निराकार निरमोहा।
नित्य निरंजन सुख संदोहा ॥३॥
Agun adabhra girā gotītā,
sabadarasī anavadya ajītā.
Nirmam nirākār niramohā,
nitya niranjan sukh sandohā. (3)
432 of 872
प्रकृति पार प्रभु सब उर बासी।
ब्रह्म निरीह बिरज अबिनासी॥
इहाँ मोह कर कारन नाहीं।
रबि सन्मुख तम कबहुँ कि जाहीं ॥४॥
Prakṛti pār prabhu sab ur bāsī,
Brahma nirīh biraj abināsī.
Ihāṅ moh kar kāran nāhīṅ,
rabi sanmukh tam kabahuṅ ki jāhīṅ. (4)
433 of 872
दो०—भगत हेतु भगवान प्रभु राम धरेउ तनु भूप।
किए चरित पावन परम प्राकृत नर अनुरूप ॥७२(क)॥
Do—Bhagat hetu Bhagavān prabhu Rām dhareu tanu bhūp,
kie charit pāvan param prākṛt nar anurūp. (72a)
434 of 872
जथा अनेक बेष धरि नृत्य करइ नट कोइ।
सोइ सोइ भाव देखावइ आपुन होइ न सोइ ॥७२(ख)॥
Jathā anek beṣ dhari nṛtya karai naṭ koi,
soi soi bhāv dekhāvai āpun hoi na soi. (72b)
435 of 872
असि रघुपति लीला उरगारी।
दनुज बिमोहनि जन सुखकारी॥
जे मति मलिन बिषयबस कामी।
प्रभु पर मोह धरहिं इमि स्वामी ॥१॥
Asi Raghupati līlā uragārī,
danuj bimohani jan sukhakārī.
Je mati malin biṣayabas kāmī,
prabhu par moh dharahiṅ imi svāmī. (1)
436 of 872
नयन दोष जा कहँ जब होई।
पीत बरन ससि कहुँ कह सोई॥
जब जेहि दिसि भ्रम होइ खगेसा।
सो कह पच्छिम उयउ दिनेसा ॥२॥
Nayan doṣ jā kahaṅ jab hoī,
pīt baran sasi kahuṅ kah soī.
Jab jehi disi bhram hoi khagesā,
so kah pachchhim uyau dinesā. (2)
437 of 872
नौकारूढ़ चलत जग देखा।
अचल मोहबस आपुहि लेखा॥
बालक भ्रमहिं न भ्रमहिं गृहादी।
कहहिं परस्पर मिथ्याबादी ॥३॥
Naukārūḍh chalat jag dekhā,
achal mohabas āpuhi lekhā.
Bālak bhramahiṅ na bhramahiṅ gṛhādī,
kahahiṅ paraspar mithyābādī. (3)
438 of 872
हरि बिषइक अस मोह बिहंगा।
सपनेहुँ नहिं अग्यान प्रसंगा॥
मायाबस मतिमंद अभागी।
हृदयँ जमनिका बहुबिधि लागी ॥४॥
Hari biṣaik as moh bihangā,
sapanehuṅ nahiṅ agyān prasangā.
Māyābas matimand abhāgī,
hṛdayaṅ jamanikā bahubidhi lāgī. (4)
439 of 872
ते सठ हठ बस संसय करहीं।
निज अग्यान राम पर धरहीं ॥५॥
Te saṭh haṭh bas sansay karahīṅ,
nij agyān Rām par dharahīṅ. (5)
440 of 872
दो०—काम क्रोध मद लोभ रत गृहासक्त दुखरूप।
ते किमि जानहिं रघुपतिहि मूढ़ परे तम कूप ॥७३(क)॥
Do—Kām krodh mad lobh rat gṛhāsakta dukharūp,
te kimi jānahiṅ Raghupatihi mūḍh pare tam kūp. (73a)
441 of 872
निर्गुन रूप सुलभ अति सगुन जान नहिं कोइ।
सुगम अगम नाना चरित सुनि मुनि मन भ्रम होइ ॥७३(ख)॥
Nirgun rūp sulabh ati sagun jān nahiṅ koi,
sugam agam nānā charit suni muni man bhram hoi. (73b)
442 of 872
सुनु खगेस रघुपति प्रभुताई।
कहउँ जथामति कथा सुहाई॥
जेहि बिधि मोह भयउ प्रभु मोही।
सोउ सब कथा सुनावउँ तोही ॥१॥
Sunu khagesa Raghupati prabhutāī,
kahauṅ jathāmati kathā suhāī.
Jehi bidhi moh bhayau prabhu mohī,
sou sab kathā sunāvauṅ tohī. (1)
443 of 872
राम कृपा भाजन तुम्ह ताता।
हरि गुन प्रीति मोहि सुखदाता॥
ताते नहिं कछु तुम्हहि दुरावउँ।
परम रहस्य मनोहर गावउँ ॥२॥
Rām kṛpā bhājan tumh tātā,
hari gun prīti mohi sukhadātā.
Tāte nahiṅ kachhu tumhahi durāvauṅ,
param rahasya manohar gāvauṅ. (2)
444 of 872
सुनहु राम कर सहज सुभाऊ।
जन अभिमान न राखहिं काऊ॥
संसृत मूल सूलप्रद नाना।
सकल सोक दायक अभिमाना ॥३॥
Sunahu Rām kar sahaj subhāū,
jan abhimān na rākhahiṅ kāū.
Sansṛt mūl sūlaprad nānā,
sakal sok dāyak abhimānā. (3)
445 of 872
ताते करहिं कृपानिधि दूरी।
सेवक पर ममता अति भूरी॥
जिमि सिसु तन ब्रन होइ गोसाईं।
मातु चिराव कठिन की नाईं ॥४॥
Tāte karahiṅ kṛpānidhi dūrī,
sevak par mamatā ati bhūrī.
Jimi sisu tan bran hoi gosāīṅ,
mātu chirāv kaṭhin kī nāīṅ. (4)
446 of 872
दो०—जदपि प्रथम दुख पावइ रोवइ बाल अधीर।
ब्याधि नास हित जननी गनति न सो सिसु पीर ॥७४(क)॥
Do—Jadapi pratham dukh pāvai rovai bāl adhīr,
byādhi nās hit jananī ganati na so sisu pīr. (74a)
447 of 872
तिमि रघुपति निज दास कर हरहिं मान हित लागि।
तुलसिदास ऐसे प्रभुहि कस न भजहु भ्रम त्यागि ॥७४(ख)॥
Timi Raghupati nij dās kar harahiṅ mān hit lāgi,
Tulasidās aise prabhuhi kas na bhajahu bhram tyāgi. (74b)
448 of 872
राम कृपा आपनि जड़ताई।
कहउँ खगेस सुनहु मन लाई॥
जब जब राम मनुज तनु धरहीं।
भक्त हेतु लीला बहु करहीं ॥१॥
Rām kṛpā āpani jaḍatāī,
kahauṅ khagesa sunahu man lāī.
Jab jab Rām manuj tanu dharahīṅ,
bhakt hetu līlā bahu karahīṅ. (1)
449 of 872
तब तब अवधपुरी मैं जाऊं।
बालचरित बिलोकि हरषाऊं॥
जन्म महोत्सव देखउँ जाई।
बरष पाँच तहँ रहउँ लोभाई ॥२॥
Tab tab Avadhapurī maiṅ jāūṅ,
bālcharit biloki harṣāūṅ.
Janm mahotsav dekhauṅ jāī,
baraṣ pāṅch tahaṅ rahauṅ lobhāī. (2)
450 of 872
इष्टदेव मम बालक रामा।
सोभा बपुष कोटि सत कामा॥
निज प्रभु बदन निहारि निहारी।
लोचन सुफल करउँ उरगारी ॥३॥
Iṣṭadev mam bālak Rāmā,
sobhā bapuṣ koṭi sat Kāmā.
Nij prabhu badan nihāri nihārī,
lochan suphal karauṅ uragārī. (3)
451 of 872
लघु बायस बपु धरि हरि संगा।
देखउँ बालचरित बहु रंगा ॥४॥
Laghu bāyas bapu dhari hari saṅgā,
dekhauṅ bālcharit bahu raṅgā. (4)
452 of 872
दो०—लरिकाई जहँ जहँ फिरहिं तहँ तहँ संग उड़ाउँ।
जूठनि परइ अजिर महँ सो उठाइ करि खाउँ ॥७५(क)॥
Do—Larikāī jahaṅ jahaṅ firahiṅ tahaṅ tahaṅ saṅg uḍāuṅ,
jūṭhani parai ajir mahaṅ so uṭhāi kari khāuṅ. (75a)
453 of 872
एक बार अतिसय सब चरित किए रघुबीर।
सुमिरत प्रभु लीला सोइ पुलकित भयउ सरीर ॥७५(ख)॥
Ek bār atisay sab charit kie Raghubīr,
sumirat prabhu līlā soi pulakit bhayau sarīr. (75b)
454 of 872
कहइ भसुंड सुनहु खगनायक।
राम चरित सेवक सुखदायक॥
नृप मंदिर सुंदर सब भाँती।
खचित कनक मनि नाना जाती ॥१॥
Kahai Bhasuṇḍ sunahu khaganāyak,
Rām charit sevak sukhadāyak.
Nṛp mandir sundar sab bhāṅtī,
khachit kanak mani nānā jātī. (1)
455 of 872
बरनि न जाइ रुचिर अँगनाई।
जहँ खेलहिं नित चारिउ भाई॥
बालबिनोद करत रघुराई।
बिचरत अजिर जननि सुखदाई ॥२॥
Barani na jāi ruchir aṅganāī,
jahaṅ khelahiṅ nit chāriu bhāī.
Bālbinod karat Raghurāī,
bicharat ajir janani sukhadāī. (2)
456 of 872
मरकत मृदुल कलेवर स्यामा।
अंग अंग प्रति छबि बहु कामा॥
नव राजीव अरुन मृदु चरना।
पदज रुचिर नख ससि दुति हरना ॥३॥
Marakat mṛdul kalevar syāmā,
aṅg aṅg prati chhabi bahu kāmā.
Nav rājīv arun mṛdu charanā,
padaj ruchir nakh sasi duti haranā. (3)
457 of 872
ललित अंक कुलिसादिक चारी।
नूपुर चारु मधुर रवकारी॥
चारु पुरट मनि रचित बनाई।
कटि किंकिनि कल मुखर सुहाई ॥४॥
Lalit aṅk kulisādik chārī,
nūpur chāru madhur ravakārī.
Chāru puraṭ mani rachit banāī,
kaṭi kiṅkini kal mukhar suhāī. (4)
458 of 872
दो०—रेखा त्रय सुंदर उदर नाभी रुचिर गँभीर।
उर आयत भ्राजत बिबिधि बाल बिभूषन चीर ॥७६॥
Do—Rekhā tray sundar udar nābhī ruchir gaṅbhīr,
ur āyat bhrājat bibidhi bāl bibhūṣan chīr. (76)
459 of 872
अरुन पानि नख करज मनोहर।
बाहु बिसाल बिभूषन सुंदर॥
कंध बाल केहरि दर ग्रीवा।
चारु चिबुक आनन छबि सींवा ॥१॥
Arun pāni nakh karaj manohar,
bāhu bisāl bibhūṣan sundar.
Kandh bāl kehari dar grīvā,
chāru chibuk ānan chhabi sīṅvā. (1)
460 of 872
कलबल बचन अधर अरुनारे।
दुइ दुइ दसन बिसद बर बारे॥
ललित कपोल मनोहर नासा।
सकल सुखद ससि कर सम हासा ॥२॥
Kalbal bachan adhar arunāre,
dui dui dasan bisad bar bāre.
Lalit kapol manohar nāsā,
sakal sukhad sasi kar sam hāsā. (2)
461 of 872
नील कंज लोचन भव मोचन।
भ्राजत भाल तिलक गोरोचन॥
बिकट भृकुटि सम श्रवन सुहाए।
कुंचित कच मेचक छबि छाए ॥३॥
Nīl kañj lochan bhav mochan,
bhrājat bhāl tilak gorochan.
Bikaṭ bhṛkuṭi sam śravan suhāe,
kuṅchit kach mechak chhabi chhāe. (3)
462 of 872
पीत झीनि झगुली तन सोही।
किलकनि चितवनि भावति मोही॥
रूप रासि नृप अजिर बिहारी।
नाचहिं निज प्रतिबिंब निहारी ॥४॥
Pīt jhīni jhagulī tan sohī,
kilakani chitavani bhāvati mohī.
Rūp rāsi nṛp ajir bihārī,
nāchahiṅ nij pratibiṅb nihārī. (4)
463 of 872
मोहि सन करहिं बिबिधि बिधि क्रीड़ा।
बरनत मोहि होति अति ब्रीड़ा॥
किलकत मोहि धरन जब धावहिं।
चलउँ भागि तब पूप देखावहिं ॥५॥
Mohi san karahiṅ bibidhi bidhi krīḍā,
baranat mohi hoti ati brīḍā.
Kilakat mohi dharan jab dhāvahiṅ,
chalauṅ bhāgi tab pūp dekhāvahiṅ. (5)
464 of 872
दो०—आवत निकट हँसहिं प्रभु भाजत रुदन कराहिं।
जाउँ समीप गहन पद फिरि फिरि चितइ पराहिं ॥७७(क)॥
Do—Āvat nikaṭ haṅsahiṅ prabhu bhājat rudan karāhiṅ,
jāuṅ samīp gahan pad phiri phiri chitai parāhiṅ. (77a)
465 of 872
प्राकृत सिसु इव लीला देखि भयउ मोहि मोह।
कवन चरित्र करत प्रभु चिदानंद संदोह ॥७७(ख)॥
Prākṛt sisu iva līlā dekhi bhayau mohi moh,
kavan charitra karat prabhu chidānand sandoh. (77b)
466 of 872
एतना मन आनत खगराया।
रघुपति प्रेरित ब्यापी माया॥
सो माया न दुखद मोहि काहीं।
आन जीव इव संसृत नाहीं ॥१॥
Etanā man ānat khagarāyā,
Raghupati prerit byāpī māyā.
So māyā na dukhad mohi kāhīṅ,
ān jīv iva sansṛt nāhīṅ. (1)
467 of 872
नाथ इहाँ कछु कारन आना।
सुनहु सो सावधान हरिजाना॥
ग्यान अखंड एक सीताबर।
माया बस्य जीव सचराचर ॥२॥
Nāth ihāṅ kachhu kāran ānā,
sunahu so sāvadhān harijānā.
Gyān akhaṇḍ ek Sītābar,
māyā basya jīv sacharāchar. (2)
468 of 872
जौं सब कें रह ग्यान एकरस।
ईस्वर जीवहि भेद कहहु कस॥
माया बस्य जीव अभिमानी।
ईस बस्य माया गुन खानी ॥३॥
Jauṅ sab keṅ rah gyān ekaras,
īsvar jīvahi bhed kahahu kas.
Māyā basya jīv abhimānī,
īs basya māyā gun khānī. (3)
469 of 872
परबस जीव स्वबस भगवंता।
जीव अनेक एक श्रीकंता॥
मुधा भेद जद्यपि कृत माया।
बिनु हरि जाइ न कोटि उपाया ॥४॥
Parabas jīv svabas bhagavantā,
jīv anek ek Śrīkantā.
Mudhā bhed jadyapi kṛt māyā,
binu hari jāi na koṭi upāyā. (4)
470 of 872
दो०—रामचंद्र के भजन बिनु जो चह पद निर्बान।
ग्यानवंत अपि सो नर पसु बिनु पूँछ बिषान ॥७८(क)॥
Do—Rāmchandra ke bhajan binu jo chah pad nirbān,
gyānavant api so nar pasu binu pūṅchh biṣān. (78a)
471 of 872
राकापति षोडस उअहिं तारागन समुदाइ।
सकल गिरिन्ह दव लाइअ बिनु रबि राति न जाइ ॥७८(ख)॥
Rākāpati ṣoḍas uahiṅ tārāgan samudāi,
sakal girinh dav lāia binu rabi rāti na jāi. (78b)
472 of 872
ऐसेहिं हरि बिनु भजन खगेसा।
मिटइ न जीवन्ह केर कलेसा॥
हरि सेवकहि न ब्याप अबिद्या।
प्रभु प्रेरित ब्यापइ तेहि बिद्या ॥१॥
Aisehiṅ hari binu bhajan khagesā,
miṭai na jīvanh ker kalesā.
Hari sevakahi na byāp abidyā,
prabhu prerit byāpai tehi bidyā. (1)
473 of 872
ताते नास न होइ दास कर।
भेद भगति बाढ़इ बिहंगबर॥
भ्रम तें चकित राम मोहि देखा।
बिहँसे सो सुनु चरित बिसेषा ॥२॥
Tāte nās na hoi dās kar,
bhed bhagati bāḍhai bihaṅgabar.
Bhram teṅ chakit Rām mohi dekhā,
bihaṅse so sunu charit biseṣā. (2)
474 of 872
तेहि कौतुक कर मरमु न काहूँ।
जाना अनुज न मातु पिताहूँ॥
जानु पानि धाए मोहि धरना।
स्यामल गात अरुन कर चरना ॥३॥
Tehi kautuk kar maramu na kāhūṅ,
jānā anuj na mātu pitāhūṅ.
Jānu pāni dhāe mohi dharanā,
syāmal gāt arun kar charanā. (3)
475 of 872
तब मैं भागि चलेउँ उरगारी।
राम गहन कहँ भुजा पसारी॥
जिमि जिमि दूरि उड़ाउँ अकासा।
तहँ भुज हरि देखउँ निज पासा ॥४॥
Tab maiṅ bhāgi chaleuṅ uragārī,
Rām gahan kahaṅ bhujā pasārī.
Jimi jimi dūri uḍāuṅ akāsā,
tahaṅ bhuj hari dekhauṅ nij pāsā. (4)
476 of 872
दो०—ब्रह्मलोक लगि गयउँ मैं चितयउँ पाछ उड़ात।
जुग अंगुल कर बीच सब राम भुजहि मोहि तात ॥७९(क)॥
Do—Brahmalok lagi gayauṅ maiṅ chitayauṅ pāchh uḍāt,
jug aṅgul kar bīch sab Rām bhujahi mohi tāt. (79a)
477 of 872
समाबरन भेद करि जहाँ लगें गति मोरि।
गयउँ तहाँ प्रभु भुज निरखि ब्याकुल भयउँ बहोरि ॥७९(ख)॥
Samābaran bhed kari jahāṅ lageṅ gati mori,
gayauṅ tahāṅ prabhu bhuj nirakhi byākul bhayauṅ bahori. (79b)
478 of 872
मूदेउँ नयन त्रसित जब भयऊं।
पुनि चितवत कोसलपुर गयऊं॥
मोहि बिलोकि राम मुसुकाहीं।
बिहँसत तुरत गयउँ मुख माहीं ॥१॥
Mūdeuṅ nayan trasit jab bhayūṅ,
puni chitavat Kosalapur gayūṅ.
Mohi biloki Rām musukāhīṅ,
bihaṅsat turat gayauṅ mukh māhīṅ. (1)
479 of 872
उदर माझ सुनु अंडज राया।
देखेउँ बहु ब्रह्मांड निकाया॥
अति बिचित्र तहँ लोक अनेका।
रचना अधिक एक ते एका ॥२॥
Udar mājh sunu aṇḍaj rāyā,
dekheuṅ bahu brahmāṇḍ nikāyā.
Ati bichitra tahaṅ lok anekā,
rachanā adhik ek te ekā. (2)
480 of 872
कोटिन्ह चतुरानन गौरीसा।
अगनित उडगन रबि रजनीसा॥
अगनित लोकपाल जम काला।
अगनित भूधर भूमि बिसाला ॥३॥
Koṭinh chaturānan gaurīsā,
aganit uḍagan rabi rajanīsā.
Aganit lokpāl jam kālā,
aganit bhūdhar bhūmi bisālā. (3)
481 of 872
सागर सरि सर बिपिन अपारा।
नाना भाँति सृष्टि बिस्तारा॥
सुर मुनि सिद्ध नाग नर किंनर।
चारि प्रकार जीव सचराचर ॥४॥
Sāgar sari sar bipin apārā,
nānā bhāṅti sṛṣṭi bistārā.
Sur muni siddh nāg nar kiṅnar,
chāri prakār jīv sacharāchar. (4)
482 of 872
दो०—जो नहिं देखा नहिं सुना जो मनहूँ न समाइ।
सो सब अद्भुत देखेउँ बरनि कवनि बिधि जाइ ॥८०(क)॥
Do—Jo nahiṅ dekhā nahiṅ sunā jo manahūṅ na samāi,
so sab adbhut dekheuṅ barani kavani bidhi jāi. (80a)
483 of 872
एक एक ब्रह्मांड महुँ रहउँ बरष सत एक।
एहि बिधि देखत फिरउँ मैं अंड कटाह अनेक ॥८०(ख)॥
Ek ek brahmāṇḍ mahuṅ rahauṅ baraṣ sat ek,
ehi bidhi dekhat phirauṅ maiṅ aṇḍ kaṭāh anek. (80b)
484 of 872
लोक लोक प्रति भिन्न बिधाता।
भिन्न बिष्नु सिव मनु दिसित्राता॥
नर गंधर्ब भूत बेताला।
किंनर निसिचर पसु खग ब्याला ॥१॥
Lok lok prati bhinn bidhātā,
bhinn Biṣnu Siv manu disitrātā.
Nar gandharb bhūt betālā,
kiṅnar nisichar pasu khag byālā. (1)
485 of 872
देव दनुज गन नाना जाती।
सकल जीव तहँ आनहिं भाँती॥
महि सरि सागर सर गिरि नाना।
सब प्रपंच तहँ आनइ आना ॥२॥
Dev danuj gan nānā jātī,
sakal jīv tahaṅ ānahiṅ bhāṅtī.
Mahi sari sāgar sar giri nānā,
sab prapañch tahaṅ ānai ānā. (2)
486 of 872
अंडकोस प्रति प्रति निज रूपा।
देखेउँ जिनस अनेक अनूपा॥
अवधपुरी प्रति भुवन निनारी।
सरजू भिन्न भिन्न नर नारी ॥३॥
Aṇḍkos prati prati nij rūpā,
dekheuṅ jinas anek anūpā.
Avadhapurī prati bhuvan ninārī,
Sarajū bhinn bhinn nar nārī. (3)
487 of 872
दसरथ कौसल्या सुनु ताता।
बिबिध रूप भरतादिक भ्राता॥
प्रति ब्रह्मांड राम अवतारा।
देखउँ बालबिनोद अपारा ॥४॥
Dasarath Kausalyā sunu tātā,
bibidh rūp Bharatādik bhrātā.
Prati brahmāṇḍ Rām avatārā,
dekhauṅ bālbinod apārā. (4)
488 of 872
दो०—भिन्न भिन्न मैं दीख सबु अति बिचित्र हरिजान।
अगनित भुवन फिरेउँ प्रभु राम न देखेउँ आन ॥८१(क)॥
Do—Bhinn bhinn maiṅ dīkh sabu ati bichitra harijān,
aganit bhuvan phireuṅ prabhu Rām na dekheuṅ ān. (81a)
489 of 872
सोइ सिसुपन सोइ सोभा सोइ कृपाल रघुबीर।
भुवन भुवन देखत फिरउँ प्रेरित मोह समीर ॥८१(ख)॥
Soi sisupan soi sobhā soi kṛpāl Raghubīr,
bhuvan bhuvan dekhat phirauṅ prerit moh samīr. (81b)
490 of 872
भ्रमत मोहि ब्रह्मांड अनेका।
बीते मनहुँ कल्प सत एका॥
फिरत फिरत निज आश्रम आयउँ।
तहँ पुनि रहि कछु काल गवाँयउँ ॥१॥
Bhramat mohi brahmāṇḍ anekā,
bīte manahuṅ kalp sat ekā.
Phirat phirat nij āśram āyauṅ,
tahaṅ puni rahi kachhu kāl gavāṅyauṅ. (1)
491 of 872
निज प्रभु जन्म अवध सुनि पायउँ।
निर्भर प्रेम हरषि उठि धायउँ॥
देखउँ जन्म महोत्सव जाई।
जेहि बिधि प्रथम कहा मैं गाई ॥२॥
Nij prabhu janm avadh suni pāyauṅ,
nirbhar prem haraṣi uṭhi dhāyauṅ.
Dekhauṅ janm mahotsav jāī,
jehi bidhi pratham kahā maiṅ gāī. (2)
492 of 872
राम उदर देखेउँ जग नाना।
देखत बनइ न जाइ बखाना॥
तहँ पुनि देखेउँ राम सुजाना।
माया पति कृपाल भगवाना ॥३॥
Rām udar dekheuṅ jag nānā,
dekhat banai na jāi bakhānā.
Tahaṅ puni dekheuṅ Rām sujānā,
māyā pati kṛpāl bhagavānā. (3)
493 of 872
करउँ बिचार बहोरि बहोरी।
मोह कलिल ब्यापित मति मोरी॥
उभय घरी महँ मैं सब देखा।
भयउँ भ्रमित मन मोह बिसेषा ॥४॥
Karauṅ bichār bahori bahorī,
moh kalil byāpit mati morī.
Ubhay gharī mahaṅ maiṅ sab dekhā,
bhayauṅ bhramit man moh biseṣā. (4)
494 of 872
दो०—देखि कृपाल बिकल मोहि बिहँसे तब रघुबीर।
बिहँसतहीं मुख बाहेर आयउँ सुनु मतिधीर ॥८२(क)॥
Do—Dekhi kṛpāl bikal mohi bihaṅse tab Raghubīr,
bihaṅsatahīṅ mukh bāher āyauṅ sunu matidhīr. (82a)
495 of 872
सोइ लरिकाई मो सन करन लगे पुनि राम।
कोटि भाँति समुझावउँ मनु न लहइ बिश्राम ॥८२(ख)॥
Soi larikāī mo san karan lage puni Rām,
koṭi bhāṅti samujhāvauṅ manu na lahai biśrām. (82b)
496 of 872
देखि चरित यह सो प्रभुताई।
समुझत देह दसा बिसराई॥
धरनि परेउँ मुख आव न बाता।
त्राहि त्राहि आरत जन त्राता ॥१॥
Dekhi charit yah so prabhutāī,
samujhat deh dasā bisarāī.
Dharani pareuṅ mukh āv na bātā,
trāhi trāhi ārat jan trātā. (1)
497 of 872
प्रेमाकुल प्रभु मोहि बिलोकी।
निज माया प्रभुता तब रोकी॥
कर सरोज प्रभु मम सिर धरेऊ।
दीनदयाल सकल दुख हरेऊ ॥२॥
Premākul prabhu mohi bilokī,
nij māyā prabhutā tab rokī.
Kar saroj prabhu mam sir dhareū,
dīnadayāl sakal dukh hareū. (2)
498 of 872
कीन्ह राम मोहि बिगत बिमोहा।
सेवक सुखद कृपा संदोहा॥
प्रभुता प्रथम बिचारि बिचारी।
मन महँ होइ हरष अति भारी ॥३॥
Kīnh Rām mohi bigat bimohā,
sevak sukhad kṛpā sandohā.
Prabhutā pratham bichāri bichārī,
man mahaṅ hoi haraṣ ati bhārī. (3)
499 of 872
भगत बछलता प्रभु कै देखी।
उपजी मम उर प्रीति बिसेषी॥
सजल नयन पुलकित कर जोरी।
कीन्हिउँ बहु बिधि बिनय बहोरी ॥४॥
Bhagat bachhalatā prabhu kai dekhī,
upajī mam ur prīti biseṣī.
Sajal nayan pulakit kar jorī,
kīnhiuṅ bahu bidhi binay bahorī. (4)
500 of 872
दो०—सुनि सप्रेम मम बानी देखि दीन निज दास।
बचन सुखद गंभीर मृदु बोले रमानिवास ॥८३(क)॥
Do—Suni saprem mam bānī dekhi dīn nij dās,
bachan sukhad gambhīr mṛdu bole Ramānivās. (83a)
501 of 872
काकभसुंडि मागु बर अति प्रसन्न मोहि जानि।
अनिमादिक सिधि अपर रिधि मोच्छ सकल सुख खानि ॥८३(ख)॥
Kākabhasuṇḍi māgu bar ati prasann mohi jāni,
animādik sidhi apar ridhi mochchh sakal sukh khāni. (83b)
502 of 872
ग्यान बिबेक बिरति बिग्याना।
मुनि दुर्लभ गुन जे जग नाना॥
आजु देउँ सब संसय नाहीं।
मागु जो तोहि भाव मन माहीं ॥१॥
Gyān bibek birati bigyānā,
muni durlabh gun je jag nānā.
Āju deuṅ sab sansay nāhīṅ,
māgu jo tohi bhāv man māhīṅ. (1)
503 of 872
सुनि प्रभु बचन अधिक अनुरागेउँ।
मन अनुमान करन तब लागेउँ॥
प्रभु कह देन सकल सुख सही।
भगति आपनी देन न कही ॥२॥
Suni prabhu bachan adhik anurāgeuṅ,
man anumān karan tab lāgeuṅ.
Prabhu kah den sakal sukh sahī,
bhagati āpanī den na kahī. (2)
504 of 872
भगति हीन गुन सब सुख ऐसे।
लवन बिना बहु बिंजन जैसे॥
भजन हीन सुख कवने काजा।
अस बिचारि बोलेउँ खगराजा ॥३॥
Bhagati hīn gun sab sukh aise,
lavan binā bahu biñjan jaise.
Bhajan hīn sukh kavane kājā,
as bichāri boleuṅ khagarājā. (3)
505 of 872
जौं प्रभु होइ प्रसन्न बर देहू।
मो पर करहु कृपा अरु नेहू॥
मन भावत बर मागउँ स्वामी।
तुम्ह उदार उर अंतरजामी ॥४॥
Jauṅ prabhu hoi prasann bar dehū,
mo par karahu kṛpā aru nehū.
Man bhāvat bar māgauṅ svāmī,
tumh udār ur antarjāmī. (4)
506 of 872
दो०—अबिरल भगति बिसुद्ध तव श्रुति पुरान जो गाव।
जेहि खोजत जोगीस मुनि प्रभु प्रसाद कोउ पाव ॥८४(क)॥
Do—Abiral bhagati bisuddh tav śruti purān jo gāv,
jehi khojat jogīs muni prabhu prasād kou pāv. (84a)
507 of 872
भगत कल्पतरु प्रनत हित कृपा सिंधु सुख धाम।
सोइ निज भगति मोहि प्रभु देहु दया करि राम ॥८४(ख)॥
Bhagat kalpataru pranat hit kṛpā sindhu sukh dhām,
soi nij bhagati mohi prabhu dehu dayā kari Rām. (84b)
508 of 872
एवमस्तु कहि रघुकुलनायक।
बोले बचन परम सुखदायक॥
सुनु बायस तैं सहज सयाना।
काहे न मागसि अस बरदाना ॥१॥
Evamastu kahi Raghukulanāyak,
bole bachan param sukhadāyak.
Sunu bāyas taiṅ sahaj sayānā,
kāhe na māgasi as baradānā. (1)
509 of 872
सब सुख खानि भगति तैं मागी।
नहिं जग कोउ तोहि सम बड़भागी॥
जो मुनि कोटि जतन नहिं लहहीं।
जे जप जोग अनल तन दहहीं ॥२॥
Sab sukh khāni bhagati taiṅ māgī,
nahiṅ jag kou tohi sam baḍabhāgī.
Jo muni koṭi jatan nahiṅ lahahīṅ,
je jap jog anal tan dahahīṅ. (2)
510 of 872
रीझेउँ देखि तोरि चतुराई।
मागेहु भगति मोहि अति भाई॥
सुनु बिहंग प्रसाद अब मोरें।
सब सुभ गुन बसिहहिं उर तोरें ॥३॥
Rījheuṅ dekhi tori chaturāī,
māgehu bhagati mohi ati bhāī.
Sunu bihaṅg prasād ab moreṅ,
sab subh gun basihahiṅ ur toreṅ. (3)
511 of 872
भगति ग्यान बिग्यान बिरागा।
जोग चरित्र रहस्य बिभागा॥
जानब तैं सबही कर भेदा।
मम प्रसाद नहिं साधन खेदा ॥४॥
Bhagati gyān bigyān birāgā,
jog charitra rahasya bibhāgā.
Jānab taiṅ sabahī kar bhedā,
mam prasād nahiṅ sādhan khedā. (4)
512 of 872
दो०—माया संभव भ्रम सब अब न ब्यापिहहिं तोहि।
जानेसु ब्रह्म अनादि अज अगुन गुनाकर मोहि ॥८५(क)॥
Do—Māyā sambhav bhram sab ab na byāpihahiṅ tohi,
jānesu Brahma anādi aj agun gunākar mohi. (85a)
513 of 872
मोहि भगत प्रिय संतत अस बिचारि सुनु काग।
कायँ बचन मन मम पद करेसु अचल अनुराग ॥८५(ख)॥
Mohi bhagat priya santat as bichāri sunu kāg,
kāyaṅ bachan man mam pad karesu achal anurāg. (85b)
514 of 872
अब सुनु परम बिमल मम बानी।
सत्य सुगम निगमादि बखानी॥
निज सिद्धांत सुनावउँ तोही।
सुनु मन धरु सब तजि भजु मोही ॥१॥
Ab sunu param bimal mam bānī,
satya sugam nigamādi bakhānī.
Nij siddhāṅt sunāvauṅ tohī,
sunu man dharu sab taji bhaju mohī. (1)
515 of 872
मम माया संभव संसारा।
जीव चराचर बिबिधि प्रकारा॥
सब मम प्रिय सब मम उपजाए।
सब ते अधिक मनुज मोहि भाए ॥२॥
Mam māyā sambhav sansārā,
jīv charāchar bibidhi prakārā.
Sab mam priya sab mam upajāe,
sab te adhik manuj mohi bhāe. (2)
516 of 872
तिन्ह महँ द्विज द्विज महँ श्रुतिधारी।
तिन्ह महुँ निगम धरम अनुसारी॥
तिन्ह महँ प्रिय बिरक्त पुनि ग्यानी।
ग्यानिहु ते अति प्रिय बिग्यानी ॥३॥
Tinh mahaṅ dvij dvij mahaṅ śrutidhārī,
tinh mahuṅ nigam dharam anusārī.
Tinh mahaṅ priya birakt puni gyānī,
gyānihu te ati priya bigyānī. (3)
517 of 872
तिन्ह ते पुनि मोहि प्रिय निज दासा।
जेहि गति मोरि न दूसरि आसा॥
पुनि पुनि सत्य कहउँ तोहि पाहीं।
मोहि सेवक सम प्रिय कोउ नाहीं ॥४॥
Tinh te puni mohi priya nij dāsā,
jehi gati mori na dūsari āsā.
Puni puni satya kahauṅ tohi pāhīṅ,
mohi sevak sam priya kou nāhīṅ. (4)
518 of 872
भगति हीन बिरंचि किन होई।
सब जीवहु सम प्रिय मोहि सोई॥
भगतिवंत अति नीचउ प्रानी।
मोहि प्रानप्रिय असि मम बानी ॥५॥
Bhagati hīn Biraṅchi kin hoī,
sab jīvahu sam priya mohi soī.
Bhagativant ati nīchau prānī,
mohi prānpriya asi mam bānī. (5)
519 of 872
दो०—सुचि सुसील सेवक सुमति प्रिय कहु काहि न लाग।
श्रुति पुरान कह नीति असि सावधान सुनु काग ॥८६॥
Do—Suchi susīl sevak sumati priya kahu kāhi na lāg,
śruti purān kah nīti asi sāvadhān sunu kāg. (86)
520 of 872
एक पिता के बिपुल कुमारा।
होहिं पृथक गुन सील अचारा॥
कोउ पंडित कोउ तापस ग्याता।
कोउ धनवंत सूर कोउ दाता ॥१॥
Ek pitā ke bipul kumārā,
hohiṅ pṛthak gun sīl achārā.
Kou paṇḍit kou tāpas gyātā,
kou dhanavant sūr kou dātā. (1)
521 of 872
कोउ सर्बग्य धर्मरत कोई।
सब पर पितहि प्रीति सम होई॥
कोउ पितु भगत बचन मन कर्मा।
सपनेहुँ जान न दूसर धर्मा ॥२॥
Kou sarbagya dharmarat koī,
sab par pitahi prīti sam hoī.
Kou pitu bhagat bachan man karmā,
sapanehuṅ jān na dūsar dharmā. (2)
522 of 872
सो सुत प्रिय पितु प्रान समाना।
जद्यपि सो सब भाँति अयाना॥
एहि बिधि जीव चराचर जेते।
त्रिजग देव नर असुर समेते ॥३॥
So sut priya pitu prān samānā,
jadyapi so sab bhāṅti ayānā.
Ehi bidhi jīv charāchar jete,
trijag dev nar asur samete. (3)
523 of 872
अखिल बिस्व यह मोर उपाया।
सब पर मोहि बराबरि दाया॥
तिन्ह महँ जो परिहरि मद माया।
भजै मोहि मन बच अरु काया ॥४॥
Akhil bisva yah mor upāyā,
sab par mohi barābari dāyā.
Tinh mahaṅ jo parihari mad māyā,
bhajai mohi man bach aru kāyā. (4)
524 of 872
दो०—पुरुष नपुंसक नारि वा जीव चराचर कोइ।
सर्ब भाव भज कपट तजि मोहि परम प्रिय सोइ ॥८७(क)॥
Do—Puruṣ napuṅsak nāri vā jīv charāchar koi,
sarb bhāv bhaj kapaṭ taji mohi param priya soi. (87a)
525 of 872
सो०—सत्य कहउँ खग तोहि सुचि सेवक मम प्रानप्रिय।
अस बिचारि भजु मोहि परिहरि आस भरोस सब ॥८७(ख)॥
So—Satya kahauṅ khag tohi suchi sevak mam prānpriya,
as bichāri bhaju mohi parihari ās bharos sab. (87b)
526 of 872
कबहूँ काल न ब्यापिहि तोही।
सुमिरेसु भजेसु निरंतर मोही॥
प्रभु बचनामृत सुनि न अघाऊं।
तनु पुलकित मन अति हरषाऊं ॥१॥
Kabahūṅ kāl na byāpihi tohī,
sumiresu bhajesu nirantar mohī.
Prabhu bachanāmṛt suni na aghāūṅ,
tanu pulakit man ati haraṣāūṅ. (1)
527 of 872
सो सुख जानइ मन अरु काना।
नहिं रसना पहिं जाइ बखाना॥
प्रभु सोभा सुख जानहिं नयना।
कहि किमि सकहिं तिन्हहि नहिं बयना ॥२॥
So sukh jānai man aru kānā,
nahiṅ rasanā pahiṅ jāi bakhānā.
Prabhu sobhā sukh jānahiṅ nayanā,
kahi kimi sakahiṅ tinhahi nahiṅ bayanā. (2)
528 of 872
बहु बिधि मोहि प्रबोधि सुख देई।
लगे करन सिसु कौतुक तेई॥
सजल नयन कछु मुख करि रूखा।
चितइ मातु लागी अति भूखा ॥३॥
Bahu bidhi mohi prabodhi sukh deī,
lage karan sisu kautuk teī.
Sajal nayan kachhu mukh kari rūkhā,
chitai mātu lāgī ati bhūkhā. (3)
529 of 872
देखि मातु आतुर उठि धाई।
कहि मृदु बचन लिए उर लाई॥
गोद राखि कराव पय पाना।
रघुपति चरित ललित कर गाना ॥४॥
Dekhi mātu ātur uṭhi dhāī,
kahi mṛdu bachan lie ur lāī.
God rākhi karāv pay pānā,
Raghupati charit lalit kar gānā. (4)
530 of 872
सो०—जेहि सुख लागि पुरारि असुभ बेष कृत सिव सुखद।
अवधपुरी नर नारि तेहि सुख महुँ संतत मगन ॥८८(क)॥
So—Jehi sukh lāgi Purāri asubh beṣ kṛt Siv sukhad,
Avadhapurī nar nāri tehi sukh mahuṅ santat magan. (88a)
531 of 872
सोई सुख लवलेस जिन्ह बारक सपनेहुँ लहेउ।
ते नहिं गनहिं खगेस ब्रह्मसुखहि सज्जन सुमति ॥८८(ख)॥
Soī sukh lavales jinh bārak sapanehuṅ laheu,
te nahiṅ ganahiṅ khagesa brahmasukhahi sajjan sumati. (88b)
532 of 872
मैं पुनि अवध रहेउँ कछु काला।
देखेउँ बालबिनोद रसाला॥
राम प्रसाद भगति बर पायउँ।
प्रभु पद बंदि निजाश्रम आयउँ ॥१॥
Maiṅ puni avadh raheuṅ kachhu kālā,
dekheuṅ bālbinod rasālā.
Rām prasād bhagati bar pāyauṅ,
prabhu pad bandi nijāśram āyauṅ. (1)
533 of 872
तब ते मोहि न ब्यापी माया।
जब ते रघुनायक अपनाया॥
यह सब गुप्त चरित मैं गावा।
हरि मायाँ जिमि मोहि नचावा ॥२॥
Tab te mohi na byāpī māyā,
jab te Raghunāyak apanāyā.
Yah sab gupt charit maiṅ gāvā,
hari māyāṅ jimi mohi nachāvā. (2)
534 of 872
निज अनुभव अब कहउँ खगेसा।
बिनु हरि भजन न जाहिं कलेसा॥
राम कृपा बिनु सुनु खगराई।
जानि न जाइ राम प्रभुताई ॥३॥
Nij anubhav ab kahauṅ khagesā,
binu hari bhajan na jāhiṅ kalesā.
Rām kṛpā binu sunu khagarāī,
jāni na jāi Rām prabhutāī. (3)
535 of 872
जानें बिनु न होइ परतीती।
बिनु परतीति होइ नहिं प्रीती॥
प्रीति बिना नहिं भगति दिढ़ाई।
जिमि खगपति जल कै चिकनाई ॥४॥
Jāneṅ binu na hoi paratītī,
binu paratīti hoi nahiṅ prītī.
Prīti binā nahiṅ bhagati diḍhāī,
jimi khagapati jal kai chikanāī. (4)
536 of 872
सो०—बिनु गुर होइ कि ग्यान ग्यान कि होइ बिराग बिनु।
गावहिं बेद पुरान सुख कि लहिअ हरि भगति बिनु ॥८९(क)॥
So—Binu gur hoi ki gyān gyān ki hoi birāg binu,
gāvahiṅ bed purān sukh ki lahia hari bhagati binu. (89a)
537 of 872
कोउ बिश्राम कि पाव तात सहज संतोष बिनु।
चलै कि जल बिनु नाव कोटि जतन पचि पचि मरिअ ॥८९(ख)॥
Kou biśrām ki pāv tāt sahaj santoṣ binu,
chalai ki jal binu nāv koṭi jatan pachi pachi maria. (89b)
538 of 872
बिनु संतोष न काम नसाहीं।
काम अछत सुख सपनेहुँ नाहीं॥
राम भजन बिनु मिटहिं कि कामा।
थल बिहीन तरु कबहुँ कि जामा ॥१॥
Binu santoṣ na kām nasāhīṅ,
kām achhat sukh sapanehuṅ nāhīṅ.
Rām bhajan binu miṭahiṅ ki kāmā,
thal bihīn taru kabahuṅ ki jāmā. (1)
539 of 872
बिनु बिग्यान कि समता आवइ।
कोउ अवकास कि नभ बिनु पावइ॥
श्रद्धा बिना धर्म नहिं होई।
बिनु महि गंध कि पावइ कोई ॥२॥
Binu bigyān ki samatā āvai,
kou avakās ki nabh binu pāvai.
Śraddhā binā dharm nahiṅ hoī,
binu mahi gandh ki pāvai koī. (2)
540 of 872
बिनु तप तेज कि कर बिस्तारा।
जल बिनु रस कि होइ संसारा॥
सील कि मिल बिनु बुध सेवकाई।
जिमि बिनु तेज न रूप गोसाईं ॥३॥
Binu tap tej ki kar bistārā,
jal binu ras ki hoi sansārā.
Sīl ki mil binu budh sevakāī,
jimi binu tej na rūp gosāīṅ. (3)
541 of 872
निज सुख बिनु मन होइ कि थीरा।
परस कि होइ बिहीन समीरा॥
कवनिउ सिद्धि कि बिनु बिस्वासा।
बिनु हरि भजन न भव भय नासा ॥४॥
Nij sukh binu man hoi ki thīrā,
paras ki hoi bihīn samīrā.
Kavaniu siddhi ki binu bisvāsā,
binu hari bhajan na bhav bhay nāsā. (4)
542 of 872
दो०—बिनु बिस्वास भगति नहिं तेहि बिनु द्रवहिं न रामु।
राम कृपा बिनु सपनेहुँ जीव न लह बिश्रामु ॥९०(क)॥
Do—Binu bisvās bhagati nahiṅ tehi binu dravahiṅ na Rāmu,
Rām kṛpā binu sapanehuṅ jīv na lah biśrāmu. (90a)
543 of 872
सो०—अस बिचारि मतिधीर तजि कुतर्क संसय सकल।
भजहु राम रघुबीर करुनाकर सुंदर सुखद ॥९०(ख)॥
So—As bichāri matidhīr taji kutark sansay sakal,
bhajahu Rām Raghubīr karunākar sundar sukhad. (90b)
544 of 872
निज मति सरिस नाथ मैं गाई।
प्रभु प्रताप महिमा खगराई॥
कहेउँ न कछु करि जुगुति बिसेषी।
यह सब मैं निज नयनन्हि देखी ॥१॥
Nij mati saris nāth maiṅ gāī,
prabhu pratāp mahimā khagarāī.
Kaheuṅ na kachhu kari juguti biseṣī,
yah sab maiṅ nij nayananhi dekhī. (1)
545 of 872
महिमा नाम रूप गुन गाथा।
सकल अमित अनंत रघुनाथा॥
निज निज मति मुनि हरि गुन गावहिं।
निगम सेष सिव पार न पावहिं ॥२॥
Mahimā nām rūp gun gāthā,
sakal amit anant Raghunāthā.
Nij nij mati muni hari gun gāvahiṅ,
nigam Seṣ Siv pār na pāvahiṅ. (2)
546 of 872
तुम्हहि आदि खग मसक प्रजंता।
नभ उड़ाहिं नहिं पावहिं अंता॥
तिमि रघुपति महिमा अवगाहा।
तात कबहुँ कोउ पाव कि थाहा ॥३॥
Tumhahi ādi khag masak prajantā,
nabh uḍāhiṅ nahiṅ pāvahiṅ antā.
Timi Raghupati mahimā avagāhā,
tāt kabahuṅ kou pāv ki thāhā. (3)
547 of 872
रामु काम सत कोटि सुभग तन।
दुर्गा कोटि अमित अरि मर्दन॥
सक्र कोटि सत सरिस बिलासा।
नभ सत कोटि अमित अवकासा ॥४॥
Rāmu kām sat koṭi subhag tan,
Durgā koṭi amit ari mardan.
Sakra koṭi sat saris bilāsā,
nabh sat koṭi amit avakāsā. (4)
548 of 872
दो०—मरुत कोटि सत बिपुल बल रबि सत कोटि प्रकास।
ससि सत कोटि सुसीतल समन सकल भव त्रास ॥९१(क)॥
Do—Marut koṭi sat bipul bal rabi sat koṭi prakās,
sasi sat koṭi susītal saman sakal bhav trās. (91a)
549 of 872
काल कोटि सत सरिस अति दुस्तर दुर्ग दुरंत।
धूमकेतु सत कोटि सम दुराधरष भगवंत ॥९१(ख)॥
Kāl koṭi sat saris ati dustar durg durant,
Dhūmketu sat koṭi sam durādharaṣ bhagavant. (91b)
550 of 872
प्रभु अगाध सत कोटि पताला।
समन कोटि सत सरिस कराला॥
तीरथ अमित कोटि सम पावन।
नाम अखिल अघ पूग नसावन ॥१॥
Prabhu agādh sat koṭi patālā,
saman koṭi sat saris karālā.
Tīrath amit koṭi sam pāvan,
nām akhil agh pūg nasāvan. (1)
551 of 872
हिमगिरि कोटि अचल रघुबीरा।
सिंधु कोटि सत सम गंभीरा॥
कामधेनु सत कोटि समाना।
सकल काम दायक भगवाना ॥२॥
Himagiri koṭi achal Raghubīrā,
sindhu koṭi sat sam gambhīrā.
Kāmadhenu sat koṭi samānā,
sakal kām dāyak bhagavānā. (2)
552 of 872
सारद कोटि अमित चतुराई।
बिधि सत कोटि सृष्टि निपुनाई॥
बिष्नु कोटि सम पालन कर्ता।
रुद्र कोटि सत सम संहर्ता ॥३॥
Sārad koṭi amit chaturāī,
bidhi sat koṭi sṛṣṭi nipunāī.
Biṣnu koṭi sam pālan kartā,
Rudra koṭi sat sam sanhartā. (3)
553 of 872
धनद कोटि सत सम धनवाना।
माया कोटि प्रपंच निधाना॥
भार धरन सत कोटि अहीसा।
निरवधि निरुपम प्रभु जगदीसा ॥४॥
Dhanad koṭi sat sam dhanavānā,
māyā koṭi prapañch nidhānā.
Bhār dharan sat koṭi ahīsā,
niravadhi nirupam prabhu jagadīsā. (4)
554 of 872
छं०—निरुपम न उपमा आन राम समान रामु निगम कहै।
जिमि कोटि सत खद्योत सम रबि कहत अति लघुता लहै॥
एहि भाँति निज निज मति बिलास मुनीस हरिहि बखानहीं।
प्रभु भाव गाहक अति कृपाल सप्रेम सुनि सुख मानहीं॥
Chhand—Nirupam na upamā ān Rām samān Rāmu nigam kahai,
jimi koṭi sat khadyot sam rabi kahat ati laghutā lahai.
Ehi bhāṅti nij nij mati bilās munīs harihi bakhānahīṅ,
prabhu bhāv gāhak ati kṛpāl saprem suni sukh mānahīṅ.
555 of 872
दो०—रामु अमित गुन सागर थाह कि पावइ कोइ।
संतन्ह सन जस किछु सुनेउँ तुम्हहि सुनायउँ सोइ ॥९२(क)॥
Do—Rāmu amit gun sāgar thāh ki pāvai koi,
santanh san jas kichhu suneuṅ tumhahi sunāyauṅ soi. (92a)
556 of 872
सो०—भाव बस्य भगवान सुख निधान करुना भवन।
तजि ममता मद मान भजिअ सदा सीतारवन ॥९२(ख)॥
So—Bhāv basya bhagavān sukh nidhān karunā bhavan,
taji mamatā mad mān bhajia sadā Sītāravan. (92b)
557 of 872
सुनि भुसुंडि के बचन सुहाए।
हरषित खगपति पंख फुलाए॥
नयन नीर मन अति हरषाना।
श्रीरघुपति प्रताप उर आना ॥१॥
Suni Bhusuṇḍi ke bachan suhāe,
haraṣit khagapati paṅkh phulāe.
Nayan nīr man ati haraṣānā,
śrīraghupati pratāp ur ānā. (1)
558 of 872
पाछिल मोह समुझि पछिताना।
ब्रह्म अनादि मनुज करि माना॥
पुनि पुनि काग चरन सिरु नावा।
जानि राम सम प्रेम बढ़ावा ॥२॥
Pāchhil moh samujhi pachhitānā,
Brahma anādi manuj kari mānā.
Puni puni kāg charan siru nāvā,
jāni Rām sam prem baḍhāvā. (2)
559 of 872
गुर बिनु भव निधि तरइ न कोई।
जौं बिरंचि संकर सम होई॥
संसय सर्प ग्रसेउ मोहि ताता।
दुखद लहरि कुतर्क बहु ब्राता ॥३॥
Gur binu bhav nidhi tarai na koī,
jauṅ biranchi Saṅkar sam hoī.
Sansay sarpa graseu mohi tātā,
dukhad lahari kutark bahu brātā. (3)
560 of 872
तव सरूप गारुड़ि रघुनायक।
मोहि जिआयउ जन सुखदायक॥
तव प्रसाद मम मोह नसाना।
राम रहस्य अनूपम जाना ॥४॥
Tav sarūp gāruḍi Raghunāyak,
mohi jiāyau jan sukhadāyak.
Tav prasād mam moh nasānā,
Rām rahasya anūpam jānā. (4)
561 of 872
दो०—ताहि प्रसंसि बिबिधि बिधि सीस नाइ कर जोरि।
बचन बिनीत सप्रेम मृदु बोलेउ गरुड़ बहोरि ॥९३(क)॥
Do—Tāhi prasansi bibidhi bidhi sīs nāi kar jori,
bachan binīt saprem mṛdu boleu Garuḍ bahori. (93a)
562 of 872
प्रभु अपने अबिबेक ते बूझउँ स्वामी तोहि।
कृपासिंधु सादर कहहु जानि दास निज मोहि ॥९३(ख)॥
Prabhu apane abibek te būjhauṅ svāmī tohi,
kṛpāsindhu sādar kahahu jāni dās nij mohi. (93b)
563 of 872
तुम्ह सर्बग्य तग्य तम पारा।
सुमति सुसील सरल आचारा॥
ग्यान बिरति बिग्यान निवासा।
रघुनायक के तुम्ह प्रिय दासा ॥१॥
Tumh sarbagya tagya tam pārā,
sumati susīl saral āchārā.
Gyān birati bigyān nivāsā,
Raghunāyak ke tumh priya dāsā. (1)
564 of 872
कारन कवन देह यह पाई।
तात सकल मोहि कहहु बुझाई॥
राम चरित सर सुंदर स्वामी।
पायहु कहाँ कहहु नभगामी ॥२॥
Kāran kavan deh yah pāī,
tāt sakal mohi kahahu bujhāī.
Rām charit sar sundar svāmī,
pāyahu kahāṅ kahahu nabhagāmī. (2)
565 of 872
नाथ सुना मैं अस सिव पाहीं।
महा प्रलयहुँ नास तव नाहीं॥
मुधा बचन नहिं ईस्वर कहई।
सोउ मोरें मन संसय अहई ॥३॥
Nāth sunā maiṅ as Siv pāhīṅ,
mahā pralayahuṅ nās tav nāhīṅ.
Mudhā bachan nahiṅ īsvar kahaī,
sou moreṅ man sansay ahaī. (3)
566 of 872
अग जग जीव नाग नर देवा।
नाथ सकल जगु काल कलेवा॥
अंड कटाह अमित लयकारी।
कालु सदा दुरतिक्रम भारी ॥४॥
Ag jag jīv nāg nar devā,
nāth sakal jagu kāl kalevā.
Aṇḍ kaṭāh amit layakārī,
kālu sadā duratikram bhārī. (4)
567 of 872
सो०—तुम्हहि न ब्यापत काल अति कराल कारन कवन।
मोहि सो कहहु कृपाल ग्यान प्रभाव कि जोग बल ॥९४(क)॥
So—Tumhahi na byāpat kāl ati karāl kāran kavan,
mohi so kahahu kṛpāl gyān prabhāv ki jog bal. (94a)
568 of 872
दो०—प्रभु तव आश्रम आएँ मोर मोह भ्रम भाग।
कारन कवन सो नाथ सब कहहु सहित अनुराग ॥९४(ख)॥
Do—Prabhu tav āśram āeṅ mor moh bhram bhāg,
kāran kavan so nāth sab kahahu sahit anurāg. (94b)
569 of 872
गरुड़ गिरा सुनि हरषेउ कागा।
बोलेउ उमा परम अनुरागा॥
धन्य धन्य तव मति उरगारी।
प्रस्न तुम्हारि मोहि अति प्यारी ॥१॥
Garuḍ girā suni haraṣeu kāgā,
boleu Umā param anurāgā.
Dhanya dhanya tav mati uragārī,
prasna tumhāri mohi ati pyārī. (1)
570 of 872
सुनि तव प्रस्न सप्रेम सुहाई।
बहुत जनम कै सुधि मोहि आई॥
सब निज कथा कहउँ मैं गाई।
तात सुनहु सादर मन लाई ॥२॥
Suni tav prasna saprem suhāī,
bahut janam kai sudhi mohi āī.
Sab nij kathā kahauṅ maiṅ gāī,
tāt sunahu sādar man lāī. (2)
571 of 872
जप तप मख सम दम ब्रत दाना।
बिरति बिबेक जोग बिग्याना॥
सब कर फल रघुपति पद प्रेमा।
तेहि बिनु कोउ न पावइ छेमा ॥३॥
Jap tap makh sam dam brat dānā,
birati bibek jog bigyānā.
Sab kar phal Raghupati pad premā,
tehi binu kou na pāvai chhemā. (3)
572 of 872
एहिं तन राम भगति मैं पाई।
ताते मोहि ममता अधिकाई॥
जेहि तें कछु निज स्वारथ होई।
तेहि पर ममता कर सब कोई ॥४॥
Ehiṅ tan Rām bhagati maiṅ pāī,
tāte mohi mamatā adhikāī.
Jehi teṅ kachhu nij svārath hoī,
tehi par mamatā kar sab koī. (4)
573 of 872
सो०—पन्नगारि असि नीति श्रुति संमत सज्जन कहहिं।
अति नीचहु सन प्रीति करिअ जानि निज परम हित ॥९५(क)॥
So—Pannagāri asi nīti śruti sanmat sajjan kahahiṅ,
ati nīchahu san prīti karia jāni nij param hit. (95a)
574 of 872
पाट कीट तें होइ तेहि तें पाटंबर रुचिर।
कृमि पालइ सबु कोइ परम अपावन प्रान सम ॥९५(ख)॥
Pāṭ kīṭ teṅ hoi tehi teṅ pāṭambar ruchir,
kṛmi pālai sabu koi param apāvan prān sam. (95b)
575 of 872
स्वारथ साँच जीव कहुँ एहा।
मन क्रम बचन राम पद नेहा॥
सोइ पावन सोइ सुभग सरीरा।
जो तनु पाइ भजिअ रघुबीरा ॥१॥
Svārath sāṅch jīv kahuṅ ehā,
man kram bachan Rām pad nehā.
Soi pāvan soi subhag sarīrā,
jo tanu pāi bhajia Raghubīrā. (1)
576 of 872
राम बिमुख लहि बिधि सम देही।
कबि कोबिद न प्रसंसहिं तेही॥
राम भगति एहिं तन उर जामी।
ताते मोहि परम प्रिय स्वामी ॥२॥
Rām bimukh lahi bidhi sam dehī,
kabi kobid na prasansahiṅ tehī.
Rām bhagati ehiṅ tan ur jāmī,
tāte mohi param priya svāmī. (2)
577 of 872
तजउँ न तन निज इच्छा मरना।
तन बिनु बेद भजन नहिं बरना॥
प्रथम मोहँ मोहि बहुत बिगोवा।
राम बिमुख सुख कबहुँ न सोवा ॥३॥
Tajauṅ na tan nij ichchhā maranā,
tan binu bed bhajan nahiṅ baranā.
Pratham mohaṅ mohi bahut bigovā,
Rām bimukh sukh kabahuṅ na sovā. (3)
578 of 872
नाना जनम कर्म पुनि नाना।
किए जोग जप तप मख दाना॥
कवन जोनि जनमेउँ जहँ नाहीं।
मैं खगेस भ्रमि भ्रमि जग माहीं ॥४॥
Nānā janam karma puni nānā,
kie jog jap tap makh dānā.
Kavan joni janameuṅ jahaṅ nāhīṅ,
maiṅ Khagesa bhrami bhrami jag māhīṅ. (4)
579 of 872
देखेउँ करि सब करम गोसाईं।
सुखी न भयउँ अबहिं की नाईं॥
सुधि मोहि नाथ जन्म बहु केरी।
सिव प्रसाद मति मोहँ न घेरी ॥५॥
Dekheuṅ kari sab karam gosāīṅ,
sukhī na bhayauṅ abahiṅ kī nāīṅ.
Sudhi mohi nāth janma bahu kerī,
Siv prasād mati mohaṅ na gherī. (5)
580 of 872
दो०—प्रथम जन्म के चरित अब कहउँ सुनहु बिहगेस।
सुनि प्रभु पद रति उपजइ जातें मिटहिं कलेस ॥९६(क)॥
Do—Pratham janma ke charit ab kahauṅ sunahu Bihagesa,
suni prabhu pad rati upajai jāteṅ miṭahiṅ kalesa. (96a)
581 of 872
पूरब कल्प एक प्रभु जुग कलिजुग मल मूल।
नर अरु नारि अधर्म रत सकल निगम प्रतिकूल ॥९६(ख)॥
Pūrab kalpa ek prabhu jug kalijug mal mūl,
nar aru nāri adharm rat sakal nigam pratikūl. (96b)
582 of 872
तेहिं कलिजुग कोसलपुर जाई।
जन्मत भयउँ सूद्र तनु पाई॥
सिव सेवक मन क्रम अरु बानी।
आन देव निंदक अभिमानी ॥१॥
Tehiṅ kalijug Kosalapur jāī,
janmat bhayauṅ sūdra tanu pāī.
Siv sevak man kram aru bānī,
ān dev nindak abhimānī. (1)
583 of 872
धन मद मत्त परम बाचाला।
उग्रबुद्धि उर दंभ बिसाला॥
जदपि रहेउँ रघुपति रजधानी।
तदपि न कछु महिमा तब जानी ॥२॥
Dhan mad matta param bāchālā,
ugrabuddhi ur dambh bisālā.
Jadapi raheuṅ Raghupati rajadhānī,
tadapi na kachhu mahimā tab jānī. (2)
584 of 872
अब जाना मैं अवध प्रभावा।
निगमागम पुरान अस गावा॥
कवनेहुँ जन्म अवध बस जोई।
राम परायन सो परि होई ॥३॥
Ab jānā maiṅ Avadh prabhāvā,
nigamāgam purān as gāvā.
Kavanehuṅ janma Avadh bas joī,
Rām parāyan so pari hoī. (3)
585 of 872
अवध प्रभाव जान तब प्रानी।
जब उर बसहिं रामु धनुपानी॥
सो कलिकाल कठिन उरगारी।
पाप परायन सब नर नारी ॥४॥
Avadh prabhāv jān tab prānī,
jab ur basahiṅ Rāmu dhanupānī.
So kalikāl kaṭhin uragārī,
pāp parāyan sab nar nārī. (4)
586 of 872
दो०—कलिमल ग्रसे धर्म सब लुप्त भए सदग्रंथ।
दंभिन्ह निज मति कल्पि करि प्रगट किए बहु पंथ ॥९७(क)॥
Do—Kalimal grase dharma sab lupt bhae sadgrantha,
dambhinh nij mati kalpi kari pragaṭ kie bahu pantha. (97a)
587 of 872
भए लोग सब मोहबस लोभ ग्रसे सुभ कर्म।
सुनु हरिजान ग्यान निधि कहउँ कछुक कलिधर्म ॥९७(ख)॥
Bhae log sab mohabas lobh grase subh karma,
sunu harijān gyān nidhi kahauṅ kachhuk kalidharma. (97b)
588 of 872
बरन धर्म नहिं आश्रम चारी।
श्रुति बिरोध रत सब नर नारी॥
द्विज श्रुति बेचक भूप प्रजासन।
कोउ नहिं मान निगम अनुसासन ॥१॥
Baran dharm nahiṅ āśram chārī,
śruti birodh rat sab nar nārī.
Dvij śruti bechak bhūp prajāsan,
kou nahiṅ mān nigam anusāsan. (1)
589 of 872
मारग सोइ जा कहुँ जोइ भावा।
पंडित सोइ जो गाल बजावा॥
मिथ्यारंभ दंभ रत जोई।
ता कहुँ संत कहइ सब कोई ॥२॥
Mārag soi jā kahuṅ joi bhāvā,
paṇḍit soi jo gāl bajāvā.
Mithyārambh dambh rat joī,
tā kahuṅ sant kahai sab koī. (2)
590 of 872
सोइ सयान जो परधन हारी।
जो कर दंभ सो बड़ आचारी॥
जो कह झूँठ मसखरी जाना।
कलिजुग सोइ गुनवंत बखाना ॥३॥
Soi sayān jo paradhan hārī,
jo kar dambh so baḍ āchārī.
Jo kah jhūṅṭh masakharī jānā,
kalijug soi gunavant bakhānā. (3)
591 of 872
निराचार जो श्रुति पथ त्यागी।
कलिजुग सोइ ग्यानी सो बिरागी॥
जाकें नख अरु जटा बिसाला।
सोइ तापस प्रसिद्ध कलिकाला ॥४॥
Nirāchār jo śruti path tyāgī,
kalijug soi gyānī so birāgī.
Jākeṅ nakh aru jaṭā bisālā,
soi tāpas prasiddh kalikālā. (4)
592 of 872
दो०—असुभ बेष भूषन धरें भच्छाभच्छ जे खाहिं।
तेइ जोगी तेइ सिद्ध नर पूज्य ते कलिजुग माहिं ॥९८(क)॥
Do—Asubh beṣ bhūṣan dhareṅ bhachhābhachh je khāhiṅ,
tei jogī tei siddh nar pūjya te kalijug māhiṅ. (98a)
593 of 872
सो०—जे अपकारी चार तिन्ह कर गौरव मान्य तेइ।
मन क्रम बचन लबार तेइ बकता कलिकाल महुँ ॥९८(ख)॥
So—Je apakārī chār tinh kar gaurav mānya tei,
man kram bachan labār tei bakatā kalikāl mahuṅ. (98b)
594 of 872
नारि बिबस नर सकल गोसाईं।
नाचहिं नट मर्कट की नाईं॥
सूद्र द्विजन्ह उपदेसहिं ग्याना।
मेलि जनेऊ लेहिं कुदाना ॥१॥
Nāri bibas nar sakal gosāīṅ,
nāchahiṅ naṭ markaṭ kī nāīṅ.
Sūdra dvijanh upadesahiṅ gyānā,
meli janeū lehiṅ kudānā. (1)
595 of 872
सब नर काम लोभ रत क्रोधी।
देव बिप्र श्रुति संत बिरोधी॥
गुन मंदिर सुंदर पति त्यागी।
भजहिं नारि पर पुरुष अभागी ॥२॥
Sab nar kām lobh rat krodhī,
dev bipra śruti sant birodhī.
Gun mandir sundar pati tyāgī,
bhajahiṅ nāri par puruṣ abhāgī. (2)
596 of 872
सौभागिनीं बिभूषन हीना।
बिधवन्ह के सिंगार नबीना॥
गुर सिष बधिर अंध का लेखा।
एक न सुनइ एक नहिं देखा ॥३॥
Saubhāginīṅ bibhūṣan hīnā,
bidhavanh ke siṅgār nabīnā.
Gur siṣ badhir andh kā lekhā,
ek na sunai ek nahiṅ dekhā. (3)
597 of 872
हरइ सिष्य धन सोक न हरई।
सो गुर घोर नरक महुँ परई॥
मातु पिता बालकन्हि बोलावहिं।
उदर भरै सोइ धर्म सिखावहिं ॥४॥
Harai siṣya dhan sok na haraī,
so gur ghor narak mahuṅ paraī.
Mātu pitā bālakanhi bolāvahiṅ,
udar bharai soi dharma sikhāvahiṅ. (4)
598 of 872
दो०—ब्रह्म ग्यान बिनु नारि नर कहहिं न दूसरि बात।
कौड़ी लागि लोभ बस करहिं बिप्र गुर घात ॥९९(क)॥
Do—Brahma gyān binu nāri nar kahahiṅ na dūsari bāt,
kauḍī lāgi lobh bas karahiṅ bipra gur ghāt. (99a)
599 of 872
बादहिं सूद्र द्विजन्ह सन हम तुम्ह ते कछु घाटि।
जानइ ब्रह्म सो बिप्रबर आँखि देखावहिं डाटि ॥९९(ख)॥
Bādahiṅ sūdra dvijanh san ham tumh te kachhu ghāṭi,
jānai Brahma so biprabar āṅkhi dekhāvahiṅ ḍāṭi. (99b)
600 of 872
पर त्रिय लंपट कपट सयाने।
मोह द्रोह ममता लपटाने॥
तेइ अभेदबादी ग्यानी नर।
देखा मैं चरित्र कलिजुग कर ॥१॥
Par triya lampaṭ kapaṭ sayāne,
moh droh mamatā lapaṭāne.
Tei abhedabādī gyānī nar,
dekhā maiṅ charitra kalijug kar. (1)
601 of 872
आपु गए अरु तिन्हहू घालहिं।
जे कहुँ सत मारग प्रतिपालहिं॥
कल्प कल्प भरि एक एक नरका।
परहिं जे दूषहिं श्रुति करि तरका ॥२॥
Āpu gae aru tinhahū ghālahiṅ,
je kahuṅ sat mārag pratipālahiṅ.
Kalpa kalpa bhari ek ek narakā,
parahiṅ je dūṣahiṅ śruti kari tarakā. (2)
602 of 872
जे बरनाधम तेलि कुम्हारा।
स्वपच किरात कोल कलवारा॥
नारि मुई गृह संपति नासी।
मूड़ मुड़ाइ होहिं संन्यासी ॥३॥
Je baranādham teli kumhārā,
svapach kirāt kol kalavārā.
Nāri muī gṛh sampati nāsī,
mūḍ muḍāi hohiṅ sannyāsī. (3)
603 of 872
ते बिप्रन्ह सन आपु पुजावहिं।
उभय लोक निज हाथ नसावहिं॥
बिप्र निरच्छर लोलुप कामी।
निराचार सठ बृषली स्वामी ॥४॥
Te bipranh san āpu pujāvahiṅ,
ubhay lok nij hāth nasāvahiṅ.
Bipra nirachchhar lolup kāmī,
nirāchār saṭh bṛṣalī svāmī. (4)
604 of 872
सूद्र करहिं जप तप ब्रत नाना।
बैठि बरासन कहहिं पुराना॥
सब नर कल्पित करहिं अचारा।
जाइ न बरनि अनीति अपारा ॥५॥
Sūdra karahiṅ jap tap brat nānā,
baiṭhi barāsan kahahiṅ purānā.
Sab nar kalpit karahiṅ achārā,
jāi na barani anīti apārā. (5)
605 of 872
दो०—भए बरन संकर कलि भिन्नसेतु सब लोग।
करहिं पाप पावहिं दुख भय रुज सोक बियोग ॥१००(क)॥
Do—Bhae baran saṅkar kali bhinnasetu sab log,
karahiṅ pāp pāvahiṅ dukh bhay ruj sok biyog. (100a)
606 of 872
श्रुति संमत हरि भक्ति पथ संजुत बिरति बिबेक।
तेहिं न चलहिं नर मोह बस कल्पहिं पंथ अनेक ॥१००(ख)॥
Śruti sanmat hari bhakti path sanjut birati bibek,
tehiṅ na chalahiṅ nar moh bas kalpahiṅ panth anek. (100b)
607 of 872
छं०—बहु दाम सँवारहिं धाम जती।
बिषया हरि लीन्हि न रहि बिरती॥
तपसी धनवंत दरिद्र गृही।
कलि कौतुक तात न जात कही ॥१॥
Chhand—Bahu dām sanvārahiṅ dhām jatī,
biṣayā hari līnhi na rahi biratī.
Tapasī dhanavant daridra gṛhī,
kali kautuk tāt na jāt kahī. (1)
608 of 872
कुलवंति निकारहिं नारि सती।
गृह आनहिं चेरि निबेरि गती॥
सुत मानहिं मातु पिता तब लौं।
अबलानन दीख नहीं जब लौं ॥२॥
Kulavanti nikārahiṅ nāri satī,
gṛh ānahiṅ cheri niberi gatī.
Sut mānahiṅ mātu pitā tab lauṅ,
abalānan dīkh nahīṅ jab lauṅ. (2)
609 of 872
ससुरारि पिआरि लगी जब तें।
रिपुरूप कुटुंब भए तब तें॥
नृप पाप परायन धर्म नहीं।
करि दंड बिडंब प्रजा नितहीं ॥३॥
Sasurāri piāri lagī jab teṅ,
riparūp kuṭumb bhae tab teṅ.
Nṛp pāp parāyan dharma nahīṅ,
kari daṇḍ biḍamb prajā nitahīṅ. (3)
610 of 872
धनवंत कुलीन मलीन अपी।
द्विज चिन्ह जनेउ उघार तपी॥
नहिं मान पुरान न बेदहि जो।
हरि सेवक संत सही कलि सो ॥४॥
Dhanavant kulīn malīn apī,
dvij chinh janeu ughār tapī.
Nahiṅ mān purān na bedahi jo,
hari sevak sant sahī kali so. (4)
611 of 872
कबि बृंद उदार दुनी न सुनी।
गुन दूषक ब्रात न कोपि गुनी॥
कलि बारहिं बार दुकाल परै।
बिनु अन्न दुखी सब लोग मरै ॥५॥
Kabi bṛnd udār dunī na sunī,
gun dūṣak brāt na kopi gunī.
Kali bārahiṅ bār dukāl parai,
binu anna dukhī sab log marai. (5)
612 of 872
दो०—सुनु खगेस कलि कपट हठ दंभ द्वेष पाषंड।
मान मोह मारादि मद ब्यापि रहे ब्रह्मंड ॥१०१(क)॥
Do—Sunu khagesa kali kapaṭ haṭh dambh dveṣ pāṣaṇḍ,
mān moh mārādi mad byāpi rahe brahmaṇḍ. (101a)
613 of 872
तामस धर्म करहिं नर जप तप ब्रत मख दान।
देव न बरषहिं धरनीं बए न जामहिं धान ॥१०१(ख)॥
Tāmas dharma karahiṅ nar jap tap brat makh dān,
dev na baraṣahiṅ dharanīṅ bae na jāmahiṅ dhān. (101b)
614 of 872
छं०—अबला कच भूषन भूरि छुधा।
धनहीन दुखी ममता बहुधा॥
सुख चाहहिं मूढ़ न धर्म रता।
मति थोरि कठोरि न कोमलता ॥१॥
Chhand—Abalā kach bhūṣan bhūri chhudhā,
dhanahīn dukhī mamatā bahudhā.
Sukh chāhahiṅ mūḍh na dharma ratā,
mati thori kaṭhori na komalatā. (1)
615 of 872
नर पीड़ित रोग न भोग कहीं।
अभिमान बिरोध अकारनहीं॥
लघु जीवन संबतु पंच दसा।
कलपांत न नास गुमानु असा ॥२॥
Nar pīḍit rog na bhog kahīṅ,
abhimān birodh akāranahīṅ.
Laghu jīvan sanbatu panch dasā,
kalapānt na nās gumānu asā. (2)
616 of 872
कलिकाल बिहाल किए मनुजा।
नहिं मानत क्वौ अनुजा तनुजा॥
नहिं तोष बिचार न सीतलता।
सब जाति कुजाति भए मगता ॥३॥
Kalikāl bihāl kie manujā,
nahiṅ mānat kvau anujā tanujā.
Nahiṅ toṣ bichār na sītalatā,
sab jāti kujāti bhae magatā. (3)
617 of 872
इरिषा परुषाच्छर लोलुपता।
भरि पूरि रही समता बिगता॥
सब लोग बियोग बिसोक हए।
बरनाश्रम धर्म अचार गए ॥४॥
Iriṣā paruṣāchchhar lolupatā,
bhari pūri rahī samatā bigatā.
Sab log biyog bisok hae,
baranāśram dharma achār gae. (4)
618 of 872
दम दान दया नहिं जानपनी।
जड़ता परबंचनताति घनी॥
तनु पोषक नारि नरा सगरे।
परनिंदक जे जग मो बगरे ॥५॥
Dam dān dayā nahiṅ jānapanī,
jaḍatā parabanchanatāti ghanī.
Tanu poṣak nāri narā sagare,
paranindak je jag mo bagare. (5)
619 of 872
दो०—सुनु ब्यालारि काल कलि मल अवगुन आगार।
गुनउ बहुत कलिजुग कर बिनु प्रयास निस्तार ॥१०२(क)॥
Do—Sunu byālāri kāl kali mal avagun āgār,
gunau bahut kalijug kar binu prayās nistār. (102a)
620 of 872
कृतजुग त्रेताँ द्वापर पूजा मख अरु जोग।
जो गति होइ सो कलि हरि नाम ते पावहिं लोग ॥१०२(ख)॥
Kṛtajug tretāṅ dvāpar pūjā makh aru jog,
jo gati hoi so kali hari nām te pāvahiṅ log. (102b)
621 of 872
कृतजुग सब जोगी बिग्यानी।
करि हरि ध्यान तरहिं भव प्रानी॥
त्रेताँ बिबिध जग्य नर करहीं।
प्रभुहि समर्पि कर्म भव तरहीं ॥१॥
Kṛtajug sab jogī bigyānī,
kari hari dhyān tarahiṅ bhav prānī.
Tretāṅ bibidh jagya nar karahīṅ,
prabhuhi samarpi karma bhav tarahīṅ. (1)
622 of 872
द्वापर करि रघुपति पद पूजा।
नर भव तरहिं उपाय न दूजा॥
कलिजुग केवल हरि गुन गाहा।
गावत नर पावहिं भव थाहा ॥२॥
Dvāpar kari Raghupati pad pūjā,
nar bhav tarahiṅ upāy na dūjā.
Kalijug keval hari gun gāhā,
gāvat nar pāvahiṅ bhav thāhā. (2)
623 of 872
कलिजुग जोग न जग्य न ग्याना।
एक अधार राम गुन गाना॥
सब भरोस तजि जो भज रामहि।
प्रेम समेत गाव गुन ग्रामहि ॥३॥
Kalijug jog na jagya na gyānā,
ek adhār Rām gun gānā.
Sab bharos taji jo bhaj rāmahi,
prem sameta gāv gun grāmahi. (3)
624 of 872
सोइ भव तर कछु संसय नाहीं।
नाम प्रताप प्रगट कलि माहीं॥
कलि कर एक पुनीत प्रतापा।
मानस पुन्य होहिं नहिं पापा ॥४॥
Soi bhav tar kachhu sansay nāhīṅ,
nām pratāp pragaṭ kali māhīṅ.
Kali kar ek punīt pratāpā,
mānas punya hohiṅ nahiṅ pāpā. (4)
625 of 872
दो०—कलिजुग सम जुग आन नहिं जौं नर कर बिस्वास।
गाइ राम गुन गन बिमल भव तर बिनहिं प्रयास ॥१०३(क)॥
Do—Kalijug sam jug ān nahiṅ jauṅ nar kar bisvās,
gāi Rām gun gan bimal bhav tar binahiṅ prayās. (103a)
626 of 872
प्रगट चारि पद धर्म के कलि महुँ एक प्रधान।
जेन केन बिधि दीन्हें दान करइ कल्यान ॥१०३(ख)॥
Pragaṭ chāri pad dharma ke kali mahuṅ ek pradhān,
jen ken bidhi dīnheṅ dān karai kalyān. (103b)
627 of 872
नित जुग धर्म होहिं सब केरे।
हृदयँ राम माया के प्रेरे॥
सुद्ध सत्व समता बिग्याना।
कृत प्रभाव प्रसन्न मन जाना ॥१॥
Nit jug dharma hohiṅ sab kere,
hṛdayaṅ Rām māyā ke prere.
Suddh satva samatā bigyānā,
kṛt prabhāv prasanna man jānā. (1)
628 of 872
सत्व बहुत रज कछु रति कर्मा।
सब बिधि सुख त्रेता कर धर्मा॥
बहु रज स्वल्प सत्व कछु तामस।
द्वापर धर्म हरष भय मानस ॥२॥
Satva bahut raj kachhu rati karmā,
sab bidhi sukh tretā kar dharmā.
Bahu raj svalpa satva kachhu tāmas,
dvāpar dharma haraṣ bhay mānas. (2)
629 of 872
तामस बहुत रजोगुन थोरा।
कलि प्रभाव बिरोध चहुँ ओरा॥
बुध जुग धर्म जानि मन माहीं।
तजि अधर्म रति धर्म कराहीं ॥३॥
Tāmas bahut rajogun thorā,
kali prabhāv birodh chahuṅ orā.
Budh jug dharma jāni man māhīṅ,
taji adharm rati dharma karāhīṅ. (3)
630 of 872
काल धर्म नहिं ब्यापहिं ताही।
रघुपति चरन प्रीति अति जाही॥
नट कृत बिकट कपट खगराया।
नट सेवकहि न ब्यापइ माया ॥४॥
Kāl dharma nahiṅ byāpahiṅ tāhī,
Raghupati charan prīti ati jāhī.
Naṭ kṛt bikaṭ kapaṭ khagarāyā,
naṭ sevakahi na byāpai māyā. (4)
631 of 872
दो०—हरि माया कृत दोष गुन बिनु हरि भजन न जाहिं।
भजिअ राम तजि काम सब अस बिचारि मन माहिं ॥१०४(क)॥
Do—Hari māyā kṛt doṣ gun binu hari bhajan na jāhiṅ,
bhajia Rām taji kām sab as bichāri man māhiṅ. (104a)
632 of 872
तेहिं कलिकाल बरष बहु बसेउँ अवध बिहगेस।
परेउ दुकाल बिपति बस तब मैं गयउँ बिदेस ॥१०४(ख)॥
Tehiṅ kalikāl baraṣ bahu baseuṅ Avadh bihagesa,
pareu dukāl bipati bas tab maiṅ gayauṅ bides. (104b)
633 of 872
गयउँ उजेनी सुनु उरगारी।
दीन मलीन दरिद्र दुखारी॥
गएँ काल कछु संपति पाई।
तहँ पुनि करउँ संभु सेवकाई ॥१॥
Gayauṅ Ujenī sunu uragārī,
dīn malīn daridra dukhārī.
Gaeṅ kāl kachhu sanpati pāī,
tahaṅ puni karauṅ Sambhu sevakāī. (1)
634 of 872
बिप्र एक बैदिक सिव पूजा।
करइ सदा तेहि काजु न दूजा॥
परम साधु परमारथ बिंदक।
संभु उपासक नहिं हरि निंदक ॥२॥
Bipra ek baidik Siv pūjā,
karai sadā tehi kāju na dūjā.
Param sādhu paramārath bindak,
Sambhu upāsak nahiṅ hari nindak. (2)
635 of 872
तेहि सेवउँ मैं कपट समेता।
द्विज दयाल अति नीति निकेता॥
बाहिज नम्र देखि मोहि साईं।
बिप्र पढ़ाव पुत्र की नाईं ॥३॥
Tehi sevauṅ maiṅ kapaṭ sametā,
dvij dayāl ati nīti niketā.
Bāhij namra dekhi mohi sāīṅ,
bipra paḍhāv putra kī nāīṅ. (3)
636 of 872
संभु मंत्र मोहि द्विजबर दीन्हा।
सुभ उपदेस बिबिध बिधि कीन्हा॥
जपउँ मंत्र सिव मंदिर जाई।
हृदयँ दंभ अहमिति अधिकाई ॥४॥
Sambhu mantra mohi dvijabar dīnhā,
subh upades bibidh bidhi kīnhā.
Japauṅ mantra Siv mandir jāī,
hṛdayaṅ dambh ahamiti adhikāī. (4)
637 of 872
दो०—मैं खल मल संकुल मति नीच जाति बस मोह।
हरिजन द्विज देखें जरउँ करउँ बिष्नु कर द्रोह ॥१०५(क)॥
Do—Maiṅ khal mal sankul mati nīch jāti bas moh,
harijan dvij dekheṅ jarauṅ karauṅ Biṣnu kar droh. (105a)
638 of 872
सो०—गुर नित मोहि प्रबोध दुखित देखि आचरन मम।
मोहि उपजइ अति क्रोध दंभिहि नीति कि भावई ॥१०५(ख)॥
So—Gur nit mohi prabodh dukhit dekhi ācharan mam,
mohi upajai ati krodh dambhihi nīti ki bhāvaī. (105b)
639 of 872
एक बार गुर लीन्ह बोलाई।
मोहि नीति बहु भाँति सिखाई॥
सिव सेवा कर फल सुत सोई।
अबिरल भगति राम पद होई ॥१॥
Ek bār gur līnh bolāī,
mohi nīti bahu bhāṅti sikhāī.
Siv sevā kar phal sut soī,
abiral bhagati Rām pad hoī. (1)
640 of 872
रामहि भजहिं तात सिव धाता।
नर पावँर कै केतिक बाता॥
जासु चरन अज सिव अनुरागी।
तासु द्रोहँ सुख चहसि अभागी ॥२॥
Rāmahi bhajahiṅ tāt Siv dhātā,
nar pāvaṅr kai ketik bātā.
Jāsu charan aj Siv anurāgī,
tāsu drohaṅ sukh chahasi abhāgī. (2)
641 of 872
हर कहुँ हरि सेवक गुर कहेऊ।
सुनि खगनाथ हृदय मम दहेऊ॥
अधम जाति मैं बिद्या पाएँ।
भयउँ जथा अहि दूध पिआएँ ॥३॥
Har kahuṅ hari sevak gur kaheū,
suni khaganāth hṛday mam daheū.
Adham jāti maiṅ bidyā pāeṅ,
bhayauṅ jathā ahi dūdh piāeṅ. (3)
642 of 872
मानी कुटिल कुभाग्य कुजाती।
गुर कर द्रोह करउँ दिनु राती॥
अति दयाल गुर स्वल्प न क्रोधा।
पुनि पुनि मोहि सिखाव सुबोधा ॥४॥
Mānī kuṭil kubhāgya kujātī,
gur kar droh karauṅ dinu rātī.
Ati dayāl gur svalpa na krodhā,
puni puni mohi sikhāv subodhā. (4)
643 of 872
जेहि ते नीच बड़ाई पावा।
सो प्रथमहिं हति ताहि नसावा॥
धूम अनल संभव सुनु भाई।
तेहि बुझाव घन पदवी पाई ॥५॥
Jehi te nīch baḍāī pāvā,
so prathamahiṅ hati tāhi nasāvā.
Dhūm anal sambhav sunu bhāī,
tehi bujhāv ghan padavī pāī. (5)
644 of 872
रज मग परी निरादर रहई।
सब कर पद प्रहार नित सहई॥
मरुत उड़ाव प्रथम तेहि भरई।
पुनि नृप नयन किरीटन्हि परई ॥६॥
Raj mag parī nirādar rahaī,
sab kar pad prahār nit sahaī.
Marut uḍāv pratham tehi bharaī,
puni nṛp nayan kirīṭanhi paraī. (6)
645 of 872
सुनु खगपति अस समुझि प्रसंगा।
बुध नहिं करहिं अधम कर संगा॥
कबि कोबिद गावहिं असि नीती।
खल सन कलह न भल नहिं प्रीती ॥७॥
Sunu khagapati as samujhi prasangā,
budh nahiṅ karahiṅ adham kar sangā.
Kabi kobid gāvahiṅ asi nītī,
khal san kalah na bhal nahiṅ prītī. (7)
646 of 872
उदासीन नित रहिअ गोसाईं।
खल परिहरिअ स्वान की नाईं॥
मैं खल हृदयँ कपट कुटिलाई।
गुर हित कहइ न मोहि सोहाई ॥८॥
Udāsīn nit rahia gosāīṅ,
khal pariharia svān kī nāīṅ.
Maiṅ khal hṛdayaṅ kapaṭ kuṭilāī,
gur hit kahai na mohi sohāī. (8)
647 of 872
दो०—एक बार हर मंदिर जपत रहेउँ सिव नाम।
गुर आयउ अभिमान तें उठि नहिं कीन्ह प्रनाम ॥१०६(क)॥
Do—Ek bār har mandir japat raheuṅ Siv nām,
gur āyau abhimān teṅ uṭhi nahiṅ kīnh pranām. (106a)
648 of 872
सो दयाल नहिं कहेउ कछु उर न रोष लवलेस।
अति अघ गुर अपमानता सहि नहिं सके महेस ॥१०६(ख)॥
So dayāl nahiṅ kaheu kachhu ur na roṣ lavales,
ati agh gur apamānatā sahi nahiṅ sake Mahesa. (106b)
649 of 872
मंदिर माझ भई नभबानी।
रे हतभाग्य अग्य अभिमानी॥
जद्यपि तव गुर के नहिं क्रोधा।
अति कृपाल चित सम्यक बोधा ॥१॥
Mandir mājh bhaī nabhabānī,
re hatabhāgya agya abhimānī.
Jadyapi tav gur ke nahiṅ krodhā,
ati kṛpāl chit samyak bodhā. (1)
650 of 872
तदपि साप सठ दैहउँ तोही।
नीति बिरोध सोहाइ न मोही॥
जौं नहिं दंड करौं खल तोरा।
भ्रष्ट होइ श्रुतिमारग मोरा ॥२॥
Tadapi sāp saṭh daihauṅ tohī,
nīti birodh sohāi na mohī.
Jauṅ nahiṅ daṇḍ karauṅ khal torā,
bhraṣṭ hoi śrutimārag morā. (2)
651 of 872
जे सठ गुर सन इरिषा करहीं।
रौरव नरक कोटि जुग परहीं॥
त्रिजग जोनि पुनि धरहिं सरीरा।
अयुत जन्म भरि पावहिं पीरा ॥३॥
Je saṭh gur san iriṣā karahīṅ,
raurav narak koṭi jug parahīṅ.
Trijag joni puni dharahiṅ sarīrā,
ayut janma bhari pāvahiṅ pīrā. (3)
652 of 872
बैठि रहेसि अजगर इव पापी।
सर्प होहि खल मल मति ब्यापी॥
महा बिटप कोटर महुँ जाई।
रहु अधमाधम अधगति पाई ॥४॥
Baiṭhi rahesi ajagar iv pāpī,
sarpa hohi khal mal mati byāpī.
Mahā biṭap koṭar mahuṅ jāī,
rahu adhamādham adhagati pāī. (4)
653 of 872
दो०—हाहाकार कीन्ह गुर दारुन सुनि सिव साप।
कंपित मोहि बिलोकि अति उर उपजा परिताप ॥१०७(क)॥
Do—Hāhākār kīnh gur dārun suni Siv sāp,
kanpit mohi biloki ati ur upajā paritāp. (107a)
654 of 872
करि दंडवत सप्रेम द्विज सिव सन्मुख कर जोरि।
बिनय करत गदगद स्वर समुझि घोर गति मोरि ॥१०७(ख)॥
Kari daṇḍavat saprem dvij Siv sanmukh kar jori,
binay karat gadagad svar samujhi ghor gati mori. (107b)
655 of 872
नमामीशमीशान निर्वाणरूपं।
विभुं व्यापकं ब्रह्म वेदस्वरूपं॥
निजं निर्गुणं निर्विकल्पं निरीहं।
चिदाकाशमाकाशवासं भजेऽहं ॥१॥
Namāmīśamīśān nirvāṇarūpaṃ,
vibhuṃ vyāpakaṃ brahma vedasvarūpaṃ.
Nijaṃ nirguṇaṃ nirvikalpaṃ nirīhaṃ,
chidākāśamākāśavāsaṃ bhaje'haṃ. (1)
656 of 872
निराकारमोंकारमूलं तुरीयं।
गिरा ग्यान गोतीतमीशं गिरीशं॥
करालं महाकाल कालं कृपालं।
गुणागार संसारपारं नतोऽहं ॥२॥
Nirākāramoṅkāramūlaṃ turīyaṃ,
girā gyān gotītamīśaṃ girīśaṃ.
Karālaṃ mahākāl kālaṃ kṛpālaṃ,
guṇāgār sansārapāraṃ nato'haṃ. (2)
657 of 872
तुषाराद्रि संकाश गौरं गभीरं।
मनोभूत कोटि प्रभा श्री शरीरं॥
स्फुरन्मौलि कल्लोलिनी चारु गंगा।
लसद्भालबालेन्दु कंठे भुजंगा ॥३॥
Tuṣārādri sankāśa gauraṃ gabhīraṃ,
manobhūt koṭi prabhā śrī śarīraṃ.
Sphuranmauli kallolinī chāru gaṅgā,
lasadbhālabālendu kaṇṭhe bhujaṅgā. (3)
658 of 872
चलत्कुंडलं भ्रू सुनेत्रं विशालं।
प्रसन्नाननं नीलकंठं दयालं॥
मृगाधीशचर्माम्बरं मुण्डमालं।
प्रियं शंकरं सर्वनाथं भजामि ॥४॥
Chalatkuṇḍalaṃ bhrū sunetraṃ viśālaṃ,
prasannānanaṃ nīlakaṇṭhaṃ dayālaṃ.
Mṛgādhīśacharmāmbaraṃ muṇḍamālaṃ,
priyaṃ śaṅkaraṃ sarvanāthaṃ bhajāmi. (4)
659 of 872
प्रचंडं प्रकृष्टं प्रगल्भं परेशं।
अखंडं अजं भानुकोटिप्रकाशं॥
त्रयः शूल निर्मूलनं शूलपाणिं।
भजेऽहं भवानीपतिं भावगम्यं ॥५॥
Prachaṇḍaṃ prakṛṣṭaṃ pragalbhaṃ pareśaṃ,
akhaṇḍaṃ ajaṃ bhānukoṭiprakāśaṃ.
Trayaḥ śūla nirmūlanaṃ śūlapāṇiṃ,
bhaje'haṃ bhavānīpatiṃ bhāvagamyaṃ. (5)
660 of 872
कलातीत कल्याण कल्पान्तकारी।
सदा सज्जनानन्ददाता पुरारी॥
चिदानंद संदोह मोहापहारी।
प्रसीद प्रसीद प्रभो मन्मथारी ॥६॥
Kalātīt kalyāṇ kalpāntakārī,
sadā sajjanānandadātā purārī.
Chidānand sandoh mohāpahārī,
prasīd prasīd prabho manmathārī. (6)
661 of 872
न यावद् उमानाथ पादारविन्दं।
भजंतीह लोके परे वा नराणां॥
न तावत्सुखं शान्ति सन्तापनाशं।
प्रसीद प्रभो सर्वभूताधिवासं ॥७॥
Na yāvad Umānātha pādāravindaṃ,
bhajantīha loke pare vā narāṇāṃ.
Na tāvatsukhaṃ śānti santāpanāśaṃ,
prasīd prabho sarvabhūtādhivāsaṃ. (7)
662 of 872
न जानामि योगं जपं नैव पूजां।
नतोऽहं सदा सर्वदा शंभु तुभ्यं॥
जरा जन्म दुःखौघ तातप्यमानं।
प्रभो पाहि आपन्नमामीश शंभो ॥८॥
Na jānāmi yogaṃ japaṃ naiva pūjāṃ,
nato'haṃ sadā sarvadā śambhu tubhyaṃ.
Jarā janma duḥkhaugha tātapyamānaṃ,
prabho pāhi āpannamāmīśa śambho. (8)
663 of 872
श्लोक—रुद्राष्टकमिदं प्रोक्तं विप्रेण हरतोषये।
ये पठन्ति नरा भक्त्या तेषां शम्भुः प्रसीदति ॥९॥
Rudrāṣṭakamidaṃ proktaṃ vipreṇa haratoṣaye,
ye paṭhanti narā bhaktyā teṣāṃ śambhuḥ prasīdati. (9)
664 of 872
दो०—सुनि बिनती सर्बग्य सिव देखि बिप्र अनुरागु।
पुनि मंदिर नभबानी भइ द्विजबर बर मागु ॥१०८(क)॥
Do—Suni binatī sarbagya Siv dekhi bipra anurāgu,
puni mandir nabhabānī bhai dvijabar bar māgu. (108a)
665 of 872
जौं प्रसन्न प्रभु मो पर नाथ दीन पर नेहु।
निज पद भगति देइ प्रभु पुनि दूसर बर देहु ॥१०८(ख)॥
Jauṅ prasanna prabhu mo par nāth dīn par nehu,
nij pad bhagati dei prabhu puni dūsar bar dehu. (108b)
666 of 872
तव माया बस जीव जड़ संतत फिरइ भुलान।
तेहि पर क्रोध न करिअ प्रभु कृपासिंधु भगवान ॥१०८(ग)॥
Tav māyā bas jīv jaḍ santat phirai bhulān,
tehi par krodh na karia prabhu kṛpāsindhu bhagavān. (108c)
667 of 872
संकर दीनदयाल अब एहि पर होहु कृपाल।
साप अनुग्रह होइ जेहिं नाथ थोरेहीं काल ॥१०८(घ)॥
Śaṅkar dīnadayāl ab ehi par hohu kṛpāl,
sāp anugrah hoi jehiṅ nāth thorehīṅ kāl. (108d)
668 of 872
एहि कर होइ परम कल्याना।
सोइ करहु अब कृपानिधाना॥
बिप्र गिरा सुनि परहित सानी।
एवमस्तु इति भइ नभबानी ॥१॥
Ehi kar hoi param kalyānā,
soi karahu ab kṛpānidhānā.
Bipra girā suni parahit sānī,
evamastu iti bhai nabhabānī. (1)
669 of 872
जदपि कीन्ह एहिं दारुन पापा।
मैं पुनि दीन्हि कोप करि सापा॥
तदपि तुम्हारि साधुता देखी।
करिहउँ एहि पर कृपा बिसेषी ॥२॥
Jadapi kīnha ehiṅ dārun pāpā,
maiṅ puni dīnhi kop kari sāpā.
Tadapi tumhāri sādhutā dekhī,
karihauṅ ehi par kṛpā biseṣī. (2)
670 of 872
छमासील जे पर उपकारी।
ते द्विज मोहि प्रिय जथा खरारी॥
मोर श्राप द्विज ब्यर्थ न जाइहि।
जन्म सहस अवस्य यह पाइहि ॥३॥
Chhamāsīl je par upakārī,
te dvij mohi priya jathā Kharārī.
Mor śrāp dvij byarth na jāihi,
janma sahas avasya yah pāihi. (3)
671 of 872
जनमत मरत दुसह दुख होई।
एहि स्वल्पउ नहिं ब्यापिहि सोई॥
कवनेउँ जन्म मिटिहि नहिं ग्याना।
सुनहि सूद्र मम बचन प्रवाना ॥४॥
Janamat marat dusah dukh hoī,
ehi svalpau nahiṅ byāpihi soī.
Kavaneuṅ janma miṭihi nahiṅ gyānā,
sunahi sūdra mam bachan pravānā. (4)
672 of 872
रघुपति पुरीं जन्म तव भयऊ।
पुनि तैं मम सेवाँ मन दयऊ॥
पुरी प्रभाव अनुग्रह मोरें।
राम भगति उपजिहि उर तोरें ॥५॥
Raghupati purīṅ janma tav bhayaū,
puni taiṅ mam sevāṅ man dayaū.
Purī prabhāv anugrah moreṅ,
Rām bhagati upajihi ur toreṅ. (5)
673 of 872
सुनु मम बचन सत्य अब भाई।
हरितोषन ब्रत द्विज सेवकाई॥
अब जनि करहि बिप्र अपमाना।
जानेसु संत अनंत समाना ॥६॥
Sunu mam bachan satya ab bhāī,
haritoṣan brat dvij sevakāī.
Ab jani karahi bipra apamānā,
jānesu sant anant samānā. (6)
674 of 872
इंद्र कुलिस मम सूल बिसाला।
कालदंड हरि चक्र कराला॥
जो इन्ह कर मारा नहिं मरई।
बिप्र द्रोह पावक सो जरई ॥७॥
Indra kulis mam sūl bisālā,
kāladaṇḍ Hari chakra karālā.
Jo inh kar mārā nahiṅ marai,
bipra droh pāvak so jarai. (7)
675 of 872
अस बिबेक राखेहु मन माहीं।
तुम्ह कहँ जग दुर्लभ कछु नाहीं॥
औरउ एक आसिषा मोरी।
अप्रतिहत गति होइहि तोरी ॥८॥
As bibek rākhehu man māhīṅ,
tumh kahaṅ jag durlabh kachhu nāhīṅ.
Aurau ek āsiṣā morī,
apratihat gati hoihi torī. (8)
676 of 872
दो०—सुनि सिव बचन हरषि गुर एवमस्तु इति भाषि।
मोहि प्रबोधि गयउ गृह संभु चरन उर राखि ॥१०९(क)॥
Do—Suni siv bachan haraṣi gur evamastu iti bhāṣi,
mohi prabodhi gayau gṛh Sambhu charan ur rākhi. (109a)
677 of 872
प्रेरित काल बिंधि गिरि जाइ भयउँ मैं ब्याल।
पुनि प्रयास बिनु सो तनु तजेउँ गएँ कछु काल ॥१०९(ख)॥
Prerit kāl biṅdhi giri jāi bhayauṅ maiṅ byāl,
puni prayās binu so tanu tajeuṅ gaeṅ kachhu kāl. (109b)
678 of 872
जोइ तनु धरउँ तजउँ पुनि अनायास हरिजान।
जिमि नूतन पट पहिरइ नर परिहरइ पुरान ॥१०९(ग)॥
Joi tanu dharauṅ tajauṅ puni anāyās harijān,
jimi nūtan paṭ pahirai nar pariharai purān. (109c)
679 of 872
सिवँ राखी श्रुति नीति अरु मैं नहिं पावा क्लेस।
एहि बिधि धरेउँ बिबिधि तनु ग्यान न गयउ खगेस ॥१०९(घ)॥
Sivaṅ rākhī shruti nīti aru maiṅ nahiṅ pāvā kles,
ehi bidhi dhareuṅ bibidhi tanu gyān na gayau khages. (109d)
680 of 872
त्रिजग देव नर जोइ तनु धरऊँ।
तहँ तहँ राम भजन अनुसरऊँ॥
एक सूल मोहि बिसर न काऊ।
गुर कर कोमल सील सुभाऊ ॥१॥
Trijag dev nar joi tanu dharaūṅ,
tahaṅ tahaṅ Rām bhajan anusarauṅ.
Ek sūl mohi bisar na kāū,
gur kar komal sīl subhāū. (1)
681 of 872
चरम देह द्विज कै मैं पाई।
सुर दुर्लभ पुरान श्रुति गाई॥
खेलउँ तहूँ बालकन्ह मीला।
करउँ सकल रघुनायक लीला ॥२॥
Charam deh dvij kai maiṅ pāī,
sur durlabh purān shruti gāī.
Khelauṅ tahūṅ bālakanh mīlā,
karauṅ sakal Raghunāyak līlā. (2)
682 of 872
प्रौढ़ भएँ मोहि पिता पढ़ावा।
समझउँ सुनउँ गुनउँ नहिं भावा॥
मन ते सकल बासना भागी।
केवल राम चरन लय लागी ॥३॥
Prauḍh bhaeṅ mohi pitā paḍhāvā,
samajhauṅ sunauṅ gunauṅ nahiṅ bhāvā.
Man te sakal bāsanā bhāgī,
keval Rām charan lay lāgī. (3)
683 of 872
कहु खगेस अस कवन अभागी।
खरी सेव सुरधेनुहि त्यागी॥
प्रेम मगन मोहि कछु न सोहाई।
हारेउ पिता पढ़ाइ पढ़ाई ॥४॥
Kahu khages as kavan abhāgī,
kharī sev suradhenuhi tyāgī.
Prem magan mohi kachhu na sohāī,
hāreu pitā paḍhāi paḍhāī. (4)
684 of 872
भए कालबस जब पितु माता।
मैं बन गयउँ भजन जनत्राता॥
जहँ जहँ बिपिन मुनीस्वर पावउँ।
आश्रम जाइ जाइ सिरु नावउँ ॥५॥
Bhae kālabas jab pitu mātā,
maiṅ ban gayauṅ bhajan janatrātā.
Jahaṅ jahaṅ bipin munīswar pāvauṅ,
āshram jāi jāi siru nāvauṅ. (5)
685 of 872
बूझउँ तिन्हहि राम गुन गाहा।
कहहिं सुनउँ हरषित खगनाहा॥
सुनत फिरउँ हरि गुन अनुबादा।
अब्याहत गति संभु प्रसादा ॥६॥
Būjhauṅ tinhahi Rām gun gāhā,
kahahiṅ sunauṅ haraṣit khaganāhā.
Sunat firauṅ Hari gun anubādā,
abyāhat gati Sambhu prasādā. (6)
686 of 872
छूटी त्रिबिधि ईषना गाढ़ी।
एक लालसा उर अति बाढ़ी॥
राम चरन बारिज जब देखौं।
तब निज जन्म सफल करि लेखौं ॥७॥
Chhūṭī tribidhi īṣanā gāḍhī,
ek lālasā ur ati bāḍhī.
Rām charan bārij jab dekhauṅ,
tab nij janma saphal kari lekhauṅ. (7)
687 of 872
जेहि पूँछउँ सोइ मुनि अस कहई।
ईस्वर सर्ब भूतमय अहई॥
निर्गुन मत नहिं मोहि सोहाई।
सगुन ब्रह्म रति उर अधिकाई ॥८॥
Jehi pūṅchhauṅ soi muni as kahaī,
īsvar sarb bhūtamay ahaī.
Nirgun mat nahiṅ mohi sohāī,
sagun brahma rati ur adhikāī. (8)
688 of 872
दो०—गुर के बचन सुरति करि राम चरन मनु लाग।
रघुपति जस गावत फिरउँ छन छन नव अनुराग ॥११०(क)॥
Do—Gur ke bachan surati kari Rām charan manu lāg,
Raghupati jas gāvat phirauṅ chhan chhan nav anurāg. (110a)
689 of 872
मेरु सिखर बट छायाँ मुनि लोमस आसीन।
देखि चरन सिरु नायउँ बचन कहेउँ अति दीन ॥११०(ख)॥
Meru sikhar baṭ chhāyāṅ muni Lomas āsīn,
dekhi charan siru nāyauṅ bachan kaheuṅ ati dīn. (110b)
690 of 872
सुनि मम बचन बिनीत मृदु मुनि कृपाल खगराज।
मोहि सादर पूँछत भए द्विज आयहु केहि काज ॥११०(ग)॥
Suni mam bachan binīt mṛdu muni kṛpāl khagarāj,
mohi sādar pūṅchhat bhae dvij āyahu kehi kāj. (110c)
691 of 872
तब मैं कहा कृपानिधि तुम्ह सर्बग्य सुजान।
सगुन ब्रह्म अवराधन मोहि कहहु भगवान ॥११०(घ)॥
Tab maiṅ kahā kṛpānidhi tumh sarbagya sujān,
sagun brahma avarādhan mohi kahahu bhagavān. (110d)
692 of 872
तब मुनीस रघुपति गुन गाथा।
कहे कछुक सादर खगनाथा॥
ब्रह्मग्यान रत मुनि बिग्यानी।
मोहि परम अधिकारी जानी ॥१॥
Tab munīs Raghupati gun gāthā,
kahe kachhuk sādar khaganāthā.
Brahmagyān rat muni bigyānī,
mohi param adhikārī jānī. (1)
693 of 872
लागे करन ब्रह्म उपदेसा।
अज अद्वैत अगुन हृदयेसा॥
अकल अनीह अनाम अरूपा।
अनुभव गम्य अखंड अनूपा ॥२॥
Lāge karan brahma upadesā,
aj advait agun hṛdayesā.
Akal anīh anām arūpā,
anubhav gamya akhaṇḍ anūpā. (2)
694 of 872
मन गोतीत अमल अबिनासी।
निर्बिकार निरवधि सुख रासी॥
सो तैं ताहि तोहि नहिं भेदा।
बारि बीचि इव गावहिं बेदा ॥३॥
Man gotīt amal abināsī,
nirbikār niravadhi sukh rāsī.
So taiṅ tāhi tohi nahiṅ bhedā,
bāri bīchi iv gāvahiṅ bedā. (3)
695 of 872
बिबिधि भाँति मोहि मुनि समुझावा।
निर्गुन मत मम हृदयँ न आवा॥
पुनि मैं कहेउँ नाइ पद सीसा।
सगुन उपासन कहहु मुनीसा ॥४॥
Bibidhi bhāṅti mohi muni samujhāvā,
nirgun mat mam hṛdayaṅ na āvā.
Puni maiṅ kaheuṅ nāi pad sīsā,
sagun upāsan kahahu munīsā. (4)
696 of 872
राम भगति जल मम मन मीना।
किमि बिलगाइ मुनीस प्रबीना॥
सोइ उपदेस कहहु करि दाया।
निज नयनन्हि देखौं रघुराया ॥५॥
Rām bhagati jal mam man mīnā,
kimi bilagāi munīs prabīnā.
Soi upades kahahu kari dāyā,
nij nayananhi dekhauṅ Raghurāyā. (5)
697 of 872
भरि लोचन बिलोकि अवधेसा।
तब सुनिहउँ निर्गुन उपदेसा॥
मुनि पुनि कहि हरिकथा अनूपा।
खंडि सगुन मत अगुन निरूपा ॥६॥
Bhari lochan biloki avadhesā,
tab sunihauṅ nirgun upadesā.
Muni puni kahi harikathā anūpā,
khaṇḍi sagun mat agun nirūpā. (6)
698 of 872
तब मैं निर्गुन मत कर दूरी।
सगुन निरूपउँ करि हठ भूरी॥
उत्तर प्रतिउत्तर मैं कीन्हा।
मुनि तन भए क्रोध के चीन्हा ॥७॥
Tab maiṅ nirgun mat kar dūrī,
sagun nirūpauṅ kari haṭh bhūrī.
Uttar pratiuttar maiṅ kīnhā,
muni tan bhae krodh ke chīnhā. (7)
699 of 872
सुनु प्रभु बहुत अवग्या किएँ।
उपज क्रोध ग्यानिन्ह के हिएँ॥
अति संघरषन जौं कर कोई।
अनल प्रगट चंदन ते होई ॥८॥
Sunu prabhu bahut avagyā kieṅ,
upaj krodh gyāninh ke hieṅ.
Ati saṅgharaṣan jauṅ kar koī,
anal pragaṭ chandan te hoī. (8)
700 of 872
दो०—बारंबार सकोप मुनि करइ निरूपन ग्यान।
मैं अपने मन बैठ तब करउँ बिबिधि अनुमान ॥१११(क)॥
Do—Bāraṃbār sakop muni karai nirūpan gyān,
maiṅ apane man baiṭh tab karauṅ bibidhi anumān. (111a)
701 of 872
क्रोध कि द्वैतबुद्धि बिनु द्वैत कि बिनु अग्यान।
मायाबस परिछिन्न जड़ जीव कि ईस समान ॥१११(ख)॥
Krodh ki dvaitabuddhi binu dvait ki binu agyān,
māyābas parichhinna jaḍ jīv ki īs samān. (111b)
702 of 872
कबहुँ कि दुख सब कर हित ताकें।
तेहि कि दरिद्र परस मनि जाकें॥
परद्रोही की होहिं निसंका।
कामी पुनि कि रहहिं अकलंका ॥१॥
Kabahuṅ ki dukh sab kar hit tākeṅ,
tehi ki daridra paras mani jākeṅ.
Paradrohī kī hohiṅ nisaṅkā,
kāmī puni ki rahahiṅ akalaṅkā. (1)
703 of 872
बंस कि रह द्विज अनहित कीन्हें।
कर्म कि होहिं स्वरूपहि चीन्हें॥
काहू सुमति कि खल सँग जामी।
सुभ गति पाव कि परत्रिय गामी ॥२॥
Bans ki rah dvij anahit kīnheṅ,
karma ki hohiṅ svarūpahi chīnheṅ.
Kāhū sumati ki khal saṅg jāmī,
subh gati pāv ki paratriy gāmī. (2)
704 of 872
भव कि परहिं परमात्मा बिंदक।
सुखी कि होहिं कबहुँ हरि निंदक॥
राजु कि रहइ नीति बिनु जानें।
अघ कि रहहिं हरिचरित बखानें ॥३॥
Bhav ki parahiṅ paramātmā biṅdak,
sukhī ki hohiṅ kabahuṅ Hari niṅdak.
Rāju ki rahai nīti binu jāneṅ,
agh ki rahahiṅ haricharit bakhāneṅ. (3)
705 of 872
पावन जस कि पुन्य बिनु होई।
बिनु अघ अजस कि पावइ कोई॥
लाभु कि किछु हरि भगति समाना।
जेहि गावहिं श्रुति संत पुराना ॥४॥
Pāvan jas ki punya binu hoī,
binu agh ajas ki pāvai koī.
Lābhu ki kichhu Hari bhagati samānā,
jehi gāvahiṅ shruti sant purānā. (4)
706 of 872
हानि कि जग एहि सम किछु भाई।
भजिअ न रामहि नर तनु पाई॥
अघ कि पिसुनता सम कछु आना।
धर्म कि दया सरिस हरिजाना ॥५॥
Hāni ki jag ehi sam kichhu bhāī,
bhajia na Rāmahi nar tanu pāī.
Agh ki pisunatā sam kachhu ānā,
dharma ki dayā saris harijānā. (5)
707 of 872
एहि बिधि अमिति जुगुति मन गुनऊँ।
मुनि उपदेस न सादर सुनऊँ॥
पुनि पुनि सगुन पच्छ मैं रोपा।
तब मुनि बोलेउ बचन सकोपा ॥६॥
Ehi bidhi amiti juguti man gunauṅ,
muni upades na sādar sunauṅ.
Puni puni sagun pachchh maiṅ ropā,
tab muni boleu bachan sakopā. (6)
708 of 872
मूढ़ परम सिख देउँ न मानसि।
उत्तर प्रतिउत्तर बहु आनसि॥
सत्य बचन बिस्वास न करही।
बायस इव सबही ते डरही ॥७॥
Mūḍh param sikh deuṅ na mānasi,
uttar pratiuttar bahu ānasi.
Satya bachan bisvās na karahī,
bāyas iv sabahī te ḍarahī. (7)
709 of 872
सठ स्वपच्छ तव हृदयँ बिसाला।
सपदि होहि पच्छी चंडाला॥
लीन्ह श्राप मैं सीस चढ़ाई।
नहिं कछु भय न दीनता आई ॥८॥
Saṭh svapachchh tav hṛdayaṅ bisālā,
sapadi hohi pachhī chaṇḍālā.
Līnh shrāp maiṅ sīs chaḍhāī,
nahiṅ kachhu bhay na dīnatā āī. (8)
710 of 872
दो०—तुरत भयउँ मैं काग तब पुनि मुनि पद सिरु नाइ।
सुमिरि राम रघुबंस मनि हरषित चलेउँ उड़ाइ ॥११२(क)॥
Do—Turat bhayauṅ maiṅ kāg tab puni muni pad siru nāi,
sumiri Rām Raghubans mani haraṣit chaleuṅ uḍāi. (112a)
711 of 872
उमा जे राम चरन रत बिगत काम मद क्रोध।
निज प्रभुमय देखहिं जगत केहि सन करहिं बिरोध ॥११२(ख)॥
Umā je Rām charan rat bigat kām mad krodh,
nij prabhumay dekhahiṅ jagat kehi san karahiṅ birodh. (112b)
712 of 872
सुनु खगेस नहिं कछु रिषि दूषन।
उर प्रेरक रघुबंस बिभूषन॥
कृपासिंधु मुनि मति करि भोरी।
लीन्ही प्रेम परिच्छा मोरी ॥१॥
Sunu khages nahiṅ kachhu riṣi dūṣan,
ur prerak Raghubans bibhūṣan.
Kṛpāsindhu muni mati kari bhorī,
līnhī prem parichchhā morī. (1)
713 of 872
मन बच क्रम मोहि निज जन जाना।
मुनि मति पुनि फेरी भगवाना॥
रिषि मम महत सीलता देखी।
राम चरन बिस्वास बिसेषी ॥२॥
Man bach kram mohi nij jan jānā,
muni mati puni pherī bhagavānā.
Riṣi mam mahat sīlatā dekhī,
Rām charan bisvās biseṣī. (2)
714 of 872
अति बिसमय पुनि पुनि पछिताई।
सादर मुनि मोहि लीन्ह बोलाई॥
मम परितोष बिबिधि बिधि कीन्हा।
हरषित राममंत्र तब दीन्हा ॥३॥
Ati bisamay puni puni pachhitāī,
sādar muni mohi līnh bolāī.
Mam paritoṣ bibidhi bidhi kīnhā,
haraṣit Rāmamantra tab dīnhā. (3)
715 of 872
बालकरूप राम कर ध्याना।
कहेउ मोहि मुनि कृपानिधाना॥
सुंदर सुखद मोहि अति भावा।
सो प्रथमहिं मैं तुम्हहि सुनावा ॥४॥
Bālakarūp Rām kar dhyānā,
kaheu mohi muni kṛpānidhānā.
Sundar sukhad mohi ati bhāvā,
so prathamahiṅ maiṅ tumhahi sunāvā. (4)
716 of 872
मुनि मोहि कछुक काल तहँ राखा।
रामचरितमानस तब भाषा॥
सादर मोहि यह कथा सुनाई।
पुनि बोले मुनि गिरा सुहाई ॥५॥
Muni mohi kachhuk kāl tahaṅ rākhā,
Rāmacharitmānas tab bhāṣā.
Sādar mohi yah kathā sunāī,
puni bole muni girā suhāī. (5)
717 of 872
रामचरित सर गुप्त सुहावा।
संभु प्रसाद तात मैं पावा॥
तोहि निज भगत राम कर जानी।
ताते मैं सब कहेउँ बखानी ॥६॥
Rāmacharit sar gupta suhāvā,
Sambhu prasād tāt maiṅ pāvā.
Tohi nij bhagat Rām kar jānī,
tāte maiṅ sab kaheuṅ bakhānī. (6)
718 of 872
राम भगति जिन्ह कें उर नाहीं।
कबहुँ न तात कहिअ तिन्ह पाहीं॥
मुनि मोहि बिबिधि भाँति समुझावा।
मैं सप्रेम मुनि पद सिरु नावा ॥७॥
Rām bhagati jinh keṅ ur nāhīṅ,
kabahuṅ na tāt kahia tinh pāhīṅ.
Muni mohi bibidhi bhāṅti samujhāvā,
maiṅ saprem muni pad siru nāvā. (7)
719 of 872
निज कर कमल परसि मम सीसा।
हरषित आसिष दीन्ह मुनीसा॥
राम भगति अबिरल उर तोरें।
बसिहि सदा प्रसाद अब मोरें ॥८॥
Nij kar kamal parasi mam sīsā,
haraṣit āsiṣa dīnh munīsā.
Rām bhagati abiral ur toreṅ,
basihi sadā prasād ab moreṅ. (8)
720 of 872
दो०—सदा राम प्रिय होहु तुम्ह सुभ गुन भवन अमान।
कामरूप इच्छामरन ग्यान बिराग निधान ॥११३(क)॥
Do—Sadā Rām priya hohu tumh subh gun bhavan amān,
kāmarūp ichchhāmaran gyān birāg nidhān. (113a)
721 of 872
जेहिं आश्रम तुम्ह बसब पुनि सुमिरत श्रीभगवंत।
ब्यापिहि तहँ न अबिद्या जोजन एक प्रजंत ॥११३(ख)॥
Jehiṅ āshram tumh basab puni sumirat Shrībhagavant,
byāpihi tahaṅ na abidyā jojan ek prajaṃt. (113b)
722 of 872
काल कर्म गुन दोष सुभाऊ।
कछु दुख तुम्हहि न ब्यापिहि काऊ॥
राम रहस्य ललित बिधि नाना।
गुप्त प्रगट इतिहास पुराना ॥१॥
Kāl karma gun doṣ subhāū,
kachhu dukh tumhahi na byāpihi kāū.
Rām rahasya lalit bidhi nānā,
gupta pragaṭ itihās purānā. (1)
723 of 872
बिनु श्रम तुम्ह जानब सब सोऊ।
नित नव नेह राम पद होऊ॥
जो इच्छा करिहहु मन माहीं।
हरि प्रसाद कछु दुर्लभ नाहीं ॥२॥
Binu shram tumh jānab sab soū,
nit nav neh Rām pad hoū.
Jo ichchhā karihahu man māhīṅ,
hari prasād kachhu durlabh nāhīṅ. (2)
724 of 872
सुनि मुनि आसिष सुनु मतिधीरा।
ब्रह्मगिरा भइ गगन गँभीरा॥
एवमस्तु तव बच मुनि ग्यानी।
यह मम भगत कर्म मन बानी ॥३॥
Suni muni āsiṣ sunu matidhīrā,
brahmagirā bhai gagan gaṅbhīrā.
Evamastu tav bach muni gyānī,
yah mam bhagat karma man bānī. (3)
725 of 872
सुनि नभगिरा हरष मोहि भयऊ।
प्रेम मगन सब संसय गयऊ॥
करि बिनती मुनि आयसु पाई।
पद सरोज पुनि पुनि सिरु नाई ॥४॥
Suni nabhagirā haraṣ mohi bhayaū,
prem magan sab sansay gayaū.
Kari binatī muni āyasu pāī,
pad saroj puni puni siru nāī. (4)
726 of 872
हरष सहित एहिं आश्रम आयउँ।
प्रभु प्रसाद दुर्लभ बर पायउँ॥
इहाँ बसत मोहि सुनु खग ईसा।
बीते कलप सात अरु बीसा ॥५॥
Haraṣ sahit ehiṅ āshram āyauṅ,
prabhu prasād durlabh bar pāyauṅ.
Ihāṅ basat mohi sunu khag īsā,
bīte kalap sāt aru bīsā. (5)
727 of 872
करउँ सदा रघुपति गुन गाना।
सादर सुनहिं बिहंग सुजाना॥
जब जब अवधपुरीं रघुबीरा।
धरहिं भगत हित मनुज सरीरा ॥६॥
Karauṅ sadā Raghupati gun gānā,
sādar sunahiṅ bihaṅg sujānā.
Jab jab Avadhapurīṅ Raghubīrā,
dharahiṅ bhagat hit manuj sarīrā. (6)
728 of 872
तब तब जाइ राम पुर रहऊँ।
सिसुलीला बिलोकि सुख लहऊँ॥
पुनि उर राखि राम सिसुरूपा।
निज आश्रम आवउँ खगभूपा ॥७॥
Tab tab jāi Rām pur rahauṅ,
sisulīlā biloki sukh lahauṅ.
Puni ur rākhi Rām sisurūpā,
nij āshram āvauṅ khagabhūpā. (7)
729 of 872
कथा सकल मैं तुम्हहि सुनाई।
काग देह जेहिं कारन पाई॥
कहिउँ तात सब प्रस्न तुम्हारी।
राम भगति महिमा अति भारी ॥८॥
Kathā sakal maiṅ tumhahi sunāī,
kāg deh jehiṅ kāran pāī.
Kahiuṅ tāt sab prasna tumhārī,
Rām bhagati mahimā ati bhārī. (8)
730 of 872
दो०—ताते यह तन मोहि प्रिय भयउ राम पद नेह।
निज प्रभु दरसन पायउँ गए सकल संदेह ॥११४(क)॥
Do—Tāte yah tan mohi priya bhayau Rām pad neh,
nij prabhu darasan pāyauṅ gae sakal sandeh. (114a)
731 of 872
भगति पच्छ हठ करि रहेउँ दीन्हि महारिषि साप।
मुनि दुर्लभ बर पायउँ देखहु भजन प्रताप ॥११४(ख)॥
Bhagati pachchh haṭh kari raheuṅ dīnhi mahāriṣi sāp,
muni durlabh bar pāyauṅ dekhahu bhajan pratāp. (114b)
732 of 872
जे असि भगति जानि परिहरहीं।
केवल ग्यान हेतु श्रम करहीं॥
ते जड़ कामधेनु गृहँ त्यागी।
खोजत आकु फिरहिं पय लागी ॥१॥
Je asi bhagati jāni pariharahīṅ,
keval gyān hetu shram karahīṅ.
Te jaḍ kāmadhenu gṛhaṅ tyāgī,
khojat āku phirahiṅ pay lāgī. (1)
733 of 872
सुनु खगेस हरि भगति बिहाई।
जे सुख चाहहिं आन उपाई॥
ते सठ महासिंधु बिनु तरनी।
पैरि पार चाहहिं जड़ करनी ॥२॥
Sunu khages Hari bhagati bihāī,
je sukh chāhahiṅ ān upāī.
Te saṭh mahāsindhu binu taranī,
pairi pār chāhahiṅ jaḍ karanī. (2)
734 of 872
सुनि भसुंडि के बचन भवानी।
बोलेउ गरुड़ हरषि मृदु बानी॥
तव प्रसाद प्रभु मम उर माहीं।
संसय सोक मोह भ्रम नाहीं ॥३॥
Suni Bhasuṇḍi ke bachan Bhavānī,
boleu Garuḍ haraṣi mṛdu bānī.
Tav prasād prabhu mam ur māhīṅ,
sansay sok moh bhram nāhīṅ. (3)
735 of 872
सुनेउँ पुनीत राम गुन ग्रामा।
तुम्हरी कृपाँ लहेउँ बिश्रामा॥
एक बात प्रभु पूँछउँ तोही।
कहहु बुझाइ कृपानिधि मोही ॥४॥
Suneuṅ punīt Rām gun grāmā,
tumhrī kṛpāṅ laheuṅ bishrāmā.
Ek bāt prabhu pūṅchhauṅ tohī,
kahahu bujhāi kṛpānidhi mohī. (4)
736 of 872
कहहिं संत मुनि बेद पुराना।
नहिं कछु दुर्लभ ग्यान समाना॥
सोइ मुनि तुम्ह सन कहेउ गोसाईं।
नहिं आदरेहु भगति की नाईं ॥५॥
Kahahiṅ sant muni bed purānā,
nahiṅ kachhu durlabh gyān samānā.
Soi muni tumh san kaheu gosāīṅ,
nahiṅ ādarehu bhagati kī nāīṅ. (5)
737 of 872
ग्यानहि भगतिहि अंतर केता।
सकल कहहु प्रभु कृपा निकेता॥
सुनि उरगारि बचन सुख माना।
सादर बोलेउ काग सुजाना ॥६॥
Gyānahi bhagatihi antar ketā,
sakal kahahu prabhu kṛpā niketā.
Suni Uragāri bachan sukh mānā,
sādar boleu kāg sujānā. (6)
738 of 872
भगतिहि ग्यानहि नहिं कछु भेदा।
उभय हरहिं भव संभव खेदा॥
नाथ मुनीस कहहिं कछु अंतर।
सावधान सोउ सुनु बिहंगबर ॥७॥
Bhagatihi gyānahi nahiṅ kachhu bhedā,
ubhay harahiṅ bhav sambhav khedā.
Nāth munīs kahahiṅ kachhu antar,
sāvadhān sou sunu bihaṅgabar. (7)
739 of 872
ग्यान बिराग जोग बिग्याना।
ए सब पुरुष सुनहु हरिजाना॥
पुरुष प्रताप प्रबल सब भाँती।
अबला अबल सहज जड़ जाती ॥८॥
Gyān birāg jog bigyānā,
e sab puruṣ sunahu harijānā.
Puruṣ pratāp prabal sab bhāṅtī,
abalā abal sahaj jaḍ jātī. (8)
740 of 872
दो०—पुरुष त्यागि सक नारिहि जो बिरक्त मति धीर।
न तु कामी बिषयाबस बिमुख जो पद रघुबीर ॥११५(क)॥
Do—Puruṣ tyāgi sak nārihi jo birakt mati dhīr,
na tu kāmī biṣayābas bimukh jo pad Raghubīr. (115a)
741 of 872
सो०—सोउ मुनि ग्याननिधान मृगनयनी बिधु मुख निरखि।
बिबस होइ हरिजान नारि बिष्नु माया प्रगट ॥११५(ख)॥
So—Sou muni gyānanidhān mṛganayanī bidhu mukh nirakhi,
bibas hoi harijān nāri Biṣnu māyā pragaṭ. (115b)
742 of 872
इहाँ न पच्छपात कछु राखउँ।
बेद पुरान संत मत भाषउँ॥
मोह न नारि नारि कें रूपा।
पन्नगारि यह रीति अनूपा ॥१॥
Ihāṅ na pachchhapāt kachhu rākhauṅ,
bed purān sant mat bhāṣauṅ.
Moh na nāri nāri keṅ rūpā,
pannagāri yah rīti anūpā. (1)
743 of 872
माया भगति सुनहु तुम्ह दोऊ।
नारि बर्ग जानइ सब कोऊ॥
पुनि रघुबीरहि भगति पिआरी।
माया खलु नर्तकी बिचारी ॥२॥
Māyā bhagati sunahu tumh doū,
nāri barg jānai sab koū.
Puni Raghubīrahi bhagati piārī,
māyā khalu nartakī bichārī. (2)
744 of 872
भगतिहि सानुकूल रघुराया।
ताते तेहि डरपति अति माया॥
राम भगति निरुपम निरुपाधी।
बसइ जासु उर सदा अबाधी ॥३॥
Bhagatihi sānukūl Raghurāyā,
tāte tehi ḍarapati ati māyā.
Rām bhagati nirupam nirupādhī,
basai jāsu ur sadā abādhī. (3)
745 of 872
तेहि बिलोकि माया सकुचाई।
करि न सकइ कछु निज प्रभुताई॥
अस बिचारि जे मुनि बिग्यानी।
जाचहिं भगति सकल सुख खानी ॥४॥
Tehi biloki māyā sakuchāī,
kari na sakai kachhu nij prabhutāī.
As bichāri je muni bigyānī,
jāchahiṅ bhagati sakal sukh khānī. (4)
746 of 872
दो०—यह रहस्य रघुनाथ कर बेगि न जानइ कोइ।
जो जानइ रघुपति कृपाँ सपनेहुँ मोह न होइ ॥११६(क)॥
Do—Yah rahasya Raghunāth kar begi na jānai koi,
jo jānai Raghupati kṛpāṅ sapanehuṅ moh na hoi. (116a)
747 of 872
औरउ ग्यान भगति कर भेद सुनहु सुप्रबीन।
जो सुनि होइ राम पद प्रीति सदा अबिछीन ॥११६(ख)॥
Aurau gyān bhagati kar bhed sunahu suprabīn,
jo suni hoi Rām pad prīti sadā abichhīn. (116b)
748 of 872
सुनहु तात यह अकथ कहानी।
समुझत बनइ न जाइ बखानी॥
ईस्वर अंस जीव अबिनासी।
चेतन अमल सहज सुखरासी ॥१॥
Sunahu tāt yah akath kahānī,
samujhat banai na jāi bakhānī.
Īsvar ans jīv abināsī,
chetan amal sahaj sukharāsī. (1)
749 of 872
सो मायाबस भयउ गोसाईं।
बँध्यो कीर मरकट की नाईं॥
जड़ चेतनहि ग्रंथि परि गई।
जदपि मृषा छूटत कठिनई ॥२॥
So māyābas bhayau gosāīṅ,
baṅdhyo kīr marakaṭ kī nāīṅ.
Jaḍ chetanahi granthi pari gaī,
jadapi mṛṣā chhūṭat kaṭhinaī. (2)
750 of 872
तब ते जीव भयउ संसारी।
छूट न ग्रंथि न होइ सुखारी॥
श्रुति पुरान बहु कहेउ उपाई।
छूट न अधिक अधिक अरुझाई ॥३॥
Tab te jīv bhayau sansārī,
chhūṭ na granthi na hoi sukhārī.
Shruti purān bahu kaheu upāī,
chhūṭ na adhik adhik arujhāī. (3)
751 of 872
जीव हृदयँ तम मोह बिसेषी।
ग्रंथि छूट किमि परइ न देखी॥
अस संजोग ईस जब करई।
तबहुँ कदाचित सो निरुअरई ॥४॥
Jīv hṛdayaṅ tam moh biseṣī,
granthi chhūṭ kimi parai na dekhī.
As sanjog īs jab karaī,
tabahuṅ kadāchit so niruarī. (4)
752 of 872
सात्विक श्रद्धा धेनु सुहाई।
जौं हरि कृपाँ हृदयँ बस आई॥
जप तप ब्रत जम नियम अपारा।
जे श्रुति कह सुभ धर्म अचारा ॥५॥
Sātvik shraddhā dhenu suhāī,
jauṅ Hari kṛpāṅ hṛdayaṅ bas āī.
Jap tap brat jam niyam apārā,
je shruti kah subh dharma achārā. (5)
753 of 872
तेइ तृन हरित चरै जब गाई।
भाव बच्छ सिसु पाइ पेन्हाई॥
नोइ निबृत्ति पात्र बिस्वासा।
निर्मल मन अहीर निज दासा ॥६॥
Tei tṛn harit charai jab gāī,
bhāv bachchh sisu pāi penhāī.
Noi nibṛtti pātra bisvāsā,
nirmal man ahīr nij dāsā. (6)
754 of 872
परम धर्ममय पय दुहि भाई।
अवटै अनल अकाम बनाई॥
तोष मरुत तब छमाँ जुड़ावै।
धृति सम जावनु देइ जमावै ॥७॥
Param dharmamay pay duhi bhāī,
avaṭai anal akām banāī.
Toṣ marut tab chhamāṅ juḍāvai,
dhṛti sam jāvanu dei jamāvai. (7)
755 of 872
मुदिताँ मथै बिचार मथानी।
दम अधार रजु सत्य सुबानी॥
तब मथि काढ़ि लेइ नवनीता।
बिमल बिराग सुभग सुपुनीता ॥८॥
Muditāṅ mathai bichār mathānī,
dam adhār raju satya subānī.
Tab mathi kāḍhi lei navanītā,
bimal birāg subhag supunītā. (8)
756 of 872
दो०—जोग अगिनि करि प्रगट तब कर्म सुभासुभ लाइ।
बुद्धि सिरावै ग्यान घृत ममता मल जरि जाइ ॥११७(क)॥
Do—Jog agini kari pragaṭ tab karma subhāsubh lāi,
buddhi sirāvai gyān ghṛt mamatā mal jari jāi. (117a)
757 of 872
तब बिग्यानरूपिनी बुद्धि बिसद घृत पाइ।
चित्त दिआ भरि धरै दृढ़ समता दिअटि बनाइ ॥११७(ख)॥
Tab bigyānarūpinī buddhi bisad ghṛt pāi,
chitta diā bhari dharai dṛḍh samatā diaṭi banāi. (117b)
758 of 872
तीनि अवस्था तीनि गुन तेहि कपास तें काढ़ि।
तूल तुरीय सँवारि पुनि बाती करै सुगाढ़ि ॥११७(ग)॥
Tīni avasthā tīni gun tehi kapās teṅ kāḍhi,
tūl turīya saṅvāri puni bātī karai sugāḍhi. (117c)
759 of 872
सो०—एहि बिधि लेसै दीप तेज रासि बिग्यानमय।
जातहिं जासु समीप जरहिं मदादिक सलभ सब ॥११७(घ)॥
So—Ehi bidhi lesai dīp tej rāsi bigyānmay,
jātahiṅ jāsu samīp jarahiṅ madādik salabh sab. (117d)
760 of 872
सोहमस्मि इति बृत्ति अखंडा।
दीप सिखा सोइ परम प्रचंडा॥
आतम अनुभव सुख सुप्रकासा।
तब भव मूल भेद भ्रम नासा ॥१॥
Sohamasmi iti bṛtti akhaṇḍā,
dīp sikhā soi param prachaṇḍā.
Ātam anubhav sukh suprakāsā,
tab bhav mūl bhed bhram nāsā. (1)
761 of 872
प्रबल अबिद्या कर परिवारा।
मोह आदि तम मिटइ अपारा॥
तब सोइ बुद्धि पाइ उँजिआरा।
उर गृहँ बैठि ग्रंथि निरुआरा ॥२॥
Prabal abidyā kar parivārā,
moh ādi tam miṭai apārā.
Tab soi buddhi pāi uṅjiārā,
ur gṛhaṅ baiṭhi granthi niruārā. (2)
762 of 872
छोरन ग्रंथि पाव जौं सोई।
तब यह जीव कृतारथ होई॥
छोरत ग्रंथि जानि खगराया।
बिघ्न अनेक करइ तब माया ॥३॥
Chhoran granthi pāv jauṅ soī,
tab yah jīv kṛtārath hoī.
Chhorat granthi jāni khagarāyā,
bighn anek karai tab māyā. (3)
763 of 872
रिद्धि सिद्धि प्रेरइ बहु भाई।
बुद्धिहि लोभ दिखावहिं आई॥
कल बल छल करि जाहिं समीपा।
अंचल बात बुझावहिं दीपा ॥४॥
Riddhi siddhi prerai bahu bhāī,
buddhihi lobh dikhāvahiṅ āī.
Kal bal chhal kari jāhiṅ samīpā,
aṃchal bāt bujhāvahiṅ dīpā. (4)
764 of 872
होइ बुद्धि जौं परम सयानी।
तिन्ह तन चितव न अनहित जानी॥
जौं तेहि बिघ्न बुद्धि नहिं बाधी।
तौ बहोरि सुर करहिं उपाधी ॥५॥
Hoi buddhi jauṅ param sayānī,
tinh tan chitav na anahit jānī.
Jauṅ tehi bighn buddhi nahiṅ bādhī,
tau bahori sur karahiṅ upādhī. (5)
765 of 872
इंद्री द्वार झरोखा नाना।
तहँ तहँ सुर बैठे करि थाना॥
आवत देखहिं बिषय बयारी।
ते हठि देहिं कपाट उघारी ॥६॥
Indrī dvār jharokhā nānā,
tahaṅ tahaṅ sur baiṭhe kari thānā.
Āvat dekhahiṅ biṣay bayārī,
te haṭhi dehiṅ kapāṭ ughārī. (6)
766 of 872
जब सो प्रभंजन उर गृहँ जाई।
तबहिं दीप बिग्यान बुझाई॥
ग्रंथि न छूटि मिटा सो प्रकासा।
बुद्धि बिकल भइ बिषय बतासा ॥७॥
Jab so prabhaṃjan ur gṛhaṅ jāī,
tabahiṅ dīp bigyān bujhāī.
Granthi na chhūṭi miṭā so prakāsā,
buddhi bikal bhai biṣay batāsā. (7)
767 of 872
इंद्रिन्ह सुरन्ह न ग्यान सोहाई।
बिषय भोग पर प्रीति सदाई॥
बिषय समीर बुद्धि कृत भोरी।
तेहि बिधि दीप को बार बहोरी ॥८॥
Indrinh suranh na gyān sohāī,
biṣay bhog par prīti sadāī.
Biṣay samīr buddhi kṛt bhorī,
tehi bidhi dīp ko bār bahorī. (8)
768 of 872
दो०—तब फिरि जीव बिबिधि बिधि पावइ संसृति क्लेस।
हरि माया अति दुस्तर तरि न जाइ बिहगेस ॥११८(क)॥
Do—Tab phiri jīv bibidhi bidhi pāvai sansṛti kles,
Hari māyā ati dustar tari na jāi bihages. (118a)
769 of 872
कहत कठिन समुझत कठिन साधत कठिन बिबेक।
होइ घुनाच्छर न्याय जौं पुनि प्रत्यूह अनेक ॥११८(ख)॥
Kahat kaṭhin samujhat kaṭhin sādhat kaṭhin bibek,
hoi ghunāchchhar nyāy jauṅ puni pratyūh anek. (118b)
770 of 872
ग्यान पंथ कृपान कै धारा।
परत खगेस होइ नहिं बारा॥
जो निर्बिघ्न पंथ निर्बहई।
सो कैवल्य परम पद लहई ॥१॥
Gyān panth kṛpān kai dhārā,
parat khages hoi nahiṅ bārā.
Jo nirbighn panth nirbahaī,
so kaivalya param pad lahaī. (1)
771 of 872
अति दुर्लभ कैवल्य परम पद।
संत पुरान निगम आगम बद॥
राम भजत सोइ मुकुति गोसाईं।
अनइच्छित आवइ बरिआईं ॥२॥
Ati durlabh kaivalya param pad,
sant purān nigam āgam bad.
Rām bhajat soi mukuti gosāīṅ,
anaichchhit āvai bariāīṅ. (2)
772 of 872
जिमि थल बिनु जल रहि न सकाई।
कोटि भाँति कोउ करै उपाई॥
तथा मोच्छ सुख सुनु खगराई।
रहि न सकइ हरि भगति बिहाई ॥३॥
Jimi thal binu jal rahi na sakāī,
koṭi bhāṅti kou karai upāī.
Tathā mochchha sukh sunu khagarāī,
rahi na sakai Hari bhagati bihāī. (3)
773 of 872
अस बिचारि हरि भगत सयाने।
मुक्ति निरादर भगति लुभाने॥
भगति करत बिनु जतन प्रयासा।
संसृति मूल अबिद्या नासा ॥४॥
As bichāri Hari bhagat sayāne,
mukti nirādar bhagati lubhāne.
Bhagati karat binu jatan prayāsā,
sansṛti mūl abidyā nāsā. (4)
774 of 872
भोजन करिअ तृपिति हित लागी।
जिमि सो असन पचवै जठरागी॥
असि हरि भगति सुगम सुखदाई।
को अस मूढ़ न जाहि सोहाई ॥५॥
Bhojan karia tṛpiti hit lāgī,
jimi so asan pachavai jaṭharāgī.
Asi Hari bhagati sugam sukhadāī,
ko as mūḍh na jāhi sohāī. (5)
775 of 872
दो०—सेवक सेब्य भाव बिनु भव न तरिअ उरगारि।
भजहु राम पद पंकज अस सिद्धांत बिचारि ॥११९(क)॥
Do—Sevak sebya bhāv binu bhav na taria uragāri,
bhajahu Rām pad paṅkaj as siddhānt bichāri. (119a)
776 of 872
जो चेतन कहँ जड़ करइ जड़हि करइ चैतन्य।
अस समर्थ रघुनायकहि भजहिं जीव ते धन्य ॥११९(ख)॥
Jo chetan kahaṅ jaḍ karai jaḍhi karai chaitanya,
as samarth Raghunāyakahi bhajahiṅ jīv te dhanya. (119b)
777 of 872
कहेउँ ग्यान सिद्धांत बुझाई।
सुनहु भगति मनि कै प्रभुताई॥
राम भगति चिंतामनि सुंदर।
बसइ गरुड़ जाके उर अंतर ॥१॥
Kaheuṅ gyān siddhānt bujhāī,
sunahu bhagati mani kai prabhutāī.
Rām bhagati chintāmani sundar,
basai Garuḍ jāke ur antar. (1)
778 of 872
परम प्रकास रूप दिन राती।
नहिं कछु चहिअ दिआ घृत बाती॥
मोह दरिद्र निकट नहिं आवा।
लोभ बात नहिं ताहि बुझावा ॥२॥
Param prakās rūp din rātī,
nahiṅ kachhu chahia diā ghṛt bātī.
Moh daridra nikaṭ nahiṅ āvā,
lobh bāt nahiṅ tāhi bujhāvā. (2)
779 of 872
प्रबल अबिद्या तम मिटि जाई।
हारहिं सकल सलभ समुदाई॥
खल कामादि निकट नहिं जाहीं।
बसइ भगति जाके उर माहीं ॥३॥
Prabal abidyā tam miṭi jāī,
hārahiṅ sakal salabh samudāī.
Khal kāmādi nikaṭ nahiṅ jāhīṅ,
basai bhagati jāke ur māhīṅ. (3)
780 of 872
गरल सुधासम अरि हित होई।
तेहि मनि बिनु सुख पाव न कोई॥
ब्यापहिं मानस रोग न भारी।
जिन्ह के बस सब जीव दुखारी ॥४॥
Garal sudhāsam ari hit hoī,
tehi mani binu sukh pāv na koī.
Byāpahiṅ mānas rog na bhārī,
jinha ke bas sab jīv dukhārī. (4)
781 of 872
राम भगति मनि उर बस जाकें।
दुख लवलेस न सपनेहुँ ताकें॥
चतुर सिरोमनि तेइ जग माहीं।
जे मनि लागि सुजतन कराहीं ॥५॥
Rām bhagati mani ur bas jākeṅ,
dukh lavales na sapanehuṅ tākeṅ.
Chatur siromani tei jag māhīṅ,
je mani lāgi sujatan karāhīṅ. (5)
782 of 872
सो मनि जदपि प्रगट जग अहई।
राम कृपा बिनु नहिं कोउ लहई॥
सुगम उपाय पाइबे केरे।
नर हतभाग्य देहिं भटभेरे ॥६॥
So mani jadapi pragaṭ jag ahaī,
Rām kṛpā binu nahiṅ kou lahaī.
Sugam upāy pāibe kere,
nar hatabhāgya dehiṅ bhaṭabhere. (6)
783 of 872
पावन पर्बत बेद पुराना।
राम कथा रुचिराकर नाना॥
मर्मी सज्जन सुमति कुदारी।
ग्यान बिराग नयन उरगारी ॥७॥
Pāvan parbat bed purānā,
Rām kathā ruchirākar nānā.
Marmī sajjan sumati kudārī,
gyān birāg nayan uragārī. (7)
784 of 872
भाव सहित खोजइ जो प्रानी।
पाव भगति मनि सब सुख खानी॥
मोरें मन प्रभु अस बिस्वासा।
राम ते अधिक राम कर दासा ॥८॥
Bhāv sahit khojai jo prānī,
pāv bhagati mani sab sukh khānī.
Moreṅ man prabhu as bisvāsā,
Rām te adhik Rām kar dāsā. (8)
785 of 872
राम सिंधु घन सज्जन धीरा।
चंदन तरु हरि संत समीरा॥
सब कर फल हरि भगति सुहाई।
सो बिनु संत न काहूँ पाई ॥९॥
Rām sindhu ghan sajjan dhīrā,
chandan taru Hari sant samīrā.
Sab kar phal hari bhagati suhāī,
so binu sant na kāhūṅ pāī. (9)
786 of 872
अस बिचारि जोइ कर सतसंगा।
राम भगति तेहि सुलभ बिहंगा ॥१०॥
As bichāri joi kar satasaṅgā,
Rām bhagati tehi sulabh bihaṅgā. (10)
787 of 872
दो०—ब्रह्म पयोनिधि मंदर ग्यान संत सुर आहिं।
कथा सुधा मथि काढ़हिं भगति मधुरता जाहिं ॥१२०(क)॥
Do—Brahma payonidhi mandar gyān sant sur āhiṅ,
kathā sudhā mathi kāḍhahiṅ bhagati madhuratā jāhiṅ. (120a)
788 of 872
बिरति चर्म असि ग्यान मद लोभ मोह रिपु मारि।
जय पाइअ सो हरि भगति देखु खगेस बिचारि ॥१२०(ख)॥
Birati charm asi gyān mad lobh moh ripu māri,
jay pāia so hari bhagati dekhu khages bichāri. (120b)
789 of 872
पुनि सप्रेम बोलेउ खगराऊ।
जौं कृपाल मोहि ऊपर भाऊ॥
नाथ मोहि निज सेवक जानी।
सप्त प्रस्न मम कहहु बखानी ॥१॥
Puni saprem boleu khagarāū,
jauṅ kṛpāl mohi ūpar bhāū.
Nāth mohi nij sevak jānī,
sapta prasna mam kahahu bakhānī. (1)
790 of 872
प्रथमहिं कहहु नाथ मतिधीरा।
सब ते दुर्लभ कवन सरीरा॥
बड़ दुख कवन कवन सुख भारी।
सोउ संछेपहिं कहहु बिचारी ॥२॥
Prathamahiṅ kahahu nāth matidhīrā,
sab te durlabh kavan sarīrā.
Baḍ dukh kavan kavan sukh bhārī,
sou sanchhepahiṅ kahahu bichārī. (2)
791 of 872
संत असंत मरम तुम्ह जानहु।
तिन्ह कर सहज सुभाव बखानहु॥
कवन पुन्य श्रुति बिदित बिसाला।
कहहु कवन अघ परम कराला ॥३॥
Sant asant maram tumh jānahu,
tinh kar sahaj subhāv bakhānahu.
Kavan punya shruti bidit bisālā,
kahahu kavan agh param karālā. (3)
792 of 872
मानस रोग कहहु समुझाई।
तुम्ह सर्बग्य कृपा अधिकाई॥
तात सुनहु सादर अति प्रीती।
मैं संछेप कहउँ यह नीती ॥४॥
Mānas rog kahahu samujhāī,
tumh sarbagya kṛpā adhikāī.
Tāt sunahu sādar ati prītī,
maiṅ sanchhep kahauṅ yah nītī. (4)
793 of 872
नर तन सम नहिं कवनिउ देही।
जीव चराचर जाचत तेही॥
नरक स्वर्ग अपबर्ग निसेनी।
ग्यान बिराग भगति सुभ देनी ॥५॥
Nar tan sam nahiṅ kavaniu dehī,
jīv charāchar jāchat tehī.
Narak swarg apabarg nisenī,
gyān birāg bhagati subh denī. (5)
794 of 872
सो तनु धरि हरि भजहिं न जे नर।
होहिं बिषय रत मंद मंद तर॥
काँच किरिच बदलें ते लेहीं।
कर ते डारि परस मनि देहीं ॥६॥
So tanu dhari hari bhajahiṅ na je nar,
hohiṅ biṣay rat mand mand tar.
Kāṅch kirich badaleṅ te lehīṅ,
kar te ḍāri paras mani dehīṅ. (6)
795 of 872
नहिं दरिद्र सम दुख जग माहीं।
संत मिलन सम सुख जग नाहीं॥
पर उपकार बचन मन काया।
संत सहज सुभाउ खगराया ॥७॥
Nahiṅ daridra sam dukh jag māhīṅ,
sant milan sam sukh jag nāhīṅ.
Par upakār bachan man kāyā,
sant sahaj subhāu khagarāyā. (7)
796 of 872
संत सहहिं दुख पर हित लागी।
पर दुख हेतु असंत अभागी॥
भूर्ज तरु सम संत कृपाला।
पर हित निति सह बिपति बिसाला ॥८॥
Sant sahahiṅ dukh par hit lāgī,
par dukh hetu asant abhāgī.
Bhūrj taru sam sant kṛpālā,
par hit niti sah bipati bisālā. (8)
797 of 872
सन इव खल पर बंधन करई।
खाल कढ़ाइ बिपति सहि मरई॥
खल बिनु स्वारथ पर अपकारी।
अहि मूषक इव सुनु उरगारी ॥९॥
San iv khal par bandhan karaī,
khāl kaḍhāi bipati sahi maraī.
Khal binu swārath par apakārī,
ahi mūṣak iv sunu uragārī. (9)
798 of 872
पर संपदा बिनासि नसाहीं।
जिमि ससि हति हिम उपल बिलाहीं॥
दुष्ट उदय जग आरति हेतू।
जथा प्रसिद्ध अधम ग्रह केतू ॥१०॥
Par sampadā binās nasāhīṅ,
jimi sasi hati him upal bilāhīṅ.
Duṣṭa uday jag ārati hetū,
jathā prasiddh adham grah ketū. (10)
799 of 872
संत उदय संतत सुखकारी।
बिस्व सुखद जिमि इंदु तमारी॥
परम धर्म श्रुति बिदित अहिंसा।
पर निंदा सम अघ न गरीसा ॥११॥
Sant uday santat sukhakārī,
bisva sukhad jimi indu tamārī.
Param dharma shruti bidit ahiṅsā,
par nindā sam agh na garīsā. (11)
800 of 872
हर गुर निंदक दादुर होई।
जन्म सहस्त्र पाव तन सोई॥
द्विज निंदक बहु नरक भोग करि।
जग जनमइ बायस सरीर धरि ॥१२॥
Har gur nindak dādur hoī,
janma sahastra pāv tan soī.
Dvij nindak bahu narak bhog kari,
jag janamai bāyas sarīr dhari. (12)
801 of 872
सुर श्रुति निंदक जे अभिमानी।
रौरव नरक परहिं ते प्रानी॥
होहिं उलूक संत निंदा रत।
मोह निसा प्रिय ग्यान भानु गत ॥१३॥
Sur shruti nindak je abhimānī,
raurav narak parahiṅ te prānī.
Hohiṅ ulūk sant nindā rat,
moh nisā priya gyān bhānu gat. (13)
802 of 872
सब कै निंदा जे जड़ करहीं।
ते चमगादुर होइ अवतरहीं॥
सुनहु तात अब मानस रोगा।
जिन्ह ते दुख पावहिं सब लोगा ॥१४॥
Sab kai nindā je jaḍ karahīṅ,
te chamagādur hoi avatarahīṅ.
Sunahu tāt ab mānas rogā,
jinha te dukh pāvahiṅ sab logā. (14)
803 of 872
मोह सकल ब्याधिन्ह कर मूला।
तिन्ह ते पुनि उपजहिं बहु सूला॥
काम बात कफ लोभ अपारा।
क्रोध पित्त नित छाती जारा ॥१५॥
Moh sakal byādhinh kar mūlā,
tinh te puni upajahiṅ bahu sūlā.
Kām bāt kaph lobh apārā,
krodh pitt nit chhātī jārā. (15)
804 of 872
प्रीति करहिं जौं तीनिउ भाई।
उपजइ सन्यपात दुखदाई॥
बिषय मनोरथ दुर्गम नाना।
ते सब सूल नाम को जाना ॥१६॥
Prīti karahiṅ jauṅ tīniu bhāī,
upajai sanyapāt dukhadāī.
Biṣay manorath durgam nānā,
te sab sūl nām ko jānā. (16)
805 of 872
ममता दादु कंडु इरषाई।
हरष बिषाद गरह बहुताई॥
पर सुख देखि जरनि सोइ छई।
कुष्ट दुष्टता मन कुटिलई ॥१७॥
Mamatā dādu kaṇḍu irṣāī,
harṣa biṣād garah bahutāī.
Par sukh dekhi jarani soi chhaī,
kuṣṭa duṣṭatā man kuṭilaī. (17)
806 of 872
अहंकार अति दुखद डमरुआ।
दंभ कपट मद मान नेहरुआ॥
तृस्ना उदरबृद्धि अति भारी।
त्रिबिधि ईषना तरुन तिजारी ॥१८॥
Ahaṅkār ati dukhad ḍamaruā,
dambh kapaṭ mad mān neharuā.
Tṛsnā udarabṛddhi ati bhārī,
tribidhi īṣanā tarun tijārī. (18)
807 of 872
जुग बिधि ज्वर मत्सर अबिबेका।
कहँ लगि कहौं कुरोग अनेका ॥१९॥
Jug bidhi jvar matsar abibekā,
kahaṅ lagi kahauṅ kurog anekā. (19)
808 of 872
दो०—एक ब्याधि बस नर मरहिं ए असाधि बहु ब्याधि।
पीड़हिं संतत जीव कहुँ सो किमि लहै समाधि ॥१२१(क)॥
Do—Ek byādhi bas nar marahiṅ e asādhi bahu byādhi,
pīḍahiṅ santat jīv kahuṅ so kimi lahai samādhi. (121a)
809 of 872
नेम धर्म आचार तप ग्यान जग्य जप दान।
भेषज पुनि कोटिन्ह नहिं रोग जाहिं हरिजान ॥१२१(ख)॥
Nem dharm āchār tap gyān jagya jap dān,
bheṣaj puni koṭinh nahiṅ rog jāhiṅ Harijān. (121b)
810 of 872
एहि बिधि सकल जीव जग रोगी।
सोक हरष भय प्रीति बियोगी॥
मानस रोग कछुक मैं गाए।
हहिं सब कें लखि बिरलेन्ह पाए ॥१॥
Ehi bidhi sakal jīv jag rogī,
sok harṣa bhay prīti biyogī.
Mānas rog kachhuk maiṅ gāe,
hahiṅ sab keṅ lakhi birlenh pāe. (1)
811 of 872
जाने ते छीजहिं कछु पापी।
नास न पावहिं जन परितापी॥
बिषय कुपथ्य पाइ अंकुरे।
मुनिहु हृदयँ का नर बापुरे ॥२॥
Jāne te chhījahiṅ kachhu pāpī,
nās na pāvahiṅ jan paritāpī.
Biṣay kupathya pāi aṅkure,
munihu hṛdayaṅ kā nar bāpure. (2)
812 of 872
राम कृपाँ नासहिं सब रोगा।
जौं एहि भाँति बनै संजोगा॥
सदगुर बैद बचन बिस्वासा।
संजम यह न बिषय कै आसा ॥३॥
Rām kṛpāṅ nāsahiṅ sab rogā,
jauṅ ehi bhāṅti banai sanjogā.
Sadgur baid bachan bisvāsā,
sanjam yah na biṣay kai āsā. (3)
813 of 872
रघुपति भगति सजीवन मूरी।
अनूपान श्रद्धा मति पूरी॥
एहि बिधि भलेहिं सो रोग नसाहीं।
नाहिं त जतन कोटि नहिं जाहीं ॥४॥
Raghupati bhagati sajīvan mūrī,
anūpān shraddhā mati pūrī.
Ehi bidhi bhalehiṅ so rog nasāhīṅ,
nāhiṅ ta jatan koṭi nahiṅ jāhīṅ. (4)
814 of 872
जानिअ तब मन बिरुज गोसाईं।
जब उर बल बिराग अधिकाई॥
सुमति छुधा बाढ़इ नित नई।
बिषय आस दुर्बलता गई ॥५॥
Jānia tab man biruj gosāīṅ,
jab ur bal birāg adhikāī.
Sumati chhudhā bāḍhai nit naī,
biṣay ās durbalatā gaī. (5)
815 of 872
बिमल ग्यान जल जब सो नहाई।
तब रह राम भगति उर छाई॥
सिव अज सुक सनकादिक नारद।
जे मुनि ब्रह्म बिचार बिसारद ॥६॥
Bimal gyān jal jab so nahāī,
tab rah Rām bhagati ur chhāī.
Siv Aj Suk Sanakādik Nārad,
je muni brahma bichār bisārad. (6)
816 of 872
सब कर मत खगनायक एहा।
करिअ राम पद पंकज नेहा॥
श्रुति पुरान सब ग्रंथ कहाहीं।
रघुपति भगति बिना सुख नाहीं ॥७॥
Sab kar mat khaganāyak ehā,
karia Rām pad paṅkaj nehā.
Shruti purān sab granth kahāhīṅ,
Raghupati bhagati binā sukh nāhīṅ. (7)
817 of 872
कमठ पीठ जामहिं बरु बारा।
बंध्यासुत बरु काहुहि मारा॥
फूलहिं नभ बरु बहुबिधि फूला।
जीव न लह सुख हरि प्रतिकूला ॥८॥
Kamaṭh pīṭh jāmahiṅ baru bārā,
bandhyāsut baru kāhuhi mārā.
Phūlahiṅ nabh baru bahubidhi phūlā,
jīv na lah sukh hari pratikūlā. (8)
818 of 872
तृषा जाइ बरु मृगजल पाना।
बरु जामहिं सस सीस बिषाना॥
अंधकारु बरु रबिहि नसावै।
राम बिमुख न जीव सुख पावै ॥९॥
Tṛṣā jāi baru mṛgajal pānā,
baru jāmahiṅ sas sīs biṣānā.
Andhakāru baru rabihi nasāvai,
Rām bimukh na jīv sukh pāvai. (9)
819 of 872
हिम ते अनल प्रगट बरु होई।
बिमुख राम सुख पाव न कोई ॥१०॥
Him te anal pragaṭ baru hoī,
bimukh Rām sukh pāv na koī. (10)
820 of 872
दो०—बारि मथें घृत होइ बरु सिकता ते बरु तेल।
बिनु हरि भजन न भव तरिअ यह सिद्धांत अपेल ॥१२२(क)॥
Do—Bāri matheṅ ghṛt hoi baru sikatā te baru tel,
binu hari bhajan na bhav taria yah siddhānt apel. (122a)
821 of 872
मसकहि करइ बिरंचि प्रभु अजहि मसक ते हीन।
अस बिचारि तजि संसय रामहि भजहिं प्रबीन ॥१२२(ख)॥
Masakahi karai biranchi prabhu ajahi masak te hīn,
as bichāri taji sansay Rāmahi bhajahiṅ prabīn. (122b)
822 of 872
श्लोक—विनिश्चितं वदामि ते न अन्यथा वचांसि मे।
हरिं नरा भजन्ति येऽतिदुस्तरं तरन्ति ते ॥१२२(ग)॥
Shlok—Vinishchitaṃ vadāmi te na anyathā vachāṃsi me,
hariṃ narā bhajanti ye'tidustaraṃ taranti te. (122c)
823 of 872
कहेउँ नाथ हरि चरित अनूपा।
ब्यास समास स्वमति अनुरूपा॥
श्रुति सिद्धांत इहइ उरगारी।
राम भजिअ सब काज बिसारी ॥१॥
Kaheuṅ nāth hari charit anūpā,
byās samās swamati anurūpā.
Shruti siddhānt ihai uragārī,
Rām bhajia sab kāj bisārī. (1)
824 of 872
प्रभु रघुपति तजि सेइअ काही।
मोहि से सठ पर ममता जाही॥
तुम्ह बिग्यानरूप नहिं मोहा।
नाथ कीन्हि मो पर अति छोहा ॥२॥
Prabhu Raghupati taji seia kāhī,
mohi se saṭh par mamatā jāhī.
Tumh bigyānrūp nahiṅ mohā,
nāth kīnhi mo par ati chhohā. (2)
825 of 872
पूँछिहु राम कथा अति पावनि।
सुक सनकादि संभु मन भावनि॥
सत संगति दुर्लभ संसारा।
निमिष दंड भरि एकउ बारा ॥३॥
Pūṅchhihu Rām kathā ati pāvani,
Suk Sanakādi Sambhu man bhāvani.
Sat saṅgati durlabh sansārā,
nimiṣ daṇḍ bhari ekau bārā. (3)
826 of 872
देखु गरुड़ निज हृदयँ बिचारी।
मैं रघुबीर भजन अधिकारी॥
सकुनाधम सब भाँति अपावन।
प्रभु मोहि कीन्ह बिदित जग पावन ॥४॥
Dekhu Garuḍ nij hṛdayaṅ bichārī,
maiṅ Raghubīr bhajan adhikārī.
Sakunādham sab bhāṅti apāvan,
prabhu mohi kīnh bidit jag pāvan. (4)
827 of 872
दो०—आजु धन्य मैं धन्य अति जद्यपि सब बिधि हीन।
निज जन जानि राम मोहि संत समागम दीन ॥१२३(क)॥
Do—Āju dhanya maiṅ dhanya ati jadyapi sab bidhi hīn,
nij jan jāni Rām mohi sant samāgam dīn. (123a)
828 of 872
नाथ जथामति भाषेउँ राखेउँ नहिं कछु गोइ।
चरित सिंधु रघुनायक थाह कि पावइ कोइ ॥१२३(ख)॥
Nāth jathāmati bhāṣeuṅ rākheuṅ nahiṅ kachhu goi,
charit sindhu Raghunāyak thāh ki pāvai koi. (123b)
829 of 872
सुमिरि राम के गुन गन नाना।
पुनि पुनि हरष भुसुंडि सुजाना॥
महिमा निगम नेति करि गाई।
अतुलित बल प्रताप प्रभुताई ॥१॥
Sumiri Rām ke gun gan nānā,
puni puni harṣa Bhusuṇḍi sujānā.
Mahimā nigam neti kari gāī,
atulit bal pratāp prabhutāī. (1)
830 of 872
सिव अज पूज्य चरन रघुराई।
मो पर कृपा परम मृदुलाई॥
अस सुभाउ कहुँ सुनउँ न देखउँ।
केहि खगेस रघुपति सम लेखउँ ॥२॥
Siv Aj pūjya charan Raghurāī,
mo par kṛpā param mṛdulāī.
As subhāu kahuṅ sunauṅ na dekhauṅ,
kehi khages Raghupati sam lekhauṅ. (2)
831 of 872
साधक सिद्ध बिमुक्त उदासी।
कबि कोबिद कृतग्य संन्यासी॥
जोगी सूर सुतापस ग्यानी।
धर्म निरत पंडित बिग्यानी ॥३॥
Sādhak siddh bimukt udāsī,
kabi kobid kṛtagya sannyāsī.
Jogī sūr sutāpas gyānī,
dharm nirat paṇḍit bigyānī. (3)
832 of 872
तरहिं न बिनु सेए मम स्वामी।
राम नमामि नमामि नमामी॥
सरन गएँ मो से अघ रासी।
होहिं सुद्ध नमामि अबिनासी ॥४॥
Tarahiṅ na binu see mam swāmī,
Rām namāmi namāmi namāmī.
Saran gaeṅ mo se agh rāsī,
hohiṅ suddh namāmi abināsī. (4)
833 of 872
दो०—जासु नाम भव भेषज हरन घोर त्रय सूल।
सो कृपाल मोहि तो पर सदा रहउ अनुकूल ॥१२४(क)॥
Do—Jāsu nām bhav bheṣaj haran ghor tray sūl,
so kṛpāl mohi to par sadā rahau anukūl. (124a)
834 of 872
सुनि भुसुंडि के बचन सुभ देखि राम पद नेह।
बोलेउ प्रेम सहित गिरा गरुड़ बिगत संदेह ॥१२४(ख)॥
Suni Bhusuṇḍi ke bachan subh dekhi Rām pad neh,
boleu prem sahit girā Garuḍ bigat sandeh. (124b)
835 of 872
मैं कृतकृत्य भयउँ तव बानी।
सुनि रघुबीर भगति रस सानी॥
राम चरन नूतन रति भई।
माया जनित बिपति सब गई ॥१॥
Maiṅ kṛtakṛtya bhayauṅ tav bānī,
suni Raghubīr bhagati ras sānī.
Rām charan nūtan rati bhaī,
māyā janit bipati sab gaī. (1)
836 of 872
मोह जलधि बोहित तुम्ह भए।
मो कहँ नाथ बिबिध सुख दए॥
मो पहिं होइ न प्रति उपकारा।
बंदउँ तव पद बारहिं बारा ॥२॥
Moh jaladhi bohit tumh bhae,
mo kahaṅ nāth bibidh sukh dae.
Mo pahiṅ hoi na prati upakārā,
bandauṅ tav pad bārahiṅ bārā. (2)
837 of 872
पूरन काम राम अनुरागी।
तुम्ह सम तात न कोउ बड़भागी॥
संत बिटप सरिता गिरि धरनी।
पर हित हेतु सबन्ह कै करनी ॥३॥
Pūran kām Rām anurāgī,
tumh sam tāt na kou baḍabhāgī.
Sant biṭap saritā giri dharanī,
par hit hetu sabanh kai karanī. (3)
838 of 872
संत हृदय नवनीत समाना।
कहा कबिन्ह परि कहै न जाना॥
निज परिताप द्रवइ नवनीता।
पर दुख द्रवहिं संत सुपुनीता ॥४॥
Sant hṛday navanīt samānā,
kahā kabinh pari kahai na jānā.
Nij paritāp dravai navanītā,
par dukh dravahiṅ sant supunītā. (4)
839 of 872
जीवन जन्म सुफल मम भयऊ।
तव प्रसाद संसय सब गयऊ॥
जानेहु सदा मोहि निज किंकर।
पुनि पुनि उमा कहइ बिहंगबर ॥५॥
Jīvan janma suphal mam bhayaū,
tav prasād sansay sab gayaū.
Jānehu sadā mohi nij kiṅkar,
puni puni Umā kahai bihaṅgabar. (5)
840 of 872
दो०—तासु चरन सिरु नाइ करि प्रेम सहित मतिधीर।
गयउ गरुड़ बैकुंठ तब हृदयँ राखि रघुबीर ॥१२५(क)॥
Do—Tāsu charan siru nāi kari prem sahit matidhīr,
gayau Garuḍ Baikuṇṭh tab hṛdayaṅ rākhi Raghubīr. (125a)
841 of 872
गिरिजा संत समागम सम न लाभ कछु आन।
बिनु हरि कृपा न होइ सो गावहिं बेद पुरान ॥१२५(ख)॥
Girijā sant samāgam sam na lābh kachhu ān,
binu hari kṛpā na hoi so gāvahiṅ bed purān. (125b)
842 of 872
कहेउँ परम पुनीत इतिहासा।
सुनत श्रवन छूटहिं भव पासा॥
प्रनत कल्पतरु करुना पुंजा।
उपजइ प्रीति राम पद कंजा ॥१॥
Kaheuṅ param punīt itihāsā,
sunat shravan chhūṭahiṅ bhav pāsā.
Pranat kalpataru karunā puṅjā,
upajai prīti Rām pad kanjā. (1)
843 of 872
मन क्रम बचन जनित अघ जाई।
सुनहिं जे कथा श्रवन मन लाई॥
तीर्थाटन साधन समुदाई।
जोग बिराग ग्यान निपुनाई ॥२॥
Man kram bachan janit agh jāī,
sunahiṅ je kathā shravan man lāī.
Tīrthāṭan sādhan samudāī,
jog birāg gyān nipunāī. (2)
844 of 872
नाना कर्म धर्म ब्रत दाना।
संजम दम जप तप मख नाना॥
भूत दया द्विज गुर सेवकाई।
बिद्या बिनय बिबेक बड़ाई ॥३॥
Nānā karma dharma brat dānā,
sanjam dam jap tap makh nānā.
Bhūt dayā dvij gur sevakāī,
bidyā binay bibek baḍāī. (3)
845 of 872
जहँ लगि साधन बेद बखानी।
सब कर फल हरि भगति भवानी॥
सो रघुनाथ भगति श्रुति गाई।
राम कृपाँ काहूँ एक पाई ॥४॥
Jahaṅ lagi sādhan bed bakhānī,
sab kar phal hari bhagati Bhavānī.
So Raghunāth bhagati shruti gāī,
Rām kṛpāṅ kāhūṅ ek pāī. (4)
846 of 872
दो०—मुनि दुर्लभ हरि भगति नर पावहिं बिनहिं प्रयास।
जे यह कथा निरंतर सुनहिं मानि बिस्वास ॥१२६॥
Do—Muni durlabh hari bhagati nar pāvahiṅ binahiṅ prayās,
je yah kathā nirantar sunahiṅ māni bisvās. (126)
847 of 872
सोइ सर्बग्य गुनी सोइ ग्याता।
सोइ महि मंडित पंडित दाता॥
धर्म परायन सोइ कुल त्राता।
राम चरन जा कर मन राता ॥१॥
Soi sarbagya gunī soi gyātā,
soi mahi maṇḍit paṇḍit dātā.
Dharm parāyan soi kul trātā,
Rām charan jā kar man rātā. (1)
848 of 872
नीति निपुन सोइ परम सयाना।
श्रुति सिद्धांत नीक तेहिं जाना॥
सोइ कबि कोबिद सोइ रनधीरा।
जो छल छाड़ि भजइ रघुबीरा ॥२॥
Nīti nipun soi param sayānā,
shruti siddhānt nīk tehiṅ jānā.
Soi kabi kobid soi ranadhīrā,
jo chhal chhāḍi bhajai Raghubīrā. (2)
849 of 872
धन्य देस सो जहँ सुरसरी।
धन्य नारि पतिब्रत अनुसरी॥
धन्य सो भूपु नीति जो करई।
धन्य सो द्विज निज धर्म न टरई ॥३॥
Dhanya des so jahaṅ Surasarī,
dhanya nāri patibrat anusarī.
Dhanya so bhūpu nīti jo karaī,
dhanya so dvij nij dharm na ṭaraī. (3)
850 of 872
सो धन धन्य प्रथम गति जाकी।
धन्य पुन्य रत मति सोइ पाकी॥
धन्य घरी सोइ जब सतसंगा।
धन्य जन्म द्विज भगति अभंगा ॥४॥
So dhan dhanya pratham gati jākī,
dhanya punya rat mati soi pākī.
Dhanya gharī soi jab satasaṅgā,
dhanya janma dvij bhagati abhaṅgā. (4)
851 of 872
दो०—सो कुल धन्य उमा सुनु जगत पूज्य सुपुनीत।
श्रीरघुबीर परायन जेहिं नर उपज बिनीत ॥१२७॥
Do—So kul dhanya Umā sunu jagat pūjya supunīt,
Shrī Raghubīr parāyan jehiṅ nar upaj binīt. (127)
852 of 872
मति अनुरूप कथा मैं भाषी।
जद्यपि प्रथम गुप्त करि राखी॥
तव मन प्रीति देखि अधिकाई।
तब मैं रघुपति कथा सुनाई ॥१॥
Mati anurūp kathā maiṅ bhāṣī,
jadyapi pratham gupt kari rākhī.
Tav man prīti dekhi adhikāī,
tab maiṅ Raghupati kathā sunāī. (1)
853 of 872
यह न कहिअ सठही हठसीलहि।
जो मन लाइ न सुन हरि लीलहि॥
कहिअ न लोभिहि क्रोधिहि कामिहि।
जो न भजइ सचराचर स्वामिहि ॥२॥
Yah na kahia saṭhahī haṭhasīlahi,
jo man lāi na sun hari līlahi.
Kahia na lobhihi krodhihi kāmihi,
jo na bhajai sacharāchar swāmihi. (2)
854 of 872
द्विज द्रोहिहि न सुनाइअ कबहूँ।
सुरपति सरिस होइ नृप जबहूँ॥
राम कथा के तेइ अधिकारी।
जिन्ह कें सत संगति अति प्यारी ॥३॥
Dvij drohihi na sunāia kabahūṅ,
surapati saris hoi nṛp jabahūṅ.
Rām kathā ke tei adhikārī,
jinha keṅ sat saṅgati ati pyārī. (3)
855 of 872
गुर पद प्रीति नीति रत जेई।
द्विज सेवक अधिकारी तेई॥
ता कहँ यह बिसेष सुखदाई।
जाहि प्रानप्रिय श्रीरघुराई ॥४॥
Gur pad prīti nīti rat jeī,
dvij sevak adhikārī teī.
Tā kahaṅ yah biseṣ sukhadāī,
jāhi prānpriya Shrī Raghurāī. (4)
856 of 872
दो०—राम चरन रति जो चह अथवा पद निर्बान।
भाव सहित सो यह कथा करउ श्रवन पुट पान ॥१२८॥
Do—Rām charan rati jo chah athavā pad nirbān,
bhāv sahit so yah kathā karau shravan puṭ pān. (128)
857 of 872
राम कथा गिरिजा मैं बरनी।
कलि मल समनि मनोमल हरनी॥
संसृति रोग सजीवन मूरी।
राम कथा गावहिं श्रुति सूरी ॥१॥
Rām kathā Girijā maiṅ baranī,
kali mal samani manomal haranī.
Sansṛti rog sajīvan mūrī,
Rām kathā gāvahiṅ shruti sūrī. (1)
858 of 872
एहि महँ रुचिर सप्त सोपाना।
रघुपति भगति केर पंथाना॥
अति हरि कृपा जाहि पर होई।
पाउँ देइ एहिं मारग सोई ॥२॥
Ehi mahaṅ ruchir sapta sopānā,
Raghupati bhagati ker panthānā.
Ati hari kṛpā jāhi par hoī,
pāuṅ dei ehiṅ mārag soī. (2)
859 of 872
मन कामना सिद्धि नर पावा।
जे यह कथा कपट तजि गावा॥
कहहिं सुनहिं अनुमोदन करहीं।
ते गोपद इव भवनिधि तरहीं ॥३॥
Man kāmanā siddhi nar pāvā,
je yah kathā kapaṭ taji gāvā.
Kahahiṅ sunahiṅ anumodan karahīṅ,
te gopad iv bhavanidhi tarahīṅ. (3)
860 of 872
सुनि सब कथा हृदय अति भाई।
गिरिजा बोली गिरा सुहाई॥
नाथ कृपाँ मम गत संदेहा।
राम चरन उपजेउ नव नेहा ॥४॥
Suni sab kathā hṛday ati bhāī,
Girijā bolī girā suhāī.
Nāth kṛpāṅ mam gat sandehā,
Rām charan upajeu nav nehā. (4)
861 of 872
दो०—मैं कृतकृत्य भइउँ अब तव प्रसाद बिस्वेस।
उपजी राम भगति दृढ़ बीते सकल कलेस ॥१२९॥
Do—Maiṅ kṛtakṛtya bhaiuṅ ab tav prasād bisves,
upajī Rām bhagati dṛḍh bīte sakal kales. (129)
862 of 872
यह सुभ संभु उमा संबादा।
सुख संपादन समन बिषादा॥
भव भंजन गंजन संदेहा।
जन रंजन सज्जन प्रिय एहा ॥१॥
Yah subh Sambhu Umā sambādā,
sukh sampādan saman biṣādā.
Bhav bhanjan ganjan sandehā,
jan ranjan sajjan priya ehā. (1)
863 of 872
राम उपासक जे जग माहीं।
एहि सम प्रिय तिन्ह कें कछु नाहीं॥
रघुपति कृपाँ जथामति गावा।
मैं यह पावन चरित सुहावा ॥२॥
Rām upāsak je jag māhīṅ,
ehi sam priya tinha keṅ kachhu nāhīṅ.
Raghupati kṛpāṅ jathāmati gāvā,
maiṅ yah pāvan charit suhāvā. (2)
864 of 872
एहिं कलिकाल न साधन दूजा।
जोग जग्य जप तप ब्रत पूजा॥
रामहि सुमिरिअ गाइअ रामहि।
संतत सुनिअ राम गुन ग्रामहि ॥३॥
Ehiṅ kalikāl na sādhan dūjā,
jog jagya jap tap brat pūjā.
Rāmahi sumiria gāia Rāmahi,
santat sunia Rām gun grāmahi. (3)
865 of 872
जासु पतित पावन बड़ बाना।
गावहिं कबि श्रुति संत पुराना॥
ताहि भजहि मन तजि कुटिलाई।
राम भजें गति केहिं नहिं पाई ॥४॥
Jāsu patit pāvan baḍ bānā,
gāvahiṅ kabi shruti sant purānā.
Tāhi bhajahi man taji kuṭilāī,
Rām bhajeṅ gati kehiṅ nahiṅ pāī. (4)
866 of 872
छं०—पाई न केहिं गति पतित पावन राम भजि सुनु सठ मना।
गनिका अजामिल ब्याध गीध गजादि खल तारे घना॥
आभीर जमन किरात खस स्वपचादि अति अघरूप जे।
कहि नाम बारक तेपि पावन होहिं राम नमामि ते॥
Chhand—Pāī na kehiṅ gati patit pāvan Rām bhaji sunu saṭh manā,
ganikā Ajāmil byādh gīdh gajādi khal tāre ghanā.
Ābhīr jaman kirāt khas swapachādi ati agharūp je,
kahi nām bārak tepi pāvan hohiṅ Rām namāmi te.
867 of 872
रघुबंस भूषन चरित यह नर कहहिं सुनहिं जे गावहीं।
कलि मल मनोमल धोइ बिनु श्रम राम धाम सिधावहीं॥
सत पंच चौपाई मनोहर जानि जो नर उर धरै।
दारुन अबिद्या पंच जनित बिकार श्री रघुबर हरै॥
Raghubans bhūṣan charit yah nar kahahiṅ sunahiṅ je gāvahīṅ,
kali mal manomal dhoi binu shram Rām dhām sidhāvahīṅ.
Sat panch chaupāī manohar jāni jo nar ur dharai,
dārun abidyā panch janit bikār Shrī Raghubar harai.
868 of 872
सुंदर सुजान कृपा निधान अनाथ पर कर प्रीति जो।
सो एक राम अकाम हित निर्बानप्रद सम आन को॥
जाकी कृपा लवलेस ते मतिमंद तुलसीदासहूँ।
पायो परम बिश्रामु राम समान प्रभु नाहीं कहूँ॥
Sundar sujān kṛpā nidhān anāth par kar prīti jo,
so ek Rām akām hit nirbānprad sam ān ko.
Jākī kṛpā lavales te matimand Tulasīdāsahūṅ,
pāyo param bishrāmu Rām samān prabhu nāhīṅ kahūṅ.
869 of 872
दो०—मो सम दीन न दीन हित तुम्ह समान रघुबीर।
अस बिचारि रघुबंस मनि हरहु बिषम भव भीर ॥१३०(क)॥
Do—Mo sam dīn na dīn hit tumh samān Raghubīr,
as bichāri Raghubans mani harahu biṣam bhav bhīr. (130a)
870 of 872
कामिहि नारि पिआरि जिमि लोभिहि प्रिय जिमि दाम।
तिमि रघुनाथ निरंतर प्रिय लागहु मोहि राम ॥१३०(ख)॥
Kāmihi nāri piāri jimi lobhihi priya jimi dām,
timi Raghunāth nirantar priya lāgahu mohi Rām. (130b)
871 of 872
श्लोक—यत्पूर्वं प्रभुणा कृतं सुकविना श्रीशम्भुना दुर्गमं
श्रीमद्रामपदाब्जभक्तिमनिशं प्राप्त्यै तु रामायणम्।
मत्वा तद्रघुनाथनामनिरतं स्वान्तस्तमःशान्तये
भाषाबद्धमिदं चकार तुलसीदासस्तथा मानसम् ॥१॥
Shlok—Yatpūrvaṃ prabhuṇā kṛtaṃ sukavinā Shrī Śambhunā durgamaṃ
Shrīmadrāmapadābjabhaktimaniśaṃ prāptyai tu Rāmāyaṇam,
matvā tadraghunāthanāmanirataṃ svāntastamaḥśāntaye
bhāṣābaddhamidaṃ chakāra Tulasīdāsastathā mānasam. (1)
872 of 872
पुण्यं पापहरं सदा शिवकरं विज्ञानभक्तिप्रदं
मायामोहमलापहं सुविमलं प्रेमाम्बुपूरं शुभम्।
श्रीमद्रामचरित्रमानसमिदं भक्त्यावगाहन्ति ये
ते संसारपतङ्गघोरकिरणैर्दह्यन्ति नो मानवाः ॥२॥
Puṇyaṃ pāpaharaṃ sadā śivakaraṃ vijñānabhaktipradaṃ
māyāmohamalāpahaṃ suvimalaṃ premāmbupūraṃ śubham,
Shrīmadrāmacharitramānasamidaṃ bhaktyāvagāhanti ye
te sansārapataṅgaghorakiraṇairdahyanti no mānavāḥ. (2)
https://www.bhajanusa.com
Viewed … times